امبارح صدف اني مشيت في شوارع المهندسين و كان يوم خميس و روحت لبيت جدتي و ده خلاني افتكر ذكريات يوم الخميس و خلاني احس اني مفتقدة يوم الخميس بتاع زمان
يوم الخميس هو يوم العيلة بنتجمع فيه كل واحد جاي من جامعتة مدرسته شغلة و نيجي كلنا على بيت جدتي بيت ماما حسنات
كنا بنقعد نتغدا كلنا سوا و نتبسط و اوقات نبقى مضايقين من الاكل اللي عاملينه نقول يووه دول عاملين فتة حد ياكل الفتة في غير العيد و شوية نقول يوووه عاملين خضار حد ياكل سبانخ في الصيف و شوية نقوول يووه دول عاملين كفتة برز بس بعد كل ده الاكل كان جميل و معمول لينا بحب و ناكله و نتبسط كلنا
اوقات بقى خالتي تدلعنا و تعملنا رزبلبن او مهلبية بيبقى اخر دلع بعد الاكل و اوقات كانت تعملنا علي لوز تبعت حد فينا يجيب ربع سوداني عشان تعمل علي لوز و كلما نبقى متحمسين لعلي لوز ! و عمري ما فهمت ليه اسمه علي لوز و هو اصلا عسل بالسوداني 🤣
بعد الاكل نشوف مين هيشرب بيبسي و لو حد حط تلج لازم يملى قالب التلج عشان نيجي نلاقيه مملي الخميس الجاي
بعد الاكل و البيبسي بقى لازم ننزل نخرج معرفش بنجيب ايه بس لازم نخرج مرة نروح شارع لبنان مرة نروح شارع مصدق مرة شارع سوريا مرة سيتي مول مرة ميدان الجيزة المهم ننزل نخرج
لو ختمت بقى ان نبات مع بعض ف ده بيكون احلى ختام و ممكن نجيب فطيرة بالسكر جميلة ناكلها بليل و نقعد نسهر طول الليل في البلكونة لحدما نتعب و ندخل ننام
مفتقدة جدا يوم الخميس بالذات اني بقيت اقضي الخميس ده في التمارين و مش بعرف اعمل اي حاجة من حجات زمان غير كل فترة كبييييرة لما اقدر اعملها و ممكن لما اروح و هما متجمعين الاقيهم عاملين كفتة برز و ساعتها حظي بيكون مش قد كدا🤣
