بوبا وسوكا

اه واه وبعد ما كتبت مقدمة بوست طوله اكبر من البوست اللي فات ومع شديد من الاسف والحسرة اتمسحت انا سمعاك ياللي بتقول الحمدلله انها اتمسحت واحب اطمنك انها اتمسحت بس برضه هكتب كتير انا منكرش ان الخطه اتغيرت بس برضه يعني انا مش هغلب نرجع للمقدمة اللي اتمسحت
هتقولولي اتمسحت ليه وازاي
هقولكم سوكة مسحتها
هتقولولي سوكة مين
هقولكم سوكة اخت بوبا
طبعا الاسئلة مش بتخلص فهتسالوني بوبا مين
فهقولكم سوكا وبوبا هما محور حديث اليوم تن تن تااااا

مش هقولكم انهم ولاد خالي الصغيرين بوبا 5سنين وسوكا 3 سنين ونص ومش هقولكم انهم اصدقائي الاعزاء ومش

هقولكم انهم اصحاب مستقبل باهر واحد هيبقى بشمهندز زي الفل والتانية اكيد هتكون دبلوماسية رائعة ومحبوبة جدا ومش هقولكم انهم بيحبوا شريط عمرو دياب الجديد ومش هقولكم انهم بيحبوا شركة المرعبين المحدودة وحافظينة و ان انا كل شوية استغل بوبا وسوكا واتفرج عليه ومش هقولكم ان بوبا بيحب سبايدر مان جدا جدا وعنده اللبس بتاعه وارفنا بيه وكل شوية يقولنا انا سبايدر مان هنقذ العالم من الاشرار وكان عايز ينط من البلكونة ويتشعلق ع الحيطة وكده يعني ومش هقولكم برضه ان سوكا بتحب اغنية شخبط شخابيط وتفضل تنطنط وانا لازم اتنطط معاها –مش عارفة ايه الهبل ده – ومش هقولكم برضه ان سوكا بتحب البكلونة يوووه اقصد البلكونة يعني وبتحب احمد مين احمد ده مش عارفة بس كل شوية تجيبلي الموبيل وتقولي خدي كلمي احمد اقولها مين احمد يا سوكا تتضحك اقول الو يا احمد تاخد الموبيل مني وتقولي كفاية كده وتقول لاحمد باي يلا انا هقعد مع اران – انا يعني- ولما جيت حكيت لمامتها وهي واقفة بصتلي بصة عتاب كانها كانت ماتمناني ع سر وانا قولته وبعد كده سوكه قررت انها متجبش سيرة احمد تاني قصادي ولو اسمه اتقال لازم تغير الموضوع علطول بس نفسي اعرف مين احمد ده ؟؟؟
ومش هقولكم ان انا لازم العب معاهم كل شوية وابقى مامتهم ف اللعبة بالعافية وانا مش عايزة العب اصلا بس هما اللي بيخلوني العب لا وع مزاجهم يعني سوكا لازم تبقى بيبي وبوبا لازم يبقى سبايدر مان يا سلام ويخلوني مامتهم ايه الظلم ده انا ببقى عايزة ابقى باور رينجيرز

اومال بقى انا هقولكم ع ايه ؟؟؟
هقولكم ان بجد العيال ديه بتفهم اوي اوي وديه مواقف بتدل ع انهم بجد بيفكروا
.

بوبا كان عنده انترفيوا علشان هيحول من مدرسته لمدرسة تانية فانا ماسكة الكتاب وقاعده اقوله ده ايه يا بوبا يقول

كار وده باص وده ترين وكده يعني ف ف الصفحة ديه كانت الحيوانات قاعده ف وسائل المواصلات ديه يعني الاسد

قاعد ف العربية والقرود فالباص والفار ف السفينة و الارنب ف الطيارة والدب ف القطر
راح باصلي وقايلي ازاي يا نوران الاسد بيعرف يسوق عربية وهو الفار عنده لبس بوليس وازاي الارنب بيطير

بالطيارة هو اصلا بيعرف يطير؟؟
ها نعم يا بوبا انت بتقول ايه بص يا بوبا هما زهقوا قالوا يرفهوا عن نفسهم شوية
بوبا : يعني ايه يرفهوا ؟؟
انا : يعني يتفسحوا شوية الحيوانات كانت زهقانة فقالوا يفسحوهم يعني
بوبا يبصلي نظره اشفاق عليا اني تعبت من المذاكرة معاه واني خلاص هيست عليه

وقالي : خلاص كفاية كده النهارده يا نورانا حسسني اني بجدهييست
انا: يا سلام شكرا يا بوبا يلا بقى روح العب
.
.
كنا ف سيتي ستارز ف في عواميد كبيرة كده فانا سانده ع واحد
يجي يقولي: يا نوران هتسدني عليه وهيقع
انا : لا يا بوبا مش هيقع
بوبا : هو اصلا واقف ازاي هو عنده رجلين ؟؟
انا سكت شوية وفضلت ادور ع الاجابة ورحت قايلاله : لا يا بوبا شايف العواميد ديه كانها رجلين المبنى ده
بوبا : بس هما مش اتنين هما كتير
انا : لا مهو علشان هو كبير اوي اكبر حتى من بابا –علشان لو قلتله كبير بس كان هيقولي بابا كبير وعنده رجلين

اتنين بس – فهو عنده رجلين كتيير اسمها عواميد
بوبا : يعني لو طلعنا فوق هيقع ولو نزلنا تحت هيقع علشان معندوش رجلين كتير غير هنا بس
انا : لا يا بوبا ما هي نازلة تحت الارض خالث زي رجلك واقفه ع الارض العمود بقى رجله نازله لحد بعد الارض

علشان هو كبير يفضلوا بيحفروا علشان يحطوه
بوبا : يعني لو حفرت هلاقيه
انا : اه يلا بقى نروح نتفرج ع محل اللعب ده
بوبا : طيب انا عايز موتسكيل
انا : ارحمني يا رب
.
.
قاعدين
بوبا: هي ماما -جدتي يعني - بتروح المستشفى ليه
يرد احد الجالسين عليه (طنط) : علشان تغسل يا بوبا – قصدها غسيل كلوي ربنا ما يوريهوش لحد –
بوبا : طب وهي بتعرف تنشر
طنط: تنشر ايه يا بوبا
بوبا : تنشر اللي هي بتغسله
فضلنا نضحك وطنط قالتله لا يا بوبا الغسيل ده كده عامل زي الدوا مش بتاع الهدوم
بوبا : اه طيب انا عايز اكل
.

.

ديه المواقف اللي انا فاكراها لبوبا اما سوكا ملهاش مواقف تفكير هي ليها مواقف ف الحياة العامة يعني دبلوماسية

وسياسية من الدرجة الاولى تعمل الحاجة وتعرف تاخد حقها منك وتعرف تدلع عليك وليها شخصية قوية كمان وتفضل

كل شوية تقولي متخافيش من القطة مش هتعملك حاجة –انا اتفضحت – واقولها لا تعالي هشيها يا سوكا – خلاص

ببقى هعيط – والحمدلله سوكا تنقذني من القطة
واخر حاجة كنت مخاصمة سوكا وقولتلها متجيش تكلميني النهاردة
كل شوية بقى تيجي تدلع عليا وجت وعايزة تقعد ع حجري واقولها امشي يا بنتي انا مش بكلمك تقولي لا هتكلميني

تقف قدام الكمبيوتر وتقولي انا هنا انزلها واقولها انا مش هكلمك امشي بقى تقولي لا مش همشي لحد ما جت وقالتلي

مش هبوظ الكمبيوتر تاني ما هي كانت مسحتلي البوست النهاردة
ومرة كنت بقولها انت يا سوكا قاعدة جوه قلبي ومربعة جواه
سوكا: ازاي يعني لو فتحت قلبك دلوقتي هلاقي نفسي فيه ؟؟
انا : اه يا سوكة
سوكة: طب افتحيه دلوقتي انا عايزة اشوف نفسي
انا: لا ده كناية يعني
سوكة لا تعليق وتمشي وعندها حالة ازبهلال
بعديها بشوية بيقولولها انت قاعده فين قالتلهم جوه قلب اران ومربعة
وكنا متخانقين جاية تجر كلام معايا وتقولي انا قاعده فين
اقولها مش عارفة ومتكلمنيش شوية وتيجي تقولي افتحي قلبك عشان اثوف نفثي وانا اقولها انت خلاص مش قاعدة

فيه تقولي لأ قاعدة وملبعة هههههه
والله انا بحب العيال ديه اوي وبجد قاعدين ومربعين جوه قلبي ويا رب مايصبهمش الغباء اللي بيجي للعيال لما يدخلوا

المدرسة ويبقوا حاجة حلوة كده لما يكبروا

النشرة رقم سبعة تحددديث

تحديث كتير وكبير

تهنئات جديدة قد اغفلنا عنها والحمدلله رجعنا لعقلنا

رضوى نجحت ف الانترفيو بتاع قسم اذاعة ومنوهتش عنه

كمون وزنجبيل نجح ف الثانوية العامة بقاله 100سنة وانا مكتبتش

وبرايد كل سنة وهي طيبة تمت سنة لولولولولوللولولولولولوللللللللللللي وعقبال ما ازغرطلها يوم فرحها كده يا رب :)

عيد ميلاد عيلاء القمحاوي كان 8 -8 وقد اغفلنا عن ذكر هذا وكل سنة وانت طيب يا باشا :) اي خدمة ومكناش نعرف عيد ميلاد سيادتك امتى ؟؟

ومبروك لبيجساسوس المصري ع نجاحك وتخرجك اخيرا يا فندم مكنتش اعرف غلط غير مقصود يا باشا مبروك يا دكتور ا

بصوا بقى النشرة ديه ايه بقى مفيش زيها

ليه لا لا مش هجيب كونان هو قاعد مع توجو موري بيحل قضية هجيبه المرة اللي جاية لو فيه مرة جاية للنشرة

المهم ليه مفيش زيها علشان احنا بنحتفل بمرور سنة وكام يوم ع اول نشرة سنة وكام يوم والله كان يوم جامد اللي كتبت فيه اول نشرة ده

يااااااااااااهوووووووووووووووه يا سلام ع النشرة ديه وجمال النشرة والله جامده :)

الاول التهاني بقى

وقبل التهاني نقول لسويدي باشا حمدلله ع السلامة كان مختفي لدرجة اني بحسب ان كائنات فضائية خطفته او سافر الخليج بس معرفش حقيقة الاوشاعة بس حمدلله ع سلامته

:)

المهم التهاني بقى ايه تهاني في تهاني ف النشرة رقم واحد ف بلوجركله هتقولولي ايه الغرور ده هقولكم لا اصل ببساطة علشان مفيش زيها محدش عامل نشرة غيري :)

اول حاجة نقول مبروووووووووووووووووووووووووووك لكل النااااااجحين

تحديث: وعندك واحد تهنئة وصلحوه :)

مبرووووووووووووووووووووووووووووووك لانووووجي علشن خدت الماجستير عقبال عندكم :)

مبرووووووووووووووك يا ابيتاف النجاح يا رب تكوني ختي المرتبة ياااا رب ولو مختيهاش مش مشلكة اجبلك واحده

من عندي مبروك يا انسه :)

مبروك يا بشمهندس محمد ع النجاح وحلو الجيد جدا حد طااايل

ومبرووك يا سموحة -زي الهوا- باين كده وده اللي استشفيته انها نجحت ف راسالة معينة ايه هي مش متاكده :)

.

وطبعا اللي ف الثانوية العامة(عربي ومنجي ونوران وندا وعمرو ايهاب ) بس ديه متاخرة شويتين

.

وطبعا انا وصحابي مش عايزة كلام ديه بقى :) الحمدلله اننا نجحنا

.

كده النجاح خلص

نيجي بقى لحجات تانية

مبروووووك لدعاء مركز الكون ع جوازها انا مش بعلقلها خااالث بس بخش عندهابرضه و مبرووك يا جمييل

وعندنا كمان اعياد جواز ناس كتير

ماما وبابا وناس قرايبنا وكده يعني المهم كل سنة وهما طيبين

.

وعندنا بلوجات تمت سنة اي كلام -لا لا مش قصدي بلوجات اي كلام ااقص - بلوج اي كلام لصاحبيه عربي ومنجي

لولولولولللي عقبال السنة اللي جاية يا رب :)

وبلوج حكاوي الليل لصاحبة احمد شقير قبل ما هو يكتب البوست انا هكتبله التهنئة كل سنة وحضرتك طيب وبلوج حضرتك جميل كده علطول

وكمان عيد ميلاد دولي هانم كل سنة وانت طيبة يا دووولي وعقبال 127 سنة :)

واختي كمان عيد ميلادها قرب 17 اغسطس اقولها كل سنة اونت طيبة بالمرة

وكمان بقول لمحمد مفيد هو ونورهان حمدلله ع السلامة وعمرة مقبولة ان شاء الله وعقبال الحج ان شاء الله

وكمان مبروك لمحمود عزت ع اصداره الاخير ويا رب ينول اعجاب القراء ان شاء الله

والاهلي خد السووووووووووووبر يا جدعااااااااااااااااان لولولولولولولولوللولولولليييييييييييي اصلا ماتش مكنش ليه

لزمة اصلا الدوري بتاعنا والكاس بتاعنا لازم يتعبونا وخلاص -الكلام ده مقتبس من عند تشوس -ايوه

.

هذه هي التهاني اللي قدرنا نوصلها الى الان واللي عنده تهنئة شووور ابعت التهنئة ع 6065 نشرة شمعة 100.9 اوعوا تغيروا المحطة

اه جبت محفظة جديدة بعد عذاب كل شوية افتح محفظتي القديمة وقول لصحابي خلاث ماتت لازم اجيب واحدة جديدة طول الترم التاني واخيرااا جبت واحدة معرفش ايه ضرورة الكلام ده بس حسيت اني عايزة اهني نفسي :)

واليكم اهم الانباء لنشرة شمعة

انها المرة الاولى وقد تكون الاخيرة التي تختفي فيها بقية اجزاء النشرة وذلك بسبب ان المعد لا يوجد لديه الوقت كي

يتحفكم بالقصة والفقرة الفنية بتاعه نورت مصر والنكت لا تنسوها بس اكيد هقولكم واحده يعني ف الاخر وذلك لانه

كان مقضيها شات مع اصحابة يتريقون ويهزرون وضاع الوقت وفااااااااااااااات المعاااااااااااااااد

ولان هذه النشرة مهمة جدا بالنسبة الية فقرر كتابتها اليوم بدون تلك الفقرات ولكن معنا فقرة جديدة لليوم فقط تسمى

مجنونة بلوجات

فلنبدأأأأأأا الفقرة

المشهد الاول

اه انا عايزه اعمل بلوجات خمسين ستين واحد يا ثلام لو عندي ستين بلوج ويكون كل واحد تمبليت مختلف و

صوت ينادي من بعيد : مجنوووووووونة

ترد الفتاه الصغيرة :نعممممممممممم يا ماااااااااااماااااااااااااااااا

الام:تعالي انشري الغسيل

الابنة :حاااااااضر

ا

المشهد التاني :

تاخد الغسيل وهي بتنشر بتفكر بصوت عالي

ابنت :اه اخر حاجة 60 بلوج واحد للكلية وواحد لصحابي وواحد للغسيل وواحد لمذكراتي وواحدل

صوت اخر ينادي :يا مجنونة

ايه الصوت ده اه ديه طنط اللي تحتينا

الفتاة الصغيرة :نعم يا طنط

الصوت التاني :انزلي خدي الغسيل اللي وقعتيه ده

يوووووووووه كل مرة انشر الغسيل اوقعه طيب هنزلك السبت تحطيه فيه

الصوت التاني:انزلي بقى يا مجنونة كل مرة كده

حاااااااضر

الحمدلله نشرت الغسيل

اه وصلنا لفين اه هعمل 150 بلوج لا لا كانوا 60 وكان فيهم واحد للغسيل اه صح

المشهد التالت

بسم الله الرحمن الرحيم

اه كل يوم اقوم مفزوعة كده من النوم حاجة غريبة فعلااا بجد وايه الاحلام العجيبة ديه حاجة عجيبة فعلا :)

...........................................................................................................

هذه اخر فقراتنا واليكم اخر نبأ ف اهم الانباء وهي نكت رخمة طازجة من الفرن الان ولتنتهي النشرة تلك بسلام وبدون احداث ضحايا ولا اي حاجة مما تسببه تلك النشرة للقراء :)فساقدم لكم نكتة واحدة فقط لا غير

:) "

واحدغبى فى الجيش القائد اداله اغلى قنبلة فى العالم وقال له ارميها على الاعداء من فوق الجبل اللى بين الجيشين

قام الراجل طلع على الجبل ، ولاول مرة فكر وقال القنبلة دى غالية قوى طب ما بلدنا اولى بيها ......ورماها على

جيشه

.

وكانت تلك هي اهم الانباااء

ايه الراجل المزعج بتاع اهم الانباء ده انا جبته بدل كونان مش كونان كان ارحم

انا كنت عايزة اخلي النشرة ديه مميزة علشان ممكن تكون اخر مرة اكتب نشرات فيها هعتزل يعني اهئ اهئ خلاث

خلاث مش هعيط بس انا عايزة رايكم افيدوووني

يلا كل نشرة وانتوا طيبين :)

ملحوظة صغيرة : نظرا لضيق الوقت ملحقتش احط لينكات انتوا عارفين الناس ديه كلها صح وكل واحد عارف نفسة :)

حالة فوجائية

اسرح بخيالي معه
افكر فيه دوما
هل سياتي ام يجعلني منتظره
ولكني سانتظره ساقضي حياتي منتظره قدومه
ولكني اشك ف قدومه ولم لا
وان لم ياتي سأذهب انا اليه
الطريق طويل والتحلي بالصبر هو وسيلتي للوصول كما اريد ف هذا الطريق
يضئ الطريق مرة ويظلم مرة
لا اعلم ما حال هذا الطريق
ولكنني قررت الذهاب اليه
نثرت احلامي ف الارجاء لعلها تصل اليه
نثرت عقدي الذهبي وفرطت حبات لؤلؤي لتدلني ع طريق عودتي معه
وصلت للجبل نظرت اليه نظره امل وجدته بعيدا جداا عني
نظر الي ومد يده الي
رغم بعد المسافة الا انني احسست بها
وابتسمت واغلقت عيني واستسلمت لاحساسي