Monday, January 01, 2007

وعدت سنة


سنة عدت بالحلو والوحش سنة خسرت فيها ناس وكسبت ناس تانيين فرحت واكيد زعلت سنة من عمري مرت قدام عيوني وف بداية السنة اللي فاتت 2006بدات البلوج نطت ف دماغي الفكرة ونزلت اول بوست كتبته كان ليلة راس السنة او بمعنى اصح اول تلات بوستات ليا بصوا انا هعمل اقتران-حلوة اقتران دي-هعمل اقتران بين البلوج السنة اللي فاتت وانا ومصر السنة اللي فاتت برضه
اكتر شهر كتبت فيه شهرسبعة
اكتر تعليقات جاتلي اكيد عن مناسبة كنا ف رمضان 46 تعليق
مكتبتش غير حوالي 3مرات باللغة العربية الفصحى
ممسحتش غير بوستين بس واحد علشان كان موضوع يخص واحدة صحبتي ومسحته علطول والتاني علشان كان نكدي -بخصوص الامتحانات -وقلت لما اتحسن همسحه
ممسحتش ولا تعليق خاااالص
بجد بجد كل بوست كتباه بعتز بيه جداا وبيبقى بموقف معايا وكل تعليق متعلقلي معتزة بيه جدا برضه
نبدا التفصيل الممل :))

. اكيد فيه احداث هتهمل زي القطارات والحجات الطبيعية دي
.
نرجع سوا كده ليناير 2006 وتحديدا الساعة 12 ليلة راس السنة قررت اعمل بلوج وكنت مسمياه -انا اكيد مجنونة-بس غيرته وخليته شمعة الفكرة جاتلي من رضوى لقيتها فرصة اعبر عن افكاري واحتك بالعالم الخارجي الافتراضي وطبعا كان اسلوبي ف الاول رائع جداا هههههه وكنت افضل افكر اكتب ايه وازاي وحجات كده اول ما نزلت
Nightlegenالتدوينة الاولى بعديها بخمس ايام دخلت لقيت اول كومينت ف حياتي من ومظنش انه علقلي تاني بس فرحت اوي اني وانا لسه مدخلتش لحد لقيت حد عبرني بعد كده رضوى عملتلي بوست عندها وابتدى يدخل ناس عندي
شهر واحد ع المستوى الشخصي محصلش فيه حاجة اما ع المستوى الدولي والمحلي محصلش حاجة برضه

.
شهر فبراير ده كان شهر افراح واحزان سويا الافراح كانت علشان المنتخب وانه ربنا نفخ ف صورته وكسب بالبطولة
اما الاحزان فوفاة جدي الله يرحمه بعد العيد الكبير ب10ايام كده ولحد بعديها بشهور ببقى ناسية ولما اروح عندهم كنت بغلط بلساني واسال عليه بس اداري ع الموقف علطول وكمان كان فيه انفلونزا الطيور وبطلنا ناكل لحمة ااقصد فراخ
وف شهر فبراير غبت شوية عن البلوج بس لما رجعت مكنش فيه غير
ابراهيم ربنا يمسيه بالخير اللي كان بيخش عليا وكانت الحالة المزاجية سيئة ومكدرة بسبب الثانوية العامة ونص البوستات تهييس اه طبعا ف شهر اتنين كان الفلانتين وده ملناش دعوة بيه

.
شهر تلاتة عيد االام ايه فيه حاجة حصلت فيه طبعا بدات الكتابة تقل بس كان ف
موضوع بحبه اوي وووصل فيه عدد التعليقات لاكتر من 15 تعليق شفته الهنا بس كانت خلاص الامتحانات قربت وكده يعني باين كده كان فيه العبارة غرقت ولا كان ف شهر اتنين المهم اكيد حصل مصيبة ف شهر تلاتة والا منكنش عايشين ف مصر طبيعي يعني

.

شهر ابريل حصلت مصيبة بتاعة دهب صح برضه ولا بيتهيالي لا صح ودخلت خصيصا-حلوة خصيصا دي-علشان اكتب وجهة نظري ومكتبتش غير اتنين بوست اه وفيه عيد ميلاد الريس حد يقدر ينسى المناسبة دي
الكتابة كانت قليلة لاني لازم استكن واقعد اذاكر علشان احافظ ع المجموع واخش الكلية اللي انا عايزاها


شهر خمسة مظنش فيه حاجة حصلت حتى لو فيه مكنتش هاخد بالي علشان كنت معكوكة ف الفيزيا اللي مكنتش بذاكرها طول السنة وكنت بلم نفسي ف المواد المتبعترة وهو الشهر لوحيد اللي مكتبتش فيه ولا بوست ممحي من الارشيف:)

.
شهر ستة اه فيه عيد ميلادي ف عز معمعة المذاكرة وكان نفسي اكتب بوست بس رشا حبيبتي كتبتلي بوست
و كتبت تدوينة مهيسة جدا عن الامتحانات و بدات الاحتكاك المباشر مع البلوجات اخش من بلوج اطلع ع بلوج لحد ما كنت هتهبل.

.
شهر سبعة ماشاء الله فيه النتيجة والتنسيق والماتش النهائي بتاع كاس العالم واللي انا متبعتش الماتشات ت علشان الامتحانات بس شفت الماتشات الاخيرة وكان نفسي المانيا تكسب بس ايطاليا هي اللي خدتها مش مشكلة المرة الجاية يمكن الاهلي يخدها هههههههههه
المهم ف شهر سبعة التهيس اشتغل والحالة المزرية اشتغلت والخوف وكل حاجة مع اني كنت عارفة هحجيب كام وعارفة اني هنقص بس برضه والنتيجة ظهرت يوم الاحد16يوليو وليلتها ع النت وكان معذبني وظهرت نتيجة التنسيق يوم 29يوليو يوم الاحد برضه وبرضه ف شهر 7
رضوى صحبتي الانتيج عملت البلوج بتاعها.

.
شهر 8 كان فيه عندنا فرحين وكان فيه فرح ف شهر سبعة برضه بس انا نطيته وف شهر 8 نزلت
اول نشرةوتاني نشرةع يمينكوا برضه ونزلت بوست وزارة الدفاع كان بوست جامد -والوزراة دي ف حركة كلابيز من اجل التغيير اللي بتقوم بيها الزعيمة كلبوزة والاعضاء رئيس الوزرا زنجولا نزلهم ف بيان رسمي ااقصد بوست عنده ف المدونة
.

شهر 9 دخلنا المدرسة والكلية وكده يعني وجه رمضان وكده يعني فيه حاجة حصلت تاني ؟؟
شهر 10 العيد الصغير والحمد لله مفيش مصايب حصلت
شهر 11 اول امتحان ميد تيرم امتحنه وكان مسخرة
شهر 12 العيد الكبير ف اليوم اللي قبل الاخير ف السنة
3
2
1
هابي نيو ير ههههههه كل سنة وانتوا طيبين وطولت عليكوا بس هو كل يوم الواحد هيتم سنة ااقصد بلوجه يعني كل سنة وشمعة طيبة


ملحوظة صغيورة:
الامتحانات خلاص بتدق الابواب فطبعا لازم اتهد واقعد اذاكر وااوفر كل دقيقة للمذاكرة علشان انجح فهنتغيب لمدة لن تزيد عن 25 يوم علشان هخلص الامتحانات يوم 25 يناير بس ممكن اخش اختلس النظر لو ذاكرت كويس هههههههه

18 comments:

Ramy Mahrous said...

Happy New Year, isA sana s3eda 3liky wy t72a2y kol omnyatk :)

أحمد said...

كل سنة وأتى طيبة و عقبال مية سنة تدوين

DoOoOoOdY said...

كل سنه وانتى طيبه يا نور وسنه جديده سعيده عليكى ان شاء الله
وعقبال العيد ميلاد التانى بتاع بلوجك
هههههههه
كل سنه وانتى طيبه

Anonymous said...

كل سنة و إنت طيبة
2005 زي 2006 زي 2007
طريقك مسدود مسدود مسدود يااااااااا ولدي يا ولدي

و ربنا يوفقك في الإمتحانات

admelmasry said...

كل سنه يا شمعة عقبال الف مليون سنه

اي خدمة يا ستي اي خدمة


والله فرحتلك انك كملتي السنه بافرح كتير لما الاقي مدونات بتقفل سنة كدا


يلا عقبال القرن والاف مليون سنه اللي بشرتك بيهم فوق


تحياتي

مـحـمـد مـفـيـد said...

كل سنه وانتي طيبه سا نوران
والنشره السنويه تستمر

Dananeer said...

كل سنه و انتوا و المدونه بخير
".

3rby said...

كل سنة وانتي طيبة
انا بقي مش بذاكر بقالي اسبوعين
امبارح ذاكرت صفحتين بالظبط

بس انتي كنتي اصغر مدونة؟
بجد هو كل المدونين ناس كبيرة وكده؟
يعني انا عيل دلوقتي ولا ايه
انا برضو كنت ناوي اكتب بوست
وكنت هاكتب فيه عن المدونين
بس هاستني لما سنة تعدي علي التدوين

Tamer Nabil Moussa said...

كل سنة وانتى طيبة

وعيد سعيد

m_elsewedy said...

ايه ده ؟
تفتكرى عيد ميلاد الريس وتنسى عيد ميلاد سويدى؟
طب ده كلام؟
خلى الريس ينفعك بقى
ههههههههههههههههههه

كل سنة وانتى طيبة وذاكرى كويس ولا اجيبلك الاونكل باشمهندس نور يذاكرلك؟؟؟
انتى حرة بقى فا ذاكرى احسنلك
:D

Nouran said...

رامي محروس:
وانت طيب ويا رب تبقى سنة سعيدة علينا كلنا

مبرمج حر:
وانت طيب وعقبالك انت كمان

دودي:
وانت طيبة يا دودي وسنة سعيدة علينا كلنا يا رب وعقبال عيد بلوجك الاول

مصري:
ليه التشاؤم ده ومسدود مسدود يا ولدي ويا رب يوفقني ف الامتحانات وميبقاش مسدود مسدود والطريق يفتح

ادم باشا:
شكرا يا باشا وانا كمان بفرح لما حد يتم سنة وعقبال سنين كتير لينا كلنا

محمد مفيد:
وانت طيب عقبالك وكمان النشرة دي كلها كام سنة وتبقى نشرة مشهورة جدا والنكت اللي فيها هتبقى عالمية هههههه

دنانير:
وانت طيبة

عربي:
وانت طيب عقبالك يا باشا اقعد ذاكر ربنا يهديك بقى علشان نبقى زملا ف كليه واحدة بلاش دفعة دي ماشي :)
ده انا اتكتب عني ف الشرق الاوسط واتقال اسمي ف برنامج ف العمق بتاع رولا خرسا يا عم ده انا كنت مشهورة اني اصغر واحدة مصرية من الام والاب لا بس دلوقتي بقى يه مدونين 14
سنة و15 يعني انت مش عيل ولا حاجة متتلككش انت كبير :))

تامر:
وانت طيب

ابيتاف هانم:
وانت طيبة وعقبالك انت كمان ويا رب يوفقنا كلنا ف الامتحانات وانت بالذات تاخدي المرتبة متنسيش مع مرتبة الشرف :))
سوووووويدي بااااااشاااا:
لازم ترحيبة كبيرة هات الحاجة الساقعة لعمك سويدي يالا ههههههه
والله يا اخ سويدي انا مقصدش مكتبش عيد ميلادك بس انا هعملك نشرة ساعة عيد ميلادك مش هو 20 يونيو ومش هعمل نشرة للريس يعني مين الاحسن ها ؟؟
وانت طيب يا سويدي ومتغيبش تاني ولو غيبت هتدفع الغرامة :))
وبلاش تتعب اونكل نوور وتجيبه انا هذاكر لوحدي خلاص هههههه

safa7_karmooz said...

ههههههههههه...حلو اوى التلخيص الموجز اللى عملتيه لسنة 2006 ....

ممكن ااقلدك فى البلوجاية بتاعتى :p بس المشكلة انها مش هتحصل....لانى من النوع الكسوووووووووووووول ....


وده واضح....انى بقالى 4 شهور متابع البلوج بتاعك...ونفسى ااعقب ....

بس كنت ناسى اليوزر نيم بتاعى :$

سنة سعيدة .....

بين الأمل و اليأس said...

ياه كل ده في 2006
يجعله عامر يارب
وربنا يسهلك في الامتحانات يارب وتفضل نور شمعة منورة البلوجريه كلهم
وعقبال 1000000000000000000000000سنه بلوجرات يارب
عدي انتي كام صفر انا معرفش جبت شوية رز ورمتهم طلعوا كدا
لو فاضية وزهقتي من المذاكرة قعدي حليهم
بس بجد الجلوس كدا في البوست ده بالذات ياسلااام
متقليش فلم كومييدي
بجد ربنا يرسم على وشك الابتسامه ويزيد من اصحابك ومن المعلقين وتعدي سنة الفين وسبعه زي اخر كام شهر عدوا بهدوء وسلام
وكل عام وانت بخير
وربنا يسترها

zordeak said...

كل سنة وانتى طيبة يا جمييلة

عقبال كده لما يبقى عندك 110 سنة وتقعدى قدام الكومبيوتر بتاعك علشان تبعتى بوست


يااااااااااه


هيبقى شكلك تحفة

هتبعتى ساعتها بوشت

:D

ايه ده كله يا ستى .., انتى فاكرة ده كله

اجمل رحلة فى بلوجك عملتيهالنا


تشكرى

كل سنة وانتى طيبة كمان مرة

مداح القمر said...

كل سنه وانتى طيبه وكانت سنه سعيده...وخصوصا انى اتعرفت على اشقى
تدوينه واشقى بشمهندسه السنه دى

ويارب السنين لالجايه تعدى عليكى وانتى فى سعاده وراحة بال

basma saghir said...

كل سنة وانتي طيبة..ومعاكي ربنا في الامتحانات لانه مفيش حد غيره يقدر ينفعك في الظروف دي ولااي حاجة
طبعا فاهماني

tamer afify said...

كل سنة وانتي طيبة وربنا يخليلك ويخليلنا المدونة الجميلة دي
تحياتي

Nouran said...

safa7_karmooz:
كويس انه عجبك
لا ده انت من النوع الكسول جداااااا جداااا 7جدااا
سنة سعيدة عليك وعلينا وعقبال ما تعمل عندك التلخيص الموجز

بين الياس والامل:
ما 2006دي فيها 12شهر
يا رب يسهلي ف الامتحانات يااا رب
ياااه فيلم كوميدي مرة واحدة
يا رب وربك يسترها وتبقى سنة سعيدة علينا كلنا

zordeak:
وانت طيب ياا رب
حلوة بوشت دي
ربنا يخليلي الارشيف غشيت منه كتير من الاحداث
وانت طيب كمان مرة:)

الدكتور احمد باشا :
وانت طيب يا باشا

بيسوو:
وانت طيبة وربنا معايا ف الامتحانات يا رب ومع الناس كلها

تامر عفيفي:
وانت طيب وشكرا ع كلامك :)