Saturday, December 30, 2006


كل سنة وانتوا طيبين يا جماعة وبالف صحة وسلامة

نتمنى لكم عيدا طيبا واكلا شهيا هههههههه

ملوحظة-خطا مقصود

امتحان الميكانيكس جه صعب شوية اصعب من اللي امتحنوا يوم الاتنين بمراحل وكالعادة كنت ناسية طريقة حل اتفه مسالة وفضلت افتكرفيها 5دقايق والامتحان ساعة تلات مسال بس محترمين يعني بس ف الاخر الحمدلله احتمال انجح فيه الحمد لله ع كل شئ

-:

Thursday, December 28, 2006

فيه مشكله

فيه مشكله جامدة جدا هي ممكن متكنش مشكلة بس انا قلبت لجوجل اكوينت فالعربي اتقلب هيروغليفي بس صلحته بس جوه فيه اسامي الناس بالهيروغليفي والاقي ناس معلقة اتقلبت انيونساي واي حد معلق بالعربي اتقلب هيروغليفي حد فهم حاجة لو حد فهم يقولي ايه البروبلم سوري يا جماعة عندي بكرة امتحان ميكانكس كفاية كده سلاش

Wednesday, December 20, 2006

النشرة كلاكيت تالت مرة



طبعا اكيد افتقدوا النشرة مع ان كان فيه تهنئات كتيرة بس ان اللي نشاطي كان متوقف زي ما انتوا عارفين وللي مش فاكرها افكره نشرة شمعة بتتكون من تلات اجزاء الجزء الاول تهنئات لكل الناس لاي مناسبة الجزء التاني قصة مش كاملة كنت كاتباها ف الثانوية العامة فقصص فظيعة الله يكون ف عونكوا اللي عايز ينط القصة ينطها تالت حاجة نكته بس مش اي نكته لازم تبقى سخيفة جدا اوكش نبدا النشرة واي تهاني ابعتوا ع 6065 من اي بلوج ع نشرة شمعة موجه
100.9 واي اقتراحات ابعتوها ع 6065 برضوا يالا نبدأ
.
التهنئات من القديم للجديد
القديم اوي اوي والله كان فيه
اخ بلوجي خطب من قبل رمضان وانا وعدته اني اكتبها ف النشرة حتى لو بعد رمضان وقبل العيد الكبير عادي خالص مبروك جدا ليه وممكن يكون اتجوز خلاص مبروك يا محمد باشا
.
طبعا عيد ميلاد رشا كان من حوالي اكتر من شهر والمفروض كنت اكتبلها نشرة بس برضه مش مشكلة كل تاخيرة وفيها خيرة
.
وعيد ميلاد رضوى بنت عمي مش صحبتي كان من حوالي اسبوعين او اكتر كل سنة وهي طيبة
وعندنا اتنين عيد ميلاد
.
كل سنة وانت طيب يا
بشمهندس نور والسنة الجاية ان شاء الله تبقى مهندس قد الدنيا وعقبال 125 سنة عيد ميلاده كان
10 -12 يعني مش قديم اوي من عشر ايام بس يا جماعة كان عندي كويز يوم الاحد امتحان معمل يوم التلات ملحقتش انزل النشرة قبل كده
.
كل سنة وانت طيب يا احمد باشا الدكتور احمد المؤلف المستقبلي لنص مطربين مصر ان شاء الله كل سنة وانت طيب والسنة الجاية تبقى ف افضل حال ان شاء الله وتبقى دكتور ومؤلف اتنين ف واحد يعني
:)
طبعا اخر مناسبة وتهنئة جامدة جدا لكل الاهلاوية الجامدين اوي وكل المصريين والعرب والافارقة يالا بالمرة بقى ع البرونزية وانهم شرفونا ورفعوا راسنا ف اي حاجة قدام العالم حتى لو كان ف الكورة اهو نرفع دماغنا شوية وجعت من كتر ما احنا منزلنها
ووتهنئة خاصة جدا لابو الكباتن الكابتن ابو تريكة بجد مبروك ليه محبه الناس ودعواتهم ليه بجد يستاهل انا شفته ف دريم انسان محترم مسلم بجد يا ريت يبقى قدوة ناس كتير وربنا يوفقه
والدكتور احمد كتب
نشيد جامد عن الاهلي بجد
ودودي حطت
صور جامدة اوي
تحدددددددددددديث
اول حاجة عيب عليا بجد طلعت معدة نشرات فاشلة مش ملمة بالاحداث البلوجية وكده يعني
اول حاجة احب اقول لدولي حمدلله ع السلامة والحمد لله ان ربنا رجعك لينا بالسلامة
تاني حاجة اقول لبسبس مبروووووك اينعم قديمة جدا بس انا قولتها عندها ونسي اكتبها هنا
تالت حاجةكل سنة وعمرو طيب بقى كبير تم 26سنة
.
الجزء لتاني من النشرة : القصة الفاشلة :)
وجه معاد النط اللي عايز ينط ينط :)
مع دقات قبها ترى سهاما من نظراتها ولهيبا من انفاسها وصدرها يعلو ويهبط عيناها اتسعت ولمعت اتتها فكرة فكرة شيطانية انها فكرة الانتقام امسكت الورقة والقلم واخذت بالكتابة ثم توقفت لحظة تراجعت وبدات بالبكاء ظلت ساعات طويلة تبكي وتبكي حتى تنبهت الى الظلام وان ضوءالقمر هو الذي يضئ غرفتها نظرت امامها لتجد ضوء القمر ينير صورتها التى تتوسط الحائط اسندت راسها للفراش واخذت تتساءل لماذا اصبحت هكذا هل هي نفس الفتاه التي كانت ابتسامتها تذيب العقول ولمسه يديها تحسسك بالامان ونظرتها تسحر القلوب ثم نظرت الى الصورة قائلة ولكن انا السبب
انا السبب.......
.
تالت جزء ف النشرة النكت السخيفة :
المرة دي اتنين نكته :
النكته الاولى خاصة بالمهندسين :
اتنين مهندسين بيلعبوا استغماية فواحد راح استخبى ورا الشجرة التاني مسكه قاله شوفتني ازاي قاله شفتك داش لاين -فعلا نكته رخمة جدا-
النكته التانية :
واحد طلع ع المعاش معرفش ينزل -لو حد عنده نكته اجدد يقول
-

Monday, December 11, 2006

اسئلة

ليه لما حد بيغلط مش بيرضي يعتذر ويقول كرامتي؟
ليه علشان حد يبان شخصية قوية كل شوية يزعل ويتامص او يبقى عايز التانين يبقوا معاه ومهتمين علطول؟
ليه لما تتيح الفرصة ان حد يتعلم من حد اصغر منه البرستيج ينأح عليا ومرضاش؟
ليه بنخاف نقول راينا مدام مش غلط؟
ليه لما حد يكون احسن مننا تنشا عداوة او مش بنتقبله؟
ليه لو فيه حد جاب اعلى مننا واحنا عارفين لانه يستحق منرحلوش بنفس صاقية ونقوله مبروك؟
ليه الهايفين هما اللي معاهم فلوس والكويسين مفلسين ؟
ليه لو واحد مش لاقي غلط انه يحلم ويتعلم؟
.
-ع فكرة الاسئلة دي جت من خلال تعاملاتي ف الكلية المبجلة-
.
انا هجاوب ع شويه منهم بالنسبة لي بس محدش يفتكر اني بمدح ف نفسي بس بجد هي دي الحقيقة
.
انا لما بغلط بروح اقول انا اسفة مش سوري تفرق كتير ف تقديرك للي قدامك
انا مبحبش ازعل من اي حد خاالص مش كل شوية اتامص
ممكن اخاف اقول راي حتى لو صح بس عربي باشا ف تدوينته الاخيرة قال كلمة عجبتني ف اخر التدوينة
بي اس(علي راي بلو):البوست مش عاجبني ولا عاجب مونجي وعارف انه هايعمل مشاكل...بس نشرته علشان اثبت لنفسي اني حر جوه بلوجي طالما مابشتمش حد واني لازم اتحدي خوفي حتي ولو كان نسبته نص في المية من عدم رغبتي في نشر البوست
والله انا لما بلاقي حد احسن مني مش هقول مش بضايق بس مش بحقد علشان طبيعي كل واحد بيحب ان ه يبقى احسن واحد بس بحاول احطه قدامي كهدف
لو حد جاب اعلىمني ويستحقها -حطوا مليون خط تحت يستحقها-بجد بفرحله جدا اقولكوا ع حاجة تانية ممكن اقعد افهم حد او اقوله يذاكر وانا اساسا مش مذاكرة ولا فاهمة حاجة
بس هي دي الاسئلة اللي انا جاوبت عليها
حاجة اخيرة:
اكتشفت ان حسن النية والطيبة مش بينفعوا ف المجتمع ده لازم ابقى متحفزة للي قدامي واحط اسوأ الاحتمالات لو كلامي غلط حد يصححلي:)
اوكش