Tuesday, January 17, 2006

سعادتي و سعادتهم
امبارح وقبل ما انام كالعادة تجيلي مليون فكرة بس فجأة جه موضوع الحب او زي ما احنا مسمينه "الصحوبية" معرفش ايه اللي جابه في راسي وسط معمعة المذاكرة بس اه جه واعدت افتكر المواضيع اللي كنا بنتكلم فيها في اعدادي تعرفوا انه حتى في اعدادي البنات بتصاحب وتحب لا وايه قصص وحوارات رهيبة.
كل زميلاتي كان عندهم قصص الا انا معرفش ليه ممكن اقول علشان ربنا ثم الثقة اللي ميديهالي بابا وماما -اصل انا الكبيرة لازم يدوني الثقة والبرستيج - ومكلمتش ولد خالص ولا حبيت خالص وكل صحابي مستغربيني
ويقعدوا يسالوني صحابي انت جامدة كده ليه دي الفترة بتاعتنا دي بتاعة المشاعر والعواطف وكانوا بيذبذبوني بس انا كنت متمسكة بموقفي
اقولهم لازم افكر بعقلي ده انا لسه في اعدادية وكانت نقطه تتحسبلي واي موضوع يجيوا يستشيروني مع اني مليش تجارب في المواضيع ديه بس علشان انا بفكر بعقلي كنت حلال المشاكل
المهم طلعنا ثانوي والمواضيع بتزيد بدل ما تنقص بطبيعة اننا في مرحلة تحديد مصير بس مابيهمهمش البنات تقعد تكلم قدامي"بصوا المسج اللي بعتهولي انا بحبك جدا وحشتيني مش قادر استغنى عنك " كلام من هذا القبيل ويقعدوا يحكوا ع المشاعر والحب والكلام ده يعني .
وانا بفتكر الكلام ده قبل ماانا واقعد اقول لنفسي طب انا معملش زيهم قصص وحوارات
كنت مضيقة جدا علشان محسيتش بالكلام ده ولا جربت .
اللي بيقولوه ده زي صحابي ليه طبعا عشان الاسباب اللي كانت في اعدادي بس برضة دي مش اسباب كافيه يعني الاسباب دي كلها متوافرة عند البنات بس هما معندهمش دم اعدت ادور ع الاسباب الحقيقية ولقيتها
بابا كان بيقولي ان البنات اللي بتخش في المواضيع ده سواء في اعدادي او في ثانوي انهم عندهم مشاكل في البيت تفكك اسري او حرمان من حنان الاب ده راي بابا في الموضوع ده
بس انا رائي غير كده
ثواني انا اصلا حبيت ايوه حبيت ولحد دلوقتي بحب
متتخضوش
انا بحب المذاكرة شفتوا الهنا
رائي بقه انهم ملقوش السعادة اللي لقيتها مع المذاكرة هما محسوش بفرحة حل مسالة مكلكعة في الرياضةاو في الفيزياء ملقوش نتيجة تعبهم اذا كانوا تعبوا اصلا
اما سعادتهم وع حد علمي بتنتهي اما البنت اتجرحت او اتكشفت اثناء محادثة ليلية او كسرة للولد يعني بتنتهي بجرح احد الطرفين
ولاول مرة اعرف الفرق بين سعادتي وسعادتهم فية-ذي ما هما مسمينها- لحد دلوقت
شمعة

5 comments:

radwa osama said...

عارفة يا نور بتفكرينى بايام اعدادى كانت كل البنات ليها اصحاب ولاد الا انا وكمان مانوا بيتريقوا عليا يمكن علشان تصرفاتى تشبه الصغيرين وكانوا بيفتكروا انى ما اعرفش فى الحب مع انى كل يوم كنت بكتب جواب للانسان اللى بحبه وما اعرفوش كنت وقتها واعترفله بانى محتاجاه ولما جه عمرو اكتشفت ان كل المواصفات اللى كنت بكتب عنها والكلام اللى كنت بقوله بينطبق عليه بشكل غريب واكتشفت ان ربنا استجاب لدعايا لما قلتله نزلى واحد عمولة يا رب ..اما بقى كلامك بخصوص انك بتحبى تحلى مسالة فيزياء مكلكعة فانا اتخنقت منك

bosbos said...

انا كمان كنت زيك كده و انا في اعدادي و ثانوي بس مش عشان المذاكره لا سمح الله علشان كنت عايزه ارتبط مره و احده في حياتي و الانسان اللي هتجوزه يكون اول واحد في حياتي عشان كده كنت بفكر الف مره كل ما يعرض عليا جد الارتباط و دايما كنت برفض في الاخرلاني ولا مره لقيت انسان ممكن اشوف نفسي معاه كمان 20 سنه و برضه زيك كانو صحابي بيستعجبوني جدا و مش هكدب عليكي احيانا كنت بشك اني ممكن اكون غلط و هما اللي صح بس كنت برضه بصر على موقفي!!1

بس الحمد لله ربنا اداني اللي انا عايزاه خطيبي فعلا اول انسان احبه و على عكس البنات اللي بتحكي عليهم معنديش حاجه اندم عليها زمان و فخوره جدا بنفسي

اثبتي على موقفك انت لسه صغيره و قدامك و قت طويل على ما تعرفي تحكمي حكم صحيح على اي شخص
و صدقيني مش هتندمي ابدا

ربنا معاكي
معلش طولت عليكي في التعليق

hummar said...

عجبني كلامك ياشمعه بس ليه انتي مسميه نفسك شمعه علشان النور مقطوع ولا ايه عموما عندنا في مصر النور مقطوع على طول بس خلي بالك انتي على حق والمهم الانسان يحب كل اللي حواليه اهله اخواته مدرسته بلده وحب العاطفه ده اعتقد ان اي واحده ملتزمه مالهاش غير حب واحد بعد الله سبحانه وتعالى وهو حبها لزوجها وبيتها واولادها وربنا يوفقك بالزوج الصالح ويكون منور زيك
الشاكوش

إنسان said...

كويس كويس خليكي كده لغايه ما تعدي ثانوي علي الاقل بس مش تنسي ان ليكي قلب و عواطف و اوعي تنسي انك انسانه
يعني اختاري الوقت المناسب الشخص المناسب الظروف المناسبه

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول