Tuesday, August 21, 2007

بوبا وسوكا


اه واه وبعد ما كتبت مقدمة بوست طوله اكبر من البوست اللي فات ومع شديد من الاسف والحسرة اتمسحت انا سمعاك ياللي بتقول الحمدلله انها اتمسحت واحب اطمنك انها اتمسحت بس برضه هكتب كتير انا منكرش ان الخطه اتغيرت بس برضه يعني انا مش هغلب نرجع للمقدمة اللي اتمسحت
هتقولولي اتمسحت ليه وازاي
هقولكم سوكة مسحتها
هتقولولي سوكة مين
هقولكم سوكة اخت بوبا
طبعا الاسئلة مش بتخلص فهتسالوني بوبا مين
فهقولكم سوكا وبوبا هما محور حديث اليوم تن تن تااااا
مش هقولكم انهم ولاد خالي الصغيرين بوبا 5سنين وسوكا 3 سنين ونص ومش هقولكم انهم اصدقائي الاعزاء ومش
هقولكم انهم اصحاب مستقبل باهر واحد هيبقى بشمهندز زي الفل والتانية اكيد هتكون دبلوماسية رائعة ومحبوبة جدا ومش هقولكم انهم بيحبوا شريط عمرو دياب الجديد ومش هقولكم انهم بيحبوا شركة المرعبين المحدودة وحافظينة و ان انا كل شوية استغل بوبا وسوكا واتفرج عليه ومش هقولكم ان بوبا بيحب سبايدر مان جدا جدا وعنده اللبس بتاعه وارفنا بيه وكل شوية يقولنا انا سبايدر مان هنقذ العالم من الاشرار وكان عايز ينط من البلكونة ويتشعلق ع الحيطة وكده يعني ومش هقولكم برضه ان سوكا بتحب اغنية شخبط شخابيط وتفضل تنطنط وانا لازم اتنطط معاها –مش عارفة ايه الهبل ده – ومش هقولكم برضه ان سوكا بتحب البكلونة يوووه اقصد البلكونة يعني وبتحب احمد مين احمد ده مش عارفة بس كل شوية تجيبلي الموبيل وتقولي خدي كلمي احمد اقولها مين احمد يا سوكا تتضحك اقول الو يا احمد تاخد الموبيل مني وتقولي كفاية كده وتقول لاحمد باي يلا انا هقعد مع اران – انا يعني- ولما جيت حكيت لمامتها وهي واقفة بصتلي بصة عتاب كانها كانت ماتمناني ع سر وانا قولته وبعد كده سوكه قررت انها متجبش سيرة احمد تاني قصادي ولو اسمه اتقال لازم تغير الموضوع علطول بس نفسي اعرف مين احمد ده ؟؟؟
ومش هقولكم ان انا لازم العب معاهم كل شوية وابقى مامتهم ف اللعبة بالعافية وانا مش عايزة العب اصلا بس هما اللي بيخلوني العب لا وع مزاجهم يعني سوكا لازم تبقى بيبي وبوبا لازم يبقى سبايدر مان يا سلام ويخلوني مامتهم ايه الظلم ده انا ببقى عايزة ابقى باور رينجيرز

اومال بقى انا هقولكم ع ايه ؟؟؟
هقولكم ان بجد العيال ديه بتفهم اوي اوي وديه مواقف بتدل ع انهم بجد بيفكروا
.
بوبا كان عنده انترفيوا علشان هيحول من مدرسته لمدرسة تانية فانا ماسكة الكتاب وقاعده اقوله ده ايه يا بوبا يقول
كار وده باص وده ترين وكده يعني ف ف الصفحة ديه كانت الحيوانات قاعده ف وسائل المواصلات ديه يعني الاسد
قاعد ف العربية والقرود فالباص والفار ف السفينة و الارنب ف الطيارة والدب ف القطر
راح باصلي وقايلي ازاي يا نوران الاسد بيعرف يسوق عربية وهو الفار عنده لبس بوليس وازاي الارنب بيطير
بالطيارة هو اصلا بيعرف يطير؟؟
ها نعم يا بوبا انت بتقول ايه بص يا بوبا هما زهقوا قالوا يرفهوا عن نفسهم شوية
بوبا : يعني ايه يرفهوا ؟؟
انا : يعني يتفسحوا شوية الحيوانات كانت زهقانة فقالوا يفسحوهم يعني
بوبا يبصلي نظره اشفاق عليا اني تعبت من المذاكرة معاه واني خلاص هيست عليه
وقالي : خلاص كفاية كده النهارده يا نورانا حسسني اني بجدهييست
انا: يا سلام شكرا يا بوبا يلا بقى روح العب
.
.
كنا ف سيتي ستارز ف في عواميد كبيرة كده فانا سانده ع واحد
يجي يقولي: يا نوران هتسدني عليه وهيقع
انا : لا يا بوبا مش هيقع
بوبا : هو اصلا واقف ازاي هو عنده رجلين ؟؟
انا سكت شوية وفضلت ادور ع الاجابة ورحت قايلاله : لا يا بوبا شايف العواميد ديه كانها رجلين المبنى ده
بوبا : بس هما مش اتنين هما كتير
انا : لا مهو علشان هو كبير اوي اكبر حتى من بابا
علشان لو قلتله كبير بس كان هيقولي بابا كبير وعنده رجلين
اتنين بسفهو عنده رجلين كتيير اسمها عواميد
بوبا : يعني لو طلعنا فوق هيقع ولو نزلنا تحت هيقع علشان معندوش رجلين كتير غير هنا بس
انا : لا يا بوبا ما هي نازلة تحت الارض خالث زي رجلك واقفه ع الارض العمود بقى رجله نازله لحد بعد الارض
علشان هو كبير يفضلوا بيحفروا علشان يحطوه
بوبا : يعني لو حفرت هلاقيه
انا : اه يلا بقى نروح نتفرج ع محل اللعب ده
بوبا : طيب انا عايز موتسكيل
انا : ارحمني يا رب
.
.
قاعدين
بوبا: هي ماما -جدتي يعني - بتروح المستشفى ليه
يرد احد الجالسين عليه (طنط) : علشان تغسل يا بوبا – قصدها غسيل كلوي ربنا ما يوريهوش لحد –
بوبا : طب وهي بتعرف تنشر
طنط: تنشر ايه يا بوبا
بوبا : تنشر اللي هي بتغسله
فضلنا نضحك وطنط قالتله لا يا بوبا الغسيل ده كده عامل زي الدوا مش بتاع الهدوم
بوبا : اه طيب انا عايز اكل
.
.
ديه المواقف اللي انا فاكراها لبوبا اما سوكا ملهاش مواقف تفكير هي ليها مواقف ف الحياة العامة يعني دبلوماسية
وسياسية من الدرجة الاولى تعمل الحاجة وتعرف تاخد حقها منك وتعرف تدلع عليك وليها شخصية قوية كمان وتفضل
كل شوية تقولي متخافيش من القطة مش هتعملك حاجة –انا اتفضحت – واقولها لا تعالي هشيها يا سوكا – خلاص
ببقى هعيط – والحمدلله سوكا تنقذني من القطة
واخر حاجة كنت مخاصمة سوكا وقولتلها متجيش تكلميني النهاردة
كل شوية بقى تيجي تدلع عليا وجت وعايزة تقعد ع حجري واقولها امشي يا بنتي انا مش بكلمك تقولي لا هتكلميني
تقف قدام الكمبيوتر وتقولي انا هنا انزلها واقولها انا مش هكلمك امشي بقى تقولي لا مش همشي لحد ما جت وقالتلي
مش هبوظ الكمبيوتر تاني ما هي كانت مسحتلي البوست النهاردة
ومرة كنت بقولها انت يا سوكا قاعدة جوه قلبي ومربعة جواه
سوكا: ازاي يعني لو فتحت قلبك دلوقتي هلاقي نفسي فيه ؟؟
انا : اه يا سوكة
سوكة: طب افتحيه دلوقتي انا عايزة اشوف نفسي
انا: لا ده كناية يعني
سوكة لا تعليق وتمشي وعندها حالة ازبهلال
بعديها بشوية بيقولولها انت قاعده فين قالتلهم جوه قلب اران ومربعة
وكنا متخانقين جاية تجر كلام معايا وتقولي انا قاعده فين
اقولها مش عارفة ومتكلمنيش شوية وتيجي تقولي افتحي قلبك عشان اثوف نفثي وانا اقولها انت خلاص مش قاعدة
فيه تقولي لأ قاعدة وملبعة هههههه
والله انا بحب العيال ديه اوي وبجد قاعدين ومربعين جوه قلبي ويا رب مايصبهمش الغباء اللي بيجي للعيال لما يدخلوا
المدرسة ويبقوا حاجة حلوة كده لما يكبروا

20 comments:

Dody said...

ربنا يخليهملك يا نور
ويارب يبقةا احسن ناس

tweety said...

rbna y5lhmlk ya rb we tshfehm 27sn nas

roshe said...

ana 7bet el 3yal de awe dmhm 7'fef bs brdo enty ely 3mla kda f nfsk ob2y rody 3lehm rd yfhmoh... 7aram 3leky bt2oly l 3yla (knaya) m hya kman lazm tmshy mozbhla mtwk3a a 3'er kda....

Tschuss said...

gamd alpost w lziz awy ya nour w kman 2aribk wad7 anhm hyb2o lehm mst2bl w ana atmnt an f nas htshel lwa2 alshla mn b3dena

MestKA said...

ربنا يخليهملك يا ستي
بس والنبي حاسبي على كلامك معاهم عشان المعلومات اللي بتديهلهم ف السن ده لازم تكون صحيحه ميه ف الميه ولو مش عارفه ليه الاسد بيسوق العربيه متعوكيش
اصل الاسد عرف انك بتتعلمي السواقه قال اشمعنا نوران انا كمان لازم اسوق
ههههههههههههههههههههههههههه

Marvel - واحد زهقان said...

بوست جامد جدا...ربنا يحميهم

بس غريبة انه يسأل عن الاسد اللي بيسوق العربية ومش بيسأل عن الراجل اللي بيطلع خيوط من دراعه وينط من الشباك
هههههه

سلام :D

kholoud said...

البوثت ده جاامد جدا يا نور
وربنا يخليهملك بس ياريت تحوتيلهم صوره عشان نفسي اثوف العسل دول...ز

زى الهوا said...

ماشاء الله ربنا يحفظهم , انا باموت فى الاطفال دى اوى , هوه بوبا اسمه الحقيقى ايه؟؟ , سكر والله

wa3d-el3yoon said...

هههههههههههههههههههه كبير أكبر من بابا فعلا كبير بس طب ما بابا كبير ههههههههههههههههه
لأ كتابتك للحوار حلوه أوى
الاطفال أجمل حاجه فى الدنيا والواحد بيحس معاهم أنه فى عام تانى خالص عالم ماعندوش حسابات عنده كده يعنى كده الكلمه تحمل معنى واحد بس
وبعدين بتقوليلها كنايه واستعاره مكنيه طبعا لازم يجيلها ازبهلال رسمى وتمشى وتسيبك
ربنا يخليهملك
ويبقوا حاجه كبيره

4xmisr said...

تم افتتاح مدونات
4xmisr
لتعليم التدوين على بلوجر باحتراف
spot-weblog.blogspot.com
الثانية للتعامل مع الانترنت بأمن
4xpert.blogspot.com
(تحت الانشاء)
باقى المدونات للربح من الانترنت لمن يهتم بذلك
شاكرين لكم سعة صدركم مقدما
وأرجو التواصل معنا بابداء الأراء والتوجيهات شكرا

yousef said...

خلى بالك من المعلم اللى عايز ينط من البكلونه وينقذ الاشرار ده
اللعنه على سيبس توون بوظت دماغ العيال
ربنا يباركلكوا فيهم يا رب
مستنى زياره لمدونتى
regards

elkamhawi said...

الاطفال تقريباً احباب الله
ربنا يخلهملك

ronnata said...

جامدة يا نور
كتابتك للحوار جامد
و بعدين متقعديش معاهم كتير طالما
انتى خايفة عليهم
لحسن انتى بتقولى معللومات غريبة
و السن دة بيلزق ف دماغة المعلومات بسرعة
و ربنا يخليهم ليكى

yasmine said...

البوست جميل اوى وربنا يخليهم
انا بحب الاطفال اوى وعندى اولاد اخويا بلعب معاهم برضه
وهما زى العسل برضه زى بوبا وسوكا كده
وكل المواقف اللى انتى قلتيها ضحتنى اوى بالذات حكايه الغسيل

~ Bato0ot ~ said...

looooool ana kman kont ba2ol bakalonaaaaaaaaaaa hehehehhehehehehhe

rabna yekhlihomlek w y7fzhom :)

~ Bato0ot ~ said...

enty handasa???? ana kmaaaaan

Nouran said...

r_نأسف للتأخير نظرا لوجود ظروف قوية منعتني من الرد عليكم احبتي :)-انفع مذيعة -

دودي:
يا رب يا بنتي يا رب

تويتي:
ايه التوافق ده نفس الدعوة يا رب تقبل منكم :)

روشا:
لا هما جامدين جدا وبيفهموا احسن مني بس انا لازم برضه احسسهم انهم لسه صغيرين فأأقولهم حجات مايفهموهاش كناية ومجاز وكده يعني :)

تشوس:
ثانك يو يا باشا متقلقش الشلة هتفضل موجودة بعون الله طول ما فيه اطفال زي بوبا وسوكا كده :)

مستكة:
يا رب
لا مش هحاسب دول يجننوا بلد اصلا وهما اللي بيدوني معلومات غلط مش انا انا طيبة انت عارفه :)
انا فعلا مش عارفه الاسد بيسوق العربية ليه وازاي بس مجتش ف دماغي انه غيران مني :)ههههههه

واحد زهقان :
شكرا يا فندم
مش عارفه سبايدر مان ده عمله ايه ف دماغه ربنا يسترها معاه وينسيه سبايدر ده :)

خلود:
شكرا يا خوخة والله حاولت احط صور بس البوست مش بيبقى متزبط هبعتهالك مع نور :)اي خدعة

زي الهوا:
سموحة ايه الاخبار:)
بوبا اسمه يحيى وسوكا اسمها بسملة :)

البشمهندس محمد:
شوفت ازاي لازم الواحد يدبر الامور علشان ميتسألش اسئلة مش هيعرف يجاوب عليها :)شكرا يا باشا
الاطفال احباب الله
مش لازم البنت تعرف يعني ايه كناية ومجاز من دلوقتي ولا ايه ؟؟
:) يا رب

يوسف:
لا بنخلي بالنا كويس منه يا فندم لحسن ده متهور :(
سبيس تون واتباعها ربنا يهديهم ويجيبلهم حجات حلوة فيها بدل سبايدر مان وباور رينجيرز والعنف ده

القمحاوي باشا:
تقريبا احباب الله يا باشا :)

روناتا:
ازيك يا باشا :)
شكرا يا باشا من بعض ما عندكم
لا متخافيش عليهم ده انا معلوماتي موثوقة وموثقة :)
لا متقلقيش عليهم:)

ياسمين:
شكرا ليكي يا جميل
ربنا يخليلك ولاد اخوكي يا رب وتلعبي معاهم ويا رب يخليلي بوبا وسوكا يا رب :)

bato0ot
بكلونة برضه :)
يااااااا رب
انت ف سنه كام والقاهرة ولا عين شمس ؟؟

مهندس مصري said...

ياه أنا فاكر و انا صغير كان مازنجر و جرندايزر مكسرين الدنيا دا غير الكابتن ماجد
ياله بقى الأيام دول راحت عليهم
ربنا يخليهم لك و يفرحك بيهم على طول
على فكرة أنا بنت أختي إسمها نوران برضه

may said...

الغباء اللي بيجي للعيال لما يدخلوا
المدرسة
تصدقي كنت لسه هاقول العيال بتفضل
ذكيه لحد ماتدخل المدرسه
حواراتهم لذيذه اوي
ومحسساني ان انتي بيبي وانتي معاهم
ربنا يخليهوملكم يارب

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول