Monday, September 13, 2010

زعلانه منك

انا زعلانه منك ايوه زعلانه مش فاهمه يعني ايه ده سافرت و سبتنا انا و هي قولت ماشي شغل لكن برضه متتصلش بينا يبقي لا ازعل

اه انا زعلانه بس معيطتش علشان انا وعدتك اني مش هعيط

اه كنت هعيط لما صحيت الصبح ملقتكش

و كنت هعيط لما ناديت عليك و مردتش

و كت هعيط لما هي جت قالتلي هو بابا فين مش هيفطر معانا

وكنت هعيط لما قررت ننزل انا و هي نتفسح و انا اللي سوقت ما ليا حق طبعا بقالي ٥ سنين مسوقتش من ساعت ما بقيت معايا

بس قررت معيطش بقي و قلت خلاص نعمل حاجه نفرح بيها

روحنا كارفور بقي و قررنا نجيب كل انواع الشيكولاتات اللي بنحبها انا و هي طبعا انت مش بتحبها في جبنالك دريم كيك بتاعتك اللي بتحبها عشان لما تيجي تاكلها

بس و جبنا بالونتين هيليوم من اللي انا بحبها واحده ليا (ما انت عارفني طفلة:)) علي شكل ميكي ماوس و واحده ليها علي شكل تويتي كده هو مكنش تويتي اوي كان معوق شويه بس هي كانت فرحانه اوي بيها صورتها صور كتيره و زمان الصور وصلتلك طبعا ولا ايه :)

بس المهم البالونه طارت منها و لسه هتعيط بقي روحت ضحيت ببالونتي بس عشان تبقي عارف لما تيجي هتجبلي واحده بدلها

المهم بقي روحنا و كلنا الشيكولاته و لعبنا بالباونه بس برده لسه زعلانه بقي

وهفضل زعلانه كده عشان تبقي عارف

لحد ما تتصل انا قولتلك اهوه

ملحوظه :

اوعي تسافر تاني و تسبنا ان شاالله لو كنت جاي في نفس اليوم زي انهارده كده

بحبك و هي كمان بتحبك


Thursday, September 02, 2010

عارف


عارف جريت النهارده علي التليفون علشان اكلمك دورت علي اسمك بس ملقتوش
عارف فتحت الالبوم بتاعنا ملقتش ليك ولا صوره كانك مكنتش معايا يوم
عارف انت وحشني اوي
فتحت الصندوق الكبير اللي حاطه فيه اللعب اللي انت جايبهالي و الجوابات اللي كتبهالي ملقتش فيه اي حاجه
هو انت روحت فين
هو فيه حد مسحك من حياتي كدا
ولا انا اللي اتمسحت من حياتك؟؟
انا مش عارفه ده حتي رقم تليفونك مش فاكراه!! ازاي كدا
ازاي انسي رقمك ده كان هو رقمي بس اخر رقم اللي متغير
ايه ده نسيتوا!!
عارف افتكرت في لحظه اني مكلمتكش بقالي ٥ سنين
تخييل خمس سنين!!!
ده كان بيعدي عليا ٥ ساعات مكلمكش فيها و ببقي هتجنن!!
عارف انهارده بس حسيت انك وحشني عارف ليه؟
لما فتحت كتاب قديم من ايام الكليه و لقيتك كاتبلي في طرف الصفحه "بحبك عمري ما هسيبك" ضحكت اوي و قلت ياااه ازاي مقطعتش الصفحه ده!!
عارف خطوبتي بكره تخييل هتخطب لواحد تاني مش ليك
علي فكره انا مبقتش احبك انت بقيت مجرد ذكري في حياتي بس
عارف عرفت انهارده من داليا صحبتنا انك جيت من السفر و سالت عليا
عارف مسالتش عليك ابتسمت بس و قلت حمدلالله علي سلمتوه و ادتلاها الدعوه بتاعت خطوبتي
عارف.... ولا بلاش انت مبقتش حد في حياتي عشان تعرف حاجه...