Tuesday, March 27, 2007

دقيقة حداد

دقيقة حداااد هي مش نهاية الدنيا بس ع الاقل لدلوقتي متضخضوش محدش مات ده ايه الافكار السودا اللي ف دماغكوا ديه بس النتيجة طلعت حطوا الافكار السودا تااني ف دماغكوا كمان والنبي مش عايزة اي كلمة اشفاق او حتى نظرة اشفاق وهي مش نهاية العالم بس ابتلاء وادعولي اصبر
انا عارفة اني خزلت امي وابويا واخواتي ده حتى روان حسيت ف عنيها نظرة كسرواشفاق انا اللي جبت التقدير ده مش هي بس حستها اوي احساسا وحش جدا جدا
بابا وماما سامحوني بجد لو كنت قصرت وديه النتيجة وادعولي لو كنت مقصرتش وده ابتلاء واللهم اجرني ف مصيبتي وارزقني خيرا منها وقل لن يصيبنا الا ما كتبه الله لنا
كانت معكم شمعة اللي اتحرقت خلااص بصوا اصعب حاجة ف الدنيا ان فيه حاجة بتحبها وهي اللي تخونك بس هي كده الرياااضة غدااارة بصوا بقى من الاخر انا جبت ضعييف ف الرياضة
يا ربي انا خايفة اوي ربنا معايا يا رب الترم التاني
بجد بجد مبروووووووك لصحااابي كلهم شلة الانس وربنا من قلبي ومفيش ضغينة
مبروك يا تشوس ومش عشان انت ابن باباك نجحت كده علشان تستحقها :)
امبروك تويتي
مبروك حسين وشريف
مبروك مستكة
وادعولي:)
ياااه كان لازم اعمل نشرة وفيها رثااء ليا ربنا يجعلها اخر الاحزان
اكيد كتبت البوست بعد ما خلصت عياااط مصر كله :(

38 comments:

tweety said...

ما تزعليش يا حبيبتى انا عارفه انك اتظلمتى خليكى جدعه ربنا مش ممكن هيخزلك عشان انتى عملتى اللى عليكى

radwa osama said...

ولا يهمك ..حركة 30 فبراير لو عايزة تروح تقلب الجامعه والكنترول وتخطف الدكتور اللي عمل البلوه ده ..معلش يا نور ..كلمتك تليفونكم بيرن ما حدش بيرد واضح انك عند جدتك ..ومش نعايا النمرة

MestKA said...

بدون شفقه ولا كلمات مواساه بقولك هارد لك وده مجرد موقف صعب وهيعدي ان شاء الله وفعلا لكل جواد كبوه وما طار طير وارتفع الا كما طار وقع
ولما تشوفي بلاوي الناس هتهون عليكي بلوتك
يعني احمد ربنا وفكري فبكره وبعده وكده وبلاش حكاية الرثاء دي مش هتفيد بحاجه المهم انك تعدي مع نفسك وتعيدي حسباتك
وخليكي دايما واثقه ان الله لا يضيع اجر من احسن عملا
ومتنسيش تخلي الحداد دقيقه واحده بس عشان مفيش وقت الميد تيرم قرب
رخامه معلش مش قادره ابطلها

أحمد said...

ماتزعليش يا نوران

Failure is not the worst thing in the world. The very worst thing not to try.
معرفش مين اللى قال العبارة دى

The only real failure in life is the failure to try.”
معرفش مين اللى قال العبارة دى

I've come to believe that all my past failure and frustration were actually laying the foundation for the understandings that have created the new level of living I now enjoy.

Anthony Robbins

We can't solve problems by using the same kind of thinking we used when we created them.

Albert Einstein


وبكرة تفتكرى جملة أنطونى روبنز و أنتى بتتضحكى وتقولى الراجل ده كان عنده حق
وماتزعليش يا نوران

voice of love said...

قوليلى بس اسم دكتور الرياضيات ده وأنا أخطفه وأحط لك السيخ المحمى فى صرصور ودنه
متزعليش يا حبيبتى
المهم انك تتعلمى وتجتهدى أكتر وتركزى التيرم ده أكتر وأكتر علشان المادة دة تترفع وتعدى صافى ان شاء الله
والضربة اللى متكسرش تقوى
المهم اننا نتعلم
خلى بالك من نفسك وشدى حيلك ودعواتنا معاكى
بس لو سمعت انك قصرتى هاجيب السيخ المحمى فى ودنك انتى
هههههههه
بالتوفيق يا حبيبتى وربنا معاكى ان شاء الله

safa7_karmooz said...

عاتى عاتى ....مادة تفووووت ولا حد يموت

المهم شدى حيلك الترم التانى ...عشان تعدى

وادعيلى فى سكتك....نتيجة حقوق اتاخرت ومدخلتش الكنترووول لسه

:(

محمود عزت said...

صلي على النبي كده يا نوران
عادي , و انا بكرة حاجي أتكلم مع عميد كليتكم في الموضوع , متقلقيش
أهم شئ تبطلي تسمعي أغنية "دقيقة حداد " عشان ثبت إن ليها أضرار فادحة على القشرة المخية

تعوضيها بإذن الله الترم الجاي

hummar said...

اسوأ حاجه قريتها في البوست ده ان الشمعه اتحرقت
ده تشاؤم مانحبش نسمعه الشمعه لازم تفضل منوره الطريق وتستمد زيتها وقوتها من حب الجميع ليكي بابا وماما واخواتك واقاربك واصحابك الانتيم يعني مش دي نهايه العالم ياشمعه بس هاتكون نهايه العالم لو ماحاولتيش انك تزيحي هذه النتيجه بالعمل والاجتهاد وبعدين بلاش عياط العمل ثم العمل ثم العمل حتى الممات لاتوجد تعزيه لانك قمتي بواجبك ولم تهملي يعني انشاء الله النجاح من نصيبك علشان بتعملي اللي عليكي اكيد كل حبايبك بيتمنولك ان تخرجيمن هذه الازمه وترجعي الشمعه اللي بتنور حياه الكل شويه الكلام اللي كتبهم مبرمج حر بالانجليزي كلها حكم جميله لازم تستوعبيها وتعملي بيها ومستنين اختراعاتك المهوله وربنا يستر على الشعب المصري من اختراعاتك ولو عايزه اي خدمه انا ممكن اشوف الدكتور بتاعك واضربه بالشاكوووووووووووش

hummar said...

شمعه ارجو منك انك تحزفي البوست المتشاءم ده واكتبي بوست جديد متفائل عن بكره

عازفة الكمان said...

انت يا بنت خلاص انا اصدرت فرمان عسكري بحذف متده الرياضيات من السنه الاعداديه لجميع كليات الهندسه والفنون الجميله و كذلك تعدام جميع دكاتره الرياضيات في العالم كله ..... اي خدمه يا ستي

bRoKeN HeArT said...

لأ ان شاء الله تعوضيها الترم التانى
و تجيبى امتياز جدا كماااااان
ربنا معانا جميعا ان شاء الله

يا مصر اكتب إليكي رسائلي said...

بمناسبة ذكرى المولد النبوي الشريف ،
يسعدني انت انتهز الفرصة لأتقدم بخالص التهاني
وأطيب التمنيات القلبية
لكم والأسرة والأصدقاء ، وكل عام وانتم بخير

Tschuss said...

wla yhmk ya shm3a ansha2 alah t3wdiha altrm d w tgibi amtiaz kman bs blash almskna d wshoit al7rkat b2a 3shan baba lma yft7 alblog ts3bi 3lih 3arfk ana walrkat alns km d..bs an sha2 alah 5er wmerci 3la althn2a d..
f 7d 3mlk comment 3aiz y3rf asm dr almath 3shan y7t srsor m7mo f wdnh..a7b a2olh klamk m3aia ana..ok

mohamed alhaddad said...

يا بنتى ولا يهمك مش أنا هندسه زيك بس ما تقلقيش خالص خالص .
انا حقولك حاجه وأنا فى أعدادى كان عندى أربعه مواد جيبت ماده جيد وشلت 3 مواد وستر ربنا انه فيه منهم ماده ممتده يعنى لو كنت يأست كده وبتاع كنت قاعدت السنه بس الحمد لله عديت وشلت مادتين جيت التيرم اللى فات الحمد لله مع انه أصعب جيبت أمتياز كنتيجه تقريبيه يعنى .

بصى لقدام واوعى تبصى لورا

مـحـمـد مـفـيـد said...

خلاص يا نوران
ابن الدكتور بتاعكوا طلع مع عبد الله في الكي جي
كلموا وهو هيخلصلك الموضوع
اي خدمه

DoOoOoOdY said...

متزعليش يا نور
قدر الله وما شاء فعل
واكيد ربنا شيلك الخير وربنا مبيضيعش حق حد زان شاء الله ربنا هيكرمك الترم ده وتعوضى
بس كفايه زعل بقى تفائلى كده وخلى املك كبيييييير

Mr vamPire said...

mtz3lesh nfsk ya nouran.shlty math we 2h y3ny 27mdy rbna 2nha gt 3la 2d kda.we shdy b2a el term el tany 3shan rbna ywf2k we 3yzen klna nw7d el d3a 3la kol el dacatra ely zlmona............

Nouran said...

تويتي:
يا رب يا نورا يا رب

رضوى:
ياريت تعمل كده وانا اشترك معاهم انا كنت موجودة بس كنت نايمة من الصدمة علشان كده محدش رد ع التليفون

مستكة:
يارب يا مستكة يارب والله هانت عليا بلوتي بعد ما رحت تاني يوم الكلية يالله الحمدلله انها جت ع قد كده
شكرا انك فكرتنيني بالميدتيرم اهئ اهئ

مبرمج حر:
مقدرش مازعلش والله يا احمد عارف اصلها حاجة غريبة جدا عليا بس شوية الكلام اللي انت كاتبهم ومتعرفش مين قايلهم دول بجد كلام حلو جدا جدا ويا رب تتعوض المرة اللي جاية يا رب

دولي:
ههههههه بلاش لحسن ده بابا واحد صاحبنا ههههه يا رب تتعوض يا رب صح الضربة اللي متكسرش تقوي

safa7_karmooz:
ياللا مادة تفوت ولا حد يموت ماشي يا عم يا رب يوفقك يا رب

محمود عزت:
عليه الصلاة والسلام
ياااه هتيجي تكلمي العميد شخصيا هههههه
تصدق ممكن اغنية دقيقة حداد هي اللي تكون عملت كده :)

الشاكوش:
انا فضلت اعيط اول ما قريت الكومينت ده الدكتور بتاعنا ده هيتعمل فيه حجات كتيرة جدا بس يا جماعة اكيد انا السبب مش هوه وممن اعمل اختراعات متخليش حد يشيل اي مادة مش مشكلة هتتعمل ازاي بس هفكر فيها برضه
معلش يا شاكوش مش هقدر ارمي البوست ده لازم اخليه علشان كل ما اذاكر وحش اجي اقراه وافتكر واذاكر حلو

رشا:
هههههههههه يالا ع اساس ان الحياة من غير رياضة هتمشي اصلا

قلب مكسور:
يا رب من بقك لباب السما

يا مصر اكتب اليكي رسائلي:
كل سنة وانت طيب والمسلمين كلهم طيبين

تشوس باشا:
ولا يهمني ويا رب اعوضها التيرم التاني يا رب وع فكرة انا ولا بتمسكن ولا بعمل حركات نص كماصلا علشان ده احساسي ساعتها
وايه ده السيد الوالد ممكن يفتح البلوج ده ايه الهنا ده يا ريت يفتح ويشوف يمكن اصعب عليه هههههه ويا رب خير
يا عم ده انا كنت هعمل نشرة بس قلت مينفعش يعني بس لازم كنا عملنا تهنئة للناجحين :)
خلاص يا عم انت هتتخانق هنا ولا ايه وكمان مش باباك ماصححش يعني مش هو اللي عمل البلوة ديه اكيد دكتور تااني :) وكمان كلامها معاك انت ليه هو انت مين؟؟
:P هههههه

البشمهندس محمد:
يا رب يا محمد بس انا خايفة اوي انا جايبة مادتين جيد وواحدة امتياز الانسانيات يعني ومعرفش الضاد ديه جت منين :(
انا هعمل اللي عليا والباقي ع ربنا

محمد مفيد:
يعني الحمدلله عبدالله هيخلصلي المشكلة :)

دودي:
ع فكرة انا زعلانة منك علشان مكلمتنيش يا هانم ماشي
قدر الله ما شاء فعل ويا رب يوفقني التيرم التاني ده يا رب

حسين:
ربنا معانا يا رب كلناالحمدلله انها جت ع قد كده الحمدلله ويارب يوفقنا كلنا التيرم التاني

Dr. Tantawy said...

لأ لأ لأ كده ازعل منك

الكليه مش زي ثانويه عامه

متزعليش من حاجه زي دي .. ولا تحطيها ف بالك طالما عملتي اللي عليكي

لسه ياما هتشوفي :) لسه واحد زميلنا امبارح بيقول كان واخد درجات نهائيه في لجان الشفوي .. و لما طلعت النتيجه و راح كشف على الدرجات لقى كل لجنه شفوي نازل فيها 20 درجه بعد ما كانت مكتوبه قدامه ف اللجنه و النتيجه انه طلع الـ29 على الدفعه بعد ما كان مرشح يكون الـ3 او الـ4 .. يعني مالآخر متتعبيش نفسك كتير ف النتيجه .. المهم تذاكري و تعملي اللي عليكي قدام اهلك و نفسك و الاهم من ده كله قدام ربنا

و انشساءالله اللي جاي احسن و احسن يا نووووور :)

Shreef said...

عادي جدا..ده متوقع مع اني في كلية تجارة بس انا تقريبا شلت كل مواد الرياضة في معظم الاترام و ايه اللي حصل يعني ولا حاجة..و على فكرة احنا مظلومين في التعليم ده..سلام

مهندس زراعي said...

ما تزعليش وخير بعون الله ربنا يوفقك في القادم

أحمد said...

كيف حالك يا نوران
يا رب تكونى أسعد النهاردة وخصوصا لأنى

I tagged you
:)))))))))))))))))))))))

Reemo said...

معلش يا قمر مش تزعلى
انا ليا اخت فى هندسه وعارفه اللى بيحصل بجد وقد ايه هى صعبه
ان شاء الله تعوضيها
مدونتك جميله
تحياتى:)

zordeak said...

ربنا معاكى

وان شاء الله اللى جاى احسن

بس انتى بس ركزى وسيبك من اللى فاات

ربنا هيوفقك ان شاء الله

:)

Abd El Rahman Magdy said...

ادعي وإن شاء الله ربنا هيوفقك

تحياتي

Anonymous said...

تعوضيها علي خير ان شاء الله

معلهش شدي حيلك

:))

bosbos said...

معلش يا حبيبتي تتعوض الترم الجاي
متقلقيش ربنا مش هيضيع تعبك

FrEe.PhArAoH said...

بعد الدبلرة والشحورة و تعب ليالى فكلية مش فبلدى وسفر وقطر وضحك ودموع ومزاكرة ولعب فهمت الليلة

فى ناس عندنا حرام تقل عن جيد جدا بتعيد السنة وناس بتقدر ومتعرفش شكل دكتور المادة .. دا شئ عادى

بس مش قاعده .. يعنى ربنا مبيخيبش ظن اللى بيشتغل كويس بردو .. بجد كل دا ملوش اعتبار طالما فى احترام لذاتنا من جوانا
انتى لو شيلتى مادة وحاسة انك مظلومه متعتبريش نفسك شيلتيها .. ليكى اعمالك انتى بس .. ومتندميش .. الندم بيهد مش بيبنى .. شوفى ايه غلط وغيريه وايه صح واتمسكى بيه .. وكمان على فكره النظام نفسه فاشل والفشل ف الفشل نجاح
لسه محدش ارتقى لدرجة النجاح زيى :)
ولا يهمك
مدونتك حلوه اوى
تحياتى

نورهان مفيد said...

متزعليش نفسك اوي كده يانور وموصلتش لدقيقة حداد يلرب مايكون في حياتك دقايق من النوع ده ابدا ابدا
ركزي انتي بس الترم التاني وربنا هيعوضك وتعبك مش هيروح ع الفاضي ماتقلقيش بس انتي خليكي في اللي جاي

mohamed alhaddad said...

أنا كنت ناوى ادخل اقول معلش بقالى كتير مش بكتب بوست متأخر لقيتك متأخره أوى

فينك ..؟؟

mohamed alhaddad said...

أنا كنت ناوى ادخل اقول معلش بقالى كتير مش بكتب بوست متأخر لقيتك متأخره أوى

فينك ..؟؟

الســـاحر said...

ولا يهمك اهم حاجه انك تقولى الحمد لله وان شاء الله هيعوضك كويس
ممكن ده يكون اختبار من عند ربنا
وفى النهايه سلامى وربنا يوفقك

هوميروس said...

يانهار يانهار
ده انا علي كده ما كنتش طالب بقي
انا لو عملت دقيقه حداد لكل ضاد جيبتها كنت لسه زماني واقف لحد دلوقتي
عموماالضادات اللي انا جبتها بعتبرهم زي ولادي دلوقتي وفرحان بيهم اكتر من الجيمات كلها
لانها ما اثرتش عليا في حاجه بعد التخرج
انا اعرف واحد حبيبي كان بيبقي مبسوط اوي لما يجيب ضاد ويقول بقي لازم استغل درجات رافت
مش عارف رافت ده كل سنه يدي درجاته للناس وبيعمل ايه
عموما هارد لك لسه الشوط التاني طويل

مداح القمر said...

http://betabloggerfordummies.blogspot.com/2007/02/music-in-your-blog.html
ادخلى اللينك دا وح تلاقى فيه ازاى تحطى الاغنيه...معلش اتأخرت عليكى بس على بال ماعرفت انا ازاى اصلا تتعمل ف البلوج الجديد دا....ثانيا تعالى هنا...انتى فين؟ انتى نسيتينا خالص؟ربنا ح يوفقك ان شاء الله ف المذاكره وامتحاناتك

hummar said...

هلا بالشمعه
كيف حالك مع الميدتيرم ارجو انه يكون كويس بس انا عندي ملاحظه انتي الاول قولتي دقيقه حداد وبعد كام يوم لقيت البوست زي ماهو قلت في نفسي يمكن عامله 3 ايام حداد زي رؤساء الدول وماله مايضرش برضه لكن في الاخر لقيت ان احنا قربنا على الاربعين وبرضه لسه البوست في مكانه والتعليقات تتوالى زي تعازي جورنال الاهرام على فكره الاربعين ده عاده مصريه قديمه وبيشترك معانا في نفس العاده من العرب اهل المغرب برضه وكمان الشيعه
يعني احنا لازم نحزفها تماما من عاداتنا لانها اعتقد بدعه المهم انا شايف ان البوست ده طول وكل ماخش البلوج بتاع الشمعه الاقي الحدا في وشي غيري واكتبي بوست متفائل بمناسبه الميدتيرم هاهاهاهاهاهاهاهاهاهاهاهاهاها متفائل بجد
الشاكوش

Nouran said...

زنجولا:
لا لا خلاص متزعلش مش هعمل كده تاني
يا رب يكون احسن يا رب

شريف:
صح احنا مظلومين ف التعليم ده

مهندس زراعي:
يا رب يا رب

مبرمج حر:
الحمدلله وخلاص عملنا التاج :)


ريموو:
شفتي مبهدلنا ف الكلية ربنا معانا كلنا يا رب
وشكرا ع رايك ف مدونتي ياجميلة



احمدباشا:
يا رب يكون اللي جاي احسن


عبووود:
يا رب ربنا يوفقنا كلنا


ابيتاف:
يا رب وهشد حيلي ان شاء الله

بسبس:

يا رب يا بسبس


free pharaoh:
الدبلرة والشحورة يا عيني ليه كده
حلو كلامك اوي خصوصا الفشل ف الفشل نجاح لا بجد حلو :)

نورهان مفيد:
يا رب ميكنش ف حياة اي حد دقايق من هذا النوع يا رب

محمد باشا:
انا جيت خلاص اهوه

السااحر:
عاش من شافك حمدلله ع السلامة
صح وهو اكيد اختبار من عند ربنا ملهاش حاجة تانية

هوميروس:
هههههههه يا سلام بس انا خايفة من رافت ده اووي بصراحة ومش عايزة اتحوجله تاني ابدا يعني بعد كده هعتبر الضادات ديه زي ولادي والشوط التاني قرب يخلص والكلية بتجيب اجوان فيا

مداح القمر:
شكرا ع اللينك يا باشا
انا جيت اهوه

الشااكوش:
كويس جدا ودخلت اجوان ف نفسي كمان
لا لا خلاص خلصنا الحداد متفاائل جدااا :)

elkamhawi said...

ياااااااااااااه بتهرجى والله

Nouran said...

علااااء:
بهرج ايه والله بجد ضاااااااااد رياااضة
اهئ اهئ