Thursday, September 07, 2006

قتلة الابداع

الموضوع ده كان نفسي اكتب عليه من زمااان بس لما قريت مدونة1/2فائقات ع فكرة
.
مدونة حلوة جداا بتكلم عن التعليم الفكرة جت ف راسي تاني وقلت لازم اكتب الموضوع
ده احترت اسميهم قتالين قتلة ولا سفاحين مواهب ولا مدرسين كل شين كان بس انا مش
قصدي ع مدرسين بتوع الدروس ملناش دعوة بيهم دلوقتي انا اقصد حاجة تانية من وانا ف كي جي 1 لحد ثانوية عامة ملقتش غير 5مدرسين هما اللي اثروا فيا وبجد هما اللي
ينطبق عليهم انهم مدرسين بجد شجعونا وينمو مواهبنا ويقوي شخصيتنا بس غير كده
كل المدرسين حفيظة معرفش ليه كنت عزمت اني اكتب الموضوع يمكن لما طلعت كراسة الرسم بتاعتي وبصراحة عندي عقدة من الرسم بسبب المدرسين يعني انا كنت بحب
ارسم جدا ووالله رسمي كان حلو لو اهتميت بي كان هيبقى حلو اوي بس اللي حصل بقى اول صدمة ف رابعة ابتدائي ف حصة احتياطي كانت عندنا مدرسة رسم رسمت
ف الكراسة بتاعتي شجرة برتقال كبيرة كان شكلها حلوة اوي ولونتها لسة فاكرة شكل ا
لشجرة ليها فروع كتيرة وورق اخضر والبرتقال نازل منها وبسذاجة مني رحت اقولها
ايه راي حضرتك يا ميس بصتلي وقالتلي ايه القرف ده طبعا مش هقولكوا عملت ايه
تنحت اتصدمت فعلا ومعرفتش اتكلم خاالص تخيل انت فرحان بحاجة وجه حد كبير
يقولك ايه االقرف ده حتى كانت تقولي حلوة بس ممكن تبقى احلى تقولي ارسمها ازاي
مش تقولي كدهواللي ضايقني اكتر ان الرسمة دي كانت معلمهالي مدرسة بحبها جداا دي
اول صدمه تاني صدمة مع الرسم برضه كان مووضوع عن طيارات ضاحكة نرسم
طيارات وليها وشوش بتضحك المهم كانت حلوة وبصراحة المدرسة ابدت اعجايبها
وقالتلي روحي لونيها ويا رتني رحت ومرجعتش علشان محدش يعرف ايه اللي حصل
محددتش الرسمة خت قصايد رائعة علشان مححددتش بالقلم الاسود فعلا حاجة تقرف
مش عارفة عاملين حصص الرسم دي ليه لا وكل مدرسين الرسم دول معقدين فعلا هما
ومدرسين الموسيقى لا والعقدة االكبر مدرسين التربية الرياضية يوقفونا ف الحوش بتاع
المدرسة ف اكتر حته فيها شمس ويبداو التعذيب ايه لزمتها الحصص دي ادام م ش
بتفدنا ف حاجة كلها تهذي من المدرس اللي واقف بصراحة مقبلتش مدرس رسم او
موسيقى او تربية رياضية كويس وبيحب يعمل حاجة كويسة لتلاميذة المفروض
الحصص دي تتعمل علشان نتطلع طاقة الابداع والموهبة الكامنة جوانا بس من ايه ده
محدش يظلم الحكومة الكلام ده من المدرسين نفسهم وانا كل سنة انتبه اول حصة اقول
هيبقى مدرس محترم وطبعا عارفين اللي بيحصل باصاب بخيبة امل ثقيلة
لا اقولكوا ع حاجة تاني كنت ف اعدادي مشتركة ف جماعة الصحافة المهم كانت ايام
الشهيدات الفلسطينيات التلاتة فاكرينهم المهم المدرسة طلبت مني فكرة المهم جيت
تاني يوم قولتلها ع افكاري كانت واحدة فيهم نرسم قلب كير نطلع منه تلات قلوب صغيرة او تلات رصاصات طالعة من مسدس او تلات وردات المهم اعجبت جدا بيهم
م خير وبركة اصلا كنا بنحب المدرسة دي جه دور استاذ الخط بتاعنا اللي هيكتب ويرسم
بنوريه الفكرة قالي مين اللي جايبها انا فرحانة بنفسي جداا انا يا مستر ايه تلات
رصاصات دي مش حلوة انا ماسكة نفسي بالعافية المستر يكمل ويقول احنا نرسم تلاته
ديناميت وخارج منهم فتيل ومش عارف ايه طبعا انا ف نفسي طب يشكر يقول حاجة
يعمل حاجة لاخرته بس لا حياة لمن مش عارفة ايه اللي حصله
المهم اللي انا عايزة اوصلهلكم من الرغي ده كله ان المدرسين مش بقى يهمهم الموهبة
اللي عند التلميذ والكلام ده المفروض يتعمل من كي جي يشوفوا ايهالمولهب بتاعة الاطال ويحصل اتصال بينهم وبين اولياء الامور طبعا بحلم مش هيحصل كده ف مصر
مع ان بصراحة ف مدرسين كويسين بس يتعدوا ع الصوابع يعني ف كي جي كانت مدرسة الماث بتاعتي لما لقيتني بحبه اوي كانت بتديني واجب اضافي كنت بفرح اوي
بيه
ف ابتدائي مدرسة العربي بتاعتنا كنا بنحبها جدا كانت بتكلمنا ع اساس ان احنا كباار
وانسات بنفهم وكانت بتخلي عندنا روح المنافسة
ف اعدادي مدرس العربي برضه كنا بنحبه اوي وكان بيهتم بالتعبير اوي ويناقشنا ف
مواضيع كتيرة
ف ثانوي مدرس الكيميا برضه كان بيحببنا ف الكيميا كان بيحببنا ف حلمنا سواء اللي عايزة تكون دكتورة او مهندسة بجد مدرس صعب نلاقي زيه ف البلد دي
اه حاجة اخيرة معظم الاطفال بيبقوا عايزين يطلعوا مدرسين لما تسالهم ليه هيقولولك
علشان نضرب اللي معملوش الواجب
والحمد لله البوست خلص :)

16 comments:

zakawi said...

لما يكون راتب المدرس ضعيف ، من الطبيعي أن مجهوده في التعليم يكون متواضع

admelmasry said...

اه الحمد لله انه خلص
ايه ده
ايه الرغي ده
تقعدي تحكي لما كنت في حضانه وحجات كده


واحنا مالنا ياعني بتحكي كل ده ليه
هه

مش عارف انا ايه الرغي ده

بس تعرفي
هههههههههههه
دمك خفيف

هههههههههه
اه والله
ايه صدقتي


ده انا كنت بارخم

تحياتي

noran said...

اولا البوست جميل جدا
والموضوع خطير جدا انا برده كنت بلاقي اعتراضات رهيبه علي رسمي من اول اولي ابتدائي وكنت باخد اسئله اضافيه في الرياضه الظاهر اننا متشابهين في حاجات كتير مش الاسم بس
وبالنسبة لموضوع ان دخل المدرس هو السبب طيب انا كنت في معرض جماعي لناس كلهم فوق ال18 وكنت باتعامل علي اني في سنهم مع اني كنت في تانيه اعدادي كان اول مره الاقي ناس محترمين وبتقدر المواهب ومش بتبص للسن اللي افتتح المعرض ده سكرتير المحافظ طبعا كان المفروض المحافظ بس هو كنسل
وسكرتير المحافظ اكيد دخلة كبير اول حاجه قالهالي لما شاف رسمي وكنت راسمه بالفحم بورتريهات لوشوش مصرية اوي وكنت لسه يدوب بدات اتقن رسم البورتريه ورسمته بالفحم وده اصعب كنت فخوره جدا قالي ارسمي علي قد سنك ما تتخيليش اتغظت اد ايه ارسم ميكي وبطوط يعني ما خلاص كنت بارسهم في ابتدائي ودلوقتي في حاجات تانية هي اللي بتلفت انتباهي
اللي عايزه اوصله هو ان الموضوع بقي قي تفكيرنا سواء المدرس او الناس العادية فاكرين انهم بيتعاملو مع كائنات ما عندهاش عقل
وتخيلي ان الرسامين التانين البسطا اللي معايا في المعرض لما قولتلهم قال ايه كانوا متغاظين زي بالظبط مع انهم مش لاقين ياكلوا الموضوع مش بالفلوس خالص مع انها عامل طبعا بس زي ما قولتي اي حد صغير عايز يبقي مدرس علشان يدرب اللي مش بيذاكروا اكيد المدرسين بتوعك كانوا كده هما كمان
اسفه جدا يانوران علي التطويل ده بس الموضوع مهم

Anonymous said...

شئ مقرف جدا ... كل ما تيجى تتكلم عن أى مشكلة فى اى حاجة يقولك الفلوس والناس مش لاقية تاكل وبتاع ، وتطلع الحلول العبقرية بتاعة رفع أجر المدرس ونفخ بطن المدرسة والعناية باى حتة فى المدرس الا عقله .. والناس اللى بتقولك ان التعليم بايظ عشان المدرس مش لاقى فلوس عشان يشرب سجاير ويعمل دماغ عشان يعرف يشرح فى رأيى ناس مبتفهمش حاجة بدليل انى كنت فى مدرسة خاصة والمدرسين كانت رواتبهم عالية وتكفيهم ورغم كدة كان فى مدرسين كتير زى الحمير وحافظين المناهج فى الكليات الزبالة اللى جايين منها ..
يا فرحتى بمدرس مرتبه عالى بس عقله واطى ... الشئ المقرف بجد أن يصبح الهدف من التعليم كله هو الفلوس والشغل والاكل والشرب يعنى مش كفاية المدرس بيتحجج بالفلوس ده كمان الطلبة بيتعلموا عشان الفلوس ودى طبعا الحاجة الوحيدة اللى اهاليهم علموهم قيمتها !!
وحاجة كدة تحسسك ان احنا عايشيين فى مزرعة فراخ كل اللى عايشين فيها بيدوروا على العلف والمية !

hummar said...

هلا بشمعتنا المنوره طبعا انتي لقتيهافرصه خلصتي دراسه وتقولي المدرسين وحشين كنتي تقدري تقولي كده قبل كده هاهاهاهاها
زمان كان عندنا مدرسين محترمين في البدايه موضوع الدروس الخصوصيه كان المدرس يرفض يدي درس للطالب اللي عنده في الفصل وكان السبب انه بيشرح في الفصل زي الدرس والطالب اللي مش هايفهم في الحصه من المدرس يشوفله مدرس تاني يمكن يقدر يفهمه. اللي عايز اقوله ان الموضوع مالوش دعوه بالمرتب ولكن اتقان الشئ والتفاني فيه شئ اصبحنا نفتقده في كل حاجه يعني المصانع بالرغم من وجود قسم رقابه الجوده والايزو وحاجات غريبه كده الا انك تلاقي الانتاج فيه عيوب ليه ماعرفش أأأأأأأأأسف انا طبعا عارف احنا عندنا الاهمال في كل شئ واصبح الواحد غير فخور بانتاجنا وهذا كله يرجع للسبب الرئيسي هو المدرسه وقتل الابداع واعتقد اننا نحتاج الى نقله نوعيه في اسلوب التعليم الشاكوش

Dr. Tantawy said...

باختصار .. في وجود ميت قاتل ابداعي من اللي بتقولي عليهم :) الواحد يقدر يكون نفسه .. لأني مؤمن بأن الموهبه ممكن تتصقل .. لكن مش ممكن ابدا تتبني من الصفر .. لو كانوا الناس دي كلها ضدك في تطوير موهبتك .. يبقى مش هتقدري تنميها جايز .. لكن هتفضل موجوده عندك و تقدري في اي وقت تبنيها من اول و جديد

محمود عزت said...

أكيد كنتي في أرومان العجوزة بنات
و اللي بيديلك كميا هو محمد عزت
يلا كانت أيام
أنا كنت في معتقل الأورمان النموذجية بنين و منحرفين و ذوي إحتياجات خاصة

الله يرحم أيام أستاذ شمهمورش بتاع الألعاب
كان أحسن طبال في مصر

فيها حاجة حلوة said...

انتي عارفة واله كل اما افتكر ايام المدرسة احمد ربنا اني لم اتجه للمخدرات واذهب للضياع المحتوم الذي ينتظر شباب المدارس فهناك الانحراف بكل انواعه.هذا بالنسبة للمداري من الناحية التربوية والادارية
اما بالنسبة للمدارس من الناحية التعليمية غهي صاحبة اداء ضعيف وذلك لان كل العناضر التي تقوم عليها المدرسة ضعيفة .فالمدرس غير مؤهل تربويا ولا علميا ولا لوم عليه لانه تعلم بنفس الطريقة التلقين .بالنسبة لحياته فهو صاحب مرتب ضعيييييييف جدا.لا يكفي لقمة عيشه فكيف ستكون حالته قرفان ومضايق وعايز فلوس يعمل ايه.كل ده بيأثر علي اداؤه داحل الفصل.فهو لكثرة مشاكله لم يعد بداخله مكان ليستمع لمشكلة طالب فاذا كان الاهالي انفسهم قد تركوا اولادهم يصلوا لهذه الدرجة المتدنية فماذا سيفعل هو هل سيتحمل همه وهم غيره.فالمدرس هو احد اغراد المجتمع فهو مطحون شأنه شأن الاخرين الكل يلهث الي اين لا يعلم ولا اعلم انا ولكن كل ما انا متأكد منه ان النهاية لن تكون سعيدة

أجدع واحد في الشارع said...

التعليم مفيش احسن من كده

hummar said...

على فكره يامداح القمر بما ان فيه ناس ارخم منك حبيت اقولك ان نوران الي كاتبه التعليق واحده تانيه غير شمعه واقرى تعليق نوران ده تشابه اسامي يامداح القمر يعني اقرى الموضوع وماتقراش على الهامش زي كل الشباب مابيعملوا

الشاكــــوش

sherif gharib said...

انتى مش ممكن كل مره بتحدفى الواحد لكتير قوى ورا
اعتقد ان ما فيش حد فينا ما رجعش بذاكرته لورا و افتكر كل اللى انتى قولتيه ده
بس هوة ده التعليم فى بلدنا لازم نلتزم بالمقرر و بس و طظ فى ابداع او اى ابتكار
انشاء الله عايزين واحد على الكليه لما تجربيها
تحياتى

DoOoOoOdY said...

اه يا نورا ان كرهت الرسم والموسيقى والرياضه من المدرسه الحمد لله المدرسين بيعرفوا ازاى يقضوا على المواهب
موضوع حلو اوى
ويا مداح القمر مش نوران هى اللى كتبه الكومينت دى واحده تانيه غيرها

Nouran said...

zakawi:
انت مدرس ولا ايه لأ طبعا يعني علشان الدكتور مرتبه وحش يقتل المريض او يهمل ف علاجه لازم الواحد يعمل الواجب اللي عليه ةيعمل اللي يرضي ضميره طب ما المدرسين ما شاء الله شغالين دروس خصوصية وبيبقى دخلهم عشر اضعاف مرتبهم

ادم:
الحمد لله انا رغاية حرام عليك تقدر تقول عقد الطفولة طلعت يعني ههههه
لا تصدق اجي اخد دروس عندك ف الرخامة بجد هههههه بس لو دخلنا مسابقة رخامة انا اللي هكسب :)

احمد باشا:
خيرها ف غيرها مش مشكلة يا سيدي
تصدق ممكن تكون هي دي المشكلة اجيبلهم صابون ع حسابي طب ما انا كنت ف مدرسة خاصة لحد اعدادي وف ثانوي غيرت مساري تعرف لقيتهم اتلاتنين زي بعض وممكن تكون الحكومة احسن كمان مش بالفلوس الموضوع بالضمير
تصدق لازم ممضوع التوعية ده الدراسة بتاعتهم مش كفاية
لازم نطلع مدرسين علشان نضرب العيال حاجة صعبة فعلا

نوران:
تصدقي بجد انا كرهت الرسم فعلا مبقتش ارسم حاجة غير مع نفسي بس بس عارفة كويس انك معملتيش زي ودخلتي معرض وبقيتي ترسمي وبجد رسوماتك حلوة
عارفة انا لو منك هعمل ايه ف سكرتير المحافظ ؟؟
ارسمه واوريه نفسه :)
صحيح يعني ايه ارسمي ع قد سنك ايه الغباء ده بجد حاجة تقرف
انا معاكي ان الفلوس عامل بس يعني ايه مش لازم يشتغل كويس الحاجات دي هيتحاسبوا عليها يا جماعة
عارفة المرة اللي اضربت فيها كان ليه من غير ما تضحكي ؟؟
من مدرس الخط الترم التاني علشان مكنتش عاملة الةاجب بتاع الترم الاولاني والله بجد مش بهزر شفتي الجمال مدرس خط :)
لا يا بنتي اسف ع ايه اصله بجد موضوع مهم وكان غايظني

ايمن:
انا معاك مش كل حاجة نتكلم فيها عن الفلوس لا ويقولولك لما يترفع اجره مش هيدي دروس وهيشرح كويس ف الفصل الموضوع موضوع ضمير وذمة بجد وانا واالله ف مدرسة خاصة ونفس الكلام اللي ف الحكومة زيه ف الخاصه وعارف معندهمش موهبة توصيل المعلومة
عارف مفيش حد بيعرف يدرس غير قلائل
لا بجد تشبيه رائع بتاع الفراخ ده

ابراهيم:
كاه فاشل تعرف السعودية تعليمها ارحم انا كنت هناك ف كي جي وتانية ابتدائي بس مدارس مصري لغات ولما جيت مصر لقيت ان هناك ارحم فعلا
عايزني اقولك حاجة ع هندسة من دلوقتي انا جاهزة بس كمان 3 اسابيع زي ما قولت جاي تقولي بعد ايه كله رااااح يا عم صلي ع النبي -عليه الصلاة والسلام- عارف انا بخلي الموهبة والابداع دول لنفسي ومش بطلعها بره

الشاكوش بيه:
انا مصدقت خلصت بجد بس مكنش خوف ممكن كنت اكتب بس انا كنت ثانوية عامة مش فاضيه ههههههههه
لا الموضوع مش مرتبات زي ما انا قلت موضوع زمة وضمير صح صح صح براافو احنا عايزين نغير كل المدرسين ونجيب تانين عندهم رساله ووعي

زنجولا:
بجد بس بعد ايه والله انا حاسه ان الرسم ده جابلي عقدة يعني مدرسين مش عاجبهم ومجموع ينقصني ف الاعدادية 7 درجات حاجة رخمة فعلا

ميدو:
وعليكم السلام
ايه ده احنا كله ف التمام واللجنه بتاعة الوزارة تيجي تلاقي كله تمام تمام يا فندم

محمود عزت:
ايه ده انت كنت بتاخد عنده انت كمان ولا ايه ؟؟ :)
انا سمعت عن الاورمان بتاعتكوا دي ده فيها شئ لا يسدقه عقل ههههه

البشمهندس المصري:
بجد وصل الانحراف لحد مخدرات انا اخري كان سجاير - مش انا اللي سمعته-ده ايه التشاؤم ده يا هندزة طب خلي النهاية سعيدة زي الافلام العربي

ابن الشارع:
انت لقيت نفسك خلاص الحمد لله
مفيش احسن من كده كله تمام يا فندم :)

احمد باشا كلاكيت تاني مرة:
بص انا نوران بالصورة نوران التانية من غير صورة ولو قصدك ع التعليق الي عندك مع دودي فانا كسلت اكتب اليوسر نيم والباسورد ههههه

البشمهندس محمد:
الحق يقال انا استفت من بعض المدرسين بس مش كلهم انا الرسمة اللي متعجبنيش بحطها ف الدرج واعيك اصل انا عيوطه ه لا بجد انا بكره المدرسة دي اوي ولو شفتها مش عارفة هعمل فيها ايه

الشاكوش:
شكرا ع الرد هههههه بس هو فيه سوء تفاهم ع ما اظن

شريف غريب:
والله انا مش بحدف حد
اه المقرر كله كوم والمقرر كوم تاني خالص المنهج وتقسيمة المنهج
متقلقش قريب جدا بس لما اجربها

دودي:
فاكرة ميس رانيا بتاعة الرسم ولا سوسن وايناس بتوع الموسيقى وميس الفت العاب يا نهار ابيض ده انا كرهت نفسي
ايه رايك عجبك :)
يا بنتي دول بياخدوا دروس ف القضاء ع المواهب انت معرفتيش

مفلس افندى الرايق said...

تربيه ايه وتعليم قال

دى مدرسين وكسه وجيل يخيب الامال

تيجى تقول للعيل اسمك ايه

يقول معلشى يا استاذ قول تانى السؤال

مادام البلد اتباعت

كل شئ خلاص عن خطى الحق ضاع ومال

اطفال واجيال طالعه

وتشوف المنظر والمستوى
يصعب عليك الحال

مـحـمـد مـفـيـد said...

قتله الابداع من البدايه تعبيرك رائع لكن المشكله تكمن في النظام ككل من البدايه الي النهايه
احييكي علي البوست الرائع والتواصل معي

Nouran said...

مفلس افندي الرايق:
حلو اوي الاسم ده تشرفنا
يعني انت رايك ان العيال هما اللي اغبيه لا يا عم المدرسين هما اللي بيخلوهم كده تصدق لو بعنا المدارس يمكن الحال ينصلح

محمد مفيد:
هي مشكلة النظام ممكن والمناهج هي المشكلة