الثانوية العامة جميلة جدا

.كل الناس كانت بتخوفني منها بس انا بحب المرحلة دي جدا ابتداء من المذاكرة لحد الاجازة والفسح مع اصحابي .

اخر 3 شهور وتكون خايف وتعيط كل يوم واحيانا كتير لا هقول علطول امسك الورقة والقلم واقعد اكتب اني مش هغيب مجموع واني مش بذاكر كويس وهعمل ايه في الامتحانات لكن الامتحانات ذي شكة الدبوس وبعد الامتحانات يجي توتر النتيجة والاهل يقولولك حط لنفسك اسوا الاحتمالات واقعد اكتب تاني عن خوفي من الامتحانات والحمد لله تطلع النتيجة وتكون كويسة بس احلى حاجة في الثانوية بجد الاهتمام اللي بتلاقيه من عيلتك بصراحة بيوفروا كل سبل الراحة ابتداء من السندويتشات بتاعة المذاكرة لحد فرحهم بالمجموع.

و كمان المدرسة جميلة جدا نزوغ ونقعد في الحوش وننام في الحصص ونحل الواجب بتاع الدرس والله العظيم متعة.

انا الوحيدة في صحابي اللي مش عايزة اخش الجامعة اصل انا بحب المدرسة من زمااااان لكن هما عايزين يخشوا المجتمع المفتوح ده بس طبعا هو مش بمبى زي ما هما متوقعين والله انا مش عارفة بس انا بصراحة خايفة منها اوي تخيلوا صحابي بيقولولي انهم مش بياخدوا سندويتشات طبعا انا مش متخيلة همشي ازاي من غير سندوتشاتي وقالولي ان اللي ياخد سندويتشات بيتريقوا عليه الكلام ده صحيح ولا بيتريقوا عليا

بس مصيري جايلي جايلي هخشها هخشها