Thursday, July 20, 2006

حجات بتسعدني

يا سلام استعت نشاطي بالرغم من البرد اللي عندي-حد بيجيله برد في الصيف حاجة صعبة- رحت النهاردة لا امبارح- علشان احنا دلوقتي الفجر- الصبح بدري الساعة 10 علشان اجيب الملف جبته وطلعت الطوابع استيكر و48 رغبة لسه مكتبتش حاجة بفكر ف ترتيب الرغبات اللي بعد لااولانية بس برضة بيلعبوا ف دماغي يقولولي خشي حاسبات قلت اعمل استخارة واللي في الخير يقدمه ربنا بس انا عايزة هندسة من زمان يلا مش مشكلتنا دلوقتي المهم نخش ف الموضوع جدو طلب مننا كل واحد يكتب عن الحاجة اللي بتسعده فانا بعد النتيجة يعني دلوقتي هكتب الحجات اللي بتسعدني ممكن تكون حجات بسيطة وهكتب حجات كتيرة ماشي بس الحجات مش بالترتيب
.
1-لما اكون بحل مسائل مكلكعة رياضة وفيزياء
.
2-لما بابا يكون معانا ونخرج معاه
.
3-لما بلعب بلاي ستيشن بس اكسب
.
4-لما اشوف حد بحبه صدفة او اشوف حد بقالي كتير ماشفتهوش
.
5-لما حد بيعبرني بمسج يا قمة السعادة
:)
6-لما يبقى في ماتش جامد والفرقة اللي بشجعها تكسب
.
7-لما نكون عاملين محشي
.
8-لما اروح فيلم مش فاشل
.
9-لما حد يشكر فيا من غير مااعرفه كويس
.
10-لما كنت بجيب الدرجة النهائية في اي امتحان
.
11-لما بنبقى في العيد الكبير واقطع معاهم اللحمة
.
12-يا سلام لو اتنين سندوتش فول من ع عربية معينة مش محل لازم العريبية دي دماغ
بقى برستيجي مايسمحش غير من ع العربية دي ويكون الساعة سته الصبح قبل ما نام بيكون طعمة فراخ مشوية محدش يتريق حقيقة والله
.
13-يا سلام لو الواحد يختم المصحف بجد بفرح جدا بالموضوع ده و حاجة تانية بتبقى جميلة التراويح في رمضان وبالذات لما رجلي توجعني من الوقفة بستمتع جدا بالموضوع ده
.
14- لما نروح عمرة اول وهلة لما تشوف الحرم تحفة تحس انك طاير فوق زي الحمام
حولين الكعبة الكلام ده سواء في مكة او المدينة
.
15-لما اكتب قصة من القصص الفاشلة اللي بكتبها ووريها لاخواتي ويعجبوا بيها لازم
طبعا ما انا اختهم الكبيرة
.
16-لما بلعب مع سوكا اقصد بسملة اخت بوبا الصغيرة وبرضه لما بلعب مع بوبا بس
سوكا اكتر
.
17-لما افهم حد حاجة مش فاهمها
.
18-لما حد يبعتني اعمل حاجة واعملها كويس
.
19-لما ماما او بابا بيدعولي
.
20-لما اكون منهمكة في المذاكرة وبنجز اللي ورايا واللي قدامي :)
.
21- لما اجيب كوتشي عجبني ويا ريت يبقى مريح
.
22-لما اروح دريم بارك مع صحابي زي السنة دي
.
23-في الشتا والجو ساقعة اوي اوي واشرب مج كبييير كاكاو دافي لا سخن وجميل والواحد يدفى يا سلام وبرضه في الشتا في يوم ساقعة اوي واناام بدري تحت البطنية اللحاف بس شرط اكون مخلصة كل المذاكرة اللي عليا علشان استمتع ومفكرش في المذاكرة :)
.
كفاية كده لحسن هنجت وشكل الحرارة طلعت تاني اروح اشوفها سلام
اه انا حطه نقط علشان السطور تتعدل مش بتطلع زي ماانا عايزاها
:(

15 comments:

فيها حاجة حلوة said...

الف سلامة انا برده عندي بردحاجة صعبة قوي في الصيق
وعلي فكرة في حاجات كتيير من اللي بتسعدك بتسعدني
وبالنسبة لهندسة اوعي حد يغير لك رايك
وبما اننا قرايب لازم نتكانف في احتلال كل كليات الهندسة.وبعدين خلاص ده انا عملت حسابك في المكتب

مـحـمـد مـفـيـد said...

والله انا بكتبك وانا لسه واخد العلاج بتاع البرد
المهم بلوج رائع بس انتي باين عليكي اكيله اوي فول من علي العربيه ومحشي واستقرتي علي الجامعه والا نسيتي كل حاجه لما جت سيره الاكل
الف سلامه عليكي

Gid-Do - جدو said...

نوران
نقلا من كتابتك كتبتى
فانا بعد النتيجة يعني دلوقتي هكتب الحجات اللي بتسعدني ممكن تكون حجات بسيطة وهكتب حجات كتيرة ماشي بس الحجات مش بالترتيب

وانا بقول السعادة دائما فى الحجات البسيطة اللى فى متناول ايدينا ـ الف سلامة عليكى من البرد وربنا يسعدك دائما

أجدع واحد في الشارع said...

الف سلامة
عشان ابراهيم كاتب عندة انك عملتى عمليه
والله بوست جميل جدا
ونفسى اعمل زيك انتى وابراهيم
الحجات اللى بتسعنى
بس انا بجد مفيش حاجات كتير بتسعدنى
عشان الدنيا مش معايا
والكلام ده انا كاتبه عند ابراهيم برده
بوست جميل جدا
وربنا يسعدك على طول

shababik said...

مساء الفل يا باشمهندزة باعتبار ما سيكون
أنا بردة بحب الكاكاو اوي
وغنتي عاملة اية دلوقتيييي؟

عازفة الكمان said...

ايه عديتي كل اللي دخلوا للبلج بتاعك كلهم عندهم برد علي العموم الف سلامه عليك و بعدين كل الحاجات دي بتسعدك مافيش يوم الجمعه اللي بنكون فيها مع بعض ماشي ماشي عيب ده احنا هنكون زمايل نقابه واحده و لا ايه.....؟

DoOoOoOdY said...

الف سلامه عليكى وبطلى تقلدينى البويت بتاعك فيه حاجات زى بتاعتى بس انا اللى كتبه الاول

MAKSOFA said...

ربنا يسعك علي طول وتحققي كل اللي أنت عايزاة يارب

مامتك مكسوفة

Nouran said...

ابراهيم:
الله يسلمك يا دكتور ده اولا
ثانيا :شكرا ليك ده من ذوقك :)

المهندس المصري:
الله يسلمك والف سلامة عليك انت كمان حاجة مقرفة البرد ف الصيف ده
خلاص انا كتبت هندسة القاهرة وقدمت الرغبات يوم الجمعة
ع رايك احنا هنعمل احتلال لكليات الهندسة وممكن نعمل كليه لوحدنا
وخلاص انا بقيت معمول حسابي ف المكتب اخش وانا مطمنة :)

محمد مفيد :
الف سلامة عليك انت كمان عندك برد
والله انا مش باكل من ع عربيات خااالص غير بتاع الفول ده معرفش ليه بس بشروط ماما حطاها عدم الاكل ع عربيات باعة جائلين واذا لزم الامر بدون اي اضافات يعني باكل فول من غير سلطة بس طعمه حلو اوي خصوصا الساعة سته الصبح ابن خالتي ينزل يجبلنا ونقعد ناكل كلنا قبل ما ننام :)
اما المحشي ده فاظن انه الاكله المفضله لمعظم المصريين
انا منستش ولا حاجة انا كتبت هندسة القاهرة خلاص وقدمت يوم الجمعة

جدو:
زي ما حضرتك قولت السعادة دايما ف الحجات البسيطة

classical_feelings:
شكرا ليك شرفتني هنا
رايك يعني اني استمر :)

ابن الشارع:
عاش من شافك يا بني -بس انا مش الشارع:)-والله يسلمك
بس مش انا اللي عملت العملية دي داليا والحمد لله قامت بالسلامة
ويا ريت تعمل زينا وتكتب عن اللي بيسعدك يمكن تخرج من حالة الاكتئاب اللي انت عايش فيها دي واعمل زي ما جدو قالك مش هتخسر حاجة
انا كمان كنت بحسب ان مفيش حاجة بتسعدني كتير بس لما ابتديت اكتب لقيت ان في حجات كتير جت ف دماغي مهما كانت الحجات قليلة بس بتسعدك اكتبها مش مشلكةة ادام هيا لاللي بتسعدك

shababik:
مساء الفل يا باشا باعتبار ما هو عليه :)
الحمد لله انا خفيت شوية اليومين دول بطلت شرب مايه ساقعة من غير محط عليها مايه من الحنفيه :)

رشا:
شكل ع البلوج عندي فيرس انفلونزا لازم اعمل عليه سكان لحسن هيصيب كل اللي هيجوا عندي ومش هينفع كده :)
والله انا منستش ولا حاجة بس دي حاجة مقدرش استغنى عنها علشان كده مكتبتهاش زي المايه والهوا يعني ينفع اكتب انا سعيده علشان بتنفس هوا وبشرب مايه ساقعة بتجبلي برد :)
فهمتيني
والله يسلمك يا ستي

دودي:
الله يسلمك عارفة لو كنا ف المدرسة كنت اتعديتي احمدي ربنا :)
والله انا اتفاجئت لما لقيت نفسي كاتباه زيك بس انا كتبته من غير ما اشوف اللي انت كاتباه وكمان ليك الشرف اني بقلدك حد يطول :) :) عجبتني اوي الكلمة دي

ماما مكسوفة:
شرفتيني وربنا يسعدنا كلنا و نحقق اللي احنا عايزينه يا رب

حدوته مصرية said...

جميل الحاجات اللى بتسعدك و ربنا يزيدها ومبروك على هندسة القاهرة باذن الله يا زميلة

Aladdin said...

ياااااااااااه الواحد بقاله مدة ماشفش بساطة بالشكل ده!!

daktara said...

جميلة جدا

karakib said...

salamtik alf salama :D

Nouran said...

محمد ياسر:
يا رب يزيد ويبارك والله يبارك فيكي يا بشمهندس

alabbin:
ربنا يكرمك وشكرا جدا ليك

ندا:
الله يبارك فيكي والله يسلمك كلها احداث ورا بعضها من غير لخبطه
وشكرا ع رايك في مدونتي الصغيرة:)

daktara:
شكراااااا

Nouran said...

كراكيب:
الله يسلمك :)