Monday, October 08, 2007

بحب الحياة:)


وانا بنشر الغسيل والحياة بمبي قصادي كدا اذ فجأة احس احساس عجيب يعملي فرح وانتشاء كدا اكيد يعني مش من الغسيل اللي بنشره ولا التلفزيون الرخم اللي بتفرج عليه ولا اي حاجه بس حسيت كدا ان انا قال ايه بحب الحياة يا لهوي اول مره احس بكده بالرغم من كل حاجه رخمة ووحشة وسخيفة فيهاوايه يعني معدلكوش الحجات الرخمة اللي ف الحياة ديه اه والله بس فجأة واحده كده


وبدون اي اسباب علشان محدش يقولي حاجه بس انا كنت بتكلم مع البشمهندز تشوس وخلاني احس اني بحب نفسي وبالتالي بقيت احب الحياه اذ فجاة كده بسمع كلام مااما من غير ما اقولها لأ خالث وديه حاجه غريبة اوي عليا وتديني كل يوم دعوتين تلاته كدا وهي صايمه ده يخليني احس بسعاده بابا لسه موجود معانا باستثناء انه كل شوية بيشغلني اعمل حجات بس برضه موجود ده محسسني بسعاده وامان اول مره ابص لنص الكوباية المليان بتفاؤل وحاسه ان ربنا مش بيسيب اي حد لو محتاجله ربنا المدبر بيعمل كل حاجه علشان سبب احنا مش عارفينه ممكن نعرفه وممكن منعرفوش بس بيخترلنا الصالح والاحسن


لازم الحياه يبقى فيها مشاكل علشان نحس بقيمتها مش مشلكه اننا نتعب شوية بس ف الاخر نحس بالفرح او السعاده او كده

نحس ان فيه امل ف بكره حتى لو مفيش امل يعني ليه ننكد ع نفسنا

لما بننكد ع نفسنا وبعديها بشوية نفرح نقول ايه الهبل ده ليه مش واحنا ف عز الازمة او الضيق نقول ان شاء الله ربنا هيفكها من عنده نبص لكل حاجه وحشه بتفاؤل نجرب نفرح وخلاص نجرب نحب الحياه نجرب يبقى عندنا امل مش عارفه انا بتكلم كاني ف برنامج اذاعي عجيب بس هو ده اللي جوايا وانا بحب اطلع اللي جوايا برايا زي ما انتوا عارفين

بس انا بجد حاسه اني بحب الحياه وربنا يستر بقى لحسن اجيلكم بكره اقولكم عايزه اعيط :)

8 comments:

m_elsewedy said...

مش عارفه انا بتكلم كاني ف برنامج اذاعي عجيب

كنت حاسس بكدة
:D
حاسس انك بتعلنى اعلان من اعلانات رمضان زى مستشفى
57357

عامة يارب تبقى الحياة حلوة كدة على طووووووووول
وان شاء الله مافيش عياط
:)))

radwa osama said...

رغم انى حزينه قوى اليومين دول الا ان تدوينتك كانت قادرة على اخراجى ولو للحظات من تلك الحالة ..وحشتينى قوى

See You said...

صباح الفل .. !

ربنا ميجبش زعل .. ربنا معاكي :) !

انا فتحت مدونتي بعد ما كنت قفلتها :( .. !

ابقي زوريني .. cu.ueuo.com

كل سنه و انتي طيبه بمناسبة عيد الفطر

محمد مصطفى said...

اكيد لازم كلنا نحب الحياه
انتي بس داومي على نشر الغسيل و انتي هتفضلي مبسوطة على طول

M.Nassif said...

يمكن بتسمعى كلام ماما علشان شوشو مربوط اليومين دول

ربنا يرزقك بر الوالدين على كل حال
:)

zordeak said...

ازيك يا نوران

وحشانى يا بنتى والله

:)

بقى اغيب شوية الاقيكى مغيرة شكل البلوج

لا والانقح من كده كمان الاقيكى بتحبى الحياة

بقى ده كلام برضه

:D

حبيها يا ستى علشان هيا تستاهل انها تتحب

كل سنة وانتى طيبة ورمضان كريم

من غير عياط

هاااا

:)

Muhammad Mammdouh said...

ربنا يخليكو لبعض كل سنة وانتى طيبة

Ahmed Essawy said...

وَلَنَبْلُوَنَّكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأنفُسِ وَالثَّمَرَاتِ وَبَشِّرِ
الصَّابِرِينَ (155)
سورة البقرة

علشان نشوف الفرح لازم نكون عارفين المرة و علشان تدوء المر لازم تكون ذوقت طعم الفرح