امممممم

اممممممم بسم الله الرحمن الرحيم - ببص حواليا دلوقتي وع البلكونه لتكون متراقبه الحمد لله مفيش حاجة اكمل كلامي اقصد كتابتي-بسم الله الرحمن الرحيم وبه نستعين احمممممم احممممممم

بسسسم -خلاص هيا قصه- نخش ف الموضوع

لقد تم تعيني وزيرة دفاع من قبل رئيس الوزراء انجولا يووه قصدي زنجولا - معرفش اختاروني ف وقت ببقى فيه ف منتهى الغباء ف الاجازة- وطلب منا نحن الوزراء كل ف مدونته بتوضيح نشاطاته وانا جاية اوضحها بعد ما قبضوا ع ريستنا كلبوزة ف حلمها وبعد ما بابا سوسه قفشها ما هي وزيرة الاعلام شكل بابايا هيعمل زي باباها بس انا هعمل اللي يمليه عليه ضميري الوزاري- قال يعني- المهم احنا هنتكلم بصيغة السيكو سيكو - طبعا مش بتاع ادم - علشان حكومتنا المصون متعرفش -قال هيا هتقرا اللي انا كتباه والله انا هتكلم واللي يحصل يحصل - ايه السخافة دي كل دي مقدمة -

________________________

نخش ف الموضوع

طبعا هعمل جيش رهيب باسلحة رهيبة عايزة اسلحه محددش عرفها قبل كده هيتكون من اربع حجات

طبعا انا لازم اكون الجيش بتاع التف ع اسرائيل انا قريت ف الرحيق المختوم ان الجيش زمان بيتكون من ايه باين خمس حاجات ومعرفش دلوقتي بيتكون من ايه بحريه وجويه ومشاه ودبابات وحجات غريبة اما الجيش بتاعنا هيتكون من حاجة غير خالص هنعمله منتخب قومي كبير القائد ولد معرفش اسمه قريت عنه ف جريدة عين من كام اسبوع انه كسب مسابقة اطول تفافه ف العالم مهو مصري بقى كان ف المانيا هخلي هو المدرب هجيبه من تحت طقاتيق الارض يدرب الجيش ده القائد بعد كده هلم كل لعيبه الكوره طبعا دي شغلانتهم الاساسية بعد لعب الكورة واثناء الماتش كده عندنا هجوم قوي بعد كده هلم كل اولاد الشوارع -ولادي زي ما رضوى مسمياهم- اهي البلد تنظف برضه يبقى كده كونا مقدمة الجيش

..............................................................................

تاني حاجة هيبقى جيش من علماء مصر كلهم هنعمل مشروع كبير لحمض الكبريتيد - رائحته البيض الفاسد- وهنعمل منه قنبلة جديده كبيرة بدل النوويه والذرية تبقى قنبله البيض الفاسد دي لو اضربت ع العدو هيموت من الريحه فالهدف من الموضوع نموتهم باقل الاسعار علشان اساعد وزارة الاقتصاد ماشي نخلي القنبله ف السكرته لحسن حد يسرق اختراعي ويعمله

....................................................................

تالت حاجة طبعا انتوا عارفين ان مفيش عندنا اكتر من الزباله فاحنا هنلم كل الزبالين عندنا ع الحدود ونرمي الزباله هنعمل غطاء زبالي جديد هيلم ذباب مصر كله عليهم ويا ريت يبقى التسي تسي علشان اللي يتقرص منه ينام ما يقمش والناموس يا ريت يبقى ملوث علشان يجيلهم حساسيه ونخلص منهم ومراوح كبيرة

........................................................................

رابع حاجة قنبلة من تصميمي كنت مصمماها ف حصة الانجليزي ف ظهر الكشكول والله فضلت ادور عليها علشان احطهالكوا ع البوست ملقتهاش المهم هيا شكل السمكة تخدع كل اللي يشوفها مزوده بجهاز دقيق يلم كل الغبار من الجو الدخان - انا كنت عامله الاختراع ده علشان يلم الرطوبة ويحولها مايه ساقعةلبابا لحسن كل شوية اقوم اجيب مايه بس غيرت الاختراع هبقى احكيلكوا ع اختراعاتي مرة تانيه- المهم الدخان ده بمجرد ما نشغل القنبله او الجهاز هيلم كل الدخان عندنا والعوادم

............................................................................................

كده تكوين الجيش اما تشغيله فهو

هنرمي القنبلة بتاعه الغبار ع العدو هتقوم تعميهم لمده مش قليله بنخلي الجيش بتاع التفافة يشتغل وف الاثناء دي الزباله جاهزة ع الحدود هنجيب مراوح كبيرة نطير بيها الذباب عليهم لازم التسي تسي والناموس الملوث وبعد كده هنرمي قنابل صغيرة من الكبريتيد توزع عليهم الرائحة العطرة ونسيبهم شويه لحد ما يهدوا نعمل هدنه يوم بعد كده هنرمي القنبلة بتاعة الغبار تاني هيبقوا بيحسبونا هنعمل نفس السيناريو بس ع مين هنجيب قنبلة الكبريتيد الكبيرة وطراخ عليهم بوووووووووووووووم ماتوا كلهم من الريحه واللي مجتلوش الريحه هيتقرص من الناموس او الذباب التسي تسي والحمد لله رب العالمين

.
.

شفتوا استغليت كل ما هو سئ ف مصلحتنا

عملت اللي عليا وكتبت الخطة الدفاعية وشكلهم هيعزلوني من المنصب وربنا يستر ع امن وسلامة الدوله

سلااااااااااااام