Monday, August 14, 2006

تاج

تحديث
يا سلام اتبعتلي تاج من اربع اشخاص اعزاء عليا من جدو العزيز وسويدي باشا وام
المهم نأسف للتاخير كان عندنا فرح هحكيلكوا عليه بعدين ولازم انزل تهنئة انتوا عارفين ف النشرة اه وبمناسبة التهنئة عندي تهنئة جاااااااااااااااااااااااااااااااااااااااااااااااامدة جدااااااااااااااااااااااااااااااااااااااااا لروشا الحمد لله اخيرا نتيجتها ظهرت جابتلنا ترالالي عقبال ما جت هعملها تهنئة ف النشرة مع الفرح بس بعد البوست بتاع وزيرة الدفاع اللي انا هعمله ماشي المهم رشا جابت جيد جداااا والحمد لله ومبرووووووووووووك ياستي اي خدمة وهنزلهالك ف النشـــرة
نيجي للتاج
هل انت راض عن مدونتك شكلا وموضوعا:
اولا شكلا بقيت راضية عنها بعد ما حطيت فيها صورة بووووووه يا سلام عجباني الصورة اوي
اما موضوعا فأنا بكتب اللي جوايا وافكاري والحمد لله محصليش مرة اني كتبت حاجة مش راضية عنها ولو حصل مش مشكلة اهي مرة وكمان انا بفضفض كتير واوقات بتبقى فضفضة بهبل عادي يعني
.
هل تعلم اسرتك الصغيرة بأمر مدونتك؟
طبعا عارفين وبخليهم يقروا اللي كاتباه بس مش قدامي لما ابقى مش موجودة ويقروه هو كده النظام حتى
عارفين الباسورد بس مش عارفين اليوسر نيم ههههههه وبابا عامل بروفيل بيعلقلي مش بيبقى معايا ف راي مش مشكلة اختلاف الرأي لا يفسد للود قضية بس اوقات بحس اني غلط اني قلتلهم علشان ببقى عايزة اكتب حاجة براحتي من غير وجود حد يقولي متكتبيش كده تاني - يا رب ما يقروش البوست ده- هههههههه صحيت الصبح لقيت بابا بيقرا البوست روحت خارجة من الاوضة بس غريبة معلقش ومقليش حاجة شكله نط السطور هو الموضوع وراثة ولا ايه :)
.
هل تجد حرجا ف ان تخبر صديقا عن مدونتك ؟
لا طبعا كل الناس عارفة وبالذات لما اتكتب ف جريدة الشرق الاوسط اني اصغر واحدة -سابقا لان ف دلوقتي اصغر مني هيرو 16 سنة ع ما اعتقد- يا سلام عملت فرح وقلت للناس كلها عيلة بقى :)
.
هل تعتبرها امرا خاص؟
يعني ايه بصراحة مش فاهمة مغزى السؤال - شكله تبع السؤال اللي فوق-لو تبعه يبقى لأ مش امر خاص عادي يعني
.
هل تسبب المدونات بتغير ايجابي لافكارك؟اعطني مثال ف حالة نعم.؟
طبعا ف تغير كبير بقيت اعرف اراء اكتر ووجهات نظر وطرق تانية ف التفكير وكنت بحسب ان معظم شبابنا ف الضياااع بس لقيت تقريبا كل المدونات اللي دخلتها مش ف الضياع مع ان ممكن يكون حد عامل مدونه شخص شفته ف الشارع وقلت عليه ضايع بالضاد مش الصاد
.
هل تكتفي بفتح صفحات من يعقبوك بردود ف مدونتك ام تسع لاكتشاف المزيد؟
طبعا مش بكتفي بخش عند ناس من عند ناس تانين عارف بحس ان عالم المدونات ده كبيير ومهما حاولت ابحث هلاقي المزيد واللي ممكن ميرويش فضولي لمعرفة العالم ده
.
ماذا يعني الك عدد الزوار ...هل تهتم بوضعه؟
طبعا احب ان يكون العدد كبيييييير بفرح اوي بحس ان حد بيقرا كلامي وبعرف ده من خلال التعليقات يا سلام بفرح جدا وطبعا كنت عايزة احطه من الاول بس مش عارفة كل ما جرب حاجة تبوظ بس اكتشفت انه بيقع ف خطر الازدواج المحاسبي انه ممكن يعدني من ضمن الزوار لو دخلت اكتر من مرة يبقى ايه فايدته بس اعتقد انه ف البروفيل ف حاجة شبه العداد بتعد اللي شافوه البروفيل
.
هل حاولت تخيل شكل اصدقائك المدونين؟
اقولكوا حاجة ومتتريقوش عليا انا بتخيل ان كل واحد هو مدونته يعني مثلا عندكوا حد انا عارفة شكله مثلا رضوى افضل متخيلها هكذا هي الحياة ولو حطه صورة هتفضل هيا الصورة لحد ما شوفها تاني ورشا متخيلاها نيمو وهي بتكتب ده اصلي بحس ان اللي بيحط صورة بتبقى الاقرب الي قلبه بس مش ف كل الحالات بس برضه مش عارفة اتخيل الواحد ازاي هو ممكن حد يعرف شكل حد من كلامه
.
هل ترى فائدة حقيقية للتدوين:
لو مكنتش الاقيله فايدة كنت معملتش مدونة اصلا ع فكرة التدوين ده ممكن يكون ان مبقاش ليه ضغط هيب ع الحكومة بس تبقى مشكلة لو خدونا ف الرجلين هههههههه ساعتها هروح اقعد مع بابايا ف السعودية ولا اعرفكوا :)
.
هل تشعر ان مجتمع المدونين منفصل مجتمع منفصل عن العالم المحيط بك ام متفاعل مع احداثه؟
هو طبعا مش منفصل باحداثة لاني بعرف الاخبار من المدونات مش من الجرايد والتلفزيون وكمان بيبقوا اسرع ف نشر الخبر وكمان تحليله ان امكن مع اعطاء وجهه نظرهم التي من الممكن ان لم تكن صحيحة ف اغلب الاحيان - هو انا قلبت لغة عربية كده ليه -ن
بس اوقات بحس ان الدونين دول مش ف مجتمعنا معرفش بحس ف مدونين مش قليلين ومقدرش اقول كتير ان عندهم فلته او حاجة غلط ممكن من كتر السكوت بيطلعوا ف بلوجاتهم ممكن
.
هل يزعجك وجود نقد ف مدونتك ام تعتبره ظاهرة صحية؟
انا بطبعتي بضايق لما حد ينقدني مش هقول هتقبل بصدر رحب والكلام ده وانا بعتبر النصيحة غير النقد - ده توضيح لحسن حد يحسبني مش بتقبل النصيحو وغرور وكده يعني- بس لو كان نقد متخذ شكل النصيحة فهتقبلها بصدر رحب ونفس شهية كاني هاكل محشي بالظبط ورق العنب بتاع ابيتاف - مع اني مش بحبه- ما علينا
.
هل تخاف من بعض المدونات السياسية وتتحاشها؟ هل صدمك اعتقال بعض المدونين؟
مش هقول بخاف وبتحاشى هقول مش بخشها اصلا انا بصراحة مش بحب السياسة خااالص وبحس ان معظم المدونات السياسية هما اللي عندهم فلته
اما اعتقال بعض المدونين يعيني بجد حاجة صعبة مع ان ممكن اللي يكون حصلهم بالذات الشرقاوي حصل لكتير غيرهم واوحش من كده بس دول علشان احنا عرفنا عنهم وحصلت ضجه ف البلوجات علشان كده عرفت واتصدمت وفعلا حسبي الله ونعم الوكيل ف اللي عمل كده فيهم
.
هل فكرت بمصير مدونتك حال وفاتك؟
بصراحة مفكرتش بس اكيد هتعرفوا من اي حد من الاقارب الاعذاء او الاصدقاء المقربون بس والنبي لما تيجوا عندي بعديه اقروا الفاتحة ع روحي ويا ريت حد يعمل النشرة ع بلوجي بس يكتب فيها تعاذينا الحارة والغوا فقرة التهنئة وهسيبلكوا قصة وكام نكته بس مش سخيفة علشان تفتكروني بحاجة حلوة :) هبقى اقول لدودي اليوسر نيم والباسورد
.
آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟
اولا مين امال فهمي دي انا معرفهاش مذيعة ع القناه التالته ؟؟
الاغنية اللي احب اسمعها بتاعه عمرو دياب انا مهما كبرت صغير بس انا مش بحب احط لينك لاغنية هتجبلي وش ف دماغي وانا اصلا مش حطه السماعات شايلاها علشان الوش برضه
.
اكتب اسماء خمسة تمرر ليهم الدور
لازم خمسة اناهعملهم عشرة زي جدو
يا سلام المهم اللي بعتولي التاج كان نفسي ابعتهلهم لما يتبعتلي وكمان بعتوه لناس انا كان نفسي ابعتهلهم ايه اللخبطه دي المهم
روشا
ابراهيم
هوميروس انا معرفش راح فين راح ومرجعش
عمو احمد شقير -لازم عمو دي ناسف ده ادب-
الاستاذ ادم المصري
زنجولا باشا
البشمهندس المصري
رضوى هكذا انا
محمد مفيد
wa3ed el 3yoon
.
انا تعبت مش قادرة احط لنكات ع اللي مبعتلوهم انا هروح اقولهم بنفسي ماشي :)

17 comments:

m_elsewedy said...

طب بصى انا هاحجز أول تعليق ولما ارجع من الشغل ان شاء الله هاكمل
لحسن كدة هاتأخرينى على الشغل
:D

hero said...

خلاص عينتيني اصغر مدون
بس على العموم شكرا يا ستي
اجاباتك حلوة

مـحـمـد مـفـيـد said...

عزيزتي نوران والله ده شرف ليا لا ادعيه ان اكون متوج منكي
وشكرا علي التاج الرائع ده

Anonymous said...

ميرسى نوران على التاج وسورى على التأخير فى الرد عليه .
أبقى أدخلى وشوفى الاجابه عليه .

Anonymous said...

ههههه يا نوران
كلامك زي السكر ماشاء الله عليكي
اولا: بامووووووووووت في صورة بوووه..و حاسة انك زيها شقية:)

ثانيا: يوم ما اعمل الورق العنب..ح اقولك تذيعيه في النشرة...اوعي تنسي..عشان الناس تتعزم..و بعدين ده اصله حادث لا يتكرر كثيرا ههه

امال فهمي..مذيعة ع التالتة؟؟؟
هههههه حرام عليكي
بتاعة برنامج الاذاعي القديم ع الناصية..و عبد الحليم و القصة دي

وحتسيبلنا النكت و القصة الهندي كمان
:) ربنا يديكي الصحة و طولت العمر و تكتبيهم بنفسك

admelmasry said...

اسف
انا مش استاذ انا دكتور
اوعي تنسي
انا ادم المصري
اول دكتور احه

تحياتي

DoOoOoOdY said...

مجننننننننننننننونه كالعاده يا نوران وبس كده

هوميروس said...

شكرا ياباشا علي اللينك
وحكاية ان انتي مبتعرفيش تكتبي بعض حاجات عشلن في البيت عارفين ممكن تعملي مدونة تانية في السر ومتقوليش لحد عنها وخدي راحتك انا جربت الحكاية دي مرة
يلا انا جيت اهوه ويمكن كنت متضايق شوية الفترة اللي فاتت بس الحمد لله دلوقتي احسن كتير

Dr. Tantawy said...

بصراحه اول مره اعرف موضوع الشرق الاوسط ده يا اضغر مدونه سابقا .. داحنا معانا وزيره دفاع لها تاريخ و الواحد مش عارف

متشكرين على التاج الجميل ده .. انا عملته و نشرته على المدونه .. بس مستني ينشف و هشيله علطول علشان الكمكمه

ربنا يوفقك يا بشمهندسه

Nouran said...

سويدي باشا:
اتفضل احجز عارف كل او تلات تعليقات ليك لو استمريت ف الحجز هعملك تهنئه هههههه بس شكلك لسه ما رجعتش من الشغل انت روحت المنصورة تاني ولا ايه يا معلم وانا مستنياك لما ترجع :)

هيرو باشا - الدكتور المستقبلي-:
خلاص عينتك اصغر واحد اصلي كنت الصغيرة وانا عندي 16 سنةيبقى انت الصغير و ع العموم شكرا يا سيدي

محمد مفيد:
يا سلام احجتني بكلامك والله هتخليني اخد قلم ف نفسي

البشمهندس محمد:
ولا يهمك وخلاص سيبتلك تعليقي وانت رديت عليا

ابراهيم:
يا سلام كده فعلا هاخد قلم ف نفسي تعرف انت بتقول كده علشان مشفتش وش الرخامة لازم انزلهولكم ف بوست لوحده واي خدمة يا دكتره - ع وزن هندزة-قافيه بقى

ابيتاف:
والله انت اللي كامك جميل وانا كمان بحب الصورة اوي والله انا مش شقيه اوي تقدري تقولي عندي طاقة كبيرة بس - هو في فرق- واول ما تعملي المحشي اديني تعليق ومعاه طبق اديكي بوست هديه وارجعلك الطبق
ووالله انا اول مرة اسمع عن امال فهمي دي اصلي مش بعرف الحجات دي ومنكم نستفيد شفتي الكرم بتاعي هسيب النكته والقصة بس هتبقى هندي ع حق وربنا يدينا كلنا الصحة وطولت العمر وانا اكتبها وانتوا تقروها

ادم باشا:
والله انت عارف اني واخده موقف من الدكتوراه بتاعتك دي بس ممكن اقولك يا هندزة او يا دكتور من غير التكلمه بتاعتها ولو حبكت معاك يبقى نأسف للغلط يا دكتور **الاول - التلات نجوم كلمة خضعت للرقابة - والحدق يفهم :)

دودي:
حراااام عليكي هتديني البلوجر كله فكرة وحشة عني وبعدين انا بقالي كتير عاقلة وانت عارفة بس لما بقلب ببقى حاجة صعبة اوي

هوميروس:
حمد لله ع السلامة الاول والله يا باشا انا بقيت اقول اكتب اللي انا عايزاه بس هسمع كلام انا مش عايزاه فبابا عمل لنفسه بروفيل يعلقلي زي ما هو عايز المواجهة الالكترونية احسن من المواجهة فيس تو فيس وعارف لو حكمت هعملها وهاجي اقولك ماشي
ويا ريت متغيبش عننا تاني وربنا ما يجيبلك ضيق يا رب ويبعد عنك وعننا الهم والحزن

Nouran said...

زنجولا:
انت متعرفش ورولا خرسا كمان قالت اسمي ف برنامج ف الغريق بتاعها
لا مغعاكو وزيرة دفاع خافوا ع امن البلد منها
اشيلهولك انا لو مش عايز تطلع البلكونة وممكن اكويه لو تحب بس هبعته للمكوجي :)

m_elsewedy said...

يا نوراااااان والله كنت فى المنصورة فعلا
بطلى تمشى ورايا بقى
:P

اجباتك كلها من صميم قلبك اللى على قلبك على لسانك
ودى احلى حاجة فى الموضوع
يعنى انا دلوقتى مش قاعد اقرا انا اكنى قاعد معاكى وبسمع
بث مباشر من بؤك لودنى على طول
:D
وربنا يستر وبابا ما يقفلش معاكى زى بابا سوسة

وبصراحة هاتفشخر بيكى عشان اسمك طلع فى الجريدة والتلفزيون
وانا كمان زمان طلعت فى برنامج بستان الوان الاهبل ده
:D

Nouran said...

شوفت انا وزيرة دفاع مصحصحة ازاي لشغلي
حسستني اني عاملة اذاعة -حكاية الاذاعة دي ضربة مع دماغي- شفت اسمي اتقال مرتين يا سلام افتخر زي ما انت عايز وانا كمان كل شوية اقول بقيت مشهورة يا جدعان :)
ايه برنامج بستان الالوان ده انا مشفتوش يا سويدي :)

m_elsewedy said...

ده برنامج مسابقات كان بتاع ماجدة عاصم عبارة عن فريقين كل فريق مكون من ثلاثة افراد
برنامج اهبل كدة
:D

Nouran said...

سويدي :
والله يا سويدي يا خويا مشفتش البرنامج ده هو انت كبير اوي كده علشان انا ملحقش البرنامج انت كنت متفوق وانت صغير وخدوك البرنامج هههههههههه

ام المريلة الكحلي :
شوفتي انا بقيت مشهووووووووووورة شوفتي ازاي وزارة وتاجات واذاعات وتهاني واغاني واي حاجة :)

مداح القمر said...

انا بستعد قبل ما ادخل على البلوج بتاعك..يعنى لما بكون مزرجن شويه او متعكنن او قرفان من اللى حاوليا بدخل على البلوج بتاعك واديها ضحك ومن القلب والله...يارب بجد تملى ضحكتك وخفة دمك الدنيا دايما
بقولك ايه؟ما تيجى نعمل شركه للمباركات والتعازى ونتعاقد مع فراشة الحاج محسن خيشه ونعمل شغل عالى اوى وقناة
ARTتحتكر كل اعلاناتنا
مبروك على الفرح وابقى احكيلى انا كمان
بهزر اكيد
لا ولا يهمك فضفضى وما تحطيش البيت فى دماغك وحطى نفسك مكانهم..اكيد عايزين يسمعوا كتير منك
قولتلك قبل كدا انتى مش ح تكبرى حتى لو لقيتى حد انتى اكبر منه
يا نهار ابيض...طيب انتى متخيلانى ايه؟ ولا اقولك الحق احط الصوره الحقيقيه عشان الصدمه بس..هو مش عيب انى اكون شبه على الكسار طبعا
حلوه اغنيه انا مهما كبرت صغير بس ايه رأيك فى اغينة لازم اغنى لمحمد فؤاد فى البوم شيكا بيكا على ما اذكر...جربى تسمعيها وقوليلى رأيك..ح تعجبك

Nouran said...

احمد باشا عندنا يا مرحبا :
حلوة بتستعد قبل ما تخش عندي دي ع فكرة انا باخد قلم ف نفسي بسرعة
طب بص اتفق مع شركة الفراشة دي واعملنا اغنية للاعلان وانا هنزله عندي ف النشرة و نوديه عند روتانا انا موافقة بص انا مردتش احكي ع الفرح كله عملت نبذة مختصرة
والله بابا بيفضل يقولي ف كلام بيتقال وكلام مش بيتقال معرفش هيا طماطم هاخد واحدة واسيب التانية حاجة صعبة فعلا انا متخيلاك شبه الصورة اللي انت حطتطها مع خلفية زرقه نفس لون البلوج بتاعك بس هيا دي مش صورتك وانت صغنن اسالك سؤال ومقلش عليا جاهلة ؟؟
مين علي الكسار ده
البوم شيكا بيكا ده قديم اوي باين كده لو لقيت الاغنية هسمعها واقولك راي