دقيقة حداد

دقيقة حداااد هي مش نهاية الدنيا بس ع الاقل لدلوقتي متضخضوش محدش مات ده ايه الافكار السودا اللي ف دماغكوا ديه بس النتيجة طلعت حطوا الافكار السودا تااني ف دماغكوا كمان والنبي مش عايزة اي كلمة اشفاق او حتى نظرة اشفاق وهي مش نهاية العالم بس ابتلاء وادعولي اصبر

انا عارفة اني خزلت امي وابويا واخواتي ده حتى روان حسيت ف عنيها نظرة كسرواشفاق انا اللي جبت التقدير ده مش هي بس حستها اوي احساسا وحش جدا جدا

بابا وماما سامحوني بجد لو كنت قصرت وديه النتيجة وادعولي لو كنت مقصرتش وده ابتلاء واللهم اجرني ف مصيبتي وارزقني خيرا منها وقل لن يصيبنا الا ما كتبه الله لنا

كانت معكم شمعة اللي اتحرقت خلااص بصوا اصعب حاجة ف الدنيا ان فيه حاجة بتحبها وهي اللي تخونك بس هي كده الرياااضة غدااارة بصوا بقى من الاخر انا جبت ضعييف ف الرياضة

يا ربي انا خايفة اوي ربنا معايا يا رب الترم التاني

بجد بجد مبروووووووك لصحااابي كلهم شلة الانس وربنا من قلبي ومفيش ضغينة

مبروك يا تشوس ومش عشان انت ابن باباك نجحت كده علشان تستحقها :)

امبروك تويتي

مبروك حسين وشريف

مبروك مستكة

وادعولي:)

ياااه كان لازم اعمل نشرة وفيها رثااء ليا ربنا يجعلها اخر الاحزان

اكيد كتبت البوست بعد ما خلصت عياااط مصر كله :(

ربنا يعينا

هو ده حااالنا ذاكرت او ماذكرتش ديه اخرتها

النهاردة امتحنت كويز من التلاتة والمصيبىة اني كنت مذاكرة وعارفة الاجابات بس نسيتها واول ما سلمت الورقة اللي فيها نقط حبر شوية افتكرت الاجابات خلاص كويز راح وعقبال الاتنين واحد بكرة والتاني يوم الخميس يا رب احل كويس وافتكر اللي ذاكرته

ع فكرة النتيجة يا النهاردة يا بكرة هههههههههه ربنا يستر وخبطتين ف الراس توجع :(

مشغووووووووووووووووول

عاملين ايه ازيكم ايه البداية الغريبة ديه ههههههه عادي ما بعد كل نكد او اكتئاب لازم يجي تهيييس وانا استاذة ف التهيس المهم فاكرين الدوارية اللي عمالة اذاكر فيها بقالي اسبوعين ديه ومش راضية تخلص ويا انا يا هي وف الغالب هتطلع هي طبعا عااادي خااالص لقينا ان احنا عندنا كويز فيها يا سلاام ايه ده يا ربي لقتها وهي طايرة علشان كده كنت بذاكرها-بصراحة شوشو الدكتورة يعني شهوار اللهم احفظنا قالتلنا من زمان وانا قلت اذاكر واخلصها بس ايه بقى مش راضية تخلص - المهم الكويز يوم الاتنين وعندي تسليم ريبورت كمبيوتر الاسبوع الجاي وباين كده فيه كويز كيميا الاسبوع الجاي او اللي بعده هعرف يوم الخميس يعني انا امشغول وحياتك مشغول ولاخر الاسبوع مشغول اغنية عبدالحليم اللي انا معرفهاش

واصلا انا النهاردة الصبح ف محاضرة الكيميا اللي كنت هتشل فيها ديه -دكتور شلل وربنا شاكي كانت ارحم منه هبقى اقولكوا ع الحوار ده بعدين وقاعد يتكلم ع التلوث لحد ما لوثلنا الحبة الكويسين اللي ف دماغنا ع فكرة كل ديه جملة اعتراضية -كنت بقول ايه اه ف محاضرة الكيميا الصبح بقول لمستكة انا عايزة اكتب عن عيد الام والرحلة واليوم اللي روني اختي يعني جت فيه الكلية وعن العصفورة -اصل كان فيه عصفورة دخلت النهاردة المحاضرة وفضلت اتفرج عليها ولما خرجت اصلها اتعذبت عقبال ما خرجت ف كنت هصقفلها اكتشفت ان انا ف المحاضرة وممكن اترد برة لو صقفتلها بس هو ده اللي كنت هكتبه عن العصفورة وميستكة تقولي ده هدهد شكل الهسهس عمل عمايله معاها هههههه المهم انا قولت اقول لماما كل سنة وانت طيبة مش لازم ع البلوج وكل الامهات طيبين ويعتبروا ان فيه بوست اتكتب وهيبقى بالنص من درس رسالة الي امي بتاع تالتة ابتدائي من ابنتك سميرة ع حد ما افتكر بس نشيل سميرة ونحط نوران

والرحلة هكتب عنها ف يوم هي واليوم اللي روني كانت فيه اصلها بدعت ف الكلية وحضرت محاضرتين مش وقته دلوقتي

الهدف وراه البوست ان انا عندي كويز قلت اخش اطمنكوا عليا =قال يعني سيبوني اخد برستيجي ف المنطقة =قبل ما اجري ف الدوارية والخطين والتيكامل اه فيه يااء بعد التااء ها يا مستكة هههههههه متخدوش في بالكوا اه وكمان باين كده بعد الكويز فيه النتيجة يعني الصدمة الكبرى ان ان ان -ديه موسيقى تصويرية ارجوكوا افهموها -0ام هند ااقصد المهم انا هيست جااامد اوووي

البوست الجاي هيكون ان شاء الله يا اما عن النتيجة او عن الرحلة بس انا لازم اكتب بوست عن صحابي والرحلة

الاتنين مع بعض يعني يوووه انا لخبطكوا معايا بس ربنا يصبركوا يالا كفاية كده عليكوا :)

سلاااااااااااااااااام

عايزة اعيط

عاااااايزة اعيط من غير سبب انا عارفة ان الضحك من غير سبب تهييس وبتاعات كده بس العياط من غير سبب ليه هو انا معيطتش ومعنديش النية بس عندي الاحساس يعني حد فاهم حاجة يعني انا مش عايزة اعيط ولا عندي النية ف كده بس عندي الاحساس اني هعيط الكلام ده ملوش دعوة بالنتيجة انا عارفة ايه اللي فيها طبعا انا كنت عاكة الدنيا واللي ربنا هيجيبه انا مش هعترض عليه علشان ربنا بيجازي كل واحد ع قد عمله وع قد نيته

وكمان انا مكنتش هكتب عن الكلام ده كنت هكتب عن الرحلة بس مش عايزة مليش مزاج يعني دخلت قلت ابص بصة ع البلوجات وبعد كده اقعدت اذاكر الدوارية -ف الهندسة التحليلية- ومن الاخر البوست ملوش لزمة وانا هنزله عند فيا وغيظ ف نفسي لاني متغاظة وخلاص هفرقع من غير سبب برضه ايه اللي جرالي انا اتجنتت ولا ايه برضه الجنون شئ طبيعي جدا عليا المهم انا هعمل حاجة ايه هي مش عارفة طالبة معايا هبل وخلاص وكفاية كده وهنشر البوست كده علشان يبقى ذكرى رخمة ليا هو كده برضك وكفاية كده اقفل واخش اكمل الدوارية

اصحابي وصحباتي

بصوا اصلا انا معتكفة وقررت اذاكر بس بصوا متقولوش ايه اللي جابك كنا مستريحين انا سمعاك ياللي بتبص وراك بس انا هقولك

انا كنت برسم الهوم ورك وفيه حاجة مش عارفاها حلو الكلام قلت اروح اكلم حد ف التليفون اساله المفاجاة التليفون بااااااااايظ ياااه دي النيلة طيب اخش ع الماسينجير يمكن الاقي حد الحمدلله لقيت وسالت وعرفت نيجي للنقطة الهامة طبعا لازم اخش ع البلوج هو انا اقدر افتح النت من غير ما اخش عليه ببص ع التعليقات لقيت حد معلقلي ع النشرة عادي يعني االفضول يخليني اخش اشوف الاقيه مين تسوش tschussواليو عليها اوم لاوت هههههه معلقليلي اخيرا خرج من الشرنقة وكتب اول بوست

كده صباح الفل ع ارخم شلة فيكي يا هندسة هتيجي ترخم ع بلوجر وطاقة الرخامةو اللي فيها هنحولها لكهربا ع غرار شركة المرعبين المحدودة هتبقى شلة الرخمين المفقودة ع اساس ان احنا هنتخطف يعني المهم بقى شجعوا جيل الرخمين ده بصوا ارخم اتنين ف الشلة انا وtschuss

وبعد كده يجي مين باين كده ممكن حسين وشريف الاخير لسه معملش واحد

بعد كده تويتي اللي عملت بلوجين ونسيت الباسورد بتاعهم وعملت واحد تالت خالص

وبعد كده مستكة اللي بتعاني مني ف الرخامة بصراحة البنت ليها الجنة :)

بصوا كده وكده اصحابي وصحباتي وصلوا وهيحتلوا بلوجر وهيفشوا فيه السلام ااقصد الرخامة بس بجد عيال جدعة -معرفش ازاي عيال وجادعة - وفيه بوست هيتكتب بعد ما اخرج من اعتكاف المذاكرة ده عن دريم بارك اللي رحناها يوم الجمعة اللي فاتت وعن صحابي والجبلاية وعن نيدو اه نيدو مش ميدو ها :)

tschuss

mr vampire

tweety

mestka

sham3a

.

ملحوظة صغيورة

ان شاء الله هرد ع التعليقات بتاعة الموضوع اللي فات بس ادعولي اذاكر وربنا يهديني

شبح المرض

انه اكثر شئ يخيفني بعد الموت المرض كالموت البطئ يتسلل اليك دون ان تدري فجاة تراه امامك تنهار امامه لا تستطيع ان تفعل شئ وعندما يقترب منك اكثر لا تقترب اليك سوى افكار الموت اظن ان المرض قاتلا للامل قاتلا للاحلام يتسلل اليك دون ان تدري لا يهزم كثيرا وان هزم فبمشيئة الله وبالارادة.

.

..............فتح الباب دخل عليها وهي نائمة اخترق جسدها استيقظت من نومها ليست كما كانت قبل ان تنام تغيرت نظرت لوجهها ف المرآة لاحظت عليه التعب والارهاق قالت لنفسها لا داعي للقلق مجرد ارهاق وسينتهي انشغلت باعمالها ومشاغلها ولم تعر الموضوع اهتماما مرت اياما وايام لم تعد قادرة ع الاحتمال ذهبت للطبيب وهنا جاءت الصدمة لقد تسلل المرض اليه دون ان تدري حل عليها الصمت للحظات لم تتوقع ذلك لم تتوقع ان تخونها الحياة تخونها امالها تخونها احلامها لم تتوقع كل هذاولكنه قضاء الله تمالكت نفسها وعادت الى منزلها تفكر هل ستعود كما كانت ام لا يوجد امل ف ذلك نظرت عبر النافذة لتجد آناس يسيرون يعبروا الطريق يضحكوا ويبكوا لا يعبئوا لها خشت ان تنام حتى لا يتمكن منها المرض ع غير علمها اخذت مستيقظة اياما واياما لقد حطمت نفسها بنفسها واستسلمت لشبح المرض حتى اخذها معه ف دنيا غير الدنيا مكثت معه ليس بالقليل وليس بالكثير ثم جاء اليها الموت لم تقدر ع ردعه فهو الوحيد الذي لا يقدر احد ع ردعه اخذها بعيدا واخذت تنظر مرة اخرى ع الطريق وع الناس ف هذا الطريق فهي ستراهم لاخر مرة ولكن ما فائدة النظر اليهم فهم اولا واخيرا لايعبئوا بها ... انتهى

.

معرفش جه الكلام ده ف بالي ليه ؟

كنت كاتباه من سنة و10 ايام بالظبط ف الاجندة وكنت هنشره بس مكتبتوش وانا بقلب ف الاجندة لقيته وقلت هكتبه بس معرفش ليه الكابة دي يمكن علشان البلد بقت مليانة عيانيين بامراض وحشه وكلها امراض تؤدي للتهلكه وفيه ناس منهم مش بتهتم انه يتمسك بالامل ونفسيته بتدمر و يموت من الياس مش المرض مش عارفة بس اللي انا عارفه ان الحالة بقت صعبة اوي وربنا يشفي العيانين و ويعافيهم ويحمينا من المرض وشبحه

كلنا ياااا رب

النشرة رقم خمسة

بصوا البوست هيبقى بصيغة بكار مع اني مش بحبه بس مش مشكلة تغيير

بكاار:هوي اصحابي شفتوا الشهر ده حوصل ايه ؟؟

كان عندنا ناجحين كتير اوي من ابتدائي لغاية الجامعة

.

منن اختي نجحت ف الابتدائية لولولولي عقبالكم كلكم وجابت 98% شفتوا الاتفوق

زنجولا باشا جاب جيد جدا وناقصله سنة الامتياز ويبقى دكتور رسمي اينعم بقى دكتور بس برضه

وعندي واحدة صحبتي طب اسنان جابت جيد جدا

واخر االناجحين دودي حبيبتي جابت جيد جدا لولوللولولولي

مبروك لكل الناجحين وهتلاقوا الشربات نازل مجانا مع كل تعليق

.

نيجي لاعياد الميلاد

كان اول الشهر عيد ميلاد البشمهندس محمد باشا كل سنة وهو طيب

.

وبعد كده برضه ف اول الشهر عيد ميلاد زميلي العزيز tschuss:)

فيه اوملاوت ع اليو المهم انا هخليه يخش يقرا كل سنة وانت طيب يا اباشا ورخمبس ع اسس وقواعد ههههه كالعادة والسنة الجاية تاخد ال120جنية من الكلية ومحدش يقول الكلمة اللي بتزعلك (....)ماشي وايه تاني اه ومتتخنقش انت وحسين بتاتا علشان بتبقوا رخمين وانتوا متخنقين :)

.

وبعد كده عيد ميلاد جدو بتاعنا كلنا كل سنة وحضرتك طيب وبالف صحة وسلامة

.

وكل سنة وهبة وهدير اخوات جوجي بخير وف حب تعرفي يا جوجي البوست اللي انت كتبتيه عليهم فعلا جميل جدا ومؤثر ربنا يخليكوا لبعض يا رب

.

بكااار:بعد كده نوران حكت القصة الرائعة ومشرط الشرير كان بيجري وراها وملحقتش تخلص القصة :

ااحببتها لدرجة العشق ضحيت لاجلها بالكثير والكثير ولكنها تركتني ولكني لا اعلم ان كانت هي من تركتني ام انا تركتها ظللت امشي وحيدا ف طريقي كانت مرشدي وصحبتي ف طريقي تركتني ف منتصف الطريق مشيت وحيدا مشيت وكدت ان اصل استدرت اليها ونظرت لعينيها ولكني اكملت الطريق تقافزت افكار داخل ذهني هل فعلت الصواب هل تركي لها وانصرافي عنها كان صحيحا ام كان كرها مني ولكني احبها ولا اعلم لماذا فعلت ذلك ولكن الذي اعلمه اني دائما ع صواب لا اخطأ ارسلت لي لطمه قويا مع الرياح كانها تقول لي لا احد ع صواب دائما تناقضات كثيرة داخل عقلي فانه يدور ويدور لا يتوقف ولكنه تعب وانهك من التفكير لقد حان الان الوقت حان تحديد مصيره هل يستمر بالتفكير وحده دون استشارة قلبه ام يعملا معا العقل والقلب ويبدا قلبه ف العمل ويدق بسرعه واستدار لكي يرجع اليها ولكن للاسف تاخر الوقت ولم يجدها ...انتهى

.

بكار:ووانا ماشي ع النيل برضه سمعت نوران بعد ما هربت من مشرط الشرير بتتكلم مع بوبا ولقيتها بتقوله:

"حوار حدث بالفعل" من فقرة انا والنجوم ومصر من هنالك برنامج من مصر وعن مصر يقدمه لكم انا طبعا

طبعا انتوا شفتوا المرة اللي فاتت عبده اش اش كان هيعمل فيا ايه فمش هعمل حوار معاه المرة دي هعمله مع ابن خالي حبيبي بوبا الجميل

طبعا بما اننا كنا ف شهر فبراير شهر الحب فلازم نتكلم عن الفلانتين

انا: ايه رايك يا بوبا ف الافلانتين داي

بوبا: تعالي العبي معايا جي تي ايه او باور رينجير او تعالي نلعب بينك بانثر

انا :ف سري اكيد ما سمعنيش اعيد السؤال: ايه رايك يا بوبا ف الفلانتين داي

بوبا: ايه ده يا نورانا حاجة حلوة ؟

انا :لا يا بوبا ده يوم الناس بتجيب لبعض فيه قلوب حمرا ةوهدايا وبيبقوا لابسين احمر كان فيه ماتش للاهلي

بوبا:ايه ده ده حاجة حلوة اوي حد جابلك يا نورانا

اناف سري الواد جه ع الجرح: لا يا بوبا

بوبا: تعالي بقا نلعب

انا: استنى يا بوبا انت لماتكبر هتجيب لمين قلب احمر-عايزة اوقعه واعرف اسم صحبته اللي ف كي جي وان-هه

بوبا: اقولك هجيب لمين وبيبصلي نظرة خبيثة

انا : صمت

بوبا: هجبلك انت

انا ف سري برضه يا سلام اخيرا حد هيعبرني : ايه يا بوبا الجمال ده هتجيبهولي يا حبيبي

بوبا:يالله بقى تعالي نلعب

انا : طيب

بوبا: يووه نسيت ده االكمبيوتر بايظ يالله نتفرج ع ام بي ثري او سبايس تون

طبعا رحت اتفرج معاه مش هيجيبلي هديه وقعدت احسب هتجيلي اول هديه بعد كام سنه اكتشفت انها بعد مش اقل من 12 سنة جاتنا نيله ف حظنا الهباب كان معكم محاوركم ناقلا لكم افكار الجيل الجديد نوران ونورت مصر

.

وبكار: وانا معدي برضه لقيت نوران بتالف اغنية بس انا كنت سمعت الاغنيه ديه قبل كده فين يا ترى فين

وماله لو ليله تهنا بعيد وسبنا كل الناس

-يا لهوي ماله طبعا انت عايز تفضحني وهنسيب الناس نروح فيندي مصر كلها زحمة ولو تهنا مش هنعرف نرجع تاني

-انا يا حبيبي حاسس بحب جديد ماليني ده الاحساس-

انت بتحب عليا ولا ايه وكمان بتقولي يا بجحتك اتاريك عايز تتوهني وترجعلها يا سونة يا خاين

-وانا هنا جنبي اغلى الناس جنبي احلى النااس

-ايوه كده اعدل كلامك ده انت كنت بتعك اوي-

كفاية كده عليكوا :)

.

الحمدلله بس انا متاكد اني سمعت الاغنية ديه قبل كده

نيجي بقى للنكته اللي انا عايز اقولهالكوا-ع فكره ده بكار اللي هيقولها مش انا-

غبي راح عمل سشوار عند الحلاق وقال عندي فرح بعد اسبوع وعايز شعري يفضل حلو كده الحلاق قاله بس ابعد عن الميه -- رجع بعد 3 ايام بيقول للحلاق ...... عطشـــاااااااان.

.

واحد فافى وهو نازل من البيت أمه سالته رايح فين؟ فقال لها مش هقولك انا حر ، نزل ووقف تاكسى فالسواق ساله على فين يا باشا؟؟؟ قال له يعنى أنا مقولتش لمامى هقولك أنت

بكار:اشوفكوا النشرة الجاية ع خير

مشرط الشرير: ديه نوران بتحبك اوي ومش هتجيبك النشرة الجاية ودلتني ع مكانك علشان اخدك انت بقى بكااار ابو كف رقيق وصغنن

انا : يا سلام اخيرا هرتاح من بكار ومشرط الشرير يا سلااام ههههههههههه