Monday, August 07, 2006

طفلة صغيرة

ليت الزمان يعود للوراء ثانية لأكون فيه ليس سوى طفلة صغيرة امرح مثلما اشاء ووقت ما اشاء لا احزن ابدا اضحك دائما وفي نفس الوقت ابكي لاتفه الاسباب اركض سريعة ف اي اتجاه و في اي مكان اريد
امسك ورقتي و قلمي لارسم شيئا يدور بداخلي وابدا بالرسم ايا كانت رسمتي سأريها لامي لتقبلني قائلة:" رسمة حلوة يا نور اهتمي بموهبتك ف الرسم" ثم
ابدا بتلوين ورقتي بالالوان التي اريد بلا قيود ابدأ باللون الازرق والاخضر والاصفر فقط تلك الالوان لا يهم شكل ورقتي ف النهاية المهم ان اكون سعيده بها أريد ان اكون طفلة لأسامح من يخطئ في حقي بدون اي حقد او كراهية
اريد ان اكون طفلة لكي لا اعرف معني الكراهيه و الحقد ولا اشعر باحساسهما لا مجال عندي للغيرة
فقط ان يكون عالمي مملوء بالحب والمودة اريد ان اضحك ضحكة صافيه تملأ قلبي سعادة وتملأ الكون حولي بهجة
والاهم ان استيقظ سعيدة واخلد لفراشي سعيدة غير مهتمة بما يحدث حولي من شئ من حروب وغيرها لا اعبء بهما ولن يلومنني احدا لاني ليس سوى طفلة .. طفلة صغيرة

18 comments:

m_elsewedy said...

هيييييييييييييييييه
اول واحد يعلق

اكتبيها الله يخليكى فى الاذعة
:P

والله يا نور كلنا عايزين نرجع تانى صغيرين
ده انا كمان نفسى كنت اعيش فى زمن اجدادى
فكرينى ابقى اشترى الة زمن من عند عمو بتاع الات الزمن
:D
ونرجع لورا سوا بس انتى هاتنزلى قبل منى بخمس محطات عشان انا هارجع زمان شوية
:D:D:D

Gid-Do - جدو said...

نور
غشيت اسمك من ماما ـ مش لازم تبقى طفلة زمنيا ممكن تكونى طفلة قلبيا قابلى الاسائة بالعفو حطى بسمة على كل وجة حزين يقابلك ابتسمى فى وش الناس واعملى دة كسلوك مش تمثيل حتلاقى راحة كبيرة جدا وتنامى من اول ماتحطى راسك على المخدة وزيادة عدد حسادك هو ترمومتر نجاحك

مـحـمـد مـفـيـد said...

الطفوله ليس لها سن معين بل هي كامنه داخل الانسان لكن احيانا يلجأاليها الانسان للخروج من كبت الحياه والهموم المحيط وفهيا اخرجي الي عالمك الطفولي ولا تزعجي احد بصراخك

BaTresYa said...

جميل انكـ كون طفل
وجميل انك تكون اعمى وأصم وأبكم
بس الأجمل انكـ ترضى بكل حاجه واى حاجه والحمد لله على كل شئ
زمن الطفوله انتهى
الطفل حاليا مبقاش طفل بقى محارب وجندي
ربنا المعين
بجد كتير بدور على مخرج اخرجه منه من دوامة الحياة بس مش لاقيه
الحمد لله على كل شئ
ونيس بوست

DoOoOoOdY said...

فضفضه جميله يا نورا بجد احييكى بس ياريت الاحلام كلها تتحقق عيشى حياتك واستمتعى بالمرحله اللى انتى فيها

أجدع واحد في الشارع said...

مفيش احسن من الاطفال
بجد حياة مفيهاش اى مشاكل
غير على المصروف
لاء انا عايز جنيه
بكرة اقول انا عايز 2 جنيه
وازعل عشان يدونى جنيه بس
بس كل دى حاجات عبيطة
مفيش احسن من انى العب فى الشارع
مشلش هم اى حاجه خلاص
ولا شغل
ولا حرب ولا اعرف ازعل
ولا اشيل هموم

Mamdouh Dorrah said...

كلنا يا نوران بنحن لأيام الطفةلة
لكن نعمل اية ..سنة الحياة

أُكتب بالرصاص said...

مع احترامي
بس
اطفال اليومين دول مهتمين بالقضايا المحيطة بهم يمكن اكثر من الكبار
وعندهم همومهم الخاصة كمان ومسئولياتهم



انا نفسي أرجع بطن أمي تاني
والله كانت ايام حلوة ، وتسع شهور مش حامل هم أي شيء ،
لا أكل ولا تصريف ولا مذاكرة ولا وشغل ولا عيال ولا حروب ولا مشاكل
ولا وجع دماغ

أه ، لو ممكن

Ahmed Shokeir said...

عايزة تبقي طفلة وانتي لسه كنتي فيها من سنوات معدودات ، لما تكوني أربعين هاتقولي زينا ياريت ارجع ويكون عندي عشرين سنة

Nouran said...

سويدي باشا:
هيييييييييييييييييه اول واحد تعلق ده ايه الهنا ده هكتبهالك ف الاذاعة يا عم الاذاعة دي هيتكتب فيها حجات كتير اوي
والله يا ريت لما تلاقي الاله ابقى ابعتلي واروح معاك بس هنزل قبليك ب 5محطات يا عم بس انت هتها الاول :)

جدو العزيز:
والله يا جدو لما ابقى طفلة قلبيا بيقولولي خليكي كبيرة حاجة صعبة بس انا بحاول بجد ابقى طفلة كبيره بالمعنى اللي حضرتك قلته وهعد الترمومتر ده وهاجي اقول لحضرتك بقى قد ايه :)
اه والله ف ناس بتمثل الحجات دي بس بيبان عليهم وبيتعرفوا من اول نظرة

محمد مفيد:
يا تصدق انا لما ببقى مكتئبة برجع لطفولتي كانت طفولة مشرده بمعنى الكلمة
بس ليه مزعجش اللي حواليا مش لازم يشاركوني بس عجبني تعبيرك اوي

ف حزني فرح:
شرفتيني يا فندم وجميل بجد الكلام اللي انتي كاتباه واحسن حاجة ف الدنيا دي الرضا بجد جبتي المفيد
ده الطفل دلوقتي بقى حاجة صعبة بجد والحمد لله ع كل شئ :)

ابراهيم:
بحاول والله بس لكل مرحلة مذاق خاص يعني اللي هتحسه ف الطفوله مش زي المراهقة مش زي النضج وبعديها بقيت المراحل ما واكيد دلوقتي ف حجات حلوة كتير يمكن احلى من الطفوله بس برضه ويكمن متكنش طفولتي بمبي بس بحنلها كتير وانا اصلا لسه صغيرة وبتفرج ع ام بي سي ثري وشكرا ع التنفيضه ومكتبتش التعليق ماشي يا دكتور :)

ابيتاف هانم:
وانا وانا وانا كمان عايزة كده هاتيلي مصاصة االزياره الجايه لو سمحتي هبعتلك اسمها انا ورضوى متعودين ع نوع معين من ايامالمذاكرةوالامتحانات:)

دودي:
ربنا يخليكي يا ستي وانت اكتر واحده عارفة المرحلة اللي جايه بالنسبة ليا مش عايزاها تيجي بس اعمل ايه :)

ابن الشارع:
تصدق احلى حاجة ف الموضوع المصروف اينعم لسه باخده بس بيفرق وانت كبير وانت صغير وانا صغيرة باخده اكتر من 500مرة بس وانا كبيرة محدد ومعروف واحسن حاجة اللعب ف الشارع ولا تقولي نادي ولا حاجة تانيه هو الشارع واهم حاجة بنفض كل الاخبار الحلو والوحش ما عادا اخبار الكورة :)

ام المريلة الكحلي:
يالا يا ستي نروح الجنينة مع بعضينا ناخد اللمصاصة من ابيتاف ونروح الجونينة بقالي يجي 6 سنين مرحتهاش وناكل النعامة كمان لو سمحتي ماشي اه اه واخش اشوف جبلاية القرود :)

cortex:
بالظبط سنه الحياه هنعمل ايه

البشمهندس محمد:
مش قلتلك انت بينك وبين الاغاني حاجة بس الاغنية دي تحفة بجد معبرة جدا عن الموقف و كل واحد مش عاجبه حاله الكبير عايز يبقى صغير والعكس بس انا لسه متمتش 118 سنه انا ابقى طفله ولا خلاص عديت المرحلة :(
مقنعين الكلمتين الاخرين دول عجبوني اوي
اكتب بالرصاص:
مع اعتذاري انا مش قصدي ابقى زي بتوع اليومين دول لسمح الله دول اطفال دول عفاريت حاجة صعبة انا عايزة الطفولة من حوالي 10 الى 15 سنه لورا كنا ارحم من بتوع اليومين دول
بس لما ارجع المشوار هيطول اوي يعني لو رجعت 10 سنين احسن من لما ارجع 17 سنة لو ممكن كلنا هنرجع حتى مامتنا هيرجعوا هتبقى مشكلة :)

محمد المصري:
انا مش بفكر كده بس انا حبيت احن لطفولتي وافتكر منها حجات
سبحان الله امبارح كنت رايحة كي جي وان ودلوقتي رايحة كليه الهندسة الايام بتجري بسرعة
جدا :)

بسبس:
يا بجد احسن حاجة ف الطفولة مش بشيل هم حاجة ولا مجموع ولا تنسيق ولا فلوس ولا حروب ولكن ليس كل ما يتمناه المرء يدركه يا خساره مينفعش :)

عمو احمد شقير :
اه والله اصل انا علشان الكبيرة بتعامل معاملة الكبير من وانا طفلة اعمل ايه عقدة نقص - لا والله مفيش عقد ولا حاجة -
ماما وبابا بيقولوا كده علطوول
الف سلامة ع حضرتك مختش بالي من الصورة غير دلوقتي اتلاكل الصيني عمل كل ده :)

مداح القمر said...

ليه ترجعى طفله وانا حاسس من كلامك ان فعلا طفله..مش قصدى حاجه بس قصدى انك منطلقه وضحوكه وعفريته..ثانيا اعتقد انهم ما صدقوا ان طفله شقيه زيك كبرت عشان يرتاحوا شويه من الشقاوه
بس وانا صغير كنت عايز ابقى كبير عشان صوتى يتسمع والناس كلها تشوفنى وتسمع رأيي وكلامى بس على رأى هشام عباس...
انا من صغر سنى...حاسس بشىء جوايا..وحلمت زمان اغنى والكون يسمع غنايا..غنيت..غنيت..وف وسط الغنوه بكيت..ولقيت الكون كله بيتغير قلت ياريتنى فضلت صغير

sherif gharib said...

يا نورا
احب اقولك اغنيه ام كلثوم
عايز الزمان يرجع قول للزمان ارجع يا زمان
الواحد نفسه فى لحظه يحس فيها انه مش مسؤل عن اى حاجه غير انه يبقى سعيد و لو حتى بلعبه جديده يلاقيها جنبه على السرير فى الصباح
تحياتى

soosa el-mafroosa said...

و الله قلتي اللي جوايا ..أنا أصلي بطلت أبقى طفلة من أول ما كملت 7 سنين ..مش م الغلب و الله دي حتى ماما كانت دايما بتحاول معايا بس أنا ما كنتش باعرف..ده حتى من قبل كده

تخيلي ماما كانت بتحكيلي عن أول يوم رحت فيه الحضانه..و ماما واقفه معايا على أساس هعيط و كده ..بتقوللي ان انا بصيتلها و انا ماسكه نفسي بالعفيه و قلتلها خلاص يا ماما امشي ماتخافيش انا مش هعيط...و الله بتصعب عليا نفسي قوي .زأنا كنت عاملة كده ليه؟

بس نفسي ارجع طفله زي أطفال زمان بتوع بوجي و طمطم و صفاء أبو السعود ..مش بتوع اليومين دول بتوع روبي و هيفا و نانسي عجرم

Ahmed Rashwan said...

تانت نور .. من فضلك أنا عاوز آيس كريم ..
بولتين بس .. واحدة فانيليا .. والتانية مانجو
أوكيه ؟ موافقة يا تانت ؟

layal said...

ذكرتيني بقصيدة
الا ليت الشباب يعود يوما

حلم حلم

الأميره أوسه said...

انا بقا نفسى أرجع لسنك اللى هو سبعتاشر سنه
أجمل مرحله فى عمرى
أنطلاق
أحلام
مذاكره ونجاح
أنتى طيبه خالص يانور
ربنا يسعد أيامك
قولى أمين
باى

Nouran said...

دكتور احمد : بصراحة لقيت الديسبلاي نيم كبير فكتبت الاسم اصلي عايزة انام

يا سلام ربنا يخليك والله ده اللي انا عايزاه بالظبط ده اولا اما ثانيا فاظن ان حضرتك كنت قاعد معاهم وهما بيقولولي كده ولا ايه الحمد لله انك كبرت يا نوران قرفتينا بس بجد اغنية هشام عباس وعمرو دياب الاتنين جامدين وكلامهم صح

شريف غريب:
هاتلي الزمان وانا هقوله الكلمتين دول بس بص اذا كان ع اللعب فعندي كتير بالذات العروسة ولعبة المطبخ اصلي لسة عيله بس المسئولية هيا اللي صعبة جدااااا منقدرش نشلها من علينا

سوسة هانم المفروسة :
عارفة وانا كمان مش طفلة من زمان زي ما قولت انا الكبيرة وطبعا معروف يعني ايه الكبيرة انا هعيط
ايوه انا برضه قصدي بتوع زمان بتوع صفاء ابو السعود وبوجي وطمطم زبلاش بكار علشان مش بحبه وكمان توم وجيري وعم ذهب وبطوط وحجات كتير جدا خليها في سري اما روبي ونانسي وهيفاء فمش عايزاهم بلا وجع دماغ

film69:
حرام عليك تنت انا لسة صغيرة بس ممكن اجبلك ايس كريم اجيبهولك من باسكن روبنز ولا منين اللي انت عايزه مقدرش اقولك حاجة انت ضيفي :)

layal:
يا ريت يعود بس نغيره بدل الشباب خليها الطفولة ماشي علشان تبقى حلوة حلم كبير وجميل

الاميرة اوسا عندنا يا مرحبا يا مرحبا :
الاول اقول امين بعد كده نتكلم
والله انا عارفة ان السن بتاعي ده زي الفل وتمام التمام بس نعمل ايه ف البشر دايما عايزين اللي مينفعش يتعمل يالله نعيش حياتنا بقى وبرضه هتفرج ع توم وجيري شئ يفكرني بالذي مضى باااي ومتقطعيش الزيارات ماشي يا جميل :)

Anonymous said...

Very cool design! Useful information. Go on! sell my diamond Northwest mortgage group Impotence treatment Hairy mature men porn Hairy gay men porn site Camping water containers Grannies babes zanesville pontiac ice cream machine diazepam rx Keyword effexor dosage Female anal fingering