Sunday, April 22, 2007

bAck


لولولولولولولي وخلصت الامتحانات ورجعت تاني كح كح كح اية التراب ده كله البلوج مترب اوي كله من رياح الخماسين ديه وانا مقفلتش الشوباك كويس ايه ده الصور متربة نبدأ حملة التنظيف جردلين ماية وأزازة جلانس وحتة تنفيض المع بيهاالحروف والصور -بوم تيش نيش - اه الحمد لله نظف وبقى بيبرق دلوقتي يااه ست بلوج هايلة ههههه فعلا ياااه بجد كانوا اربع اسابيع عصيبة اول اسبوع النتيجة بعد كده توابعها وبعد كده تحضير عفريت الميد تيرم وبعد كده الامتحانات مااقلكوش عليها تفزع الحمدلله بس الواحد حس ان ثقته بنفسه بدات ترجع تاني بعد ما كانت ادمرت باستثناء ان امتحان الرياضة اللي هجيب فيه امتياز ان شاء الله التيرم التاني - ده اللي طالع عليا اني اقول لصحابي هجيب امتياز رياضة التيرم ده شكلي اتهبلت خلاص- كان امتحان ابن ناس كالعادة ورخم بس كنت طالعة مبسوطة من جوايا بالرغم اني الفت علم تكامل جديد بس ده ميمنعش اني حسيت اني مبسوطة ولا الكيميا بدعت بس حليت مسالة التكيف صح الحمدلله هههه كان يوم الجمعة اوقف ميكروباس الساعة 8 الصبح اقوله جامعة بصلي باستنكار واستعجاب قائلا جامعة ايه دلوقتي يا انسه ومشي وسبني بس معرفتش وجهع الميكروباس ده ياااه بلاش السيرة ديه بقى انا زهقت من الامتحانات..ا
.
المهم اثناء تنظيفي للبلوج عثر ع تاجين متاخرين بقالهم قرنين والله يا بشمهندس مبرمج حر انا مقصدتش انفضلك ومعملهمش بس الظروف جت كده وادي يا سيدي التاجين اللي ف زمتي وفوقيهم غرامة 25 قرش لا مش القرش بتاع الماية قرش اللي هو حفيد حفيد الجنية يعني ربع جنيه يا عم نبدأ بقى
.
هل كنت طالب شاطر ف المدرسة؟
.
هات بلاستر يا دكتور علشان نغير ع الجرح بقولكوا جبت ض رياضة تقولي شاطر بس بصراحة انا كنت شطوووورة طول مرحلة المدرسة وبطلع من الاوائل ونجوم وحركات كده بس المدرسين مكنوش عرفني علشان كنت بقعد ف الاخر مش بتكلم ولا اجاوب بس بيتفاجئوا اني اجيب درجات حلوة اخر السنة واني بطلع من الاوائل بس ع فكرة ان شاء الله هبقى شطورة ف الكلية اصل الوقعة اللي متكسرش تقوي باستثناء انها بتعور بس بتدي مناعة وخبرة
.
كنت عايز تبقى ايه وانت صغير؟
انت اللي جبته لنفسك يا فندم الموضوع ده عايز بوست من اوله لاخره بس هقول برضه من غير تريقة يعني طبعا كنت
عايزة اطلع مدرسة ده حاجة طبيعية يعني علشان انتقم واوقف العيال واسالهم شفوي اصلها عقدتي الشفوي ده واللي ميجاوبش هعذبه
وكنت عايزة اطلع بتاعة ذرة ويبقى عندي كشك سجاير جنب الذرة واقف ف الاتنين
وكنت عايزة اطلع جرسون علشان التبس وكنت عايزة اطلع مخترعة وصحفية بيني وبين نفسي ورسامة بس بجانب كل ده كنت عايزة اطلع مهندسة ويا ريتني ما طلعت كنت فضلت واقفة مكاني مش كان احسن
.
ايه اكتر مادة بتكرها؟
عادي يعني بس العربي ممكن شوية علشان مكنتش بجيب فيه درجات عدلة بس في حاجة غريبة اوي ليه نص البلوجر بيكره الجغرافيا دده انا كنت بحبها اكتر من التاريخ وكنت شاطرة فيها وف اولى ثانوي كنت جايبة تاني اعلى درجه فيها شفتوا التفوق :)
.
التاج التاني::
ايه الهواية اللي لما تكون فيها بتنفضل عن العالم الخارجي؟
.
اديني كتاب قصة رواية ميكي حتى وسيبني مش هترجع غير وتلاقيني مخلصهم بحس ان القراية ديه عاملة زي النوم والماية والاكل حتى لو كانت قراية مجلات اطفال
مع ادهم صبري افضل اتخيل ازاي بيعمل كده الرجل المستحيل ده والست الشريرة سونيا جراهم اللي مش راضية تديله ابنه ست رخمة اوي ولما بقراها بحس ان المصريين دول كويسين معرفش ليه بجد نبيل فاروق يشدك باسلوبه الجميل وعايز تعرف ايه اللي هيحص بعد كده
نيجي لفريق المستقبل ونور وزملائة ولحد دلوقتي نفسي اعرف بنته ازاي قده فيه عدد وقع مني ومرة واحنا مسافرين ف الطيارة فضلت ورا العدد لحد ما خلص كان بتاع الطيف وكنت هعيط بس عارفة ان المشكلة هتتحل بس نفسي اجيب طرق مفتكسة تحل المشاكل زي القصص ديه
ماوراء الطبيعة ودكتور رفعت باستثناء اني بحس انه شخص سخيف ورخم معرفش ليه برضه بس بحب اقراها وببقى عايزة اعرف سر النداهة بس مش كل الاعداد ظريفة يعني فيه بيتقى رخمة وفيه حلوة بس احلى عددين اقرتهم لما فيه ناس بيحكوا حكايات مرعبة مرة ف برنامج ودكتور رفعت حد مستضيفة ومرة كانوا شلة اصاب قاعدين سوا
نيجي لهاري بوتر يا سلام ع الامتاع جااامد جااامد فعلا
اكتر حاجة لو حد ندهلي هنفضله يعني عارفين ايه وانا بقراه بلية العجيب منزلش منها غير 12 عدد بس بحبه جدا بلية ونخلة وطوفي وعزوز الشرير بس غبي اوي ودنجل وطبعا البلية المسحورة وبلبلة اخت بلية فعلا اكتر سلسلة بحبها اه والمخترع اللي مش فاكرة اسمه ماشاء الله فقدت الذاكرة لا بس جامدة صراع ف النادي اكتر واحدة بحبها اصلها تاني اصدار بس اول واحد جبته كان عندي الحصبة و7 سنين وكانت هي مؤنس وحدتي ف غرفتي ههههههه ايه ده سجع يا سلام عليا
طبعا مش عايزة انسى ميكي جيب وفلاش ومجلات الاطفال اساسي علاء الدين وبلبل و قطر الندا وماجد وميكي .
ع فكرة فيه هواية تانية الرسم ده بجد حبي بس غدر بيا برضه مش مشكلة المسامح كريم وانا لسه بحبه برضه
.
اباصي التاج ده لمين
المهم بقى يا جماعة المفروض يبقى فيه نشرة قوية بس انا مش قادرة اعمل واحدة فهنزل التهنئة
اصلا كل سنة وانتوا طيبين علشان المولد النبوي جدوا حلاوة المولد غرامة تاخير
وكل سنة وانتوا طيبين علشان شم النسيم ويا رب تكونا استمتعتوا بالفسيخ والبيض الملون
.
مبروك لتاتي الف مبروك يا جميل
.
مبروووك لدعاء وبراء
.
انتوك او هاني يعني كل سنة وانت طيب هي متاخرة تلات سنين بس مش مشكلة ع عيد ميلادك وع ان بلوجك تم سنه وعقبال 100 سنة يا بشمهندس
.
لستو ادري بلو متاخرة كتير بس مبروك ع سنتين تدوين يا جميل وعقبال سنين تانية كتير
.
نسكافيه وكابتشينو : مبروك يا احلى مدونين مدونة القهوة ديه بس انا عايزة نسكويك :) واحد كابتشينو وواحد
نسكافيه وصلحوا
.
كمون وزنجبيل : الف سلامة يا باشا ان شالله اللي يكرهك
:)
.
مبروك لدكتور مصطفى عزت ع الخطوبة مبروك يا دكتور
.
وكمان لنورهان مفيد اخيرا دخلت عالم التدوين مبروك ع البلوج شكله هيبقى هايل

.

كلمة محشورة ف زوري :
كل واحد عارف هو عايز ايه محدش يغصب ع حد حاجة وانا لو نصحت حد وهو مرضاش خلاص انا عملت اللي عليا بس الحد ده لازم يعرف ان اللي نصحه بيحبه وبيخاف عليه وان استحاله كل الناس غلط وهو اللي صح ومينفعش حد برضه يعاند وخلاص وكماناهم حاجة ان الضمير يبقى مستريح الضمير
.
الحمدلله قولت كل اللي كان ف نفسي نشكركم ع حسن استماعكم وقراتكم وشكرا لكم واستمتعوا معا ع اجواء الموسيقى الصاخبة والبوست الرائع هذا ف هذا الجو البديع والدنيا ربيع وكل واحد هينزلع عصير برتقال ع حسابي

17 comments:

صاحب البوابــة said...

ياااااااااااااه

رغم ان الكلام كثير

الا اننى حقاً قد استمتعت بقراءة هذا البوست

خاصة عندما علمت أنك تقرأين لدكتور أحمد خالد توفيق

تحياتي

karakib said...

الله يبارك فيكي :) يا رب تكوني عملتي حلو فالامتحانات

نورهان مفيد said...

حمدالله ع السلامة ويارب تكون الامتحانات عدت علي خير
وشكرا علي زيارتك لمدونتي المتواضعة اووووي
وكمان شكرا ع التاج والتهنئة
وبجد ده كتيييير اوي
ومتتاخريش علينا كده تاني

محمد فوزي آل ربيع said...

أنا جيت أهه

الحمدلله إنه قومك من الإمتحانات بالسلامة بس شكلها جرعة الإمتحانات كانت زايدة أوي خدتي وقت على ما فقتي. شكرا جزيلا ع التعزية ف رجلي
كدة كل العالم عرفت و هيجيبولي ورد و شيكولاتة بقى و أهيس و سناني توجعني و أروح للدكتور و يخلعلي ضرسي و يرجعوا يجيبولي ورد و شيكولاتة

دا أنا كدة أسعد إنسان ف الدنيا
أنا كنت بأقول إية
أنا شكلي هأتجر في الكلام كتير

آه . شكرا جزيلا ع التاج . مش عارف أنا الوحيد في الفضاء البلوجري اللي بيحب تاجات ولا إية؟
كل أما أدخل على واحد ألاقيه زعلان من التيجان اللي بتجيله

هوا الواحد يطول يبقى ملك متوج بتاجات مش تاج واحد و من أعز أصحابه

أنا لمحت كلمة تكامل ف الموضوع
أي خدمة؟

بس كويس إني ألاقي حد بيحب جغرافيا
هيا صحيح مادة معفنة لما بتبقى منهج بس بتكون حلوة لما تذاكرها لوحدك من غير التعريفات المملة و السخيفة دي و بعدين إية دة؟ كنتي عايزة تطلعي كام حاجة و انتي صغيرة؟ شكلك كنتي مؤمنة بالإستنساخ
ع فكرة بتحصل كتيير معايا
و أنا حاليا حالتي صعبة بما إني لسة ف ثانوي

طب بما إنك هاوية قراءة كدة خدي الكتاب دة
((الخيميائي)) أو الكيميائي لبابلو كويليو (برازيلي) و دا كان عندنا ف دبي من أسبوعين

بصراحة كتاب توحفة و على شكل رواية بس الأهم أسلوب تنمية الذات اللي فيه
تقدري تلاقيه ع النت

أنا اتكلمت كتير لما زوري نشف
فين عصير البرتقال بتاعيييييييييي؟

تحياتي

Ahmed taher said...

في الحقيقة كل اللي اقدر اقوله ان دمك خفيف فعلا
تحياتي لك واتمني مشاركتك عندي

MestKA said...

اول مره اعرف انك شاطره في التنظيف اوي كده دا البلوج بيبرق من النظافه
ثانيا رفعت اسماعيل مش رخم ولا بتاع ده ظريف جدا وممتع اوي وقال تقوليلي ميكي وبطوط ياشيخه روحي
وبعدين انتي مستكتره ليه على نفسك انك تجيبي امتياز فالرياضه هو اللي بيجيبوا امتيزات احسن منك فأيه
ولو سمحتيلي اكمل الكلمه اللي محشوره واقول ان الواحد لازم يحكم بعقله الاول مش بقلبه ولا بهبله
وكل لبيب بالاشارة يفهم

مبرمج حر said...

يا نوران نورتى مدونتك تااااانى , وربنا هيوفقك بأذن الله

(:

تحياتى

tweety said...

حمد الله على السلامه يا جاي من الامتحانات وحشتينا
وان شاء الله امتياز مع اكبر مرتبه واشوفك دكتوره يا رب واحسن حاجه انك طلعتى الكلمتين اللى محشورين احسن تتخنقى

مداح القمر said...

حمدلله ع السلامه يانوران...والله كنا مفتقدينك كتيييير...ربنا يوفقك ف امتحاناتك وناخد حلاوة الرياضه وبقيت المواد
عايزه تطلعى مدرسه...دا اغلب البنات كدا زى بنت اختى مثلا عشان تضرب العيال...اسمها نورهان على فكره
يااااااااااااه لسه فاكره بليه العجيب؟دى كانت جامده جدا..وكان عندهم مدرس اسمه حنفى او برعى..وجد بليه كان لذيذ هو كمانبس مالحقتيش تان تان للاسف...بصرحاه كلامك عن القصص والحاجات بتاعة زمان طريقتها حلوه اوى بجد...الكلام بينطق ضحك وشقاوه ومتشكر ع المباصيه
اه كنت ح انسى...البوست اللى فات بعتلك اللينك بتاع الاغنيه..وح احطيهولك هنا كمان...ادخلى على اللينك وانتى ح تفهمى كل شىء
http://betabloggerfordummies.blogspot.com/2007/02/music-in-your-blog.html

rasha said...

ايه يا بنتي وحشاني مووووووووووووووووووووووووووت مش مبالغه مش عارفه اشوفك خالص عرفتي ان امتحاناتي 7-5 وهخلص 24-5 طبعا تهريج انا عارفه طبعا الاسبوعين دول طحن اكيد بس لازم نشوف حل ومبروك يا ستي علي انتهاء الميدترم وعقبال الفاينل

zordeak said...

ألف ألف حمد الله عالسلامة

ايه البوست العسل ده

انا فضلت اقرى وابتسامة جميلة على وشى


وكنت عايزة اطلع بتاعة ذرة ويبقى عندي كشك سجاير جنب الذرة واقف ف الاتنين
وكنت عايزة اطلع جرسون علشان التبس


هههههههه

ايه يا بنتى الامنيات الغريبة دى

بس بينى وبينك

عسسسسسسل


انا اعرف ناس كانو عايزين يطلعو رقاصة

علشان يلمو النقطة


انتى كده مستوى مقدور عليه

:)

Nouran said...

صاحب البوابة:
اه والله كتير بس اصلي كان بقالي كتير مش بكتب وكويس انك استمتعت بالبوست

هاني انتوك:)
انا عملت عمايل ف الامتحانات

نورهان مفيد:
الله يسلمك والحمدلله الامتحانات كانت كالمعتاد حسبي الله ونعم الوكيل ههههه
يالا اعملي التاج احنا مستنينه :)

محمد فوزي:
الحمدلله اني طلعت منها سليمة عفوا يا عم لا شكر ع واجب :)
انت شكلك هيست جاامد
اعمله بقى مستنياه ع فكر انا بحب التيجان اوي برضه
لا التكامل عندنا ملوش حل غير المووت ان ان ااان حلوة الجغرافيا برضه
حلو عصير البرتقاال ؟

احمدطااهر:
شكرا جدا ليك يا فندم وانا جايه اهوه فوريرة

مستكة:
لا لا انا شاطرة ف التنظيف الالكتروني بس ف الحقيقة شاطرة برضه مش عايزين فضايح
لا رخم اوي وسخيف كمان لا ميكي وبطوط بتقولي عليهم كده ماشي ماشي
انا مش مكستنكرة لكن انا يائسة ف فرق يا سيادة البشمهندسة
حلوة كل لبيب بالاشارة يفهم ديه :)

مبرمج حر:
شكرا يا فندم وربنا يوفقنا كلنا :)

تويتي:
حمدلله ع سلامتنا كلنا يا بطتتي ايوه كنت هتخنق بس يا رب نفهم بس :)

مداح القمر:
الله يسلمك يا باشا يا رب يوفقنا كلنا يا رب
كنت عايزة اطلع مدرسة اصلهم شريرين اوي
بلية العجيب ده حبي واعتزازي زي كريازي :)وجد بلية كان عسول برضه وف عدد عملوا عصابة وقعدوا يساوموا جدهم كانت سلسة حلوة اوي
لا معرفش تان تان ديه
شكرا يا باشا وحلو التاج اللي انت عملته السرعة فا الاداء

روشا:
وانت كمان وربنا معاكي ف الامتحانات يا رب

احمد بااشا :
الله يسلمك
يا سلام ع احلام الطفولة ديه والله جامدة هههههه
تصدق ان الحلم اللي انت بتقول عليه كان بيراودني بس قلت ده حتى عيب اني افكر ف الحلم ده ههههه
مقدور عليه اوي :)

مـحـمـد مـفـيـد said...

حمد الله علي السلامه
وفينك ؟

Nouran said...

محمد مفيد:
انا هنا هوه والله يسلمك :)

Lasto-adri *Blue* said...

معلش يا نوران
:$
انا متأخرة اكتر
بس كتر خيرك والله... وعقبال ما تخلصى من هندسة وتكملى بدل السنة والاتنين عشرة وعشرين
:)

Shahinco2005 said...

انا ان شاء الله باكتب تعليق بس اديوني فرصة من 15 يوم ل 23 سنة اقراء المكتوب ده كله اصل والله مبحبش القراءة

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول