انا جيت

بصوا انا جيت سريعا سريعا ورايا حجات كتير اسفة ع التاخير واتبعتلي تاج هجاوبه دلوقتي بس قبل كده احب اقول لجدو كل سنة وهو طيب وعقبال سنين تانية كتير وعقبال ما يشوف احفاد ياسمين وشريف :) واوعدكم هنزل نشرة ع اخر الاسبوع ده اوا اول الاسبوع اللي جاي اوك الكلام نتكلم بقى عن التاج اللي اتبعتلي البشمهندس المبرمج الحر بعتلي تاج لولولولي :)

.

اسم مدونتك ايه؟

شاماعاةا -شيل الالف بعد كل حرف وهتعرف اسم المدونة او اقولك طريقة سهلة بصوا ع المدونة من فوق هتلاقوا الاسم منوررر

لماذا اخترته ماذا تقصد به؟

بص يا سيدي زي ما قلت ف اول تدوينة من 100سنة كده لما كنت ف 2ثانوي ف درس الكيميا كنا بنحب المستر اوي وكان كل ما يسالني ع اسمي اكون جايبة درجة وحشة مرة 16 من 20 ةالتانية 17.5 مع العلم ان المرتين دول بس اللي نقصت فيهم مش مشكلتنا المهم قالي انت نوران انت انت كبيرك شمعة ومن هنا كل الناس عرفتني بالاسم ده كنت مشهورة بيه اوي ف المدرسة بس تقدر تقول بحب الاسم ده :)

هل فكرت ف اغلاق المدونة والسبب:

الاجابة نعم

السبب : كنت ساعة النتيجة السنة اللي فاتت قلت لو جبت مجموع وحش هعاقب نفسي وارمي البلوج يعني هحرم نفسي من حاجة بحبها نوع من انواع العقاب يعني بس اكتشفت اني مش هقدر اعيش من غير تدوين بتاتا -حلوة بتاتا دي صح -:)

.

صورتك ف المدونة رمزيتها؟

انها نوع من انواع الحنين الي الطفولة وافلام الكارتون الذي يتمثل ف ستوووووووووب ايه الهبل ده بصوا انا بحب الكارتون بتاع كرتي البعبع ده اوي شركة المرعبين المحبوبة ههههه والبنت عسولة وبحس انها بتعبر عني من جوه طفلة بس مش بقطتين بضفرتين :)

.

طبيعة كتابتك ف المدونة بشكل عام سياسة قصة عبث كلام فاضي؟

اولا اعترض ع كلمة كلام فاضي بذمتك بيبقى فيه حاجة اسمها كلام فاضي فيه كوباية فاضية طبق فاضي هههههههههه

انا اللي يجي ف دماغي بكتبه مش حاجة معينة تهيس ع قصص قصيرة بتاعتي ع7 خواطر ع رياضة ع مذكرات ع مواقف ع كل حاجة كده يعني

.

لماذا تدون اصلا؟

اصلا واساسا حاجة بعبر بيها عن نفسي وبطلع فيها افكاري تعرفوا انا بعبر عن نفسي حلو بالكتابة اوي لكن لو اتكلمت يالهوي ع اللي هيحصل ههههههه بس بجد التدوين ده بقى شئ مهم جدا بالنسبة ليا بعرف اخبار الدنيا بتواصل مع ناس كتير بعرض افكاري وتهيسي وقصصي ونكتي الرخمة وخواطري وكل حاجة انا عايزاها يا بجد شئ جمييل

.

احلى جملة قيلت لك ف وصف مدونتك؟

هي مش احلى جملة ولا حاجة بس انا فرحت لما اتكتبت ف الجرنال زمااان كده وقعدوا يقولوا اصغر مدونة تاخذك لعالم مش عارف ايه بتلقائية وليست سذاجة ومش عارف ايه واصلا واساسا معرفش حد وصف مدونتي قبل كده او ممكن يكون سابلي ف كومينت حاجة والله معرفشي ممكن حد يوصفهالي واختار احلى وصف ههههههههه بس الجميع مجمعين انها مدونةن عيلة كبيرة وده بيبسطني :)

.

التعليقات بالنسبة ليك اهميتها؟

ياااه ده شئ مهم جدا جدا بالنسبة ليا انتوا متشفونيش بعد ما اكتب البوست وكل شوية اشوف مين عبرني وعلقلي يااه ولما كان بيوصل التعليقات 10تعليقات ياه كنت بعمل فرح

.

احلى بوست كتبته ضع لينك واذكر السبب؟

اصلا كل بوستاتي حلوة ههههه بس البوست اللي انا بحبه بتمنى معرفش بس كنت حاسه بيه اوي ساعة رمضان

.

اافضل مدونة قراتها ؟

ايه ده انا مش بحبكده بص هجاوب اجابة كويسةاستنى استنى اه اي مدونة دخلت عليها وسيبت تعليق فيها تبقى الفضلى بالنسبة ليا حلوة الفضلى ديه :)

.

افضل بوست قراته؟

ايه يا عم كله افضل افضل مفيش نص نص او اسوأ ع العموم الاجابة موجودة فوق :P

.

هل خسرت صديقا بسبب الكتابة هنا؟

لا بس شكلي هخسر علشان انا هكتب تدوينة ايه بس اصبروا عليا لحسن الصديق حاله ينصلح وكمان ده انت جرار شكل اوي اوي يعني انت عايزني اخسرك :)

.

حد قل ادبه ف تعليق عندك وايه ردة فعلك؟

لا مظنش اصل معظم مواضيعي مينفعش حد يقل ادبه ف تعليق بس والله مش عارفة هعمل ايه لو حد عمل كده بس مش هرد عليه وهرمي التعليق

.

اسوأ مدونة الاجابة اجبارية يمكن اختيار عدة مدونات..هما كتير اصلا؟

انا اللي قلت مفيش اسوأ استاهل ههههه ومين قالك انهم كتير يعني ما ممكن انت تشوف مدونة وحشة وحد يشوفها حلوة بس المدونات اللي بتعدي جامد ف الحدود المعقولة يعني فيه حجات مش هعرف اقولها يعني بصواعادة المدونة الوحشة او السيئة مش لو صادف ودخلتها مش هخشها تاني فهنسى اسمها ايه رايك؟

.

اسوأ بوست؟

انا اللي جبته لنفسي ماااشي مش بقراه الحجات الوحشة وحاجة وحشه هفتكرها ليه اه تعبتني يا شيخ :)

.

اسؤا مدون مهو هتجاوب هتجاوب؟

ايه التاج اللي بصيغة افعل ده كانت حاجة ف العربي :)

مفيش سؤال اختياري ههههه كله اجباري طب بص اسؤا مدون واحد اكيد بيدون وحش ايه السؤال اللي اجابته تافهة ده :)

نباصي لمين التاج ده بصوا بقى اللي عايز يعمله يعمله بصراحة مليش مزاج اباصي

تخاريف

يالا بقى هنشطب وهاخد اجازة وهذاكر وهظبط مواعيدي ومش هنام كتير ومش هكتب بوست عن الفلانتين وحالتي النفسية متدهورة ده انا حتى مش بتفرج ع الكارتون ولا باور رينجيز شفتوا التدهور وكل اللي بعمله ف حياتي بناااااااااام والنبي قولولي حل ع النوم ده يا جماعة وجه الدكتور بتاع التكامل اللي معرفش اسمه ايه زود الطين بله راجل فضل يحبطنا ويحبطنا وياريته بيعرف يشرح

ان الله لا يغير بقوم حتي يغيروا ما بانفسهم"

والمشكلة اني مش عارفة اغير من نفسي عارفين لما تبقوا عارفين حاجة غلط ومش عارفين تغيروها وجواكوا حاجة مش عارفين تعملوها

ع فكرة المفروض يبقى فيه نشرة بس بصراحة مش قادرة اكتب نشرة واهيس وكده واحط قصص تشل ونكت تجيب الضغط والفقرة الجديدة ونورت مصر والف اغنية ع الاغنية وكده بس برضه مش قادرة افوت تهاني كتيرة

اولهم لدولي اللي رجعتلنا من تاني والبركة ف الحاجة ابي وكنت ناوية احطلها والله نشرة جامدة بس صدقيني هتبقى ف اول النشرة

عندنا عيد ميلاد البشمهندس محمد ما شاء الله 19 سنة عقبال 119 سنة يا باشا

عندنا البشمهندس الدكتور زنجولا ومع الناجح يرفع ايده وجيد جدا مع انه حسب كلامه كان منتظر الامتياز بس احسن من مفيش رئيس الوزرا بتاعنا بقى معاه البكالريوس وهنبعتله الشيك ع الميل علشان يتمنظر بيه :)

وبمناسبة الناجحين برضه منن اختي عقبالكوا كده نجحت ف الابتدائية 98 ف الميه طالعة متفوقة زي بس ع فكرة انا كنت اشطر لكن دلوقتي مش متاكدة من موضوع الشطارة ده :(

وصحبتي برضه بس هي مش بتخش ع البلوج بس برضه اعدادي طب اسنان جيد جدا شفتوا التفوق

حلاص فيه تهاني تانية انا مختش بالي منها ؟؟

اتنين ف واحد

اولا:

انا : بطتتي

هي: وزتي وحشتيني

انا : وانت كمان والله بس ايه الحظيرة اللي واقعين فيها ديه

كل يوم من ده لما نشوف بعض ف الكلية الصبح بطتتي ديه صحبتي نورهان كانت معايا ف المدرسة وف درس الرياضة بس بقينا صحاب ف الكلية بجد بحبها جدا بحب تلقائيتها وطيبتها وبساطتها وهبلها ف احيان كتير انا وهي بنمثل ثنائي هبل وعبط يجنن :) بجد انا معرفتهاش غير لما دخلت الكلية المهم انها عملت بلوج شفتوا ازاي ومستكة برضوه ف طريقها انها تكتب حاجة ف بلوجها اللي مش معمول لسه بس بتقولي ف الاجازة المهم بطتتي عملت بلوج فني تويتي وضيعته وعملته تاني عادي يعني المهم يعني -ايه حكاية المهم معايا ديه-انا فرحانه انها عملت بلوج وعقبال مستكة اهوه لينك لبطتتي:) هو لسه البلوج مش متنظم بس هيحلو صدقوني

.

يا سلام اتبعتلي تاج شكرا ع التدبيسة يا دودي ويا بشمهندس محمد:)

.

ايه اللي هيحصل لاميلك لما تموت؟

سلام قول من رب رحيم قول ايه اللي هيحصلك لما تموت مش لايميلك يحصله اي حاجة هو انا هبقى فايقة له كفاية اللي هبقى انا فيه

.

اديت الباسورد بتاعك لحد قبل كده؟

اه يعني هو الايميل فيه اسراري البلوجيه يعني

.

لو اه كانت طبيعة العلاقة بيه ايه؟

بابا يعني علشان هو اللي كان عملي الايميل ايام ما كنت عيلة ولما غيرته ادتهولوه علشان يفضيهولي لما اكون مش بخش عليه وكمان مصر كلها عارفة الباسورد بتاعي يعني لو عايزة رضوى تعملي حاجة هدهولها اذا كانت مش عارفاه يعني :)

.

اسمك؟

يااااه سؤال صعب جدا ع العموم ممكن تقولولي نور اس اتنين او مثنى نور زي ما انتوا عايزين

نوراااااااااااااااان -بس هي الف واحدة ف النص-

.

اسم الدلع المشهور بيه وسط اصحابك؟

مش اسم واحد كل واحد حسب الغزالة فيه نونو و نور ونورا وحاليا شموعة ووزتي :)

.

عمرك؟

17 سنة ونص -انا اكبر من دودي بشهر و 10 ايام0-

برجك؟

بيقولوه الجوزاء بس انا معرفش ايه علاقة الابراج بالموضوع وكمان انا معرفش عنه اي حاجة :)

.

مجال دراستك؟

والعياذ بالله هندزززززززززززة-بس لسه بحبها برضه-

.

شخصيتك نوعها ايه؟

اتنين ف واحد برت بلاس ههههههههه

انتوا اللي جبتوه لنفسكوا انا هتكلم سبوني اتكلم طيب خلاص انا هكتب :)

زي ما فهمت من السطر اللي قبل ده فتقدر تقول رخمة من الطراز الاول للي ميعرفنيش واللي يعرفني برضه عادي يعني يااااه ده انا بعذب الناس اوي وممكن تقول تنكة بس ديه حسب المزاج بس ف الاساس للي ميعرفنيش يعني هخلي الناس تتعود عليا كده لازم حبة تناكة ولما يعرفوني يقولولي كنا بنحسبك تنكة

ممكن نقول صفات حلوة شوية عاقلة بس بحالات برضه مستمعة للناس طيبة والله العظيم مش بجامل نفسي يعني عيوطة فماما بتقول عليا حساسة الحساسية ليها علاقة بالعياط والله معرفش كفاية كده بقى اصلا مش بعرف اوصف نفسي :)

.

المود بتاعي:

زجزاج مش زجاج علشان محدش يفهم غلط

.

وقت فراغك بتعمل فيه ايه؟

ياااه حجات كتيرة بنام وبنام وبنام وباكل وممكن اقرا وممكن اعمل كيكة يعني كل 120سنة مرة والعب بلاي استيشن واتفرج ع الكارتون والتلفزيون كفاية كده كلها حجات بتضيع الوقت شفتوا وقت فراغي كبير ازاي -ع فكرة ف حجات اساسية مش هعملها ف وقت الفراغ علشان ليها وقت اصلا-

.

الاكلة المفضلة؟ انا هغير صيغة السؤال هخليه الاكل المفضل قال اكلة واحدة قال

المهم المحشي والبطاطس ف الصينية مش الحمرا البيضة والمحشي تاني والخرشوف واكل كتير تاني متعدش -ده انا بقت اكيلة اوي من بعد ما دخلت الكلية حاجة صعبة-

.

الصفات اللي اختها من ماما ومن بابا؟

صدقوني مش هعرف اجاوب ع السؤال ده اني شخصيا معرفش :)

.

اكتر 6 حجات بتكرهها؟

القطط

الكدب والعالم السوسة

الميكروبسات

التلفزيون المصري

السياسة

بكار ابو كف رقيق وصغنن

.

اكتر 6 حجات بحبها؟

بصوا بقى ف حجات هنطلعها من ال6 حجات علشان مينفعش نقول عليها حجات يعني ربنا ورسولنا وبلدنا وبابانا ومامتنا واخواتنا وقرايبنا وصحابنا

نيجي بقى لل6 حجات:)

الكارتون

البلاي استيشن

الرياضة والفيزيا بالرغم اني مبقتش اعرف احلهم ومعذبني

الرسم والقراية

الشيكولاتة

الكورة

.

الشغل بالنسبة ليك؟

هو حلم وتجربة خايفة من المرور بيها وممكن اكون مش ضامنة الحصول عليها

.

الكمبيوتر بالنسبة لك ايه؟

زي اخويا هههههههه

.................................................................................

التاج التاني:

ع فكرة انا اكتشفت ان السؤال التاني ده تاج لوحده يا سلام انا جالي تاج 2 ف 1

الخمس الحجات اللي محدش يعرفها عنك؟

اولا:

ها نور

لا لسة

نور

لا لسه

ماما بخااااااار بخاااااااااار

حد فهم حاجة طبعا لا المهم انا وروان ومنن اخواتي كنا بنلعب ف الرسيفير علشان كان معلق ونشيل الفيشة ونحط الفيشة لحد ما طلع دخان وانا بهبلي ااقول بخار قال بخار قال هههههه المهم ان احنا بوظنا الرسيفير طبعا 3بنات زي الشربات مش بيعملوا اي حاجة عادي خالص وخلينا بابا يجيبلنا واحد تاني ف نفس اليوم علشان كان فيه الحلقة الاخيرة من مسلسل متابعينوه بقالنا شهر :)

.

ثانيا:

بصي انا بعرف اولع الكبريت اوريكي

لا يا محمود هتوريني هنا لحسن نولع ف الشقة ولا حاجة

لا انا هسيطر ع الموقف

الموقف ده حصل وانا وابن خالتي عندنا 5 سنين والبيت كله نايم وطبعا سيطرنا ع الموقف بعد ما الورق المتولع وقع ع الارضض وحته من السجادة كانت هتولع وطلعت اجري اجيب مايه علشان نطفي الحريقة

ع فكرة محدش يعرف خالص لحد دلوقتي :)

.

كفاية فضايح ونخش ف حجات قسيرة -اه بالسين بقى-

ثالثا: لما بحب حد مش بعرف ابين اني بحبه

.

رابعا:بيبقى نفسي اعامل الناس اللي معرفهاش كويس بس بيغلب عليا طبع التناكة والرخامة بس والله مش بيبقى قصدي يعني لما جي اروح اشتري حاجة لازم اسمع الجملة ديه هو فيه حد مزعلك ولا ايه وربنا مش ببقى عاملة حاجة تدل اني زعلانة انا كده اصلا بتغاظ اوي من الحكاية ديه

.

خامسا:وانا صغيرة كان نفسي اطلع صحفية مهندسة مخترعة اه 3 ف واحد وعندي لحد دلوقتي حجات كتبتها زمااان ومحدش شافها غير واحدة صحبتي ومبقتش صحبتي ها يا دودي كنت معتبرة الاجندة ديه نفسي ولما اديتهالها تقراها قالتلي عادية يعني ايه اللي فيها اتغاظت اوي بجد اما عن الاختراعات فاسالوا رضوى وهكتب عنها بوست ان شاء الله

.

كده خلصنا التاج اللي ف زمتنا وهندبس فيه الناس الحلوين ديه ع فكرة دول تاجين يعني فيه

ناس عملت الاول وانا هدبسها ف التاني حد فهم حاجة :)

سويدي

عربي ومنجي

الدكتور احمد باشا

محمد مفيد

ادم باشا

مبرمج حر التاج التاني علشان عمل الاولاني :)

البشمهندس نور باشا

بطتي

خواطر تهيسية

-متوقفة عن الكتابة لاسباب لا اعلمها

...يا رب متجننش-

.
لا اعلم لماذا تطير الافكار مني داخل عقلي

...بتطير ازاي معرفش

.
تتخبط يمينا ويسار ولا تستقر ف جهة

...بتخبط ازاي انا معرفش-

.

متوقفة عن الكتابة لاسباب لا اعلمها

...شكلي هتجنن-

.
اسباب ليس لها علاقة بحالتي

...انا عملت جراحة بسيطة ف رجلي اكيد مش هي السبب

.

اسباب ليس لها علاقة بعقلي

...انا ركبي حديد والاهلي حديد و عقلي شديد

.
ولكنها بالتاكيد اسباب لا اعلمها

...شكلي اتجننت

.
ماذا اكتب ؟؟

...اكتب اللي اكتبه

.
سؤال يتردد ف ذهني

...بيتردد رايح جاي

.
ااكتب عني؟ عن عائلتي؟ عن اصدقائي؟ عن بلدي؟

...شكلي هخنق نفسي ف الاخر

.
اردت ان اكتب شئيا فوق العادة ولكنه هرب مني كالعادة

... يا سلام عليا

.
بل وازدادت صعوبة حالتي باني قررت الاستستلام

...الاستسلام لايه معرفش

.
ولكن يدي امسكت ورقة وقلم ورسمت اشياء تذكرني بطفولتي

...طفولة سعيدة ومشردة جدا

.
ولكني الياس الذي ف عقلي ناداني قائلا

...معرفش ناداني ازاي بس ناداني

.
انها مجرد محاولة لتذكر الاشياء الجميلة ولكنها لن تدوم

...حالتي باظت خالص

.
وقررت التحدي

... هتحدى مين معرفش

.
ورسمت المزيد والمزيد اشياء كثيرة جميلة ملونة

...يا سلام عليا لما ابقى فايقة

.
وها انا منتظرة لعلي استطيع الكتابة

...مش عارفة هفضل مستنية كتير

.

ولكني نجحت ف تذكر الاشياء الجميلة

...اخيرا فلحت ف حاجة

.
متوقفة عن الكتابة لاسباب لا اعلمها

...خواطر تهيسية من اثر البنج ابن الفقرية

.

انتهى