Wednesday, April 26, 2006

ربنا يستر

انا معرفتش موضوع دهب ده الا بالصدفة بابا كلمني يوم الاتنين وقالي
بابا: شفت الانفجارات اللي حصلت في دهب
انا: لأ ده فين عندكوا في الرياض ولا ايه
بابا: لا يا بنتي ده عندكوا انتوا
انا: في جزيرة الدهب؟؟؟
بابا: لا مش في جزيرة الدهب في دهب جنب شرم الشيخ
انا: ياااا ولا كنت اعرف ربنا يستر والانفجارات متجلناش الهرم وتفجره
بابا: بلاش هزار
انا: طيب وحضرتك عامل ايه
الى بقية المكالمة............. بأختصار معرفتش الموضوع الا بالصدفة زي الموضوع اللي قبله بتاع الكنائس وزي موضوع العبارة وزي موضوع بني مزار وما خفي كان اعظم
ومعرفش نسبوا الموضوع لمختلين عقليا زي اللي قابليهم ولا لجماعة ارهابية متطرفة ولا لابن لادن ولا لأنبوبة بوتجاز فرقعت وعملت اللي عملتوا طبعا كلها حجج واعذار اتعودنا عليها عند صدور اي مصيبة يا عيني وكل حاجة بيحطوها ع شماعة مختل عقليا طب بدل ما تسرحوهم في الشوارع لموهم وحطوهم في مستشفى ولو مفيش اماكن في العباسية ابنوا مستشفيات جديدة على الاقل هتشغلوا دكاترة ومهندسين وعمال ومحاسبين ومليون حد علشان المختلين كتروا في البلد دي ولا ايه رأيكم؟؟
ولما تشغلوا الناس دي البطالة هتقل وممكن يكون البطالة هو السبب في موضوع دهب ده هتقولوا ازاي؟؟ هقول ان ممكن شباب فاضيين خلصوا كليات ومش لاقين شغل اشتركوا في منظمة ارهابية وقالوا هيوروا الحكومة اللي مش موفرةالهم شغل -انا بتريق ان مكنش بجد- الله اعلم الحقيقة فين.
يعني في مليون مصيبة في البلد وهما مش بيجيبوا غير الانفجارات والمدابح بتاعة الارهابيين والمختلين عقليا وامش هنجيب الغلط ع مصر ولا ع الدولة اصل الدولة -زي ما خت في الاقتصاد- ما هي الا مجموعة افراد انتخبوا من قبل الشعب ليديرهم طبعا وده مش حقيقي ده مجموعة من العصابات اللي الشعب ميقدرش يفتح بقه ويكلمهم
والحاجة المؤكدة ان الواحد مش بيحس بالنعمة الي في ايده غير لما تضيع منه زي الصحة والحواس الخمسة يعني لو مصر ضاعت او جت امريكا وخدتها كلنا هنقف ضدها لكن طول ما العصابة مسكاها مش هنعمل حاجة وهنتفرج ده طبيعي جدا ع البشريين ولا انا غلطانة يعني تسمعوا في فلسطين او العراق عن مذبحة بشرية او عن عبارة غرقت او عن حاجة ذي ديه بأختصار هما مش فاضيين علشان وراهم حاجة كبيرة اسمها انهم عايزين يحرروا وطنهم لكن احنا وطنا متحرر بس متخلف ومورناش حاجة نعملها زي ان احنا نعمل ع تقدمه لكن ورانا ان احنا نخربه اكتر
ودي وجهة نظري المتشائمة جدااااااااااااااا
مش مكفيهم الثانوية العامة علينا جايبين انفجارات كمان
وربنا يستر ع البلد دي

10 comments:

karakib said...

صح ربنا يستر

Tamer Nabil Moussa said...

ربنا يرحم الشهداء ويدخلهم فسيح جناتة

ربنا يوفقك

الى الامام

marktwain said...

يارب اخربها علي الشعب ده يمكن يفوق و يعرف " ان الله لا يغير ما بقوم حتى يغيروا ما بانفسهم " و يفتكروا ان صلاح الحاكم من صلاح الراعية

ابداو بنفسكم الاول
بصراحة انا زهقت من الشعب اللى مستسلم لكل حاجة
اما البطالة فامفيش بطالة لان السبب باختصار ن كل واحد عايز يشتغل اول مرة مدير عام او انه يسافر برة عشان الفلوس كتير
انا فاكر مرة انابي البوتجاز وصلت لعشرة جنيه عند البايعين اللى فى شارع و كانت فى المستودع بخمسة جنيه او اقل و مع ذلك الناس كانت بتشتريها بعشرة جنيه لة الناس كانت اتمنعت عن شراها ايه اللى كان ح يحصل؟
او السكر مثلا فيها ايه لو نبطل نستعمله الصين عبها رفض انه يستخدم السكر و بقت بتصدره بتهيلئ في حجات كتيير نقدر نعملها
بلمناسبة ايام ازمة الانابيب كنا بنستعمل البابور احتجاجا و حاولنا نخلى الجيران زينا بس للاسف فاضطرينا نرجع للانابيب

Nouran said...

كراكيب"انتوك ولا انتيكة؟؟"
ربنا يستر

ابراهيم : البلد زي الزفت فعلا وكلامي كئيب كمان وهذاكر وامري لله

تامر:
ربنا يوفقني ويوفقك ويوفق الناس كلها والله يرحمهم مكنتش اعرف انهم مصريين اصلا غير من كام يوم كنت بحسبهم سياح

marktwain:
ومش لازم يكون صلاح الحاكم من صلاح الرعيه وفي بطالة استحالة يكون كل الناس عايزة تبقى مدير عام مرة واحدة لا طبعا وبرضه مش معقول اكون خريج كلية محترمة ومن كليات القمة مثلا واروح اشتغل اي شغلانة االشغل مش عيب بس مش بعد تعب السنين دي كلها دراسة ومذاكرة يروح هدر كان لزمتها ايه وجع القلب؟؟؟ ولو مستعملناش السكر هناكل ايه هنحط عسل ولا ملح؟؟؟
انا معاك في موضوع ان الله لا يغير بقوم حتى يغيروا ما بانفسهم
والمفروض كل واحد يبأ بنفسه وكل واحد يقول اشمعنى انا يبقى محدش هيتغير
والحمد لله ان الغاز الطبيعي موجود ومش هنعوز انابيب ولا بواجير يا بشمهندس

الافغانى said...

انا قرايت التعليق عند المهندس وانا راي سيب البيشتغل بيشتغل وكفاية موضوع انفجارات دهب اللي غطي علي قبض 50 واحد في اسبوععشان اعتصام متضامنين مع القضاة

karakib said...

انا انتوك
و باقول تاني ربنا يستر عالبلد علشام كده بوخت اوي و قلبت غم !!

marktwain said...

طب احنا معندناش غاز
نعمل ايه
سؤال رخم
ممكن اعرف عرفتي حكاية الباش مهندس دى منين؟
اوعى تكونى انتى كمان من نفس الجامعة

كمنجاتي said...

نوران الموضوع فعلا مقرف لانه بيفكرنى بابطال الحرب والسلام وابطال المعركه الجويه والبريه والبحريه والمهلبيه.....واقع زى الزفت وعلشان نغيره عايزين بلد جديده وشعب جديد....صدقينى انا كتير باسرح بخيالى وافكر لو انا رئيس الجمهوريه هاعمل ايه؟؟؟واقعد افكر ساعات فى الاخرباوصل لنتيجه واحده هى
ربنا يرحمنا
كمانجه

ayman_elgendy said...

موضوع ان الله لا يغير ما بقوم ده موضوع كبير اوي متخصرهوش في كلمتين عشان نغير واقعنا لازم نغير انفسنا والتغيير هنا المقصود بيه تغيير المجتمع .....اذا كان الناس هبلة وعبيطة فأنت دورك تنشر الوعي وتغير نفسك وتقول لأ لاي ظلم واقع امامك من باب الامر بالمعروف والنهي عن المنكر ودي فريضة زي الصلاة كده بس غايبة عنا حنتحاسب كلنا عليها......يعني مثلا موضوع القضاة والمعتقلين من كفاية والاخوان ....احنا لازم نقول لأ للنظام البوليسي اللي بيعمل كده وده برضه من باب تغيير ما بأنفسنا

Nouran said...

وانت طيب يا ابراهيم