هو و هي

هي: بلاش تنزل و النبي متروحش النهاردة

هو : لا طبعا انا نازل و هروح و هفضل اروح لحد ما اموت او هو يمشي

هي :علشان خاطري اقعد معايا انا حاسه اني هولد انهارده

هو : ما انا قاعد معاكي بقالي اسبوع و بتقوليلي كدا و بعدين انتي في السابع تولدي ايه بس

بصي بس يا حبيبتي مش فاكرة الراجل ده عمل فينا ايه مش فاكرة

هي: ما خلاص قال هيمشي استنيت 30 سنة مجتش علي ال 6 شهور دول

هو : لا جت ما بقاله 30 سنة هي ال 6 شهور ديه اللي هيصلح فيهم ولا هينشر فيهم الامان

انتي اكتر واحد عارفه هو ضرنا قد ايه و انتي برضه عارفه ان حالنا احسن من ناس كتير و مع ذلك ضرنا كتير اوي

مش فاكرة لما متعينتيش في الكلية علشان ابن الدكتور اتعين

مش فاكرة لما مامتك اتوفت ازاي بعد ما اخدت اكياس دم فاسده

مش فاكرة لما جينا نتجوزو سعر الحديد غلي قد ايه و مكناش عارفين نجيب شقة

مش فاكرة ادهم صاحبنا اللي مات في العبارة و هو راجع علشان يتجوز و محدش عرف ياخد حقه

مش فاكرة الضريبة العقارية اللي اتفرضت من غير اي سبب منطقي

مش فاكرة مارك صاحبنا اللي مات في الكنيسة الشهر اللي فات

مش فاكرة كل ده لازم انزل لازم انزل مينفعش منزلش

هي : حرام عليك فاكرة كل ده بس احنا في المستقبل دلوقتي ان شاء الله هيمشي ان شاء الله و الدنيا هتبقى كويسة

هو: ايه اللي يضمن اصلا انه ماشي ما في اول عهده قال هترشح فترتين بس و ما شاء الله بقاله 30 سنة ايه اللي يضمن انه ميعتقلش كل الشباب ديه ايه اللي يضمن ان ابنه ميترشحش و يكسب بالتزوير ايه اللي يضمن كل ده

هي : كل الدنيا شاهده عليه و لو معملش اللي هو قاله هنقوم عليه تاني كلنا

هو : ما كل الناس شافته امبارح و البلطجية بيضربوا في المتظاهرين بيقتلوهم و بيحرقوا البلد و بيخربوها هو ده الضمان اللي بتكلمي عليه و كمان ازاي يطلع يقول كلام تاني غير اللي احنا بنطالبه بيه و بعديها بكام يوم يطلع تاني علشان يلعب بعواطف الناس ديه كلها انا اتاثرت باللي قاله بس بلطجية امبارح دول خلوني افتكر انه ملوش امان فعلا ملوش امان

هي : ما ممكن ميكونش عارف ان فيه بلطجية هينزلوا

هو : حتي لو مش عارف ان في بلطجية ما كله من نظامه اللي بنطالب انه يمشي و كمان التغير اللي حصل ده واجب عليه و كان المفروض يحصل من زمان اوي ده مش فضل علينا ده واجب عليه

هي : طب بس اهوه عمل تغيير

هو : يا حبيبة قلبي كل اللي عمله احنا مش عايزينه ده حتي مقالش حاجه علي قانون الطوارئ مقالش حاجه علي خطة زمنيه محدده تضمن اللي قاله مقالش علي الاشراف القضائي للانتخابات

هي : يعني هتنزل برضه

هو : عارفه كل اللي قولتهولك فوق ده حصلنا احنا بس فيه حجات كتيرة اوي حصلت لناس تانيه و انتي عارفه كل ده كويس

عارفه ازمة العيش و ازمة الغاز و ازمة المواصلات و التحرش و الحوادث اللي بتحصل في الطرق و القطارات اللي كل شوية بتخبط في بعض و الشباب اللي بيهاجرعلشان يروح يغسل اطبباق برا بلده و يموت غرقان في البحر الزباله اللي بقت مالية البلد الزباله اللي جت فترة بقت تتحط فلوسها مع الكهربا ايه علاقه الزبالة بالكهربا!! الاراضي الزراعيه اللي اتبنا عليها و بعدين يروح يستصلحوا الصحرا ما كان عندهم ارض كويسة ايه لازمتها كل ده !!! و مش محتاج اقولك علي العشوئيات و حقهم فب انهم يعيشوا حياة كريمة محترمة مش هقلك علي اهل الدويقة و المساكن اللي هما عملوهالهم اللي هيا 36 متر مسطح تخيلي يعني تلت شقتنا تخيلي !!! و حجات كتيرة حصلت في عهده كتيير اوي

هو و يبدأ في البكاء ... ليه يا حبيبتي ليه نبقي سلبيين و نخاف و خلاص ليه عايزة ابننا لما يكبر و يسالني يا بابا انت منزلتش ليه في المظاهرات ارد اقوله ايه من حق ابني عليا اني انزل من حقه لما يجي للدنيا يجي و الدنيا تبقي احسن من عندنا من حقه يجي يلاقي رئيس عنده 50 سنة مش 80 سنة

تقترب منه و تحتضنه تتمتم ببعض ايات القران في اذنه

هو و قد هدأ متزعليش يا حبيبتي و متخافيش انا هنزل و ان شاء الله هاجي تاني و هشوف ابننا و ابننا هيجي في دنيا حلوة و جديدة فيها عدل و تعليم كويس و طبقه متوسطة و مفيش وسايط يضيعوا حقه و مفيش خضار مسرطن فيه اكل كويس و تعليم محترم و خدمة صحية ممتازة من حقه انه يتعلم في فصل فيه 30 طالب من غير ما ندفعله الاف الجنيهات متخافيش يا حبيبتي ان شاء الله

هي : انزل بس امانه عليك خد بالك من نفسك خد بالك انك نازل و سايبني انا و ابنك خد بالك ان الناس هتقول عليك خاين علشان نازل تدافع عن كل اللي قولتهولي ده و نازل تاخد حقك خد بالك من نفسك خد بالك من البلطجية اللي بقوا في الشارع خد بالك من اللي عايز يسوء صورتك و صورة اللي زيك في المظاهرات ديه

خد بالك من نفسك يا حبيبي

يقبل يديها و يقول : ربنا معانا ربنا اقوي و احسن من الكل ربنا ميرضاش ب الظلم

هي : ربنا معاكوا استودعك الرحمن الذي لا تضيع ودائعه لا اله الا الله

هو : محمد رسول الله