Monday, November 27, 2006

واخيرا

واخيرا
فعلا بجد وحشتوني جدا جدا الحياة من غير تدوين رخمة رغم ان بابابيقولي
يا نوران هتدمني الموضوع ده بس ف الصيف بجد الموضوع كان هيوصل لموضوع الادمان كده علطول قاعدة قدام الجهاز ولا شغلة ولا مشغلة ما انقذنيش غير المصيف ودلوقتني مينفعش ادمنه خالص نقول الكلية برستيج يعني قال مقطعة نفسي مذاكرة اه مقلتلكوش عن سبب انقطاعي السبب وببساطة الكمبيوتر ودي مشكلة اسمها: التكنولوجيا وانا

حسبي الله ونعم الوكيل ف دي مشكلة المشكلة مش ان جهازي فرقع ولا اني ببوظ الاجهزة المشكلة ف ان الجهاز جديد لانج بس فيه عفريت بجد ف كل الاجهزة الحديثة عندنا بتفرقع الكاميراالديجيتال اللاب توب واخيرا الكمبيوتر شفتوا مشكلة شنعاء ولكن الحمدلله الكمبيوتر رجع لعقله ويا رب يفضل كده علطول
الميت تيرم خلصته والحمدلله وعرفت ايه بعبع كلية الهندسة اللي محدش من كل الاخوة البلوجارية البشمهندسين قالي عليه ممكن يكون بعبع كل واحد بيختلف عن بعبع التاني بس انا بعبعي الوقت فعلا مفيش وقت خالص لسه مخلصين رمضان ويقولولك امتحان الميت تيرم بعد اسبوعين او تلاتة ماشي هنلحق نذاكر الاسبوع الاول عدى وبنفكر هنذاكر ايه االسبوع التاني عدى وبنفكر نذاكر ازاي الاسبوع التالت جه ولسة مذكرناش خالصالاسبوع الجاي الامتحان يا ربي فيه حجات مذكرتهاش خاااالص هنسقط ولا ايه بابا يقولي مش عايز مقبول وهو مش عارف اني هطلع بمواد يا ده انا كنت اموت مش مشكلتنا المهم اسبوع الامتحانات شخصيا هو اللي جه وانا مذكرتش حاجة قبليها خالص اول مرة ف حياتي اذاكر حاجة لاول مرة واروح امتحنها تاني يوم وايه ما شاء الله عليا ابقى فاكرة كل حاجة قبل الامتحان اخش جوه كان الذاكرة اتمسحت باستيكة وطبعا مفيش وقت لحاجة اسمها تفتكر او تفكر ف الامتحان لازم تبقى حافظ المسالة وتشتغل معرفش ليه النظام الرخم ده المهم كلنا كده والغريبة بنخرج من اللجنة هنموت من الضحك معرفش ع ايه بالظبط تقدروا تقولوا هبل ونسال بعض حليت ايه صح مش السؤال العادي غلطت في ايه
الحمدلله الامتحانات عديت ع خير وخرجت بيها بحصيلة تجارب كويسة
اول مرة ف حياتي اعرف ان فيه يوم الجمعة امتحان كان عندي امتحان رسم وايه كمان الكلية عملت حركة ف منتهى الذكاء اللي خلقه ربنا كان المفروض نمتحن ف ملحق بره الكلية بتاع الكيميا رحنا نطلع صالة الامتحانات لا انتوا مش هتمتحنوا هنا ف امتحان تالتة باور فيه وهيخلص 3 ونص ازاي يعني مكتوب كده ف الجدول وامتحانا هيبتدي الساعة 2 يا رب ارحمنا يا رب نقول للدكتور هنعمل ايه دلوقتي الساعة 2الا عشرة يقولنا ثواني بنعمل حسابتنا يا سلام بيعملوا حسابتهم النهاردة حبكت يوم الامتحان وهما اللي بيدرسولنا بحوث العمليات والحسابات الدقيقة والدقة والانتظام مش مشكلتنا دي مشكلتهم هما انا فضلت اقول كده لصحابي وفضلنا قاعدين شوية لحد ما قالولنا ارجعوا ع الكلية تاني تخيلوا بقى 400طالب بيعدوا الشارع مع بعض قفلنا المرور طبعا لحد ما عدينا النحية التانية وقاعدين نقول لو الامن المركزي هنا كان هيحسبها مظاهرة –هبقى اقولكوا ع موضوع الامن المركزي ده مرة تانية- ويجي يضربنا بس احنا هندافع عن نفسنا بالمساطر والمثلثات قال يعني المهم رحنا الكلية قالولنا هنمتحن ف صالة الالعاب الساعة كام يا جماعة الساعة اتنين وعشرة خير خير متقلقوش
وصلنا الصالة الرياضية هاهاهاهاها الباب مش راضي يتفتح يا سلام روحوا ع مبنى عمارة الدور السادس ماشي يا عم لما رحنا وهنطلع لا تعالوا تاني ع الصالة الرياضية روحنا لحد الساعة اتنين ونص بيحاولو يفتحوا الباب ونسمع الله اكبر هما داخلين يحاربوا الحمد لله هيه هيه هيه فتحوا الباب الساعة اتنين ونص دخلنا الحمد لله لقينا مكان والحمد لله قعدنا ندور ع بوردة علشان نبدا بقى ونثبت اللوحة البورد خلصت ما شاء الله الدكتور يقف ويقول اللي مش لاقي مكان يخرج بره واللي ملقاش بردة يخرج بره نعم بخرج فين بره المهم خرجنا كنا حوالي 200 او 150عدد لا باس به كده يعني الساعة كام الساعة 3 الا ربع الحمد لله هنروح فين يالا ع مبنى عمارة الدور السادس واطلعوا بالاسانسير قال يعني كنا هنطلع ع السلم المهم طلعنا ولقينا مكان الحمد لله ولقينا بورد بس كانت سوبر بوردة بتاعة عمارة بقى ومش قادرين نشيلها الحمدلله الاخوة البشمهندسين اللي معانا شلوهالنا وحطوها ع الترابيزة وفضلنا ننفض عليها كمية تراب بشعة فعلا الحمد لله الساعة كام تلاتة يالا هنوزع الورق عقبال ما افتكروا ان احنا عندنا امتحان الحمد لله خدنا الورق وكانت الساعة تلاتة وخمسة بدانا والحمدلله الرسم وخلصنا ع الساعة خمسة وخمسة نزلنا كانت كل الناس خلصت بقالهم ساعة وقاعدين مستنينا سوري يا جماعة مش بإيدنا وحكينالهم المشكلة بتاعتنا
طولت عليكم فيه حجات كتيرة جدا جدا جدا عايزة اكتب عليها بس بوست واحد مش كفاية
سلاااااااااااااااااااام
الكلام طالع نمنم بس عندي مش ظاهر الفونت والكلور والحجات د اختفت اصلا مكنش راضي يخش ع الاكونت من اول مرة قولولي اعمل ايه لحسن الخط ده هيحولني وهيحول ناس كتير افيدوني ارجع الحجات بتاعة الخط دي ازاي اوكش
:)

19 comments:

مـحـمـد مـفـيـد said...

اولا حمد لله علي السلامه وانا عارف ان الرد هيجي السنه الجايه
ثانيا /الخط بصراحه صعب قوي وهتخليني البس نضاره كده حرام عليكي
اتمني ان تكوني بخير

Nouran said...

والله انا عارفة انه صعب اوي بس عندي مشكلة جوه الفونت والحجات بتاعة الايديت مش موجودة شوفت الرد جه علطول ازاي شوفت السرعة
والله يسلمك يا باشا :)

هوميروس said...

عودٌ عبحميد
مرحبا بيكي في الكليه

She said...

نوراان الف الف مبروك مش امتحنتي اول ميد تيرم في هندسه

بعد كده كله هيعدي

وعلفكره لو دخلتي عماره انتي اللي هتشيلي البورد مش البشمهندسين انسي الدلع دل كله

هوا انتو لسه شفتو حاجه

VEЯŎ said...

حمد الله على السلامة

مداح القمر said...

حمد لله ع السلامه...باين عليهم كانوا يومين جامدين..ربنا يوفقك
اهم حاجه فعلا تاخدى الخبره...خبره=نجاح
خبره+مذاكره=نجاح مع تقدير
وبعدين ايه حكاية يوم الجمعه دا...وعرفتى تحلى ازاى؟؟ انا كان عندى تروحوا جنينة الحيوانات ارحم
ربنا يوفقك ف المذاكره وتلاقى وقت ليها..ولينا احنا كمان..ما احنا لينا عليكى حق برضه..ولا ايييييييييييييييه؟

الســـاحر said...

اولا حمد لله على سلامتك
وعلى فكره برده كلنا مشغولين فى الامتحانات
ويارب يارب ربنا يوفقك فى الامتحانات وتطلعى الاولى على الكليه كمان
ههههههه
لكن الحمد لله انك نورتى البلوج من تانى
وفى النهايه سلامى
ربنا يوفقك

voice of love said...

ياااااااااااه
عود أحمد يا باشمهندسة يا صغننونة
ومبروك مقدما على النتيجة وبالنجاح ان شاء الله

هوميروس said...

مش عارف انتي لقيتي حل لمشكلة الفونت دي ولا لا
بس عموما ممكن تعملي اللي هقولك عليه
لما تدخلي علي creat postهتلاقي كلمة compose جنبedithtml اضغطي علي composeممكن ترجع الحاجات دي كلها وربنا يسهل

هوميروس said...

ايه ده الكلام كله اتلخبط
اضغطي علي compose

NoOR said...

كده اقدر اقول وانا مطمن اهلا بيكي في كليه الهندسه

DoOoOoOdY said...

اهلاااااااا بيكى والله ليكى وحشه يا بنتى ومتغيبيش كده تانى يا باشمهندسه
سلااااام

Nouran said...

انا جيت شوفتوا متاخرتش :
هوميروس:
اهلا بيك انت تاني عندنا خلاص يا عم انا بقيت قديمة ف الكلية ده انا امتحنت ميت تيرم

شيماء:
الله يبارك فيكي والحمدلله انك بشرتيني علشان انا حطه ف ذهني اني مش هعدي من اعدادي اصلا
بس البورد ده تقيل وانا اصلا شكلي هخش عمارة بعد ما كنت مش ناوية ياللا اللي فيه الخير يقدمه ربنا

فيرو:الله يسلمك

البشمهندس محمد باشا:
الله يسلمك وهحاول ماغيبش تاني

الدكتور احمد:
اه والله كانوا يومين عذاب الحمدلله عدوا ع خير وحلوة الكلمتين بتوع النجاح والخبرة نظرية برضه
هنحاول نقسم الوقت بس انتوا ادعوا اعدي السنة دي ع خير

الساحر:
الله يسلمك
الحمدلله مش كنت انا لوحدي اللي متعذبة
انت بتتريق عليا الاولى من ورا قصدك :)
يا رب افضل منورة علطول يا رب :)

ابيتاف هانم:
وانت طيبة يا ستي
يعني ده طبيعي اعذروني يا جماعة اصلي كنت لما بنقص نص درجة كنت بعيط :))

البشمهندس محمد:
والله الحمدلله انك طمنتيي اني احتمال اخرج منها وشكل اعدادي دي عند كل الناس زي بعض ربنا معاك وتخرج وربنا معانا وننجح

داليا:
ازيك يا جميل
يا رب انجح يا رب

هوميروس:
شكرا يا باشا دخلت لقيته اتعدل

نوور:
شكرا يا بشمهندس كده اقدر اقول كان عندك حق لما حذرتني :)

دودي:
ماشي يا ستي :)

أُكتب بالرصاص said...

انا هأدعي لك دعوة حلوة علشان الامتحانات


روحي يا بنتي
ربنا يجعل لك اللجنة سهلة والمراقب شيش بيش وطناش
وتعرفي تغشي كويس


:)

بالنسبة لتحسين الخط

لازم تكتبي كتير

المقالة اكتبيها عشر مرات قبل ما تعملي ليها بابلوشير


والحمد لله على سلامتك

ياء said...

حمدلله على السلامه ياجى من الميد ترم

marktwain said...

و بكت شمعة من اول ميت تيرم
لسه قدامك تسع ميت تيرم و عشرة تيرم غير المعامل شدى حيلك
بس على فكرة المهم اكتر التيرم ركزى فيه بقى

ياريت تشركونى احملة اللى عايز اعملها
ضد الاستغلال
http://weght-zaar.blogspot.com/

admelmasry said...

انت فين يا جميل .. وحشاني

Captain L.J.Silver said...

howa enty lessa shofty 7aga ..."u ve only just begun" ....enjoy b2a ya nouran ; pppppppppppp

Nouran said...

اكتب القلم الرصاص:
لو حضرتك عايز تدعيلي ادعيلي ان ربنا يهديني واذاكر والامتحان سهل واللجنة مش سهله ومش صعبة علشان اتمزج:)


ياء:
الله يسلمك

مارك توين باشا:
لا دي شمعة ساحت مش بكت يا رب اكمل واصمد ع ال9ميت تيرم وال10تيرم :)

ادم باشا:
انا اهوه يا باشا كنت مشغولة اعدادي بقى :)

البشمهندس شيفو:
والنبي بلاش تشاؤم محسسني اني داخلة ع روتانا هو انت لسه شفت حاجة مش هتقدر تغمض عنيك :)