Sunday, September 17, 2006

وعدى اليوووووووم ع مهلوا

يا سلام رحت الكلية يا جماعة طبعا منمتش غير ساعتين طبعا لسه نظامي مقلوب بس الكلية دي هتعدله هتعدله المهم نزلت من العمارة اول مرة امشي من غير رضوى متوقعة اشوفها مستنياني اتاخرتي ليه سوررري الاسانسير كان مشغول ونزلت ع السلم واحكيلها قصة حياتي
المهم مشيت لوحدي مبتسمة جدااا بتفرج ع الفرحة ف عيون الاطفال رايحين المدرسة اول يوم بتفرج ع ضحكات الشباب بتوع ثانوي وهما بيسلموا ع بعض بطريقتهم طبعا ومبتسمين طبعا مش علشان المدرسة علشان هيتفسحوا ف المدرسة المهم لحد دلوقتي الدنيا بمبي ف عنيا
نزلت حوالي7ونص من بيتنا عايزة اركب حاجة ان شالله اتوبيس تخيلوه الماساة لا محدش يفكرني ولا تاكسي ولا ميني باص ولا اتوبيس ولا اي مواصلة رحت ماشية لحد ما الحمد لله النحس انفك ع الساعة 8وربع الحمد لله ركبت ميني باص لولولولولي وصلت الكلية المبجلة معادنا انا وصحابي نتقابل 8 انا وصلت 8 ونص كنت اول واحدة اوصل فيهم يا سلام الحمد لله فرشت الكشكول وقعدت ع الرصيف اتفرج ع الناس برضه ما الفرجة ببلاش- معرفش اللي بيقولوه ع البنات بتوع هندسة غفر يجي يتفرج النهاردة -اتفرجت الحمد لله لحد الساعة تسعه الا ربع العيال جم ولله الحمد دخلنا تهنا شوية جوه سذج بقى والحمد لله معرفش خت رسم هندسي واسقاط الدكتور رغااي جدا جابلنا صداع تلات ساعات رغي يا نهاري الحمد لله خلصنا وخرجنا رحنا الجبلاية زحمة جدا مصر كلها ف هندسة المهم كنا قاعدين تحت الشمس عمودي وطبعا هلاوس قلة النوم بدات مع اختكم صداع هيفرقع دماغي الحمد لله حاطة بنادول من تالتة ثانوي ف المحفظة دي اساسيات مع البلاستر المهم جبت ماية وخت البنادول بيقولولي ايه ده قلتلهم دوا ضغط تخاريف فضلت اشرب كانز البيبسي مش بينزل ولسة ماليانة يا سبحان الله السطل لسه مقفولة هبل وربنا المهم عندنا محاضرة جبر فين يا جماعة ف 3002 الحمد لله وصلنا بالسلامة متهناش المرة دي دخلنا المدرج فاضي نسبيا يعني قعدنا فا الاول نسبيا برضه محاضرة جبر الدكتورة اسمها ايه بقى شهوار شهراوار حاجة كده مش فاكرة بالظبط المهم كانت محاضرة حلوة وخدنا مسائل وحلنا وكده يعني الحمد لله خلصنا الساعة اتنين رحنا قابلنا صحابنا اللي ف الجموعة التانية -تبع التخاريف- انا بقولهم الدكتورة رشحت حجات كتير جدا واسمها شهريار صحابي يبصولي ويضحكوااا البنت خلاص فيوزاتها ضربت
الحمد لله اخر محاضرة امشي بقى رحت النحية التانية عند الحرم الجامعي قلت اقابل اصحاب الكفاح الثانوي كلهم مخدوش حاجة ومروقين وبالذات رضووى يا ربي كلية الرايقين انا مش بحقد انا برخم بس:)
طبعا هنموت من الجوع فقررت اخد سندويتشات معايا حد ليه عندي حاجة طبع العمدة اللي قدام تجارة زحمة اكتفينا كل واحد جاب مايه وخلصها اصل درجة الحرارة النهاردة 150ده شئ اكيد
الحمد لله هنروح يا جماعة دي مشكلة مفيش حاجة راضية تتركب حوالي ساعة الاتلت واقفين برضه فرشت ع الرصيف كنت خلاص مت مش متعودين ع البهدلة ديلحد ماالحمدلله تاكسي اتكرم ووقفلنا ووصلنا لحد البيت والحمد لله طلعت البيت وحكيت لماما هذا الموجز بتفاصيل اكتر شويتين والله مامتي تعبت معايا ف الرغي بتاعي ده
سؤال ع الماشي؟
هو الشبكة ف الكلية واقعة خاالص كل ما السيد الوالد يكلمني تفصل المكالمة والله برضه الحاج والدي تعب معانا قلبت دماغه برضه يعملوا ايه بقى بنتهم الكبيرة فرحانين بيها لازم تصدعهم يالله كفايه كده عليكم هوزع بنادول مع البوست ده وكل سنة وانتوا طيبين وانتظروا البوست القادم عن رمضاااااااااااااااااااان
سلام

33 comments:

taty said...

يا نوران والله والله والله
بكرة تخلصي الكلية انشاء اللهع و الخمس سنين دول يعدوا في لمح البصر
مم هتحسي بيهم
و لما تخلصي هتقولي ياريت يوم من ايام قاعدة الرصيف دي يرجع تاني
انا عارفة انك ممكن ماتصدقنيش دلوقتي
بس بكرة تقولي تاتي قالت
كل سنة و انتي طيبة

Lasto-adri *Blue* said...

نظرية بنات هندسة غفر بتثبت بعد تالت ابسوع من بدأ الدراسة يا نوران
ما تستعجليش على رزقك

وغير كدة بقى ح تثبت ليكى نظرية اخرى، بس بلاش ابشرك من دلوقتى

يعنى حاولى تستمتعى باول اسبوعين، لا ممكن تنسهم فى حياتك، حاجة فلتة فى هندسة كدة

وابقى افتكرى كلامى

wa3d el3yoon said...

هلا هلا هلا على الجون الجامد
موضوعك لذيذ أوى
بس عموما اليوم عدى من غير تعب أو مشاكل عويصه الحمد لله
فكرتينى بمحاضره الرسم الاولى بتبقى مسخره الدكتور قاعد يتكلم عن القلم الرصاص والسنون والاسيكه الكويسه من الوحشه خنقنا
عموما الرسم أهم حاجه فى السكشن
والجبر أهم حاجه فى المحاضره
شوفتى التناقض
قضى الكليه كويس

Epitaph said...

هييييييييييييييه

و بقينا من بتوع الجامعة
لولولولييييي

:)) مبروك يا ستي
عقبال البكالوريوس ان شاء الله

BaTresYa said...

انا حاقده عليكوا :-(
الكل راح الجامعه انهارده وانا قاعده عوطليه :-(
اصل انا جاتلي هندسة شبين ولحد الان مجتليش ورقة الترشيح وانا اساسا في اعلام اي عكـ بقى بس ابقي خوديني معاكي :-(

ربنا يديم سعادة اول يوم جامعه عليكي

مفلس افندى الرايق said...

بكره تخلصى الجامعه
وتبقى وزيره

وتبقى للمجتمع شمعه
وتشعى نورك علينا

دانتى الامل وبكره اجمل
وبيكى الفرح بيملى عينينا

يلا بقى بمناسبه الكلام الحلو ده
على الغدى اعزمينا

اصلنا مدونين جعانين
وطمعانين فيكى توكلينا

ههههههههه شحات مودرن
كل سنه وانتى طيبه وشرفنى المرور

m_elsewedy said...

نوراااااااااااااااان
دخلتى الكلية خلاص؟؟؟
وهندسة كمان؟؟
مش زراعة يعنى؟
:D
خلاص اخر ايام الدلع هاتروح وخلاص مش هاتبقى نوران اللى نعرفها بس على فكرة
هما او اسبوعين دول مش هاتنسيهم ابدا فعلا وهاتقعدى تفتكرى وتقولى ايه اللى كنا بنعمله ده ده طبعا لما تتنقلى هندسة القاهرة فرع العباسية قسم ضحايا هندسة ده بعد سنة تانية
انتى ما شفتيش اونكل نور عامل ازاى؟ ده قضى بتاع سنة فى العباسية
عقبالك
:P
وشكرا على سؤالكك علية بجد
وربنا يوفقك فى العباسية يووووووه اصدى فى الكلية
:P

shaimaa said...

نظريه بنات هندسه غفر دي نظريه اكيد 100%
المهم هيا بتظهر امتي؟؟
بعد تلات اسابيع او شهر كده وبتتاكدي منها في اخر التيرم في ايام المشاريع لما تقعدي تشتغلي 20 ساعه متواصل ومش مكفينك
قعدنا ساعتين مستنين تاكسي اصلنا مش متعودين علي البهدله

هتتعودي قريب يا ماما لا تقلقي
قعدتي النهارده علي الرصيف بكره هتقعدي علي الارض متخفيش كله طبيعي

مبروك علي الكليه والله يعينك بقي علي اللي جاي

انى راحلة said...

فطست على روحى من الضحك..المهم ان ده كان شبيه بأول يوم لى فى هندسة..واضح ان كل طلبة هندسة بيقضوا أول يوم زى بعض

و أوعى تعلقى على الأسماء..لسه هاتشوفى أسماء أعجب من كده..دكتورة الكيميا أسمها شكيناز..و دكتور الوصفية أيام ماكان فى وصفية-متهيألى بيدى رياضة دلوقتى-أسمه برهام..دكتور الميكانيكا أسمه طوسون

بس الا شهوار..دى رائعة محدش كان بيفهم منها حاجة و كنت دايما بنام فى محاضراتها..مدام هتديكى توقعى انها تاخد غياب..المهم انك بعد شوية هتعرفى الدكاترة الكويسين اللى كل الطلبة بيحضرلهم..و بعد شوية هتبقى خبرة فى موضوع المواصلات و هتعرفى أسهل الاماكن اللى ممكن تاخدى فيها مينى باص ابن حلال فاضى

أهلا بيكى يافندم فى دنيا هندسة..اللى فيها الطلبة أشبه بالمعذبون تحت الأرض

ربنا يوفقك انشاءالله و تبقى بشمهندسة أد الدنيا

مداح القمر said...

يوم متعب ولذيذ وباللنسبه لحكاية الشبكه مش عارف فعلا ان ملاحظ ان اى كلية هدنسه بروجها الشبكه واقعه فيها...بيت النجار مخلع

Nouran said...

تاتي:
ازيك يا جميل بصراحة لما اخلص هشتاق للرصيف بالذات اصله حبيبي من ايام ثانوي وانت طيبة يا تاتي

لستو ادري -بلو- حلوة لستوه دي:
لا بس في بنات تحسيهم مينفعش يبقوا غفر يعني المقولة دي تنطبق عليا انا وصحابي من دلوقتي وحياتك بس هنشوف الايام تورينا
كنت قلتي النظرية التانية علشان متصدمش بحاول استمتع اهه

البشمهندس محمد باشا:
وجوووووون شكرا يا سيدي
المشاكل العويصة كانت ف المواصلات امتى ربنا يتوب عليا واتم 18سنة واعمل رخصة واخد عربية الوالد لو رضي يسبهالي او احوش واجيب عربية هههههه
اه تصدق وقعد يقول نبرد القلم ونعمل مش عارفة ايه واصلا رغاي ومش طايق نفسه جبلنا صداع تناقض فعلا

جوجي هانم:
لولولولييي
عقبالك انت الاول السنة دي متنسيش المرتبة واعملك نشرة تفرقع ف الاجواء البلوجية

batresya:
ليه الحقج من اولها لو عايزة تحقدي بجد روحي لدودي اعلام هتحقدي بس كده انت في ايه ف الاخر ؟؟ اعلام ولا هندزة؟؟

مفلس افندي الرايق:
وزيرة بحالها ده الحج زنجولا شكله فركش الوزارة بتاعة الكلابيز
ايه الكلام ده يا رايق :)
خلاص شوف تاكل ايه وابعتلك ديليفري من مصروفي -هبقى مفلسة بس امري لله-يالله كله لله وانت طيب ويا رب السنة الجاية تكون مودرن من غير شحاته هههههههه

سويدي:
سويدددددددي الحمد لله شوفتك يا بني قبل ما اموت وصيتي متخليش حد يخش الكلية اهئ اهئ -انا قلبتها دراما-مجموعي مجبش زراعة انت هتقلب عليا المواجع يا سويدي ولا ايه شكلهم كده لا ممكن ننساهم
هي فتحت فرع جديد بس انا مش مستعجلة اروحه هو اونكل نور لسة بيتعالج مش ربنا كرنه السنة دي يبقى فيه امل ربنا يخلص اونكل نور من اللي بيعانيه
لا شكر يا كابتن كنت هتبقى بطل قسم المفقودين كفاية انت اول فايز عندي ف مسابقة اول كومينت انت نسيت :p

shaimaa:
كله هيبااان انا مؤمنة بالغفر وبعزهم لاني واحدة منهم هههههههه
انا كنت بتبهدل قبل كده بس بهدله عن بهدله تفرق
كويس انك طمنتيني انه طبيعي علشان كنت هخاف ع نفسي
الله يبارك فيكي يا جميل

اني راحلة:
ليه يا بنتي راحلة البلد دي احسن من غيرها شرفتيني يا جميل
شكل نص البلوج ضحايا هندسة ولا ايه ؟؟
تصدقي كل الناس نفس اليوم ده دي كلية غريبة
لا كله كوم وشهوار دي كوم بس والله انا فهمت منها مع ان صحابي مفهموش معرفش ليه وهيحضروا واحد تاني بكرة انا سمعت الاسامي الغريبة دي
ف اعلام عندهم فضل شاكر واحنا عندنا طوسون سبحان الله
ف اماكن المواصلات فيها بتبقى رايقة ما تقوليلي ربنا يكرمك
لا وانت الصادقة معذبون تحت السلم -عجبني اوي السلم اللي جنب مدرجات 3001 و 3002 عاملينه موقعنا وكل شوية حد يقومنا علشان يطلع
يا رب يوفقنا كلنا

الدكتور احمد:
بصراحة كان يوم حلو مقدرش انكر معرفش الشبكة واقعة ليه ده انا اتخنقت يالله عرفت الاماكن اللي مش بتبقى واقعة اوي -الشبكة-شكرا يا دكتور ع المحكمة انا خلاص حطيتها ع راي رضوى ميرسي كتير

ادم المصري said...

جميل ... يا ريت بقي تفتكري الكلام ده اول يوم السنه الجاية


واعرفي الفرق

Dody said...

ااااااااااااااه من معاناه المواصلات دى منهم لله السواقين دول بس بوست جامد يا نورا بس نظريه بنات هندسه دى انا مش مصدقاها البنت بنت فى اى مكان

BaTresYa said...

لا انا سجلت اعلام يا قمر acu
خاصة يعني وادعي عيلي احسن مش عارفه اروح شبين دي ازاي :-(

Captain L.J.Silver said...

LA222AAAAAAAAAAAAAAAAAAAAAAA...
SHAHWAAAAAAR LA22AAAAAAAAAAAAAAAAAAAAAAA... howa 3ammatan staff el math beta3 e3dady kollo madroob belnar...laken shahwar deeh madrooba belnawawy we el keemawy !!we boukra te2oly Captain Silver 2ally !

Gid-Do - جدو said...

شمعة

الف مبرووووووووووووووووووك وانشاء الله اشوفك بتتقدمى شوية بشوية لحد ما تبقى غفير على تالت اسبوع حسب كلام بلو وساعتها تغبرى صورتك على البلوج ـ على فكرة ابقى شوفى تعليقى عند دودى اللى بقلها فية تزوغ وتقبلك فى جنينة الاورمان ـ تحياتى ودعواتى بالتوفيق

مهندس مصري said...

عدي اول يوم بس اول يوم تشوفي شهوار انا عارف ان صوتها بيرن وخصوصا في 3002 هي قصيرة بس جبارة في صوتها.وبعدين في حد يقعد في الجبلاية اول يوم دي ولا ميدان رمسيس.اما بالنسبة لان بنات هندسة غفر ده ينطبق علي الاخوة المجاهدين المكافحين اللي بيذاكروا اما بالنسبة لمارينا فهي كما هي ستظل مارينا حيث الدماغ العالية والبال الرايق.يس هقولك حاجة انا كنت بتضايق لما حد يقولها لي بس اتضح انها صح بعد ما هاتخلصي ان شاءالله صدقيني ستتمني ولو يوم من ايام الجامعة.ربنا معاكي

مـحـمـد مـفـيـد said...

نوران الشمعه الهادئه
اولا كل عام وانتي بخير بمناسبه رمضان
هتجدي صعوبات في البدايه ولكنها من اجمل الصعوبات
وايامك هذه من اروع الايام التي ستعيشينها باذن الله

انى راحلة said...

لول..أدينى قاعدة أهو..البلد رائعة طبعا انتى هتقوليلى

بالنسبة للمواصلات..على حسب انتى ساكنة فين..لو زيى و زى ناس كتير فى الهرم..يبقى بلاش الموقف اللى قدام الجامعة و امشى قدام شوية بعد المسلة..هتلاقى المينى باصات بتلف و بتبقى لسه فاضية رغم ان الناس طبعا بيهجموا و اللى يلحق..
و ياريت ماتعتمديش على موضوع العربية ده لحسن كنت زيك فاكرة انى أول ما هاخش الكلية هيبقى لى عربية أسوقها..و أدينى هاتخرج من غير حتى ما أسوق عربية حنطور..

BackBone said...

انا لله و انا له راجعون

انتي ايه يابنتي اللي دخلك هندسه بس!!! منتي كنت كويسه

اه ه ه ه ه ه ه ه ه ه, كنتي فين يا لأه لما قولنا الأه ه ه ه ه ه ه.ـ

المهم يالله بقه طالما دخلتي برجلك يبقي تعملي حسابك مفيش حاجه اسمها مكياج و لا تسريح شعر. علي سنه اولي لو مكنتيش اتحجبتي طاعه لربنا هتتحجبي علشان مفيش وقت تغسلي شعرك اصلاً و بعد سنه تانيه مفيش كمان حتي حلاقت دقن و لا شنب

و اللهي كنت طيبة يالله انا لله و ان له لراجعون

الســـاحر said...

مفيش حلاوه منغير نار
ان شاء الله ربنا يجعلها سنه حلوة عليكى بس انتى شدى حيلك
والشبكه ضعيفه علشان انتى ماقولتيش فى الاول بسم الله
هههههههههه
وربنا يوفقك

Anonymous said...

كل سنه وانتم طيبين وربنا يعود علينا وعليكم الايام بخير

Sampateek said...

و انا اللي فاكرة نفسي رغاية اتاري في مهندسة سكرة اغري مني
ههههههههههه
كل سنة و انتي طيبة يا سكرة و ربنا يجعلها سنة سهلة و سعيدة و موفقة
شدي حيلك اعدادي هندسة صعبة و عايزة شغل
ربنا معاكي
و يرجع بابا بالسلامة
قبلاتي

Nouran said...

ادم:
ليه يا بني التشاؤم ده ان شاء الله يكون احلى من اول يوم اعدادي ع الاقل داخلة عارفة الحقيقة ومش هتوه كتير :)

دودي:
اه المواصلات ع فكرة لو خدنا من قدام كليتي هتبقى اروق من عندك ابى جربي
بالنسبة لبنات هندسة هما قصدهم ان البنات مش بتلاقي وقت تفتكر فيه انها بنت من كتر الشغل والمذاكرة

batresya:
يا رب متروحيش شبين لحسن باين كده انها بعيد

كابتن سيلفر:
حرااااام عليك والله انتوا ظالمين شهريار الست شرحت كويس وفهمتها رايك هغير رايي ولا ايه
بس بيقولوه ف واحد اسمه هاني عبد المللك كويس رايك اروح احضره واكبر لشهريار ؟؟ افيدني يا هندزة

جدو:
الله يبارك ف حضرتك يا رب ابقى غفر بس اجيب نتيجة كويسة وانا موافقة
ممكن ادور لصورة واحدة غفر احطها نظرية برضه يا جدو
شوفت التعليق يا جدو وشكرا ع الكلام اللي فيه

البشمهندس المصري:
صح 3002 قصيرة بس عليها صوت
اه قعدت ف الجبلاية ومفيهاش مكان غير ف الشمس بس بعد كده نقبنل مقرنا ع السلم
يبقى كده ضمنا غفر لاني مش معقول بعد عذاب الثانوية اضيع مجهودي اتعذب شوية تاني واجيب تقدير
يا رب دلوقتي بتمنى يوم من ايام المدرسة

محمد مفيد:
ايه شمعة هادئة دي انت جبت الفكرة الغلط دي عني منين يا باشا
اولا كل سنة وانت طيب
ثانيا تعرف ان انا مستمتعة جدا بالبهدلة للي بتبهدلها والتوهان والحجات دي بجد حجات جديدة عليا وزي ما بتقول صعوبات جميلة

اني راحلة:
الحمد لله انم ممشتيش البلد زي الفل بالذات المواصلات
ع فكرة انا جربت المكان ده كويس اما بالنسبة للي يلحق فانا اجدع واحدة تنط ف الميني باصات حتى اسألي دودي
ليه كده ولا حتى حنطور يبقى هحوش من دلوقتي واجيبها لنفسي ع 45سنة كده اهوه لسه ف امل :)

باك بون باشا:
لا اله الا الله من مات
هي هندسة مقبرة الطلبة ولا ايه يا جماعة يعني انت مكنتش بتحبها ؟؟
لا متقلقش انا محجبة طاعة لربي ومن زمان والمكياج مليش فيه اصلا يالا احسن بلا وجع دماغ لسه هبص ف المراية واحط الوان بلا قرف
بس ايه حكاية مفيش وقت تغسلي شعرك دي هقصه ولا ايه
حلوة دقت وشنب
يالا لا اله الا الله ربنا يصبرنا يا رب

الساحر باشا افندي:
حلوة مفيش حلاوة من غير نار
يالا هحاول اشد حيلي
هبقى اقول بسم الله الرحمن الرحيم واقول ما اخلص اقول الحمد لله
ههههههههههه
يا رب يوفقنا كلنا


عمر:
وانت طيب

كلبوزة هانم :
والله وحشاني يا كلابيزوه شوفتي الرغي ده كبت بس من اثار المدارس بتاعة السنين اللي فاتت
وانت طيبة يا كلبوزة ويا رب تبقى سنة وسعيدة ادعولي انتوا بس اشد حيلي كويس يالا سلاااام

NoOR said...

نوراااااااااااااااان : الف مبروك

قال مش متعوده علي البهدله ... بعد كده البهدله هي اللي مش هتبقي متعوده عليكي

مستني البوسط بتاعك بعد اول ميد تيرم

مفلس افندى الرايق said...

ايه انتى لسه ماجيتش من الكليه من وقتها

ازيك
كل سنه وانتى طيبه

Gbalawy said...

كل سنه وانتى طيبه
فكرتينى باول يوم فى الدراسه
كنت لازم اسمع اغنيه عبد الحليم(بالصدفه طبعا) وابتدى ابتدى المشوار
وان شاء الله هاننجح اخر المشوار

مـحـمـد مـفـيـد said...

علي فكره احنا قرايب
حزري فزري ابقي مين؟

ayhm jzzan said...

ذكرتيني بأيام الجامعة يا شيخة
آه كانت أيام ؟؟؟!!!
تحياتي وسلام

Nouran said...

نووور:
الله يبارك فيك عقبال لما اباركلك وانت طالع منها مع مرتبة الشرف
شكرا لتبشيري بان البهدلة مش هتتعود عليه اهئ اهئ
متقلقش انا هذعكوا اول باول بالحجات دي

مفلس افندي الرايق:د
لا انا جيت بس كنت تعبانة كلية دماااار شااامل
وانت طيب ورمضان كريم

جبلاوي:
وانت طيب حلوة الاغنية دي لا بجد حلوة وابتدى المشوار وشكله هيطول ويا رب ننجح اخر المشوار

محمد مفيد:
اقولك انا عرفت ان احنا قرايب من فترة قريبة كنت جايبة ف سرتك رضوى قالتلي شوفت بقى :)

ayman zzan:
كانت ايام كويسة ولا ايه
سا رب ايامي تبقى كويسة انا كمان

Anonymous said...

مبروك بس هندسة مرة واحدة كان عندي اعتقاد ان
انتي علمي علوم وهتخشي طب ولاحاجة
كان شكلك بيقول كده

أجدع واحد في الشارع said...

كل سنه وانتى طيبة
وتعالى شوفى البوست
الجديد

Nouran said...

hero:
كل الناس بتقولي شكلي دكتورة معرفش ليه ؟؟ شفت هندسة مرة واحدة بيني وبينك تجارة احسن ناس بلا وجع قلب

اجدع واحد ف الشارع:
وانت طيب بس اكيد البوست اللي بتقول عليه بقى قديم اصلي كنت نايمة اليومين اللي فاتوا دول :)