بوست سررريع جدا جدا :)

وحشتوووووني جدا جدا

ووحشني البلوج جدا جدا

وعندي كلام كتير جدا جدا

بس الوقت قليل جدا جدا

ومش هعرف اقول اي حاجه جدا جدا

وحاجه عجيبة جدا جدا

ايه حكاية جدا جدا ديه

المهم يعني اني اختلست 20 دقيقة بالثانية وقولت لماما اقعد اشوف البلوج اشوف اخبار الدنيا والحياه ف العالم الافتراضي وملحقتش اعلق عند حد ولا اخش ع الخمسين الف بلوج اللي اعرفهم ولا اعلق لحد ولا ارد ع التعليقات ولا ابص ع الميل ولا الفيس بوك ولا اي حاجه ولا اكتب حاجه من اللي انا عايزاها ده انا عندي حجات كتيرة جدا عايزة تتكتب وباقي من الزمن 5 دقائق واقوم اكمل اللي ورايا عايزه اقولكم حجات كتيرة وعندي تاج كمان من الدكتور احمد زورديك :) متقلقش هيتعمل انشاء الله ف اقرب 20 دقيقة هختلسهم تاني

يلا كفاية كدا لحسن ماما هتيجي تقومني دلوقتي بس ادعولي اعرف اخش تاني لحسن باين كدا اني هنسى الكمبيوتر ده

يلا سلام :)

المشاركه الاساسية :)

ينفع ابقى مبسوطه

ومفيش اي ظروف حواليا كويسه

ينفع ابقى بضحك

ومفيش اي حاجه تضحك

ينفع العب

ومفيش اي حد يلعب معايا

ينفع اعيط

ومفيش حد يطبطب عليا

ينفع اتكلم

ومفيش حد يرد عليا

ينفع يكون العيد ع الابواب

ومرحش افتح الابواب

كل سنة وانتوا طيبين

كلوا الكحك والبتيفور وحوشوا العديات :)

عيد سعيد

-باين كده فكرت البوست مستوحاه من اعلان زاين الجديد بتاع العيد المشاركه اساس الحياهوشكرا :)-

بحب الحياة:)

وانا بنشر الغسيل والحياة بمبي قصادي كدا اذ فجأة احس احساس عجيب يعملي فرح وانتشاء كدا اكيد يعني مش من الغسيل اللي بنشره ولا التلفزيون الرخم اللي بتفرج عليه ولا اي حاجه بس حسيت كدا ان انا قال ايه بحب الحياة يا لهوي اول مره احس بكده بالرغم من كل حاجه رخمة ووحشة وسخيفة فيهاوايه يعني معدلكوش الحجات الرخمة اللي ف الحياة ديه اه والله بس فجأة واحده كده

وبدون اي اسباب علشان محدش يقولي حاجه بس انا كنت بتكلم مع البشمهندز تشوس وخلاني احس اني بحب نفسي وبالتالي بقيت احب الحياه اذ فجاة كده بسمع كلام مااما من غير ما اقولها لأ خالث وديه حاجه غريبة اوي عليا وتديني كل يوم دعوتين تلاته كدا وهي صايمه ده يخليني احس بسعاده بابا لسه موجود معانا باستثناء انه كل شوية بيشغلني اعمل حجات بس برضه موجود ده محسسني بسعاده وامان اول مره ابص لنص الكوباية المليان بتفاؤل وحاسه ان ربنا مش بيسيب اي حد لو محتاجله ربنا المدبر بيعمل كل حاجه علشان سبب احنا مش عارفينه ممكن نعرفه وممكن منعرفوش بس بيخترلنا الصالح والاحسن

لازم الحياه يبقى فيها مشاكل علشان نحس بقيمتها مش مشلكه اننا نتعب شوية بس ف الاخر نحس بالفرح او السعاده او كده

نحس ان فيه امل ف بكره حتى لو مفيش امل يعني ليه ننكد ع نفسنا

لما بننكد ع نفسنا وبعديها بشوية نفرح نقول ايه الهبل ده ليه مش واحنا ف عز الازمة او الضيق نقول ان شاء الله ربنا هيفكها من عنده نبص لكل حاجه وحشه بتفاؤل نجرب نفرح وخلاص نجرب نحب الحياه نجرب يبقى عندنا امل مش عارفه انا بتكلم كاني ف برنامج اذاعي عجيب بس هو ده اللي جوايا وانا بحب اطلع اللي جوايا برايا زي ما انتوا عارفين

بس انا بجد حاسه اني بحب الحياه وربنا يستر بقى لحسن اجيلكم بكره اقولكم عايزه اعيط :)

نظااااااااارتي

اه واه نظاااااااااارتي اين ذهبتي لا ااقصد ماذا حدث لكي

اعاااااااااااااااااااااااا النظارة بتاعتي ماتت ولا ايه

نظاااااارتي هعيش ازاي انا دلوقتي من غيرك يا نظارتي

مذاكرة كمبيوتر اكل غسيل تلفزيون كل حاجة بعملها بيكي

كل ده علشان مرحتش بيكي الكلية ولبست العدسات يومين

نظااااااارتي

اينعم فيه نظارة غيرك استبن وشكلها حلو برضه بس انا اتعودت عليكي

هتقولولي ايه اللي حصلها

هقولكم معرفش بفتح الجراب بتاعها واجدها من غير مخدتها اه محدش يقولي طب ركبلها سرير ولا حاجة والمخده مش لقياها

قولت يعني عادي جيت البسها لقيت دراعتها سايبه

اعاااااااااااااااا قولت اعمملها بالمفك

اعاااااااااااا معرفتش قولت خلاص هطلع الاستبن فضلت ادور نص ساعة عليها لحد ما لقتها

ولبستها مش شايفة حاجة الابعاد ضايعة خالص اعاااااااااااااااااا

نظارتي حبيبتي هفتقدك بس بصراحه يعني انا مكنتش بحبك اوي وكده احتمال اجيب نظارة جديده

هتقوليلي مكنتش بحبك ليه هقولك يا ستى علشان انت جيبتي بعد نظارتي الحبيبة اللي كنت بحبها واللي اتكسرت فجأة واحده وانت جيتي بعديها نقدر نقول مجرد تعود بس هفتقدك برضه

انتظروا بوست عن النظارات بس لما اجيبه من عند رضوى لو لسه عندها علشان انا كنت كاتباه ع الكمبيوتر وبعته لرضوى علشان تقولي رائيها ايه واتمسح من عندي فهنحاول ندور عليه وننشره -اللي هو انا الناس الجمع دول- وكل سنة وانتوا طيبين خلاص العشرة الاواخر جم اهم الهمه بقى عايزين نلحق ليله القدر يا رب

وكل سنة وانتوا طيبين :) -