Tuesday, January 09, 2024

الكيكة بعد ال٣٠


عمل الكيكة مختلف جدا بعد ال ٣٠ !! 

ده اللي جه في بالي وانا بعمل كيك امبارح ولا باصه ف مقادير ولا باصه ف اجندة ولا عامله اي قيود على اي حاجة بعملها


بقيت اعمل الكيك بمهارة و سرعةكبيرة مش بس كدا انا كمان مبقتش استخدمت المضرب الكهربا او حتى الكيتشن ماشين او الخلاط في عمل الكيك مش عارفة من امتى بس تقريبا من اول ما البنات بدأوا يدخلوا معايا نعمل كيك و بقينا نستخدم المضرب اليدوي و ده عشان نستمتع في مزج المكونات و تحويلها لخليط سحري رائع قوامه مظبوط و ريحته بتجنن الواحد و هي طالعة من الفرن 


خديجة -بنتي الصغيرة- شريكة عمل الكيك معايا

اول ما نيجي نعمل الكيك  تقولي استني هقولك المقادير ٢ دقيق ، ١ الا سكر ، ٤ بيض ، شوية زيدة و شوية لبن 🤣 و نبتدي نعمل الكيك اضرب شويه بالمضرب و هي شوية و اختها الكبيرة شوية و نبهدل المطبخ كله عشان نعمل الكيك❤️

كل مرة تقولي ماما نعملها كيكة ملونة ارفض لان كان ف محاولات فشلنا فيها كتير 

تقولي طب اعمليها فانيليا او بصي اعمليها ماربيل بتبقى حلوة اوي و هي مكس كدا يا ماما.


بحب ابتدي بالبيض و الفانيليا مع السكر اكسر البيض مع بعض و احطله الفانيلا تضرب جامد بالمضرب اليدوي كأني بصرب اي حاجة بتضايقني بعد كدا انزل بالسكر اضرب اضرب اضرب لحد ما يختفي و يمتزجوا بخفة مع بعض احط الزبدة المغشوشة بزيت و اكمل ضرب لحد ما يدوبوا في بعض و احط الزبادي اضرب اضرب اضرب الخليط كله داب في بعض ايدا انزل بالدقيق انا للحقيقة بنخل الدقيق و البيكينج باودر على الخليط و اقلب لحد ما الدقيق يختفي و يدوب و يحول القوام للخليط السحري اللذيذ بعد كدا نقسم الخليط نص بالكاكاو و نص فانيليا و نجيب قالب الكيك السحري المستطيل و نحط شويه من هنا و شويه من هنا و في اخر خطوة نشكلهم مع بعض بحيث ان الكاكاو يحضن الفانيلا عشان تطلع احلى ماربيل كيك  -عشان تعجب خديجة و تقولي حلوة اوي -و نحطها في الفرن 🤩


 و طبعا لكل جواد كبوة جيت كدا من كام سنه جربت دقيق الكيك و عملت غلطة صغيرة و هي اني حطيت بيكينج باودر على الخليط اللي طلع عليه اصلا بيكينج باودر و كانت النتيجة ان الكيكة باظت و طلعت هابطة ! و انا بكلم ف التليفون و بقول لمامتي يا ماما الحقيني الكيكة باظت و طلعت هابطة مريم -بنتي الكبيرة- سمعتني و قالتلي لا انا مش هاكل كيكة مهبوطة و كان عندها ساعتها ٤ سنين😂😁 عادي لو عملنا كيكة هبطت مننا مره مفيش حاجة هتحصل في الدنيا و ساعتها اتعلمت ان دقيق الكيك مش بيتحط عليه بيكينج باودر😁

Friday, January 05, 2024

ام سينا و اخواتها

 


ام سينا .. دايما بتكون في بالي ام سينا مرات البواب اللي في بيتنا القديم

ام سينا كانت امرأة عشرينة بتساعد جوزها زي اي ست مصرية اصيلة فاكرة وانا ٩ سنين و روحنا بيتنا و كان فيه عم ابراهيم البواب و ام سينا مراته ام سينا بجد كانت لهلوبة انا كنت مسمياها كدا كانت بتعمل كل حاجة تجبلنا الطلبات و تمسح العربيات و تساعد عم ابراهيم ف حجات كتير كانت بتصحى



من الفجر تغسل كل عربيات العمارة و تلمعها فلة و ابتسامتها مش بتفارقها كنت بنبهر بنشاطها و ابتسامتها كنا بنكلمها عبر الانتركم في عصر ما قبل الديلفري ام سينا عايزين ب ٢ جنية فينو (ايام ما كان الفينو ب ١٠ قرووش) عايزينه من قصر السروات يا ام سينا مش من الفرن اللي جمبنا ام سينا عايزين لبن و زبادي اي طلب كنا نكلم ام سينا عبر الانتركم كبرت و بقى عندي عربية كانت بتلمعهالي كل يوم الصبح بكل نشاط و عم ابراهيم ياخدها يركنهالي لما ارجع و في يوم مشيت ام سينا و عم ابراهيم من عندنا في العمارة و يقال انهم رجعوا البلد بعد كا بنوا هناك عمارة و اتنين والله و اعلم بس دايما ام سينا في بالي هي و نشاطها و ضحكتها

 بعد ما ام سينا و عم ابراهيم مشيوا جالنا بواب جديد عم احمد و مراته ام نسمة

ام نسمة  متفرقش عن ام سينا غير انها كانت اكبر منها كتير في السن ضحكتها مش بتفارق وشها و الحقيقة معرفش كانت مستحملة عم احمد ازاي كان مبيعملش اي حاجة الحقيقة و هي بتعمل كل حاجة تجيب الطلبات تمسح سلالم العمارة و تلمع العربيات من الساعة ٥ الصبح كانت بشوشة جميلة 

ام اسلام .. بعد ما نقلنا بيت جديد اتعرفنا ع ام اسلام الحقيقة معرفش عنها حجات كتير غير انها كانت بتقابلني الصبح تدعيلي لما اجي رايحة الشغل و نفس النشاط و الهمة بتاعت اخواتها ام سينا و ام نسمة

ام كريم : امرأة سيتينة الآن كانت بتساعدنا في البيت من ٢٥ سنة تقريبا طبعا ارملة و عندها ٣ اولاد بتعمل كل اللي في مقدرتها عشان تعرف تعيش و تعملهم اللي هما محتاجينه كانت نشيطة بالرغم انها كانت بطيئة بس كانت نظيفة جدا وبتعافر و بتحارب خلاص حوزت ولادها ال ٣ و اعتزلت المهنة و احنا مكناش عارفين نعمل ايه من بعدها فترة طويلة



ام حامد .. بتساعدني في تنظيف البيت امرأة اربيعينه اترملت من ٨ سنين و بدأت تنزل عشان تصرف على ولادها عندها ٤ ولدين و بنتين مش هقولكم ع النشاط و الهمة و الضحكة اللي منورة وشها و دايما كل ما اقولها يا ستي هتعملي كل ده ازاي تضحك و تقولي كلمتها الشهيرة " على الله " و فعلا الاقيها بتتحل من عند الله لدرجة اني بقيت اقول زيها ع الله و هي بتضحك في كل موقف صعب يقابلها و تكلمني و تقولي على الله و سبحان الله فعلا بيتحل 


كتبت الكلام ده لاني حسيت ان عايزة اكتب عنهم وانهم علطول في بالي رغم ان بقالي سنين مش بشوفهم ما عادا ام حامد لسه معايا لحد دلوقتي

 و ان في طبقة من الستات المصرية تعبانين و شقيانين و في مختلف الاعمار و الازمنة و كلهم مشترك بينهم ضحكتهم اللي بتخليهم يكملوا و سايبين كله على الله   

Monday, January 01, 2024

يناير ٢٠٢٤

 اول حاجة بتيجي في بالي كل سنة جديدة المدونة هنا و باجي اجري اكتب بوست كأني بثبت لنفسي ان لسه ف حته شمعة صغيرة موجودة 

كل سنة و انت طيبة يا شمعة بقى عندك ١٨ سنة ❤️❤️

Saturday, May 20, 2023

متى ؟؟

متى هي اللحظة المناسبة للبوح!!

للبوح بكل ما هو في صدورنا

نصرخ باعلى صوت لنعلن عن ما نريد

لا احب هذا 

لا اريد ان افعل هذا

لا استطيع الاستمرار هكذا

لا استطيع كتمان هذا

ماذا افعل

اجلس حائرة

ابكي و ابكي

لا ادري من انا و ماذا افعل هنا 

فقط  مرة اخرى اسأل نفسي

متى !!

متى سيتغير كل شئ ! 

متى هي اللحظة المناسبة للبوح !  

Monday, January 09, 2017

الزمن

البلوج ده اتعمل ف يناير 2006 يعني من 11 سنه !!  ساعتها كنت بنت صغيره طموحه في ثانوي دلوقتي بقيت زوجه و ام ومهندسه و اتغيرت كتير اللي اكتشفته و انا بقلب في البلوج اني كنت صغيره اوي فعلا ازاي بكتب الحجات ديه شدني بوست كنت كتباه اسمه تخيل هنبقي ايه بعد 10 سنين اللي اكتشفته ان مفيش اي حاجه من البوست اللي انا تخيلته ده حصل و الكلام اللي حصل دلوثتي انا حتي مكنتش عارفه اتخيله من كتر ما هو غريب انه كان يحصل
الواحد المفروض ميخافش من بكره هو مش عارف هيحصل ايه بكره فعلا الزمن بيغير الناس و بيغير المواقف و بيغير الاحداث و الطموح و بيغير الاحلام !!
شمعه كل سنه و انت طيبه كدا انت كملتي 11 سنه :)

Saturday, June 23, 2012

فضفضه

التدوين اصلا اني ادون اللي انا عايزاه مش لازم اكتب كلام سياسي ولا اكتب كلام منمق ليه اكتب في البلوج و مكتبش في ورقه مثلا !!
مش عندي كشكول حلو  اكتب فيه و غير كده عايزه اكتب علي الفضاء الاليكتروني 
بجد كان عندي كميه افكار كتيره جدا بمجرد ما فتحت الكمبيوتر بجد اتبخرت بخ مفيش افكار !!
عماله بعصر دماغي اجيب افكاري مش لاقيه 
لسه زي ما انا ملقتش شغل !!
روحت اتنين انترفيو و محدش كلمني
للحظه او بصراحه للحظات حسيت اني بليده انا مش شاطره ازاي ابقي خريجه هندسه جيدجدا و مش لقيه شغل يبقي اكيد انا اصلا مش شاطره !!
مش عايزه اشتغل مهندسه مش عايزه اشتغل خالص
قريت قصه اسمها باقي من الزمن ٩٠ يوم نكدت عليا مش بحب النهايات الرخمه حتي لو البنت هتبقي مبسوطه بعد اللي اختارته بسبرضه كانت مكن تبقي نهايه سعيده و تبسطني !
عايزه اكتب كتاب
عايزه اتعلم الرسم
عايزه اعمل مشروع
عايزه اطبخ حلو
عملت كيكه بالشيكولاته و الصوص كانت تحفه !!
انا اصلا بطبخ تحفه ! قولتلوا كدا و هو مش مصدقني قولتلوا انا اصلا شاطره ف هبقي شاطره في اي حاجه بعملها طبخ لعب رسم اي حاجه هبقي شاطره 
اللي مش شاطره فيه اوي التعامل مع الناس بس بجد اتشطرت جدا !!
انا اتخطبت !!

Friday, April 06, 2012

شمعة من تكون ؟

شمعة من تكون ؟
بنت في ثانوية عامة حلمها تدخل كلية هندسة مكنتش محددة اوي هي عايزة هندسة ليه هل تدخل اتصالات ولا عمارة كان حلمها من كي جي وان انها تطلع تبني عمارات فكان طبيعي جدا تدخل هندسة المهم بقي شمعة نجحت بتفوق ف ثانوية عامة و قدرت تحقق فعلا حلمها و تدخل كلية هندسة في اول سنة شمعة بدأت تتغير جابت ضاد في الرياضة اول صدمة تاخدها في تاريخها التعليمي بس قامت و وقفت و كملت تاني جه القسم بقي دخلت قسم تالت خالص يقال انه جديد يعني و اللي بيتخرجوا هيتخطفوا خطف المهم القسم كان حلو يعني و هي حبت القسم اوي و كل سنة جيدجدا و بتاع هي مكنتش عايوة تجيب امتياز مكنش في طموحها الامتياز حلو جيد جدا المهم شمعة بدأت تختفي تقريبا هي فعلا مبقتش موجودة خالص شمعة اختفت طريقة الكلام طريقة اللبس طريقة التفكير طريقة الهزار الضحك كل حاجة اختفت مبقتش موجودة شمعة !
بس اتخرجت بقي من الكلية بقالها 10 شهور كان حصل في البلد ثورة ولا حاجة اتصلحت في البلد ولا حاجة باظت هي بايظة اساسا و وقف قطاع المقاولات او قول يعني بقي حذر انه يشتغل بشده و كدا فالقسم الجديد اللي كانوا هيخطفوا الناس خطف متخطفش منه حد !! نوران بقي قاعدة دلوقتي في البيت مش لاقية شغل و بتدور علي شمعة علشان مش لقياها
بقالها 10 شهور تقريبا بتدور علي شمعة و مش لقياها طلع هوايات جديدة لنوران
مش عايزة تشتغل في الهندسة عايزة تبقي مدرسة
بقت بتطبخ بس لازم من الكتاب علشان المقادير تبقي مظبوطة
بقت فاضية مورهاش حاجة تانية
بتعمل الماجستير نجحت التيرم الاول في التمهيدي
عايزة تعمل كتاب لقصص تكتبها بس من ساعتها مش بتكتب قصص
و قاعدة بتدور علي شمعة !!

Sunday, January 29, 2012

ليس سوى انعكاس عينها داخل عينيه

هي : عارف ان البنت ديه بتحبك و انا بضايق اوي و بغيير اوي

هو مقاطعا : بتغيري من ايه بس يعني انا شايف حد غيرك !!

هي : لا بس هي بتحبك انت مشوفتهاش بصتلي ازاي لما شافتني معاك من يومين !! ديه كانت هتاكلني !! و مش بتشوفها بتبصلك ازاي !!

هو : يا حبيبتي ديه طيبه اوي و بتساعدني في حجات كتيرة و مفيش اي حاجة من اللي بتقوليها ديه موجودة

هي : طب انت بتعاملها ازاي بتعاملها حلو صح انت اللي عملت كدا اصلا انا عارفاك بتعامل البنات ازاي (وش متغاظ و متجهم )

هو : يا حبيبتي بعاملها عادي و الله و لازم تبقي انت واثقة فيا اكتر من كدا

هي :انا واثقة فيك بس مش واثقة فيهم !!

هو : طيب خلاص بقي نغيير الموضوع

هي : طيب يالا قولي عملت ايه النهاردة

هو : مفيش يا حبيبتي روحت الشغل و رجعت اتغديت و نزلت جتلك و قاعد معاكي اهوه


يرن جرس هاتفه ليرتبك هو و تنتبه هي


هي : ايه فيه ايه اللي خضك كدا !

هو : اصل بصي من غير زعل ولا جنان من بتاعك ده هي اللي بتتصل

هي : هي مين

هو : عبير اللي معايا في الشغل

هي تنظر بتجهم و حزن

هو طب خلاص ردي عليها و قوليلها ان الموبيل معاكي و لو فيه حاجة ضروري تقولهالك

هي : اه طبعا هرد عليها و كمان انت عايز ترد عليها !!

هو : يا حبيبتي انا قولت حاجة !!


ترد هي بدلع : الوو

عبير : تصمت لا تعرف من اين تبدأ هل رقم الهاتف خطأ لا لقد ظهر اسمه عندما طلبت الرقم

الو ممكن

هي : ايوه

عبير: ااقصد مش ده تليفون احمد عبدالكريم

هي : اه يا فندم حضرتك مين

ترتبك عبير لا تعلم ماذا تقول هل يعقل ان اسمها لم يظهر على الشاشه !! و تقول : انا عبير اللي معاه في الشغل

هي : اااه اهلا و سهلا انا ريم خطيبته بس معلش هو مش جمبي دلوقتي اقوله حاجة لما يجي

عبير : لا اصله كان طلب مني اشوفله حاجة بخصوص الشغل يعني

هي : اوكيه لما يجي هقوله يلا باي باي

عبير : باي


هو: ايه كانت عايزة ايه

هي : حاجة بخصوص الشغل حرام عليك !! بجد بتطلب منها حاجة ايه يعني انت معندكش حد تاني غيرها


في الجهه المقابلة كانت عبير تجلس مصدومة قالت لنفسها بصوت مسموع : ايه اللي عملته

ده ما كنت قفلت السكه و لا اي حاجة

تسمعها مني اختها و تقول لها : انت برضه كلمتيه !!

عبير :لا كلمتها هي كمان انا مش مصدقه انا كلمتها ازاي ده انا لما شوفتها كان هاين عليا اكلها

مني : انت اجنينتي ولا ايه ركزي بقي انتي نسيتي نفسك ولا ايه ده جه حكالك عنها عايزة ايه اكتر من كدا

عبير : ديه قلتله انا خطيبته خطيبته ازاي ده مش لابس دبله اصلا !

مني : عبير يا حبيبتي انت لازم تاخدي بالك من نفسك و من تصرفاتك ممكن جدا تكون هي حاسه انك بتحبيه و انت عارفه البنات بيعملوا ايه و كمان انت لو بتحبيه بجد متحبيش تكوني السبب في انه يزعل او يضايق في حياته

عبير : طب و انا ما هو اصلا اللي خلاني اتعلق بيه هو السبب هو اللي كان بيعاملني حلو اوي هو اللي خلاني احب الدنيا و اتبسط و احب نفسي

مني : ما هو ممكن يكون بيعامل كل الناس كدا ديه طريقته انت اللي حسيتي كدا

عبير : مش عارفه مش عارفه انا زعلانه اوي زعلانه اوي


في اليوم التالي

يدخل هو الي العمل يضحك كعادته و متوجها الي عبير

هو : ازيك يا عبير معلش معرفتش اكلمك امبارح

عبير : اه و لا يهمك كنت هقولك اني خلصت الشغل المطلوب مني خلاص

هو : طب هايل برافو عليكي ان شاء الله اشوفك يوم الخميس في خطوبتي ان شاء الله

تصمت هي و تنظر اليه بشده و تمنع عينها من الدموع : مبروك ربنا يتمملك بخير معلش بس ورايا شغل كتير مبروك مرة تانية


يذهب هو لمكتبه ذهبت مسرعه الي الحمام انهارت في البكاء لم تري اليوم في عينه نظرة

الحزن التي تراها كل يوم وجدت نظرة اشراق و حب و فرحة و جدت فقط نظرة خزن في عينيها

اكتشفت ان الحزن الذي في عينيه ليس سوى انعكاس عينها داخل عينيه


Thursday, January 19, 2012

مجرد كلام

ينفع اكتب بايد واحدة علي الكيبورد
لقيتها صعبة اوي
الجو سقعة عايزة احط ايد في جيبي و ايد اكتب بيها!!
الجو سقعه جدا
مش بيخليني حتي اعرف افكر و لا اجيب اي افكار جديدة
فعلا مفيش اي افكار عندي لحد دلوقتي ولا اهداف ولا طموحات
يوم 25 يناير الجاي يا تري هيحصل فيه ايه ؟؟
انا من حزب الكنبة
بس كنبة مع الثوار يعني مش فلول
بس مش بنزل اخري بعمل شير علي الفيس بوك او اكتب نوت تعبر عن رأي او اتكلم مع قرايب
ي بس مفكرتش اعمل اكتر من كدا
عارفه انه غلط
عندي واحدة صحبتي فلول اوي ديه بتنزل العباسية و فظيعة يعني !!
بتحب حسني مبارك !!
بس علي الاقل هي نزلت العباسية و وقفت مع رأئيها !!ة
اانا مرحتش التحرير ولا مرة !!
اانا حتي بكتب و خلاص
عايزة اكتب عشان اثبت وجودي هنا
حتي لو بكتب اي كلام
لا ده حتي مفيش حاجة جوايا اكتبها !!
مفيش بنزين !
العربية مفيهاش بنزين اللمبة نورت
بخاف اوي لما اللمبة تنور بحس انها فجأة هتقف في نص الطريق و هقعد اعيط و مش هعرف اعمل حاجة !
في حين ان مفيش بنزين في مصر السعودية عاملة اعلانات ايه بقي !!
لتر بنزين هدية عند شرائك لقطعة شيكولاتة !
ف احنا الحمدلله مش لاقيين البنزين
و شكلنا كدا مش هنلاقي شيكولاتة بعد كدا
انا كنت بفكر في كل حاجة و في اي حاجة
دلوقتي مش بفكر :)
الساعة 4 بتوقيت القاهرة دلوقتي
مفيش اي بصيص امل
بس انا متفائلة
متفائله
ان شاء الله خير
خير ان شاء الله !

Sunday, January 08, 2012

هيا بنا لنحقق مجدنا الكبير

هيا بنا لنحقق مجدنا الكبير !!
و بعد ما حققناه
هنعمل ايه دلوقتي ؟؟
!!