Wednesday, September 19, 2007

مش عارفه مالي

مش عارفه مالي
.
ايه اللي جرالي
.
اتجننت او اتهبلت او حاجه حصلالي
.
حالة غريبة جيالي
.
بنام كتير و و لا ع اي حاجه ببالي
.
بخاف من قطه متخلفة صغيرة وكانها ليا انا بس وقفالي
.
حاسه بحجات غريبة قلقاني
.
بجد مش عارفه مالي
.
ادعولي ربنا يصلح حالي

Monday, September 10, 2007

رمضان كريم





كل سنة وانتوا طيبين
رمضان كريم
ربنا تقبل منا صيامنا يا رب
مش هرغي كتير المرة ديه هقولكم بس اني فضلت اعلق الزينة ساعه كدا وبعد كده كلها وقعت فجبت مسامير وشاكوش وعملتهم وربطها ولحد دلوقتي لسه موجوده الحمدلله باستثناء كده كل حاجة زي ما هي زي
السنة اللي فاتت

وكل سنة وانتوا طيبين

Thursday, September 06, 2007

بجد كلنا ليلى؟ سؤال



كتبت الكلام ده امبارح وكسلت انشره ونشرته النهارده


انا قاعده ف العربية كده وبفكر اكتب ايه ع البلوج افكار كتيرة وطبعا حاجة محضراها ف دماغي وقلت هروح اكتبها الاقي البلوجر كله
ا

بيكتب عن قضية واحدة زي كلنا ليلى السنة اللي فاتت معرفش ليه جتلي الفكرة ديه اول ما روحت وبتفصح البلوجات لقيت كلنا ليليى 2
ويلكم باك:)
بس السؤال اللي جالي لما لقت البوست بتاع ليلى يعني ليه مكتبوش من سنة ولا عايزين يعملوه يوم معين ؟
مش مشكلة المهم يعني انا قررت اشارك ف الموضوع وما زلت عند رأي ان مش كلنا ليلى زي ما قلت السنة اللي فاتت

بعض الاسئلة اللي موجوده ف البوست الرئيسي بتاع الموضوع

هل انت سعيدة كفتاة ؟

الى حد كبير الحمدلله يعني مفيش حاجة حصلت تخليني اضايق اني بنت بس اكيد ف غيري كتير مضايقين من انهم بنات والموضوع ده بسبب الاهل نوعا ما علشان ف بعض الاهالي مش بيدوا بنتهم الثقة او الحرية ف الاختيار او التعبير عن رايها وده موجود وبيحصل فالاهل هما العامل الاساسي ف موضوع السعاده كفتاه ده

هل تعرفين دورك في الحياة أم تتسابقين وتلعبين أدوارا مرسومة وفقط؟
الحمدلله عارف ومقتنعة تماما انه دور مهم سواء ف الحياة الاسرية او الحياة العملية وخطط اهدافي مش مجرد ادوار مرسومة وانا بمشي عليها بس ده حاجة انا اللي عايزاها وانا اللي حطلها الخطط ديه

.
هل مستعدة أن تدافعي عن وجهة نظرك عموما أم تجبنين عند المواجهة؟وهل ترين جبنك سمة شخصية أم يغذيها من حولك؟
الموضوع ده يرجع للشخصية مش للنوع يعني ف بنات ممكنن تجبن عند المواجهة زي ما بتقولي بس ده راجع لشخصيتهم مش انهم مضايقين او منبوذين ع انهم بنات وف بيبقوا مجبروين ع امرهم
وبرضه حسب الاهل هما اللي ممكن يدوكي الثقة ف المواجهة او يزودوا من حالة الجبن
.
ليلى والمجتمع
ما مشاكل ليلى الملحة في المجتمع من وجهة نظرك؟ ما مصدرها؟ هل يمكن حلها؟ وهل عندك موقف شخصى من واقع الحياة؟
ممكن مشكلة ناتجه عن مشكلة تانية ناتجة عن مشكلة تالتة يعني مجموعة مشاكل ف بعض
الامان : اظن ان البنت بقت مفتقده للامان فا الشارع انا عن نفسي اوقات كتيرة ببقى ماشية عايزة اتلفت حواليا مين جاي عليا مين ماشي جنبي بيبقى عندي هواجس الحمدلله محصليش اي موقف وحش بس اللي بنسمعه ونشوفه يخلي
يخلي الواحد خايف من اي حاجة
المشكلة ديه ناتجه عن ايه ؟؟
ف رائي عن حجات كتيرة منها انعدام الاخلاق والعنوسة عند الجنسين بنت او ولد يعني هيبص ليه بره ؟؟علشان هو اصلا معندوش جوا وده يجبنا للمشكلة التانية لليلى العنوسة
شبح العنوسة يبدأ يطارد البنت من اول ما تتخرج من كليتها يصبر عليها الشبح بيبقى لسه بيبي مش باينله حاجة اول ما البنت تخرج من 25 سنة خلاص الشبح يكبر ويكبر
.
ليلى والرجل:
البنت زي الولد مهيش كمالة عدد

هل ترى المرأة أقل من الرجل في أي مستوى من المستويات؟ و إن كان فعلا، فما هي هذه المستويات؟
يعني مش بالمعنى ده بالظبط بس طبعا ف حجات الرجل ممكن يعملها ليلى متقدرش وفيه العكس علشان ربنا خلق لكل واحد فيهم طبيعة معينة كل واحد المفروض يرضى بيها
مش معنى ان الرجل هو المورد المالي للاسرة انه يبقى الاعلى ف المستوى مش لازم ننسى دور ليلى ف البيت وبرضه ف المورد المالي ف بعض الاحيان
.
ما رايك فى دور الاعلام فى ترسيخ صورة نمطية عن المرأة؟ ومعالجات قضايا المرأة؟ وتأثيره؟
ستوووووووب كده هنخش ف الغلط مرة كنت بسمع لاف ان 100 .6 ولقيت يسرا بتتكلم وبتقول
من حقك تمارسي الرياضة من حقك تعملي مش عارف ايه وايه وايه وايه انا مكنتش فاهمة بالظبط فيه ايه اكتشفت ان ف يوم عاملاه سوزان مبارك للمرأة ليه بالظبط مش فاكرة علشان تتفسح ولا علشان ايه بالظبط مش عارفه
يعني ايه حقها تمارس رياضة يعني يعني هي واخده كل حقوقها علشان تدور ع الرياضة اللي تمارسها
وكمان الاعلام ده هو اللي بيخلي مصر بره عبارة عن شارع الهرم - مع احترامي للشارع مش قصدي اي اساءة اكيد فاهمين قصدي يعني- واللي بيبصوا للبنت المصرية ع انها زي روبي نهضه المستقبل بتاعه مصر
ولما بيناقش قضية بينقشها بركاكة وسخافة فظيعة زي مسلسل حارة العوانس بتاع السنة اللي فاتت مش عارفه حسيت انه مسلسل جارح اكتر من انه بيعالج قضية

اما بقى بالنسبة ليوم كلنا ليلى فانا بصراحه محستش باي حاجة وزي ما قلت ف اول البوست ان انا كنت مستغربة توقف الحركة رغم اني مكنتش مأيداها بس برضه يعني

وف الاخر برضه بكرر كلامي ان كلنا ليلى ومش ليلى كل واحده عندها ليلى من ناحية خاصة غير التانية واسعدتني مشاركتي ف الموضوع


ليلى هنا
اللي عايز يعمل بوست عنده ويجاوب ع الاسئلة
يعمله

Monday, September 03, 2007

سياتي هذا اليوم



اخفي مشاعري دائما

.


لا احب ان اظهرها لا ادري ما السبب

.

ولكنها لن تختفي الى الابد

.

سياتي اليوم الذي تظهر فيه


.


حتما سياتي هذا اليوم

Sunday, September 02, 2007

اوقات


اوقات ببقى عارفة انا عايزة ايه واوقات مش ببقى عارفة خاالص
اوقات ببقى عايزة اخلي احلامي حقيقة واوقات مش بيبقى عندي احلام اصلا

اوقات ببقى عايزة اطير لفووووق واطير واطير واوقات ببقى مش عارفة ازاي امشي ع الارض اصلا
اوقات بحس ان انا اكتر واحدة مبسوطة ف الدنيا واوقات بحس ان محدش مضايق زي

اوقات ببقى عايزة اعمل حجات كتيرة كويسة واوقات ببقى مش عايزة اعمل حاجة غير اني انام
اوقات ببقى عايزة اغير حجات كتير مضايقاني فنفسي واوقات بتبقى نفسي عجباني كده ومحدش ليه دعوة بيا
اوقات بتطلع للاحسن واوقات مش ببص غير للقليل

اوقات بجري وبتنطط وبضحك واوقات ببقى عايزة اعيط واعيط
اوقات برغي وبرغي واوقات مفيش كلمة بتطلع مني ده يمكن ابو الهول يتكلم وانا لأ
اوقات بحلم وبحلم وببقى حاسه ان احلامي هتتحقق واوقات مصدقش ان فيه حاجة اسمها حلم يتحقق واتوقع الاسوأ دايما
اوقات بملى الجو فرح وضحك واوقات بملاه كآبة وارف

اوقات ببقى طيبة واوقات ببقى شريرة
اوقات ببقى شمعة واوقات ببقى نوران واوقات ببقى حد تالت بيجمع بين الاتنين نوران وشمعة وده الغالب
اوقات ببقى عايزة اكتب علشان الناس تقرا وتضحك وتبقى مبسوطة وهي بتقراه واوقات ببقى عايزة اكتب وخلاص ف الحالتين بكتب اللي جوايا بس الطريقة بتكون مختلفة ف الحالتين
اوقات وسعات ودقايق وثواني وحجات كتيييرة جوايا مختلفة
متناقضات كتيرة بتبقى موجودة ف حياتي وكل واحدة عكس التانية خالص مفيش وسط
مش عارفة ليه ؟