Saturday, March 25, 2006

تخييل

تخييل بعد عشر سنين يعني في 2016 تفتح البلوج وتشوف الارشيف وتشوف اول حاجة كتبتها اظن اني هستمتع اوي بس يا ترى هعمل بلوجات تانية واتخلى عن شمعة ولا اصلا هرمي شمعة بس انا اامل اني اخلية وان محدش يرمي بلوجه ولا يتخلى عنه يممكن يزودهم بس يبقى ع القديم ويسيبه حتى لو مجرد ذكرى
وهقولكم انا متخيلة الموضوع ازاي يعني مثلا
رضوى بنت عمي هتعمل بلوج جديد هتسميه ام العيال واول حاجة هتحطها صور السبوع و هتحكلنا عن مغامرتها مع
اولادها وانا اقصد مغامرات بمعنى الكلمة وهيبقة هكذا انا للماضي لا هتكتب في قليل او هتسيبوا ذكرى علشان ام العيال هيبقى ليه مواضيع اكتر او ممكن تعمل لكل واحد من ولادها بلوج باسمه من اول يوم وهتكتب فيه عنهم لحد ماتسلمه ليه لما يبقى عنده 6 سنين اشمعنى هو ده اللي جه ع بالي اما
عمرو ممكن ما يكتبش عن كل مظاهرات واعتصامات هيكتب عن تجربته كأب عليه مليون حاجة منها انه يجيب الولاد
د من المدرسة وممكن يتعارض وقت ندوة او مظاهرة مع وقت خروج الاولاد معرفش هل ممكن يسيب اولاده في الشارع ويروح المظاهرة ولا يخلي رضوى تجيبهم مع العلم انها كانت جابتهم امبارح يعني مش دورها اسيبه يرد هو عليا والايام هتورينا
اما رشا هتخلص وتبقى خالي شغل او ممكن حد يشغلها لا هتقعد في البيت مورهاش حاجة علشان مفيش شغل خالي او
ممكن تعمل مشروع هيا وزمايلها ممكن تتخطب وتحط صورالخطوبة ع البلوج او ممكن متتخطبش نظرا لعدم وجود عرسان هده مش لانها وحشة ده علشان الايام هتبقى صعبة ومحدش هيتجوز ولا يشتغل ممكن نطبق ساعتها فكرة اليوجينيا هيا هترد عليا برضة والايام هتورينا هيبقى عندها 29 سنة ولسه ولا اشتغلت ولا اتجوزت اقصدي ولا اتخطبت
وعمو اسامة هيبقى جد وهيكتب في بلوجه شعر ع تجربة الجد وهيكتب قصايد ع احفاده ولاد رضوى
اما انا فممكن اخلص مظنش ان شمعة تفضل منورة كل ده لا ممكن انا طويلة فيا رب ماخلص وان شاء الله اكون خلصت والكليه اكيد ع 26 سنة اكون خلصت هشتغل بواسطة مع العلم اني هخلص بعد رشا بس انا هشتغل وهيا لا هو كده بقى وهتخطب وهيا لا برضة لاني هاعمل اعلان يوجد عروسة لو متختبطش لحد سن 22 سنة شوفتوا الندالة بتاعتي هاسيب بنت عمي مش بتشتغل و متتخطبش ولا تتجوز
والله انا كتبت عن عيلتي ولو في وقت كنت هخش ع كل البلوجات وقاريته من اول واعرف كل واحد واكتب عنه بس انا ورايا حجات كتير
الكلام اللي كتبه هزارمتزعليش يا رشا يا رضوى قولي لعمرويخش ويقولي هيعمل ايه ماشي وان شاء الله الحاجة بعد 10 سنين تتحسن بس برضه كان في كلام حقيقي منه
وكل واحد يا ريت يكتبلي يتصور نفسة مع البلوجات عامل ازاي وفي حياته وياااااااااااااااااااااا رب يحقق كل اللي يتمناه وانا هخش اخد بصه ع التعليقات واخرج من غير ما اكتب حاجة
اسيبكوا ومتنسونيش وادعولي ربنا
شمعة

17 comments:

rasha said...

انت بقي هتفضلي في ثانويه عامه بعد 10 سنين

hummar said...

هلا بشمعه اكيد الشمعه الاصيله عمرها ماتخلص هاتفضل منوره على طول
وعلشان تفضل منوره لينا الطريق علشان مانتهش في الضلمه
المستقبل بايد الله سبحانه وتعالى علينا الاجتهاد والعمل
اما الاماني والاحلام بدون عمل عمرها ماتتحقق
علشان كده مصر هاتتقدم لو كل شبابنا كان عندهم احلام حلوه ويدعموها بالعمل شوفي اليابان ماكانش حد يصدق انها بعد الحرب العالميه وضربه امريكا لها بالقنبله الذريه انها ها تتقدم وتكتسح العالم بكل انواع الصناعات التكنولوجيا عايزه اساسا شخص حالم ويجتهد وتلاقي المعجزات
حد يصدق ان بيل جيتس ده من سنكوح لاغنى رجل بالفعل في العالم يحتكم على مايقرب 85 مليار دولار
كل ده من الافكار والاحلام بس نفذ احلامه
واحنا لسه مش عارفين نعمل ايه في انفلونزا الطيور المهم ان فيه امل مادام فيه احلام
ياشمعه انا عايزك تطلعي دكتوره في ايه مش عارف يمكن زي سميره موسى الله يرحمها ويجعل مثواها الجنه لانها وامثالها كانوا الرواد في البحث العلمي احنا محتاجين مبدعين وانشاء الله انتي وبنت عمك تتجوزوا وتشتغلوا وتبقوا حاجه كويسه واسمعي الكلام لحسن هاضربك بالشاكوش على راسك




الشـــــــــاكوش

أحمد said...

أنا لسه امبارح كنت بفكر في حاجة شبة كدا

Egyptos said...

أنا مبسوط بعائلة البلوجات دى بجد
شمعة و رضوى و رشا و عمرو و الكبير أسامة باشا عمو يعنى و الباشا جدو كمان
برافو

folan el folany said...

ياشمعة
هاتفضلى منورة لحد ميت سنه

ETFOKHS said...

ربنا يدينا و يديكي طول طول عمر
و إن شاء الله حتى بعد ما تتخرجي في 2017
برضه يفضل البلوج موجود
.....يا ريت تنوري بلوجي يا
..يا شمعة

Anonymous said...

اتفوخس
ده انت سخام

Nouran said...

جدو:
انا هاشتاق للكلمة دي اوي اوي اوي بس كويس قلت حد اقولهالو
وان شاء الله يتحقق اللي حضرتك تتمناه ويارب نكون -شباب الجيل ده- عند حسن ظن حضرتك بينا وتفرح بياسمين وشريف يا رب.

رشا: انا خلاص صالحتك
بابا: انا عارفة ان حضرتك طنت عايزني اطلع دكتورة بس القلب وما يريد انا بحخب الرياضة وان شاء الله اكون دكتورة في مجالي وابقى زي سميرة موسى يا سيدي اي خدمة بس يا ريت ميقتولونيش.

فولان الفلاني: يا رب افضل منورة علطول وانور السنة علشان مش باينلها نور.

اتفوخس: ان شاء الله هكون اتخرجت قبل 2017 واكون بعمل الماسجتير كمان

Nouran said...

حاجة نستها شكرا لكل من عمرو ورضوي ع التنفيضة دي والتكبير الشديد ده ونشكركم لحسن قراتكم

نورااااااااااااااااااااااااااااان

karakib said...

الماضي يعيش 000 يعيش في ذكرياتنا الجميله بعد عشر سنوات ستتذكرين كل من كتب لكي تعليق و كل من ساعدك علي التدوين 000 و كل ذكرياتك الجميله سيعيش الماضي بداخلك دائما و يجعلك تبتسمين في لحظات الوحده تبتسمين ابتسامه تسامح مع الحياه القاسيه 000
انتوك

إياكش تولع said...

بعد عشر سنين انشاءالله حنكون كلنا بنكتب عن جمال مبارك حيلة مامته و محاولة توريث الحكم للننوس ابنه....و انا حاكون باكتب نداء فى الجرانين للبحث عن عروسة متريشة أعيش على قفاها

عمرو عزت said...

ما تقوليش كده يا نوران
انا بس كنت مشغول شوية
انتي عارفة قلب نظام الحكم بيحتاج تمرينات و مجهود

المهم
بعد 10 سنين ان شاء الله مش هايكون فيه مظاهرات
لان حركة كفاية هاتكون وصلت للحكم خلاص

و انا مش هابقي فاضي احضر ندوات
لاني هابقي باكتب العمود اليومي بتاعي في الاهرام مكان ابراهيم نافع اللي هيكون لسه بيتحقق معاه هل سرق فلوس الاهرام و لا لأ

و رضوي هاتكون بتكتب مكان أنيس منصور اللي أكيد هيكون زهق من الكتابة بعد 10 سنين

و زي ما نتي شايفة
هانبقي مشغولين جدا
فالاولاد هاندخلهم مدارس داخلية علشان ما نضطرش نروح نجيبهم من المدرسة

radwa osama said...

بعد عشر سنوات من الان لن اكتب في عامود انيس منصور بس انا هكون رئيسه تحرير الاهرام واول حاجه هعملها هلغي العامود بتاع ابراهيم نافع واللي بيكتب فيه ساعتها عمرو عزت ..

Nouran said...

عمرو: ان شاء الله تقلبوا الحكم وان شاء الله تلاقوا مدارس داخلية تعلموا فيها ولادكم او خلوا رشا تجبهم بس البيت بتاعكوا بعيد عليها
رضوى: هتبقى رئيسة تحرير ع عمرو ولا هو هيبقى رئيس مجلس ادارة يا ريت تشغلوني معاكوا وحرام عليكي لو لغيتي العمود مش هيعمل حاجة تانية اديله صفحة بدالها ماشي

محمود عزت said...

عمرو حيبقى في قصر الرئاسة و رضوى في وسط البلد بتعمل شوبنج و رشا في ناسا بتصمم أول مركبة فضائية حتهبط على إمبابة

Nouran said...

ابراهيم: ممكن مبارك مايمشيش ده مش بيموت اصلا او لو حركة كفايه بتاعة عمرو نفعت هيبقى هو رئيس الجمهورية زي ما محمود عايز غير كده مفيش امل يتغير حسني
و يا رب تعمل اللي انت عايزة ومتبقاش بكرش ولا حاجة وتاخد الدكتوراه

محمود: انتوا هتكوشوا ع البلد ولا ايه بس رربنا معاكوا برضه طب افتكرني معاهم يعني وانت هتبقى وزير الصحة والدكتور الخاص بتاع عمرو -انا معرفش تخصخصك ايه بالظبط- بس مهما كان تبقى دكتور العيله بتاعة الرياسة

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول