برست بلاس ولا هيداندشولدرز

تحددديث:

اللي يخش يجاوب ع الاسئلة مفيش غير عربي بس اللي جاوب ابعتوا الاجابات ع 6065 والاسامي هتنزل ف النشرة بعد عمر طويل وهقول الاجابات الصحيحة ف التعليقات مش هقولها علني لحسن نتقفش ولا حاااجة هههههه عادي بهيس يعني

.

.

برت بلاس ولا هيد اند شولدرز

لا لا ده مش اجابة سؤال ملكة جمال مصر انا سمعت اوشاعة مغرضة بتقول انهم بيسالوهم بتغسلوا شعركم بايه وده اللي ناقص واحنا مالنا ان شالله بيغسلوه بجاز واحنا مالنا وديه اسئلة ثقافية تتسال اصلا وفيه حد بيتفرج ع مسابقات من هذا النوع ؟؟

المقصود بعنوان التدوينة ان البوست 2 ف 1 وانا مش عارفة انهي شامبو هو اللي 2 ف 1 ابعت الاجابة ع 6065 وهتكسب علبة شامبو هدية

:)

طبعا امباارح كان فيه ماااتش جامد جدا باستثناء ان ف اربع اجوان دخلوا كده معرفش ازاي هههههه اكيد حطوهم ف الجون بس كان ماتش حلو اوي كنت حاسة ان انا الاهلي وبرشلونة الكلية من كتر الاجوان اللي جت فيا وف الاهلي اخر جون دخل ف الاهلي كان بتاع ايتو ف اخر دقيقة وانا اخر جون دخل فيا بتاع الكيميا 13 من 20 شفتوا الهنا والسرور مش عارفة طب انا اتدربت والاهلي ادرب يبقى العيب فين العيب ف النظام وسعد زغلول قال مفيش فايدة والجيش بيقولك اتصرف وبمناسبة الجيش شفتوا يا جماعة الريس جه يتفرج ع الماتش والاهلي احرجه ودخل فيه 4 اجوان عارفين امبارح ف الماتش كان مدحت شلبي بيعلق المهم بيقول ان ف ارض الملعب دلوقتي ناس بالملاين والمليارات بفلوس اكتر من ميزانية النادي الاهلي للنشاطات انتوا جايبين الناس تقروا عليهم ولا ايه لا ولما رونالدينهو نزل الراجل ده جاامد والله لعيب فعلا المهم ضحك لعصام عبدالفتاح ومدحت شلبي قعد يقول هيروح البيت يقولهم ده رونالدينهو ضحكلي لا ويقولك مش مهم النتيجة فكرني بنفسي وانا بقول المهم انجح مش لازم تقدير وقد يقول المهم ان احنا جبناهم فكرني بنفسي وانا بقول المهم اني دخلت الكلية وخلااص

.لا بس رونالدينهو جاي ليه ده حتى مرحش مع البعثة يشوف الاهرامات ده كان واقف ف الماتش مش بيجري كانه بيوجهم ويلمس الكورة بس ده اللي كان بيعمله حاجة غريبة

.

طب عارفين الريس كان جاي ليه ؟ اللي يعرف اجابة السؤال يبعتلي ع 6065 والجايزة تذكرتين ماتش الاهلي وبرشلونة الجاي هههههه

يبقى لحد كده عندنا سؤالين وهديتين صح كده

المهم كل سنة وانت طيب يا اهلي وعقبال 100 سنة كمان وتجيب برشلونة وتكسبهم انت بقى هما كل شوية يكسبوك مرة 6 واحد من كام سنة والمرة ديه 4 صفر شكلك هيبقى وحش اوي

.

المهم نيجي للموضوع التاني :)

اكتشفت اننا واخدين اجازة النهاردة وف ناس مش هيروحوا الشيخ زايد واحنا هنروح والرسمة طلعت صعبة ايه الكلام الل بقوله ده المهم ان النهاردة تحرير سينا تعرفوا اني مكنتش اعرف غير ف 3 اعدادي اننا بناخد اجازة اليوم ده انا كنت بحسب 6 اكتوبر هو اللي عملوا فيها الحجات كلها بس لقيت ف يوم تاني بتاع تحرير سينا طبعا انا مش عندي اي خلفية تاريخية عن اي حاجة ما شاء الله عليا المهم يعني انا بحب يم الاجازة ده جدا طبعا انا ورايا بلاوي متلتلة واستاتيكا مركونة من الترم الاولاني عايزين ننعش الذاكرة ومتفرجتش ع الطريق الى ايلات نفسي اشوف الفيلم ده كامل ولا مرة عملتها وشفته دايما بنام ف نصه وانا بتفرج عليه المهم ايه اللي جابني بقى هنا معرفش حد جابني ومشي وسابني المهم اني هنا اه ف تحرير سينا بفتكر قصة عنق الزجاجة بتاعة ادهم صبري كان عدد خاص مش مشكلتنا المهم سينا رجعتلنا وهتروح مننا بمناسبة تحرير سينا وانا قاعدة بذاكر استاتيكا جتلي افكاري تعطلني كالعادة هي الافكار السودا ديه جتلي قبل كده بس المرة ديه جامدة بمناسبة ان الريس راح ماتش الاهلي وبرشلونة وقعد حفيده ع حجره وبمناسبه انه قائد الضربة الجوية

عندنا دلوقتي اسئلة كتير وابعتوا اجابتها ع 6065 ومش عارفة ايه اللي ممكن يحصل هبعتلكوا صورة للريس سنة 2017 ماشي :)

ههههههه

طبعا قبل الاسئلة ف حاجة عايزة اقولهاا ف كذا حاجة حصلت وانا ضاربة طناش ومش عايزة اكتب عنا تعديلانت دستورية القبض ع عبد المنعم انا اخواني ومش عارف ايه تاني حصل

المهم ان انا عندي اثئلة ثغننة جدا جدا

الثؤال الاول:

ماهي انجازات اللئيث باثتثناء الضلبة الجوية ف حلب اكتوبل ؟

الثؤال الثاني:

ما هو قيمة ملتب اللئيث باثتثناء المكافات واموال الشعب؟

الثؤال الثالث؟

هل اللئيث وظيفة حكومية زي كل الوظايف يعني طلع ع المعاش وياخد علاوات وحجات كده ولا ملوش سن علشان يطلعع ع المعاش؟

الثؤال اللابع:

بعد 150ثنة الا لبع هيبقى حفيد اللئيث اللي شفناه امبالح ع حجله ف اللئاسة ولا ايه؟

الثوال الخامث؟

انا بكتب ليه السين (ث) وليه الراء(لام)وليه عماد متعب امبارح ضيع اجوان كتيييير؟

واخيلا ااقصد اخيرا ابعتوا اجابة ال12 سؤال اللي ف البوست -انا معرفش هما كام سؤال-ع 6065 وهتنزل اسماء الفائزين ف النشرة ان شاء الله بعد عمر طويل واحتمال اخد وقت مستقطع علشان الفاينل ع الابواب وعايزة افتحله الباب واقف جون حلو كده للكلية واروح اجيب فيهم جوون لحسن المرمى بتاعي هيقع خلاص بس ممكن تلاقوني داخلة تاني عادي خااالث ااقصد خااالص :)

سلام