Monday, December 11, 2006

اسئلة

ليه لما حد بيغلط مش بيرضي يعتذر ويقول كرامتي؟
ليه علشان حد يبان شخصية قوية كل شوية يزعل ويتامص او يبقى عايز التانين يبقوا معاه ومهتمين علطول؟
ليه لما تتيح الفرصة ان حد يتعلم من حد اصغر منه البرستيج ينأح عليا ومرضاش؟
ليه بنخاف نقول راينا مدام مش غلط؟
ليه لما حد يكون احسن مننا تنشا عداوة او مش بنتقبله؟
ليه لو فيه حد جاب اعلى مننا واحنا عارفين لانه يستحق منرحلوش بنفس صاقية ونقوله مبروك؟
ليه الهايفين هما اللي معاهم فلوس والكويسين مفلسين ؟
ليه لو واحد مش لاقي غلط انه يحلم ويتعلم؟
.
-ع فكرة الاسئلة دي جت من خلال تعاملاتي ف الكلية المبجلة-
.
انا هجاوب ع شويه منهم بالنسبة لي بس محدش يفتكر اني بمدح ف نفسي بس بجد هي دي الحقيقة
.
انا لما بغلط بروح اقول انا اسفة مش سوري تفرق كتير ف تقديرك للي قدامك
انا مبحبش ازعل من اي حد خاالص مش كل شوية اتامص
ممكن اخاف اقول راي حتى لو صح بس عربي باشا ف تدوينته الاخيرة قال كلمة عجبتني ف اخر التدوينة
بي اس(علي راي بلو):البوست مش عاجبني ولا عاجب مونجي وعارف انه هايعمل مشاكل...بس نشرته علشان اثبت لنفسي اني حر جوه بلوجي طالما مابشتمش حد واني لازم اتحدي خوفي حتي ولو كان نسبته نص في المية من عدم رغبتي في نشر البوست
والله انا لما بلاقي حد احسن مني مش هقول مش بضايق بس مش بحقد علشان طبيعي كل واحد بيحب ان ه يبقى احسن واحد بس بحاول احطه قدامي كهدف
لو حد جاب اعلىمني ويستحقها -حطوا مليون خط تحت يستحقها-بجد بفرحله جدا اقولكوا ع حاجة تانية ممكن اقعد افهم حد او اقوله يذاكر وانا اساسا مش مذاكرة ولا فاهمة حاجة
بس هي دي الاسئلة اللي انا جاوبت عليها
حاجة اخيرة:
اكتشفت ان حسن النية والطيبة مش بينفعوا ف المجتمع ده لازم ابقى متحفزة للي قدامي واحط اسوأ الاحتمالات لو كلامي غلط حد يصححلي:)
اوكش

24 comments:

admelmasry said...

نوران

حمدلله ع السلامة

ليكي وحشه بابت يا وحشه

والله مستوحشك كتيييييييييير


اما بالنسبة للكلية المبجلة انا اعزرك جدا زز ومقدر موقفك

بس عايز اقولك .. ان مش هي دي كل الحياه

والانسان ياما لسه هيشوف

ومش كل التجارب اللي بنمر بيها زز بتكون هي خبراتنا ... لا دا فيه مراقبتك للناس .. سماعك ومشارتك لمشاكل الناس


احب اقولك ان العفوية .. دي نوع من الطيبة

اما التمثيل .. فاعتقد انه نوع من الخبث


احيانا .. باحب امثل دور التعلب .. لكن عادة ما بيغلب عليا طبع الخروف

عيشي حياتك زي ما انتي شايفاها .. وما تسمحيش لحد يقولك انشر ايه وما انشرشي ايه ... لان الانسان بيتعلم بس من الاخطاء

تخيلي انك لو ما بتغلطيش هتتعلمي منين ؟


اخيرا ... الواحد لا هيعيش خروف علي طول وال تعلي علي طول .. لازم حبه كدا وحبه كدا



يلا بقي سلام

maged stephen said...

الغفران صفة الاهيّة كلما تسمو الروح بتهذيب الجسد والارتقاء عن شهوات العالم يصبح مستطاعا بقدر كبير

Anonymous said...

اولا اسئله تدل فعلا عن تجربة مع مجتمع غداار
بس اكيد فيه الكويس زي مافيه الوحش واكيد النيه الصافيه ليها جزاءها والجدع اللي يعرف يواجه المجتمع ده بنيته ومايتأثر ولا يتغير عشان يعرف يعيش
الانسان هو الانسان
والبوست جميل واحييكي عليه
وربنا يسترها

DoOoOoOdY said...

ياعينى يا بنتى ؟المأساه اللى انتى عايشاها مأثره عليكى اوى
صدقينى مش انتى لواحدك اللى بتعانى من الموضوع ده كلنا بنعانى منه لان مفيش حد مثالى ابدا ودى طبيعه البشر

مداح القمر said...

انا زيك بعترف بغلطى بس صدقينى فيه ناس كتير حواليا افتكرونى ضعيف عشان كدا...معاكى ان اللى يستاهل حاجه وعن جداره انا اول واحد بصقفله انما ليه ساعات بتضايق منه؟؟ عشان انا لما اكون استاهل بجد مش بلاقى حد يصقفلى... وصدقينى مش المفروض اللى مش لاقى انه يحلم انه ممكن يتعلم...انما يحلم دى بلاش عشان ممكن يصطدم بالواقع وانتى عارفه ان الواقع بيزحلق ممكن اوى تتفح راسه ولا حاجه...هههههههه
بحاول اخليكى تبصى لابعاد الامور..انما انا متفق معاكى تماما واحب ازود سؤال كنت كتبته عند الساحر..وهو ليه فى الحب بيقولوا اتقل واوعى تبين انك بتحب اوى وما تندلقش مع ان الواحد ممكن يعيش كل ثانيه فى حياته بحب وعشق؟ومش ح يخلصوا يعنى ولا سعرها ح يولع

Anonymous said...


اكتشفت ان حسن النية والطيبة مش بينفعوا ف المجتمع ده لازم ابقى متحفزة للي قدامي واحط اسوأ الاحتمالات لو كلامي غلط حد يصححلي:)اوكش

أتحفزى بس طبعا من غير ما يحس أنك متحفزه ليه و أستعينى بمن تثقى فيهم عشان
تفهمى اللى لسه ما وثقتيش فيهم وبلاش حتة أسوأ الأحتمالات دى عشان ممكن تخسرك
كتتير

3rby said...

اولا شكرا علي الفقرة
ثانيا:اسئلتك ديه مالهاش اجابة
هيّ ديه النفس البشرية بعد الايفليوشن اللي حصلها في القرن ال19
احنا اشباه بني ادمين

FrEe.PhArAoH said...

الاسئلة الابدية
من منظور دينى لو جينا بصينا بعمق اكتر هنلاقى ان كل دا من تحكم الشيطان الزايد فوقتنا او فمجتمعنا او هما معا
كلنا نتمنى المدينة الفاضلة .. لكن من منظور اجتماعى ممكن نقول ان الموضوع كله فساد نظام حاكم
الموضوع اكبر من مشاعر وصدمات .. كل دا موروث عن اجيال واجيال .. انتى بنقائك موجوده وفلانه بخبثها موجوده .. يمكن مولوده فنفس يوم ميلادك الموضوع محتاج وعى دينى ودكتور نفسى وقلب لنظم الحكم فمعظم اجزاء العالم .. دا مجرد رأى شخصى .. انما على طول الخير موجود جمب الشر .. اهم حاجه نحاول نلون محيط حياتنا احنا باللون المناسب .. وفنفس الوقت نتعامل مع بقية الالوان بسهوله وبعدم دهشة

اخيرا اعتبرى انى مقلتش ولا كلمة من كل دا :)

موضوع ممتاز

تحياتى

Anonymous said...

اسئلة في مكانها بس للأسف مش هتلاقي اجابة عتهم لأن احنا بقينا في زمن الماديات محدش بقى حريص على مصلحة حد او بيحب الخير لحد الا قلائل من الناس.. التعاملات الانسانية بقت قليلة بصراحة (حاجة تقرف)

Anonymous said...

ازيك يا نوران يا جميلة عاملة اية؟ يا رب كله تمام شدي حيلك امتحنات التيرم قربت
يا عزيزتي اسالتك تحتاج الي رسالة دكتوراه علشان تجاوبيها
دي اصلها بتبقى عقد و شراشيب ما يعلم بيها الا ربنا
بس النتيجة اللي وصلتيلها صح
الناس دي مينفعش معاها الذوق
و لكن
صدقيني مش حتعرفي تكوني الا نفسك
قبلاتشي

elkamhawi said...

اهم حاجة النية تكون من جوه صافيه

محمد أبو زيد said...

دي هي الاسئلة الابدية
اللي كل واحد خلقه ربنا بيفكر فيها
ومع ذلك ما حدش بيعرف يجاوب عليها

محمد أبو زيد said...

دي هي الاسئلة الابدية
اللي كل واحد خلقه ربنا بيفكر فيها
ومع ذلك ما حدش بيعرف يجاوب عليهااحد خلقه ربنا بيفكر فيها
ومع ذلك ما حدش بيعرف يجاوب عليها

Anonymous said...

اولا ازيك يا نوران


ثانيا مدونتك جميلة

اما بالنسبة لموضوع الاعتذار

انا اعتقد انا الانسان اذا اخطأ

وجب عليه الاعتذار

مهما كان حجم خطاؤه

او منصبه هو شخصيا

او حتي الشخص الذي اخطا فيه

والاعتذار قوة وليس ضعفا

لان القوي هو الذي يعترف بخطاؤه

وربنا يجعله عامر

hummar said...

اولا الشمعه لسه منوره انا شايف انشطه جديده وخاصه بعد امتحان الميد تيرم يمكن ده تأثيره ارجو ان تكون نتائج الميدتيرم حلوه اكيد حلوه ولا كنتي ماظهرتيش خالص وتكوني متقوقعه في النتائج
ثانيا الموضوع اللي بتتكلمي فيه يانوران موضوع كبير ناس كتير عايزين يتخطوه ومش عارفين لان الحكايه اكتر بكتير من انك تكتبي اسئله في بوست انما ده محتاج تغيير منهجي للشعب انا اعتبرت ان نكسه الاخلاق بتاعتنا ظهرت مع هذا الشعب العاطفي في اعقاب نكسه 67 ولكنها تأصلت في الشعب مع الانفتاح الاستهلاكي اللي بدا بشراهه بعد حرب اكتوبر ومهما اتفق او اختلف الفرقاء فانني اعتقد ان التغيير مش ممكن يحصل في الوقت الحالي الا بعد هزه قويه تصحي هذا الشعب النائم ليصحى ويفوق بس اخشى انه بعد فوات الاوان
نصيحتي ليكي ياأنسه انك تفضلي زي مانتي ومالكيش دعوه بتفكير الناس يعني خليكي انتي الشمعه المنوره ولو غلطتي اعتذري وقوه شخصيتك نابعه من ثقتك في نفسك وطموحك لازم يكون هو طريقك للنجاح وكلنا هانقولك مبروك انك نجحتي في كشف اسرار المجتمع لكن حاجه مهمه وهي انك لسه ماشفتيش حاجه ده انتي لسه على العتبه بتاعه الدنيا الواسعه انتي عارفه ليه بيقولو مصر ام الدنيا علشان هي بلد المتناقضات والعجائب كل حاجه فيها مش موجوده في الدنيا كلها المهم شكلي كان نفسي اكتب بوست مع اني كنت عايز اكتب تعليق صغير لكن الموضوع كبيررررررررررررررررررر

LAMIA MAHMOUD said...

معاكي حق في كل كلمة بس صدقيني في ناس زيك لسة

Nouran said...

ابيتاف:
الله يسلمك
والله مبقتش بتنفع خااالص

صح والله يا جوجي جبتي المفيد
خليني ع طبيعتي سفن اب اه ههههههه :)

ادم باشا المصري:
الله يسلمك يا باشا مستوحشني مرة واحدة هههههههه
شكلك كده مجرب قابلي لسه الواحد ف بداية الطريق وخلاص هيموت اما لما نكمل هنختفي ونتحلل
تعرف انا بحب اخد الخبرات من اني اتفرج ع الناس واسمعهم بحس انها بتبقى خبرات اكتر التمثيل وما ادراك ما التمثيل فعلا خبث
انا قولت كده هنشر اللي شايفاه من وجهة نظري عايزة انشره ع مزاجي يعني
بس حلوة نظرية التعلب والخروف دي
:)

maged stephen:
صح والله

بين الامل والياس:
مجتمع غدار وغادر والله بس المشكلة ان النية الصافية يقت نادرة جدا ومش بتبان خااالص غير كل 100سنة مرة مثلا
شكرا ليك وربنا يسترها

رضوى :
شفتي ايه اللي حصلي اهئ اهئ اهئ

الدكتور احمد:
والله عندك حق وانا كمان بيفتكروا اكمني بكبر وبعتذر ومكبرة دماغي اني عبيطة بس عارف اول ما احس بكده باخد موقف عدائي وهيشوفوا العبط اللي ع اصوله وبرضه معاك حق اصقف لكل الناس لحد ما ايدي توجعني ويجي الدور عليا ملقيش حد يقدرني -انا معقدة نفسيا ولا ايه-والواقع بيزحلق خصوصا ع قشر الموز هههههه
اجابة سؤالك علشان لما حد يحس انه مطلوب بيستهبل فخليه تقيل احسن :)

مبرمج حر:
والله مش بعرف اتحفز ولو اتحفزت مش بعرف اداري و لو داريت بفرقع من جوه شوفت بقى
رايك يعني بلاش اسوا الاحتمالات ديه انا معاك ف اني ابقى مش مامنه للي لسه معرفهمش دي عندك حق

عربي:
اولا:عفوا وبجد كانت عجباني الكلمة دي
ثانيا:انا عارفة انها ملهاش اجابة عندي بس طلع معندهاش اجابة عند اي حد

ferr.pharaoh:
من منظور ديني اكيد زي ما انت قولت ومن منظور اخلاقي احنا اللي عملنا كده بس المشكلة ان الخير بقى اقل من الشر حلوة اوي حكاية الالوان دي بجد احييك عليها

شريف:
حاجة تقرف وتغيظ جدا

سمباتيك لكن كلبوزة:
وحشتيني اوي انا الحمد لله كويسة والامتحانات خلاص 15 يناير ادعولي
تحتاج حجات كتيرة علشان نجاوب عليها وعقد كبيرة كمان ملهاش حل والله يا كلبوزتي مينفعش معاهم الذوق خااااااالص ومش هعرف اكون الا نفسي صح الكلام يا كلبوزتي:)

القمحاوي:
اهم حاجة ودي المشكلة ان النية الصافية موجودة :)

محمد ابو زيد:
كلامك صح الصح

عمرو احمد:
اولا الحمد لله
ثانيا :شكرا ليك ده من ذوقك
ثالثا-دي من عندي-كلامك مظبوط مليون الميه بس محدش بيعمل كده وهما مش مدركين ان الاعتذار قوة ولما اعتذر لحد بيتخض نظام هو لسه ف حد بيعتذر شوفت حال الدنيا وربنا يجعله عامر

الشاكوش باشا:
الحمدلله لسه منورة واحتمال كبير تتطفي اكيد من تاثير الميد تيرم ونتايج الميد تيرم كمان
الموضوع اللي بتكلم فيه صعب وتعليق حضرتك كانه تحليل جامد جدا لحال الشعب ف فترتنا دي ومن فنرة 67 واحنا كلنا مستنين الهزة القوية تحصل
بجد هبقى زي ما حضرتك قولت وشكرا جدا ع النصيحة الجامة دي وهحطها ف دماغي

lamia mahmoud:
بجد لسه ف ناس زيي؟؟

IBN BAHYA - إبــن بهيـــــــــــــة said...

أرق تحية كرقة هذا اللون البديع في مدونتك .. وتحية للجميع هنا بلا استثناء
كل ما ذكرتيه صحيح مع الأسف والسبب هو تغير نوعي يحدث للمجتمع منذ فترة طويله .. هذه ثماره بالطبع .. لكن أختلف معك في آخر عبارة بأنك لابد أن تكوني متحفزة للجميع لتدافعي عن نفسك على الأقل
ليست الدنيا كلها بهذا السواد .. هناك كثيرون محترمون حقاً .. المشكلة أن الحق محترم زياده عن اللازم والباطل رغم خرسه ولكنه مزعج وشديد الضوضاء وأحيانا يحتجب الحق من وقاحة الباطل

فابحثي عن الحق تلاقيه مركون جنب أي حيط وبيعيط .. ليه يا عم .. يقولك ما حدش سامعه من صوات وزعيق وسفسطة وقلة أدب الباطل
بس دي الحدوته الملتوته اللي كلنا عارفينها وبرضه بنتعب نفسنا وندور عليها مع إنها جنبنا
عموما تدونية جيدة
وتحيتي لك وللجميع

مـحـمـد مـفـيـد said...

ايه نوران
ايه الحزن ده
لا القاعده ثابته واكيد ليها شواذ فلا يجب ان نعمم الشواذ ونجعلها قاعده
عيشي كما انتي وتجدي الكون يتحول من حولك الي ما هو تريديه

3rby said...

صح والله
صح والله
صح والله
صح والله

ايه يا بنتي اللزمة الغريبة ديه
طيب وافرضي غلط
تشيلي ذنوب بسبب لزمتك؟
ههه

DoOoOoOdY said...

وحشتينى اوووووووووووى بجد والله وحشتينى

الســـاحر said...

انتى معاكى حق ى حاجات اه وحاجات لا
يعنى الواحد لازم يكون متحفز لاى عمل مش كويس من اللى حواليه
لكن انا مش معاكى انك بكده ماتكونيش طيبه من كل الناس
يعنى الناس اللى متعرفيهاش تعاملى معاها بحذر
واصحابك المقربين عاميلن منغير حذر
لان حتى لو اصحابك غلطوا فيكى لو معاكى
دا بيكون غصب عنهم
لانهم بيحبوكى بجد
وانا معاكى فى موضوع الحذر
وفى النهايه شدى حيلك كده فى الكليه وربنا يوفقك

Anonymous said...

يا عندليب قول شكوتك
الغنوة مش ح تموتك
ما تخافش من غنوتك و احكي على بلونك
انما كتم الغنا هو الي ح يموتك

Nouran said...

ابن بهية:
اهلا بحضرتك عندي يا فندم وشكرا ع ذوقك
تفق ف اشياء مع حضرتك بس ان فيه كثير محترمين دي مظنش خالص بقوا يتعدوا ع الصوابع بجد بس ده ميغيرش من حقيقة انه لسه فيه احييك ع رايك

محمد باشا:
بجد بجد شكرا ايه يا عم مختفي احنا زعلناك ولا حاجة
ف الاخر بنبقى صحاب صح لا كله الا المبادئ ده انا هكتب بوست عن المبادئ :)هيبقى جامد جامد
لا سوري ع ايع يا باشا قول اللي انت عايزه

محمد مفيد:
لا بس هو انا كنت مضايقة شوية والحمدلله فكيت

عربي:
هههههههههههههههه ماشي يا مان عارف فيه بوست ليا قريته لقتني كاتبه يجي 15 مرة الحمد لله -ده دليل ع تدين الشعب المصري انه بيستعمل ان شاء الله والحمد لله كتير الكلام ده كان مكتوب ف درس عربي بتاع يا اول او تالتة اعدادي -ههههه بس عندك حق من غير ما احلف

دودي:
طب وربنا كنت بفكر فيكي فتحت لقيتك كاتبه التعليق ده ف نفس اليوم وربنا وانت كمان وحشتيني اوي

الساحر:
ايه عاش من شافك اهنئك انك الكومينت اللي قبل قبل الاخير ههههههه
وانا كمان معاك اضم صوتي لصوتك

شادي:
حلووووووووووووة اوي