Thursday, August 03, 2006

تحديث لثالث مرة" الاذاعة من عند شمعة

من مكاني هنا ابثها لكم -ايه التخاريف دي- من مكاني هنا قررت -خلصينا خنقتينا- قررت اني اعمل اذاعة -بس المشكلة يا فالحة ان الاذاعة بتتسمع مش بتتقري- خلاص هسميها نشرة مش مشكلة ولا يهزك-ايه احنا ف فرح هنا عيب- خلاص ولا يهمك بلاش يهزك دي المهم انا فكرت اعمل بلوج ليها لوحديها بس قلت اجرب هنا لو حلوة اعملها لوحدها لو وحشها هعملها هنا بلوجي وانا حرة في :)
المهم النشرة من عند شمعة او الاذاعة من عند شمعة - المهم الموضوع فيه شمعة وخلاص- دي بتتكون من كذا حاجة
1- تهنئة لاي مناسبة او اكثر من تهنئة
2-قصة فاشلة من بتوعي اللي مش بيكملوا -بالمناسبة كنت عاملة بلوج اسمه قصة لم تكتمل بعد ومسحته ومعرفش مين حتى دخل عليه قلت اكتب هنا -
3-نكته سخيفة -لازم تبقى سخيفة هو ده النظام-
4-معرفش بقى لحد كده وفكرت لو ممكن حد يقولي ازود عليها او اخليها كده اوك
1.....2....3...
بسم الله الرحمن الرحيم-انتي داخلة ع الميكروفون خشي ف الموضوع- ماشي
التهنئة:
كل سنة وانتوا طيبين وعقبال 100 سنة كمان مع بعضيكوا وتكونوا كده بقالكوا 118 سنة سوا وانا يبقى عندي 117 سنة يا كده كبيرة اوي مش مشكلة
النهاردة 3\8 عيد جواز بابايا و ماماتي ال18 كل سنة وهما طيبين وعقبال البكاري - انا موجودة مش انا برضه ابقى البكاري علشان انا الكبيرة-
التهنئة التانية : للعروسة والعريس بتوع امبارح 2\8هما مش هيقروا الكلام ده بس مبروك ليهم ويا رب يبقوا فرحانين علطول يا رب علشان هما ناس كويسة
التهنئة التالته:لكل صحابي اللي دخلوا الكليات اللي عايزنها واسبيشل لدودي مبرووك يا بنتي بقينا من طلاب الجامعات المصرية الخطيرة :)
تهنئة الرابعة: للدكتور ابراهيم مبروك يا مان ع الشغل وعقبال لما تفتح عيادة- هو الشغل بيتعمله تهنئة-اه بيتعمله ف النشرة بتاعة شمعة
تحديث مطلعش شغل طلع تدريب ناسف للغلطة يا دكتور
تهنئة خامسة : ليا ياسلام وصل عدد التعليقات ف البوست اللي فات ل31 انا معلقة 3 تعليقات بس مش مشكلة انجاز ياسلام- رشا قالتلي ده علشان الثانوية العامة والتنسيق-
مش مشكلة انجاز برضه
تحديث : تهنئة سادسة ليا برضوا
هاهاهاهاها قال بيقولوا اني اعلى نمرة رياضة ف المدرسة 48 من 50 شكل المدرسة اتقلبت من مدرسة المتفوقين لمدرسة الفاشلين قال انا اعلى درجة قال ههههههههههه
تحديث 2 : التهنئة السابعة :
كل سنة ودولي طيبة وعقبال 126 سنة ماشي يا جميل :)
تحديث 3:التهنئة الثامنة
مبرووووووووووك يا بشمهندس نور ع نجاحك
انا محبتش اعمل نشرة جديدة علشان متبقاش نشرتين ورا بعض والنكت السخيفة هتكتر هيا والقصص
فعملت تحديثات علشان اديكوا هدنة ومتزهقوش شفتوا انا طيبة ازاي
كل دي تهاني يا رب كتر الافراح يا رب حاجة صعب علشان الحرب اللي مش راضية
تخلص دي ملناش دعوة دلوقتي بيها خلينا ف اللي احنا فيه
.
ننتقل للجزء التاني
القصة الفاشلة : استحملوا وامركم لله ممكن تعدوها مش هزغل بس قولولي انكوا نطوها
استيقظت سعيدة ع غير العادة تسترجع ذكريات يومها الماضي واخذت تتحدث مع نفسها : قالها لي اخيرا قالها وهو ينظر في عيني ويمسك يدي لقد قالها لي امام العالم كله قالها بقوة وحنان ودفء قال : بحبك بحبك هل تقبلينني ...وضعت يدي ع فمه لماذا لا اعلم هل لاني اخاف من المستقبل انا دائما هكذا اضع اسوا شئ امامي ولكنه قال لي اعرف ما يدور بداخلك لكن هل تقبلينني زوجا لكي اشتدت خوفي ثانية فانا لم اعتد ع الدنيا سوى ان تاتيني بكل ما هوسئ تعطيني اسوا ما لديها
ولكنه قبل يدي وقالها ثانية لم اتردد لحظة ثانية وقلت له نعم ارضى بذلك
يرن الهاتف ليقطع احلامها وافكارها تنظر اليه وتجيب
الو الو ماذا حدث وكيف ....... انقطع الخط
بصراحة القصة دي اكيد من نسيج كتر الافلام العربية والهندي اللي كنت بتفرج عليها سا عة الامتحانات معرفش هندي
.
ننتقل للجزء التالت
النكتة السخيفة :
مرة سمكة غبية غرقت
مرة واحد رخم قابل واحد رخم قاله منيجي نرخم ع حد قاله لا قاله ليه قاله رخامة
بصراحة انا بحب النكتة الرخمة اللي فوق واللي تحت بتغظني
ايه البوست ده من تاثير الفرح بتاع النهاردة - اكيد مش بتاع بابا وماما-
اللي معجبتوش القصة يقولي انه نطها ماشي - يا عيني انا اتهبلت اوي - ربنا يحميني لشبابي يا رب
البوست طويل اوي مش مشكلة يا جماعة هيا نشرة كل 3 اربع اسابيع يعني لما يبقى في مناسبة خلاص بقى
ع فكرة انا فايقة اوي معرفش ليه
ملحوظة:
كتير قالولي ارتب افكاري بس انا مش عارفة ع ايه
اذا كانت حاجة ملخبطة فده علشان كنت بشرح الموضوع بس مش اكتر بس برضه قولولي ملخبطة في ايه يمكن مكنش فهمت كويس بعض التعليقات ماشي الكلام :)
سلام

16 comments:

مـحـمـد مـفـيـد said...

يا باش معندسه روحي نامي انتي كنتي دخلتي اعلام بدل الهندسه دمك خفيف اوي
احييكي علي البوست الجميل ده

marktwain said...

أولا مبروك الكلية

ثانيا حلو اوى الموضوع ده بيفكرني ببرنامج التهانهي اللي بيجي في الراديو اللى هو بتاع " من سوسو و توتو الى عماد و سعاد بمناسبة الزفاف السعيد "
اما القصة حاسس ان كنتى مهرتلة و انتى بتكتبيها
اما النكت البيخة بصراحة ...بيخة
سمعتي بقى النكته دى
مرة واحد اتنين تلاته
...لا دول غير التلاته التنين
هههههههههههههه
صباح البواخة

sherif gharib said...

على فكره انت دمك زى العسل واسلوبك لذيذ وبجد ممكن تكونى مذيعه هايلة بس يا ريت بلاش النكت يا باش مهندسه تحياتى

m_elsewedy said...

راديو شمعة
طب الله يخليكى عايزين لينك بث مباشر المرة الجاية عشان الواحد يتسلى بدل ما اسمع مونتكارلو
:P
يارب تبقى فايقة كدة على طوووووووووول
وكل سنة وماما وبابا طيبين

Gid-Do - جدو said...

نوران
وحايات من شم الارض وبرطع لتقولى انتى اتعشيتى اية باظبط ـ مع الوصفة والمقادير ـ ليلة كتابة التدوينة دية علشان اخلى جدة ياسمين تحضر اكلة زيها يمكن بعد ماكلها تتفك عقدى وابقى مبهج زيك ويبقالك الحلاوة مع تسجيل حقك فى الاختراع

Ahmed Shokeir said...

امسكي الخشب يانوران بوستين ورا بعض اخبارهم حلوة كده
واحد نجاح وكليات قمة
والتاني نشرة اخبار ولا الجزيرة في شبابها وفيها فرح باين او اتنين واعياد زواج

وقصة ع الماشي كده نوع جديد من انواع القصص ، بيكون اقصر من القصة القصيرة

بس النكتة التانية أجمل

Nouran said...

محمد مفيد:
تعرف والله النوم هو اللي عامل فيا كده خلاني اتهبلت تعرف انا كتبه اعلام الرغبة ال7 لو جاتلي مكنتش هزعل :)

مارك نوين :
الله يبارك فيك يا بشمهندس
وشكرا شوفت التهاني لو عندك تهنئة قولي وانا هعكمل معاك الواجب هكتبها اول واحدة ف التهاني هقول من البشهندس مارك نوين الى اي حد انت عايزه
القصة مكتوبة بالظبط ف يوم كنت بذاكر فيزيا لحد ما طلع عيني وكتبتها ف الاجندة عايزها تبقى قصة كويسة تخيل انت بقى فيزياء
اما النكت فانا قلت من الاول انها سخيفة يعني اانا عملت اللي عليا وده الجديد ف الموضوع بدل ما تضحك تبقى نكته رخمة -عارف دي نكتتي المفضلة كده انت حرقت نكتة النشرة الجايةولا يهمك هجيب واحدة ارخم - ايه رايك

شريف:
شكرا جدا لو فشلت ف الهندسة هاخش ف الاذاعة بس والله لو قدر اشيل النكت كنت شيلتها بس انا قلت عايزين حاجة غريبة قلت احط نكت سخيفة هابقى اقولكوا نكت كويسة المرة اللي بعد الجاية علشان انا قولت لتوين اني هجيبله نكته رخمة اوي ماشي

ابيتاف:
ضحكتك اوي كده شوفتي فواقاني رهيب ازاي اسئلي رضوى وهيا تقولك حاجة صعبة شكلك بتحبي النط بس هيا من فيلم هندي واثار الفيزيا لعبكة يعني
لو عايزة تعملي تهنئة انا ف الخدمة يا استاذة السنة الجاية لما تيجيلك المرتبه هفصلك نشرة مخصوص ماشي يا جميل

ابراهيم:
انت بتردهالي ولا ايه يا دكتور بس انا مش فاهمه انظم افكاري في ايه بالظبط نرجو الافادة اكتب التعليق تاني ماشي مش هتخسر حاجة
ايه ده انت بتشتغل بلوشي كده يعني بتدرب وبس الله يكون ف عون المرضى لسه بتجرب فيهم :)- والله انا بهزر- ربنا معاك يا دكتور

سويدي باشا:
حمدلله ع السلامة يا مان بس ايه راديو شمعة ده تصدق فكرة اعمل ع موجه 100ز9 وهتكسح نجوم اف ام واحطها لينك ع كل المدونات وهقول انك صاحب الفكرة ماشي
وانت طيب عقبالك :)

جدو العزيز:
والله يا جدو انا كلت من البوفيه اللي كان ف الفندق ف الفرح وكانت حجات غريبة شوية بس اثارها مظهرتش غير عليا انا بس بقيت العائلة والاسرة سليمين تماما ممكن ابقى اسئل الشيف الفرح الجاي يا جدو ونخلي الاختراع للشيف ماشي الكلام :)

عمو احمد شقير
انا مسكته والله امسكوا انتوا كمان انا ل
قيت نفسي كاتبه تلات مواضيع حرب واسرائيل قلت اغير بقى مود البلوج
بس ايه راي حضرتك ف النشرة الرهيبة دي نشرة جامدة جدا والقصة نقدر نسميها قصص ما بعد الفيزياء ولازم القصة تبقى ناقصة وملهاش حل
النكته الاتانية دي حكاية اصلا نكتة فعلا جامدة كويس انها عجبت حضرتك :)

عازفة الكمان said...

يا عيني كده اتهبلتي رسمي صح
بس بجد حلو بس منعكش شويه و عايز شويه ترتيب ..آه علي فكره انا حاولت اكلمك و مش عارفه انتي فين يا بنتي

el_assel said...

هاي نوران
انت لذيذة قوي بس انا شايف ان انتي تنامي شوية وتتغطي قبل ماتنامي علشان البرد تقريبا بياثر عليكي
مع تمنياتي ان تكوني اكبر مهندسة في مبني الاذاعة
مع تحيـــــــــاتي

voice of love said...

اعملى تحديث فى الاذاعة وتهنئة علشان عيد ميلادى وتبقى كده فل

كلبوزة لكن سمباتيك said...

عسولة يا نوران
انا حقدم في الاذاعة دي علشان اشتغل مذيعة اقول وشششش بعد الارسال
تعالي شاركيني الحلم بان يكون لنا موقف

Nouran said...

رشا:
حرام عليكي انا اتهبلت كله من تاثير الاكل اللي اخترناه انا وانت مش مشكله انت برضه حبيبتي وبنت عمي :)
اكيد ف الشارع ما انت عارفاني

كريم :
اهلا بيك يا فندم عندي شرفتني
بس المشكله ان الدنيا حر جدا يعني احنا مش ف الشتا احنا ف اغسطس عارف يعني ايه اغسطس :)
وع فكرة انا مش بصحى من النوم وذي ما اعتقد انه كان تاثير الاكل بس شكرا ع الوصفة بتاعتك
ويا رب اكون اكبر بشمهندسة ف المبنى اللي انا هبنيه -الموضوع مش راكب صح-
وشرفتني مرة تانية :)

دولي:
ايه رايك ف التحديث انت تؤمر يا جميل وكل سنة وانت طيبة وعقبال سنين تانية كتير -لا تحصوا فيحصي الله عليكم- ايه رايك :)

ابيتاف:
والله انا قلت كده لازم نهبل علشان الحاجة تتطلع كويسة :)
بس حلوة فكرة الجرنال والقناه دي بس راحواااا كلهم ليه ؟؟
وحلو الشعار ده انا موافقة عليه

كلبوزة لكن سمباتيك:
متقلقيش هتنجحي معاكي واسطة جامدة مدونتك الجميلة وصاحبة الاذاعة مش كفايه كده ولا نجيبلك باقي المدونين وسايط وانتي هتبقى اكبر المذيعين عندي زي هالة سرحان ف روتانا ماشي الكلام :)

ام المريلة الكحلي:
ايه الغيبة الطويلة دي اشرقت الانوار مرة اخرى يا جميل -بس الغيبة مكنتش طويلة اوي صح -
اي تهنئة عايواها هذعهالك بس النشرة الجاية كده لحسن نتحسد من كتر التهاني الاذاعة تفلس وتقفل وحد غيري ياخد التهاني
والعيد القومي بتاع مدينة بومبا اللي هتبنيها لازم نخططله من دلوقتي علشان تبقى نشرة جامدة قوليلي يوم ايه وهبدا العمل ع النشرة بس بصي عهايزة امضي معاك العقد حصريا ويا ريت ابني شوية من المدينة وناخد الاخوة المدونين المهندسين نبني كلنا وبعدين بعد ما نخلص بنا والمدينة بقت حلوة نجيب بقية المدونين كل واحد يشتغل ف تخصصه بعيد عن الكوسة كل واحد بشطارته :)
بس كل ده بعد اذن حضرتك -طبعا الكاف تحتيها كسرة علشان التانيث- علشان الامر امرك والشورة شورتك دي مدينتك
وشكرا ع الكلام الحلو ف حقي ده :)

NoOR said...

شكرا يا جميل ومبروك علي بدايه بث راديو شمعه 100,909 ........ة

Nouran said...

البشمهندس نور:
اي خدمة يا بشمهندس و ان شاء الله لما تتخرج تيجي تشتغل ف الاذاعة مهندس اي حاجة تحبها ان شالله مذيع احنا ف الخدمة :)

مداح القمر said...

تشششششششششششت تووت...سورى اصلى غيرت الاذاعه:))))
البوست دا فيه افكار كتير ونفسى اعلق على كل حرف فيه..لكن بالنسبه للقصه دى فعلا حقيقه..زمان كنت بحلم وانا نايم..ولما كبرت بحلم وانا صاحى بس فجأه اسمع...ياحمد تعلالى المطبخ ثوانى...يااحمد فيه ناس عايزينك..يااحمد يلا نكمل مذاكره الامتحان بكره وافوق من الحلم...خايف معرفش احلم لا صاحى ولا نايم..بس تعرفى ايه الاهم..انك تعيشى اللحظه..مش بس لما تفتكريها تقولى ياه دى كانت حلوه وانا مش حاسه...وافكارك لذيذه جدا جدا جدا وبجد ضحكت من قلبى...والاجمل الصوره الكتكوته دى

Nouran said...

دكتور احمد :
ايه غيرت الاذاعة وجبت نجوم اف ام ولا بتجيب100.909 الاذاعة بتاعتي اعترف :)
بجد ف افكار كويسة ده انا فرحت جداااا كده والله ايه ضحكت ع النكت ولا ايه يا دكتور مش مشكلة المهم تضحك ومن قلبك شوفت الصورة جميلةوالفيلم بتاعها جميل جدا برضه