Saturday, September 16, 2006

ذكريات سنين فاتت

اكتب بوست عدل بقى قبل الدراسة يا هو عندي اجازة يوم السبت هيه هيه هحكيلكوا عن اول يوم ده طبعا ان شاء الله هيبقى يوم مميز وبوست حلو ويا رب يعجبني اليوم ويعجبكوا البوست وهكتب عن حفل الاستهبال بس برضه مع بوست اول يوم
المهم بما ان الدراسة جت خلاص فلازم اوضب المكتب طبعا انا بوضبه مرتين مرة بعد الدراسة من الكتب والكشاكيل والحجات دي ومرة قبل الدراسة من الجرايد والمجلات والحجات دي وكل سنة احط الشهادات بعد الدراسة واشيلها ف مكان تاني قبل الدراسة ذكاء بقى نعمل ايه
المهم برضه افضل اتفرج ع الالبومات معرفش تقاليد غريبة فعلا بس المرة دي بقى شفت صورة شياكة ليا صورة اول يوم مدرسة كي جي وان يا سلام كنت فرحانة اوي اول يوم ف كي جي وان ده والله انا لسه فاكر اليوم ده انا حتى كنت فرحانة اكتر من دلوقتي شفتوا مقارنة بين فرحة كي جي وفرحة الكلية
اصل فرحة اليونيفورم والكوتشي اللي بينور والشراب اللي بكرانيش والشنطة الباربي فرحة بجد متقوليش بقى الكلية كل يوم هفكر البس ايه ع كوتشي شكله ايه والشنطة شكلها ايه وفوق كل ده الكوتش مش بينور شفتوا حاجة غريبة فعلا
المهم نخش ف الاحداث اه بس قبل كده والنبي عايزة اقول حاجة
بوبا دخل المدرسة والحمدلله مستوى ذكاؤة قل جداا اخته الصغيرة جنبه بيقولي نورانا مين دي الواد جاله عته من كي جي وان امال لما يخش جوه هيعمل ايه لا وفرحان بالكوتشي بتاعه ومش بينور يفرح بيه ليه طب بصوا يوم الاحد اللي فات لقيته ساحبني من ايدي وبيقولي تعالي افرجك لبس المدرسة والكوتشي والشنطة فضل يروح هنا وهنا يا سلام يجيبلي الشنطة بتاعته بات مان مالها باربي والكوتشي بتاعة اسود معرفش ماجابوش بمبي ليه فرحان بقى وهروحالمدرسة ساذج صح بس بصراحة الولد راح ومعيطش طلع راجل بجد -اصل مدرسته دخلت الكي جي بدري علشان يتعودوا راح يوم التلات-وصورته باليونيفورم هتشوفوه صورته قبل المدرسة وبعديها يا عيني الولد بقى بينام بدري بصراحة المدرسة رحمتنا منه كان وش يالله مش موضوعنا
.
المهم بصوا بقى هكتبلكوا المسلسل بتاعي مع المدرسة اول سنة من كل مرحلة
كي جي وان:
قلتلكوا عليها بقى مش هنرغي كتير اه نسيت اقولكوا كان بيبقى معايا لنش بوك بمبى -اصلي بنت بابا وماما الكبيرة فكانوا مدلعني-
اولى ابتدائي:
البنت كبرت والله دخلت ابتدائي اول يوم لابسة اليونيفورم شياكة والله وفرحانة كبرت يا عالم يا سلام واول حصة انجليزي كانت حصة حلوة ويوم حلو طبعا مقلكوش ع اللي عملته تاني يوم يالله استر ع نفسي
اولى اعدادي:
البنت كبرت يا سلام بقت ف اعدادي لابسة اليونيفورم ورايحة المدرسة مبسوطة جدا اصلي كنت طالعة الاولى ف خامسة ابتدائي اول حصة تسمع الاسطوانة المشروخة انتوا خلاص كبرتوا انسوا بقى شغل ابتدائي ده - واالله شغل ابتدائي كان انظف- خلاص هستر ع مدرستي القديمة
اولى ثانوي:
مقلكوش عليه بقى كنت مستنية اليوم ده من زمان ليه بقى؟؟
كان نفسي البس الجيبة الكحلي والقميص اتلابيض بس حظي طلع نحس المدرسة اللي رحتها غيرت القميص بقى كاروهات شبه بتاع الرجاله فعلا قميص بشع اول حصة كانت عربي مدرس رخم كده نفس الاسطوانة المشروخة اعدادي غير ثانوي نفس الكلام ايه الشلل ده
بس كمان كنت متغاظة اكتر علشان رحت مدرسة مكنتش عايزة اروحها قال ايه مدرسة متفوقين يا سلام بس بصراحة المدرسة طلعت كويسة من نحية التفوق والصياعة برضوا لازم التوازن ف مجتمعنا :)
اولى معهد ااقصد اعدادي هندسة :
بصراحة معرفش اول يوم ده هيبقى شكله ازاي ربنا معايا ومعاكوا لاني هحكلكوا عليه بالتفصيل الممل
بس متوقعة اسمع الاسطوانة المشروخة بتاعة كل السنين عادي يعني بس عارفين ايه اللي هفتقدوه بجد
الكوتشي الاسود بتاع ثانوي -معرفش المديرو حاكمة علينا لازم اسود-والجيبة الكحلي والسويت شيرت بتاع الشتا كان فيه جيب حلو -طبعا انت عارفة يا دودي هههههههههه-يالله هبروزهم واعلقهم
كفاية لحسن كتبت كتير اوي
اه حمدلله ع سلامة سويدي رجع يا رجالة
مازالوا مفقودين:
ابراهيم يا بني كنت ع بلوجك وشوية لقيته اتمسح انت رحت فين ؟؟؟ ؟؟
عمو احمد شقير والله كل ما اخش عند حضرتك البلوج واقع ف الحكاوي وف نظارة شمس ايه المشكلة ؟

20 comments:

الســـاحر said...

انا بهنى نفسى انا كنت اول كومنت...والله انتى رجعتينى لايام زمان بعد ما كنت فاكر انى اتولت كدة كبير زى ما انا..وان شاء الله ربنا ينجحك السنه دى وينجح كل اللى هيقرا الرساله دى...انا كتبت قصيده جديدة وعايز رايك فيها

Nouran said...

شكلي هعيد مسابقة اول كومينت دي اللي يكتب اول كومينت تلات مرات بينزل اسمه ف النشرة اللي هتلاقيها ع شمالك
ع فكرة انا خلاص روحت سيبت التعليق وجيت لو لسه اون لاين رد عليا

الســـاحر said...

ايوة انا لسه اون لين ...معاكى

وعلى فكره انتى لو عملتى مسابقه اول كومنت انا هاخد المركز الاول دايما

ولو انا عملت مسابقه اول كومنت هتاخدى المركز الاخير

ههههههههههههههههههههه

Nouran said...

هبقى كده الاول من ورا ههههههههههه

الســـاحر said...

ههههههههههه

ممكن اقوللك على حاجه والله العظيم الصوره اللى انتى حطاها احلى صورة انا شفتها لغايه دلوقتى

والله بجد انا حاسس انى شايفك فى الصورة...الصورة بتنطق وكمان فيها برائه وطفوله جميه

Nouran said...

شكلنا هنقلبها شات يا عم خلاص تصبح ع خير بقى عندي6 كومينت ف 10 دقايق
شكرا يا سيدي بجد انا بحب االصورة بتاعتي دي ومن جهة اني عيلة فانا عيله سلااااااااااا

مداح القمر said...

ليه ما كتبتيش باستفاضه اكتر؟؟
هو فيه رسم ارضيه لما تكتبى كتير....اكتبى مش ح نزهق
اكتر حاجه عجبتنى صورتك وانتى فى كى جى...يابختكوا عندكوا يونيفورم زى السكر...اصلنا احنا الولاد كنا بنروح بالشباشب ساعات ونقعد نرفع فى البنطلون اللى كل شويه يقع
ان شاء الله اول يوم ف الكليه مش حتنسيه من حلاوته

Gid-Do - جدو said...

نوران

كل سنة وانت طيبة بمناسبة رمضان بتمنى ليكى ولاسرتك احلى الامانى ودائما بالتوفيق فى حياتك ـ المدونة عند احمد شقير واقعة زى مانت بتقولى وابراهيم شكلها معملش اب لود او مسحها

إنسان || Human said...

جميل جدا إن إحنا نفتكر حاجات عدت من سنين.........لكن الجمله اللي بتتكرر في كل المراحل حتحسيها جواكي من غير ما حد يقولهالك ..........فعلا الكليه غير

Gbalawy said...

ايام وبنعشها

تمنياتى بعام دراسى ناجح ان شاء الله
ورمضان كريم


تحياتى

DoOoOoOdY said...

عارفين يا جماعه الماساه اللى نوران حكيت عنها انا كنت مشركاها فيها كلها وبالذات الثانوى وهدى عرفه والكوتشى الاسود والسويتشرت بتاع الموبيلات والحصص الرخمه؟وباتمان وعادل زكى وسقراط يااااااااااه حاجات كتير. بوست جامد يانور

admelmasry said...

حلوة قوي الحكايات دي
رجعتني لايام زمااااااااااان

ايام العشرينات كده لما كنت لسه شباب

فيها حاجة حلوة said...

بصي يا نوران بكره ان شاء الله هاتروحي الكلية هاتدخلي من الباب و سيطلب منك الكشف عن هويتك من خلال بطاقة الترشيح وستدخلي وعلي يمينك مارينا ثم تتحهي لمكان ستعرفي بعد ذلك ان اسمه الجبلاية ستجدي مندوبين الاسر وخاصة اسرة المنار ممسكين بالجداول وتفسيم المجموعات فكما اغتقد ستكوني مجموعة (ه) وستذهبي لحضور اول محاضرة وستندهشي من ان اول يوم سيدخل الدكتور ليشرح وكأنه في نصف العام وستستمر الحياة لمدة اسبوع محاضرات كاملة العدد وستسمعي حينها من اصدفائك في اي كلية اخري انهم لم يروا اي دكتور حتي الان وبعد اسبوع او عسرة ايام سيطلب منكم ان تكزنوا جاهزين لامتحان وستكون مدته مغاجاة حيث ان المدة لن تكفي سوي لكتابة اسمك علي الورقة المطلوب منكي الا تصدمي لان هذه ستكون حياتك لمدة خمسة سنوات وقد قضيتها من قبلك ولم يشفع لي حسن السير والسلوك بس ثقة انا اكتر حاجة بحبها هي الهندسة اكتر من الشيكولاته وربنا يوفقك وسلمي لي علي جيمي امام الباب الرئيسي لما تروحي تجيبي الكشكول الجامبو ربنا معاكي وشدي حيلك علشان مكانك مستنيكي في المكتب

أجدع واحد في الشارع said...

اهو ايام وبنعشها
وايام وهنعشها
وكل سنة وانتى طيبة

مـحـمـد مـفـيـد said...

عزيزتي نوران
اول سنه لكي علي مجتمع جديد ستواجهين مشاكل لكنها بسيطه انما بالنسبه لكي ستكون كبيره
مجتمع الجامعه حياه رائعه بس نفهما صح
فلا تخفي ولا تترددي في الخوض فيها

كمنجاتي said...

نوران أزيك ياقموره,مبروك على الجامعه مع أنى ما أعرفش أنت دخلتى كلية أيه بس برده مرحبا بكى فى دنيا جديده صحيح أنا خلصت الجامعه بس الأيام دى لن تمحى من ذاكرتى مهما حييت لأنها بالفعل كانت أحلى أيام عمرى

جميل الواحد يكون ليه سيستم فى حياته أنا عن نفسى رتبت المكتب بتاعى فى الجامعه مرتين 000مره وأنا فى إعدادى والمره الثانيه وأنا فى البكالوريوس لدرجة أن الكتب كانت وصلت لحد الباب وأنا مش عارف أعمل أيه غير أنى أمنى نفسى بالتخرج حتى أرى الغرفه مرتبه

على فكره انت روحك روح خفاقه مش عارف ليه بس أنا حاسس كدا

على العموم سلام دلوقتى

marktwain said...

جميلة قوى الحكايات دى فكرتينى بأول يوم ليه في المدرسة كنت فرحان قوى و دخت على اسمي في فصول اولى ابتدائي اللى في المدرسة كلها ملقتهوش فقعدت على الدكة جنب البواب
و كان يوووووووووووووووووم
و كل دراة و انتى طيبة

...دنيتي said...

كل سنة وانتي طيبة يا نوران ورمضان كريم :)

Nouran said...

احمد باشا:
والله انا مستعدة اكتب اصل انا رغاية جدا بس هخاف عليكوا صدقني هتندم
شفت اليونيفورم بتاعنا شياكة ولازم شوية دلع اول العنقود بقى
انت كنت ف مدرسة متاكد ؟ ههههه

جدو:
وحضرتك طيب
مدونة عمو احمد شقير رجعت وشكل ابراهيم مسح البلوج مش باين خالص

انسان:
الكلية غيرررررررررررررررررر ابصم بالعشرة

جبلاوي:
حمدلله ع السلامة يا باشا
وايام وبنعشها ويا رب يبقى ناجح وكل سنة وانت طيب

دودي:
مأسااااااااااااااة بلاش فضايح اكتر من كده والله باتمان هيوحشنا ههههههه

ابيتاف:
انا روحت يوم وعرفت انها كوم تاني ارحمني يا رب
الكلمة دي مسمعتهاش النهاردة معرفش ليه غريبة
انا هكتبها دلوقتي اهوه
الكوتشي ده حكاية والشنطة برضه

ادم المصري:
المفروض احط جدو قبليها من الادب هتبقى جدو ادم هههههههه
ده انت رجعت زمان اوي

البشمهندس المصري:
سبحان الله جه كلامك ف دماغي من قبل ما اشوفك والدكاترة داخلين يشرحوا امال ايه اللي صحابي بيقولوه ده عرفت الحقيقة وانا هشد حيلي علشان المكتب احنا اتفقنا خلاص

اجدع واحد ف الشارع:
ع رايك وكل سنة وانت طيب

محمد باشا:
انا عندي الخميس اول يوم بصراحة اليوم كان حلو باستثناء المواصلات كانت حاجة تقرف فعلا
انت وخالد عارفين بعض ولا ايه ؟؟؟

محمد مفيد:
اوجزت وافدت بصراحة كلمتين جامدين يا باشا :)

كمانجة:
عاش من شافك يا عم
انا باين كده دخلت هندسة ع ما افتكر يعني
نفسي اعرف ايه خفاقة اللي كل الناس بتقولي عليها دي وانا حاسة نفسي شويه هبل ع عبط ومزيج من الاثنين
ع العموم شكرا يا عم
سلام

مارك توين:
يا عيني جنب البواب والله صعبت عليا يا هندزة المهم لقيت اسمك ولا قضيت اليوم كله بره ؟؟؟؟؟؟؟
وانت طيب يا هندزة

Nouran said...

امجي:
وانت طيبة يا جميل اعفا انت السنة دي صح :)