Monday, September 11, 2006

بجد كلنا ليلى ؟؟ سؤال

اغيب يومين ارجع الاقي البلوجر نصه ليلى ونصه قيس
بس بجد احنا كلنا ليلى يعني كل البنات والمرأة بشكل اكبر مقهورين بجد وان الرجاله هما اللي ليهم الكلمة الاولى والاخيرة وان الاب بيفرق بين بنته وابنه بجد
طبعا مقدرش انكر واقول مفيش ليلى ف بلدنا بس اكيد مش كلنا ليلى
انا لما دخلت ع المدونة الام الاول مكنتش فهمه حاجة بس بعد كده لما قريت كذا بوست عن الموضوع ده بدات افهم الفكرة اللي بيتكلموا عليها
بس انا واحدة من الناس شايفة ان البنت واخده حقها تالت ومتلت وباباها بيخاف عليها وخطيبها او جوزها طب عارفة اكيد كل واحدة من جواها نفسها تبقى ليلى دي طبيعة جوه حواء يعني مثلا تخيلوا معايا مامت اي واحد تعبت فجاة هتشوفوا ايه اللي هيحصل للاسرة كلها هتبقى تحت امرها من اول الاب لحد اصغر ولد دول علشان هما بيحبوها وميقدروش يستغنوا عنها مش علشان هي بتغسل وتمسح بس علشان هي ملكة البيت
وع فكرة انا شايفة ان دايما الراي اللي بيتاخد بخصوص اي حاجة بيبقى مشاورة بين الاتنين يعني مثلا اروح لبابا اقولوه حاجة يقولي قولي لماما افهم طبعا الرد علطول بيبقى فيه الفة بين الاتنين
طب كل اللي بيشتكي انه ليلى يجرب ميبقاش ليلي يعني مثلا يبطلوا شغل زي ما كلبوزة عاملة سبع صنايع تجرب متعملش حاجة كده هتلاقي نفسها مش قادرة تفضل قاعدة مروقة دماغها
طب ما في ناس بيضايقوا ان جوزها او خطيبها مش بيغيروا عليهم مش سأل فيهم سايبهم براحتهم ونفسهم يبقوا ليلى نظام الشورى شورتك والكلمة كلمتك
بس برضوا انا مقدرش انكر ان ف ناس طالعة عنها وهما ليلى بجد يعني متعذبين ع الاخر بس دي غالبا بتبقى عقدة من الراجل شايفها احسن منه الناس بتحبها اكتر منه فيطلع عينيها وبصراحة ف ناس بيبقوا شريرين اوي من جنس حواء وهما اللي ممشين البيت تحبوا تبقوا كده
اللي انا فهمتوا من حمله ليلى انهم بيفضفضوا عن اللي مضايقهم والتفرقة او المعاملة والاسلوب وانا عن نفسي فخورة اني بنت كفاية ان لما ابقى انا وولاد خالاتي اكلنا قاعدين بليل وعايزين حاجة بينزلوا الولاد مش هينزلوني انا حاجة كويسة صح وبرضه ممكن اكون مش حاسه بليلى علشان انا واخواتي بنات كلنا معندناش اخوات ولاد او ممكن علشان لسة مش مجوزة وقاعدة ف بيت ابويا بس انا عن نفسي مش ليلى
وف الاخر انا ولا مشجعة للموضوع ولا معارضة ليه ويا ريت راي يكون وصل لحسن انا مستعجلة والكلام بيقع مني ولو موصلش هكتبوا تاني
ليلى ضيعت بوست ذكريات سنين فاتت انتظروه بس انا فرحانة اني شاركت ف الموضوع ده بجد

14 comments:

M-i-D-o said...

السلام عليكم و رحمة الله تحية كبيرة ليكىيا اخت شمعة على البلوج الجميل ده بس انا شايف ان الموضوع واخد اكبر من حقه فعلا مااحنا عايشين فى مصر بقالنا كتير و بنشوف و نسمع عن مليون ليلى كل يوم و مش ها نتحرك ولا ها نتحرك لان هو ده ناموس و قانون الحياة ظالم و مظلوم و زى ما فى ليلى فى سعادالناس مش ها تفكر فى ليلى لان هموم الحياة كتير مش ها تخلينا نبص على ليلى لانها مش شئ جديد على مجتمعنا ها تشد انتباهنا ليها لأ ده شئ متئصل فى المجتمع المصرىالتفكير الصح هو الاختيار الصح لو الواحد فكر كويس قبل ما يختار اكيد ها يعيش كويس و ده الكومينت اللى انا كنت باعته ل كلبوزة فى موضوع ليلى يارب يعجبك
( السلام عليكم و رحمة الله و براكته
تحياتى للجميع و اولهم كلبوزة هانم و بدعيلك بالتوفيق يارب على الموضوعات الجميلة اللى انتى كاتبة فيها اما بالنسبة للموضوع اللى قدامنا ف الطرح فى الموضوع ده كتير جدا جدا و من الحكايات بدل الواحدة الف حكاية بس المهم الواحدة منكم تبص كويس قبل ما تختار انا كان قدامى تجربة واضحة ل واحد من زملائى و اكتر من اخويا قدامى شفته و خطيبته بترميله كلمة افسخ الخطوبة علشان عريس احسن منه طب ليه يمكن اللى انتى بتبيعيه دلوقتى ده هو اللى هايحبك و يحافظ عليكى و حكاية ليلى دى فعلا حكاية مؤثرة بس اكيد الحكاية دى واراها جواز تقليدى جدا مش تقليدى عادى يا جماعة يا شباب و بنات و هوانم و سيدات مش المهم ان الزوج يكون كويس اووحش عند اول زيارة لكن وراء كل عظيم امراة ما تنسوش الكلمة دى انتو النص التانى للدنيا و من غيركم الرجالة تضيع انا لغاية دلوقتى مش متصور نفسى عايش من غير امى دهلانى بدرس فى القاهرة و منزل الاسرة مش فى القاهرة و مش متصور مدى البهدلة و انا بتاثر جدا لما تكون المراة مضايقة من الراجل و علشان ايه مش متصورة ان الراجل يكون وصى عليها مع ان ربنا و القران و الرسول عليه الصلاة و السلام هم اللى قالو كده مش احنا ياجماعة لو الواحدة منكم وقفة ورا جوزها و خطيبها و حبيبها بجهدها و بتساعده و واقفة جنبه اكيد ها تلاقى منه كل احترام وحنان بس اللى بتختار غلط ذنبها على جنبها و لازم نبص كويس على شريك العمر لانها تابيدة باذن الله كده او كده و اما تكون تابيدة سعيدة و نفرح لكم او تابيدة مش حلوة و ساعتها ها نجرى ورا بعض فى المحاكم فكرو يا جماعة ولله العظيم هى الفكرة فى التفكير الكويس و التانى و صلاة الاستخارة و باذن الله فيها الشفا)

مع اجمل تحياتى
م/ محمد عبد المنعم

wa3d el3yoon said...

بأختصار
مافيش ملاكيه فى الارض يعنى مافيش ليلى أصلا
أتمنى الرساله تكون وصلت

أجدع واحد في الشارع said...

ليلى حلوة بس انا حاسس لحاجه غريبة اوى بس مش عارف ايه هى

~ Bato0ot ~ said...

let me comment on ur post .. u r right we r not all "laila" some are really having their rights ..
"wa3d el 3eyoun" u seem to be so hurted by a gurl !! we are not talking about angels!
we are talking about a humman being who needs the lowest rights of hummanity!!
n thats her right n if Adam is not taking his rights let him raise his voice too! we are not against him .. bel3ks .. we are asking him to co-operate n be fair wiz her .. wizout his cooperation ..laila will never get her rights .. got me?

Epitaph said...

انا كمان معنديش اخوات و لاد
و الحمد لله بابا مش من النوع التحكم المتسلط

بس هي الفكرة ان فيه ليلي
و فيه كتير
و لسة يا ما ح نشوف
مش معني كدة ان احنا نعزلها
بس نسمع لها
في تسلط بيجي من ناحية الرجل بادعاء انه رجل
وان البنت كائن ضعيف

لازم يتغير المفهمو ده و نفهم ايه اللي بيضايق ليلي لان اساس المجتمع هو ليلي

:))

و ليلي لما تحب تكون مختلفة و مستقلة في مجتمعنا..و معتدة بنفسها بتتهاجم من الست قبل الراجل

صديقتي انها تلك الازدواجية المتأصلة في مجتمعنا الشرقي

و برغم كل شئ انا فخورة اني بنت
:))

احييك علي كلامك و مشاركتك و موقفك

ادم المصري said...

جميل جدا كلامك وعجبني
انتي فعلا جريءة .. لما تقولي الراي ده

فعلا غريبة ملا يكون الانسان سعيد في حياته ولا يشعر باي مشكلة اطلاقا

ثم يخترع المشكلات .. ويدعي انه يواجة لانه فيه ناس تانية في مكان تاني مرت تقريبا بنفس الموقف

اسمحيلي اقول لايبتاف
طالما انتي عمرك ما حسيتي بليلي اصلا
بتكتبي عن لسانها ليه ؟

الســـاحر said...

انا رايى ان احنا فى مجتمع شرقى ممكن يكون فى ليلى بس مش بالصورة المتكامله..ومجتمعناالشرقى بيفرض علينا دة يعنى الراجل لازم تتسمع كلمته وهوصاحب الامر والنهى وهو القوى فى كل حاجه ..لكن فى المقابل بيعوض ليلى قصاد ده انها لو طلبت لبن العصفور يجيبو ويحسسها بالامان والحنا وتحس معاه ان الدنيا ملكها..فهى معادله يعنى لازم تاخد علشان تدى...سلام

NoOR said...

شكلي كده هاحبك ....اخيرا لقيت مدونه بنت وبتتكلم بحياد

ايه ده الحريم اتسرعت- لا مؤاخذه هي جت كده ثانيا حريم ده معناه انها حاجه ليها مكانتها زي الحرم المكي الشريف - كلهم عايزين يولعوا في الرجاله انا خايف انزل من بيتنا لحسن اتخطف ويقولوا عدو المرأه احرقووووووووه


انا يا ولداه لسه راجل من الساحل وفاتح الكومبيوتر الاقي طوفان ليلي وانا مش مجمع اي حاجه وهنجت و حالتي بقت نيله


امانه يا شيخه فهميهم ان الدنيا مش قفش كده دول واخدين حقهم تالت و متلت

توهة said...

ينصر دينك يا أستاذ خليفه


فانتازياااااااااااااااااااا
فانتازيااااااااااااااااااااا

rasha said...

ايه يا بني فينك و حشاني وبعدين ايه حكايه ليلي دي اللي في كل حتي ما تهدي بقي و تروح بتها ولا ايه ؟

Nouran said...

ميدو:
انا معاك يا بشمهندس

البشمهندس محمد:
انت داخل سخن كده ليه يا عم هدي شويه بس برضوا فيه ليلات قليلين برضه

اجدع واحد ف الشارع:
والله ما فهمت حاجة

batooot:
برافو عليكي انت كده جيتي ع النقطة اللي انا عايزاها بس برضه مفيش حد مظلوم كل واحد هو اللي بيظلم نفسه نسبيا يعني

ابيتاف هانم:
الحمد لله دول شكل اللي عندهم اخوات صبيان بيتعذبوا اوي
هو فعلا اساس المجتمع ليلى بس ليلى مش موجوده بالصورة الكتيرة دي يعني انتوا حسستوني ان مصر كلها ليلى
وانا كمان فخورة اني بنت

ادم المصري:
يا عم ما هي دي الحقيقة انا جبت حاجة من عندي لا نطرية الكلام اللي انت كاتبته ده
ع فكرة انت عندك عصبية قبلية كل واحد يكتب اللي هو عايزه يا باشا طب ما انا لو كتبت ع ولاد الشوارع هكون حسيت معانتهم ايه يا عم ادم :)

الساحر:
صح هو ده الكلام
حلوة صورة سلفستر استالوني دي

نوور باشا:
حمدلله ع السلامة الاول
ثانيا :ايه يا عم ما البنات زي الفل وبيتكلموا بحيادية يعني معندناش عصبية قبلية تلاقي بعض الناس خدتهم الحمية وكده يعني فاتكلموا
هيا بجد الحريم اصلها كده ده انت عندك مرجع لكل حاجة خروب كلية الطب والحريم ايه يا عم قاموس متجول
يا عيني يا نوور صعبت عليا ابعتلك بنادول يا بني اقراه ع مهلك متجريش وانت بتقرى
خلاص يا عم كفاية كلام ف الموضوع ده

فانتازيا هااانم:
مين استاذ خليفة ده تقريبا جيتي بلوج غلط هههههههههه

رشا:
واللله انت كمان وحشاني انت عارفاني صايعة عطول مش ف بيتنا وقتي ملك الشارع مش ملكي ههههه
يا بنتي ان شاء الله غمة وتزول

الســـاحر said...

ربنا يخليكى كلك زوق..انتى اللى احلى وان شاء الله فى علو وارتفاع..وربنا يوفقك

Jannah said...

يا شمعة انتى نورتى الكمبيوتر

فعلا مش كلنا ليلى وانا قلتها على البلوج بتاعى انى "لـــــــســـــــــتُ ليلى"

و برضو انا شايفه الستات واخدين حقهم تالت و متلت و شعارهم الزعيق والصوت العالى.

وكذا مرة شفت ست بتضرب راجل فى الشارع

لو كان كلنا ليلى, كان كل ده بان قدام عيوننا فى الشوارع والجامعات و المدارس لكن للأسف كل ليلى ما شافتش مواقف غير جوه بيتها من اقرب الناس ليها و لازم هم يفرقوا بين شخص عايشبن
معاه و مجتمع.

وربنا يعافينا جميعا و يحمينا من كل سوء

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول