Monday, September 18, 2006

حالو يا حالو

يا رمضان جاي ف الطريق وحشنا اوي كل حاجة وحشتني ف الشهر ده ابتداء من الذكريات لحد الاحساس بكل تفاصيل الشهرطبعا عارفين انهم هيمشوه الموضوع فلكي علشان النتيجة متبوظش طول السنة
واول يوم هنروح مهدودين المدرسة -ايه ده اول سنة مش هبقى ف المدرسة مشوها مدرسة ماشي - والسؤال الشهير صايمة و لا ذي كل سنة طبعا بنرد بابتسامة صفرا لا زي كل سنة
رمضان مش يعني
بكااار ابو كف رقيق وصغنن ع راي مشرط الشرير انت بقى ابو كف رقيق وصغنن -بصراحة بتخنق من بكار بقى بالذات لما يقول هوي اصحابي شوفتوا امبارح حوصل ايه ويعرضوا الحلقة اللي فاتت ف حلقة النهاردة كل يوم نفس الموجز -يالا المسامح كريم واحنا داخلين ع شهر كريم كفاية كلام ع بكار ماله بوجي وطمطم اي نعم مكنتش بحب اتفرج عليهم كنت بحب اتفرج ع سلاحف النينجا او باور رينجير ع القناة التانية بس بوجي وطمطم كانوا ارحم
و المسلسلات اللي بتكون اكتر من20واحد واكسيليوسفز وحصريا والحجات دي لا والاسخف البرامج الرخمة اللي ع القنوات المصرية يا نهاري دي بتجيب تخلف معرفش فكرة الخريطة التلفزيونية ف رمضان هدفها ايه يعني اشمعنى ف رمضان اللي يبقى التلفزيون فيه موسم والبرامج تكتر وكده يعني انا كان اخري ف لبرامج الكاميرا الخفية واخري ف الكارتون سلاحف النينجا لأ السندباد البحري كان حلو ع القناةالتانية ونقعد
نتخانق نتفرج عليه ولا ع بوجي وطمطم
ذكريات رمضان.
فاكراه اول فانوس جالي كنا مسافرين لبابا وجدتي -مامة بابا- جاية تسلم علينا وجابتلي فانوس حلو اوي بشمعة بس طبعا مش مسموح نحط فيه شمعة ليه معرفش وبمناسبة ذكر الفوانيس فطبعا التطور اللي حصل ف الفوانيس خلانا كل سنة نجيب فوانيس شكل بس بصراحة اكتر واحد اصيل بتاع الشمعة طبعا متقوليش بتاع اللمبة ولا اللي بيغني ولا اللي بيطلع بخار ويقولك شبيك لبيك والحجات دي مفش احسن من التقليدي بقينا بنبدلهم بفوانيس الميداليه عارفنهم
لا بقى ولا البمب والصواريخ اول يوم رمضان لحد دلوقتي بنزل افرقع مع ولاد خالتي وفيها ايه بقيت طالبة جامعية هنزل برضه بنعمل عصابة وننزل بعد الفطار علطول نجيب علبة صواريخ وبمب كتير ونفرقع بقى لحد ما نخلص ونجيب تاني
رمضاااااااااااااااااااااااااااان احسن اكل
المائدة الفخمة التي تحتوي ع كل ما لذ وطاب ابتداء من الشوربة الى الديك الرومي وفصائله طبعا
و الحلويات اللي بعد الفطار اللي يعني بتموت بجد كنافة بسبوسة قطايف
والسحور طبعا30يوم فوووول بس احسن حاجة بيبقى بيتي مش بنيجب من الراجل بيتعمل ف البيت طبعا السحور بتسحر مرتين مرة قبل ما نام علشان لو مرديتش اصحى ولو صحيت يبقى زيادة تاكيد ع السحور طبعا لازم اتغذي كويس علشان اكبر بسرعة ههههههههه
.
كده اكل رمضان خلص بس طبعا رمضان مش اكل وبس من اول ما نعرف امتى يوم رمضان المسجات تنزل ايه ما شاء الله والتليفونات شغالة علطول وحاجة جميلة بجد الروح اللي بتبقى ف الشارع تحس بريحه الطيبة والتسامح ف الشهر ده مالية الجو بجد احلى شهر ف السنة
ونتسابق مين يختم القران الاول ومين يختمه اكتر من مرة ومين صلى التراويح امبار يااااه احلى حاجة التراويح عارفين لما تبقوا بتحبوا حد اوي وبتفضلوا معاه علطول وقلبكم بيدق علطول وانتوا معاه وتحس انك طاير من الفرحة وكل ما تتالم كل ما شعورك بالسعادة والرضى بيزيد ده بالظبط احساسي ف رمضان وانا بصلي وبالذات صلاة التراويح والتهجد بجد متعة
يااااه رمضان خلاص قرب يخلص مااااامااااا عايزين نجيب لبس العيد هننزل بعد الفطار علطول علشان الدنيا متبقاش زحمة ماشي السنة دي عايزة كوتشي وعايزاه لونه كذا-الرغي بتاع البنات اشتغل ف الحته دي ننطها احسن ماشي-ايه ده
بكرة العيد
هيه هيههيه هيه لا مش هيه رمضان مشي قوام هيوحشنا اوي اوي
اليوم اللي قبل العيد كلنا لابسين ترنجات جديدة -معرفش ليه التقاليد دي- وواقفين ف البلكونة والجو بيبقى ساقعة وهنتلج بس السنة يدي شكل الطقوس هتتغير والفجر يأذن وبعدين نسمع اذان العيد
الله اكبر الله اكبر لا اله الا الله الله اكبر الله اكبر ولله الحمد .....................لحد اخر الادان ننزل نصلي ونطلع نناااااام ياااااه رمضان خلص هنستناك تاني -انا فبركت الشهر ف كام سطر ايه الافترى ده -ياللا مستنين العدية بعد لفة قمر الدين الهدية
نلقاكم بعد رمضان ان شاء الله وكل سنة وانتوا طيبين

39 comments:

Anonymous said...

كل سنه وانتى طيبه ي نوران حبيت اكون اول المهنئين لكى بالشهر الكريم ويا ريت تزورينى بس يا ريت تفهمينى ؟؟؟؟؟؟؟

الســـاحر said...

لا لا انا زعلان اوى اوى
كنت عايز اكون اول كومنت
لا لا حرام حرام دى كوسه
المهم كل سنه وانتى طيبه
بمناسبه رمضان ويارب تفضلى طيبه علطول
على فكره انا بعتلك لفتين قمر الدين
هما لسه ماوصلوش؟؟؟؟

NoOR said...

يا مفتريه خلصتي رمضان قبل ما يبداء

يا مصر اكتب إليكي رسائلي said...

تحياتي ولحد عندكم جي اقول
بمناسبة الشهر الكريم كل عام وانتم والأسرة الكريمة وكل الأصدقاء والأحباب بالخير ومصرنا الحبيبة كلها بالخير واليمن والبركات

أجدع واحد في الشارع said...

تعالو شفونى وانا غبى

مفلس افندى الرايق said...

كل سنه وانتى طيبه يا باشا

طيب خلينا نشوفك بقى قبل رمضان ونعلق الزينه سوى

sherif gharib said...

رجعتلنا كلنا الذكريات الحلوه اللى فى الشهر ده
باستثناء الفول اللى فى السحور لانى بقعد بعدها شهر نقاهه منه
كل سنه و انتى طيبه و يا رب تكون شهر كريم علينا جميعا
تحياتى

m_elsewedy said...

كل سنة وانتى طيبة يا جميييل
ورمضان كريم

Dr. Tantawy said...

هههههههههههه
انا اكتشفت ان رمضان عند الناس غير رمضان عندي ههههه
عموما ربنا يبلغنا رمضان على خير انشاءالله و تفرحي بيه كمان و كمان
بس اهم حاجه
بمب العيد ههههه

Ahmed Shokeir said...

نوران كل سنة وانتي طيبة

جميل احساسك برمضان وطقوسه الخاصة اللي مصر تتفرد بيها فعلا

هيا النينجا دي الي فيها المعلم رشدان برده ؟

رمضان ايامنا كان فيه نيللي وبابا عبده وبعد كده كان رافت الهجان

ماقلتليش هو امبارح حوصل إيه ؟

رمضان كريم

الأميره أوسه said...

نوران كله رمضان وأنت طيبه
وكلى كويس عشان تكبرى بسرعه وتتخرجى
وتبقى دكتوره عظيمه
أأأأأأأيه
أنت فى هندسه
لا حول الله يارب
معلش يا بنتى أنا كمان مهندسه
بس أنا خريجة تجاره قسم عماره
بشتغل طبيبه قسم جراحة تجميد
أيوه تجميد دى حاجه جديده

Gid-Do - جدو said...

شمعة
انت لميتى كل قمر الدين اللى فى السوق
كل سنة وانت طيبة عيد سعيد علشان اكون اول واحد بيعيد عليكى وبكدة اخد اول كحكة بسكر ـ تمنياتى بالتوفيق دايما

LAMIA MAHMOUD said...

كل سنة وانتي طيبة

حائر في دنيا الله said...

رمضان كريم
وكل سنة وانت بخير وبصحة وبسلامة
وراحة بال

MAKSOFA said...

كل سنه وانت طيبه ياعسوله انت والله

admelmasry said...

كل سنه وانتي طيبة

Anonymous said...

كل سنة وانت طيبة
فعلا روح رمضان بتخليه مختلف عن كل شهور السنة

BaTresYa said...

كل سنة وانتي طيبه ورمضان كريم عليكي وعلينا يا قمر ..

الســـاحر said...

على فكره انا كتبت قصيده جديده ونفسى تشوفيها

عشقك ندي said...

كل سنة وانت طيبة ورمضان كريم

DoOoOoOdY said...

كل سنه وانت طيبه يا نورا ورمضان كريم ومتزعليش من اللى حصل فى الجامعه امبارح
رمضان كريم

Mai Kamel said...

وانتي طيبة يا نوران.. ومبروك عليكي هندسة:)
وصدقيني لو الكلية مش عاجباكي انهاردة وانتي في اخر سنة هتبقى متقطعة وانتي عارفة انك هتسيبيها:(

عازفة الكمان said...

بجد شكرا جدا علي الاغنيه وانت بنت جادعه و الله عايزه اكلمك بس انتي عارفه الطحن اللي انا فيه لم اشوفك آه ما انتوا جاين غي رمضان وكل سنه وانت طيبه وشكرا تاني علي الاغنيه

Anonymous said...

كل سنه وانتى طيبه يامهندسه المهندسين
بمناسبه راس السنه الهجريه
يالا بقى كروته بكروته

تحياتى

Anonymous said...

ملحوظه بدون زعل
فى ضمن تعليق aoossa
كتبت ( لا حول الله يارب)
اسمها : ياحول الله يارب او لا حول ولا قوة الا بالله

خطأ بنقع فيه كلنا بس نحاول نتداركه

تحياتى

أُكتب بالرصاص said...

كل سنو انت طيبة

اختصرتي رمضان بسفكرتينا بايامه الحلوة

رمضان في مصر له طعم تاني خالص


فينك يا رمضااااان

هوميروس said...

كل سنة وانتي طيبة ورمضان كريم

Anonymous said...

يابختكم بالحاجات دى هنا مفيش اى حاجه من دى خالص هيه حنعمل ايه بقى كله اكل عيش

voice of love said...

ايه كل الرغى ده
يا خبر
كل سنة وانتى طيبة يا باشمهندسة يا صغننة
حد جاب لك فانوس ولا أبعتهولك ؟

... said...

نوران
معلش اتاخرت عليكى يا صغنونة
كل سنة وانت طيبة
وجميلة ورقيقة
ورمضان كريم يا احلى بلوجاوية

Darweshe said...

كل سنة وانتى طيبة يانوران
رمضان كريم

ROMIL said...

رمضان كريم

hummar said...

هلا بالشمعه
رمضان كريم
انا مش عارف يابت ياشمعه ايه الرغي ده كله انتي طالعه رغايه لمين
مبروك على الشهر الكريم وعلى كليه الهندسه قلنالك زمان دي كليه صعبه بس الهندسه للجدعان
الشاكوش

FrEe.PhArAoH said...

بوست روعة

انا اول مره اعلق هنا بس البوست دا بجد يستحق الاعجاب

انتى تقريبا جمعتى معظم المشاعر اللى بنحسها ف الشهر دا .. احييكى

وكل سنة وانتى طيبه

littilemo said...

ماشى يا هندسه

... said...

نوران

انتى فين

وحشتينا

أشرف حمدي said...

كل عام وانتم بخير ورمضان كاريم .
في انتظار تشريفكم لي في مدونة الكاريكاتير
http://caricatooz.blogspot.com/
مع خالص حبي واحترامي
د. أشرف حمدي

Nouran said...

انا اتااااااااااااخرت اوي معلش يا جماعة رمضان بقى والاكل والنوم وكده يعني وجه وقت الرد ع الناس اللي شرفوني وكل سنة وهما طيبين مع ان رمضان قرب يفنش خلاص:

واحد من الناس:
ليك لفة قمر الدين لو ابيتاف مشلتش القانون
كل سنة وانت طيب وبهنيك انا بقى بالعيد

الساحر:
انت مش اول كومينت اعتبر نفسك اول كومينت كوسة ايه يا دكتور خالد احنا ف رمضان وصايمين يعني
عملنا قمر الدين خلاص يا رب يكون ثوابهم وصل
حلوة تفضلي طيبة علطول ديه عجبتني اوي كل سنة وانت طيب يا دكتور

البشمهندس محمد باشا:
وانت طيب يا اشا حلو كده اهوه الشهر خلص كل سنة وانت طيب بقى العيد قرب
ايه يا عم الحركات اللي بتعملها ديه بس عارف كل الصبيان كده بيحبوا المقالب المفرقعة دي عندنا ف الكلية كده برضه حاجة غريبة هي اكيد عدوى ف هندسة

لبس العيد نجيبه خريفي او ممكن نجيب قميص فوقيه بلوفر بس طبعا مش هنلبس البلوفر يعني هنخليه للعيد الكبير ههههههههه


نووور:
رمضان خلص شفت بدأ وخلص والعيد قرب يجي كل سنة وانت طيب

يا مصر اكتب اليك رسائلي:
وانت طيب يا باشا ربنا يتقبل مننا كلنا اجمعين يا رب

اجدع واحد ف الشارع:
ايه يا عم غباء ايه؟؟

ابيتاف:
جوجي التقاليد هي هي مصريين بقى
تعرفي السنة دي مجبتش بمب ولا فرقعت صواريخ
انا بجيبهم لولاد خالي وولاد خالاتي واخواتي بس بفرقع معاهم شفتي هههههه
كل سنة وانت طيبة

مفلس افندي الرايق:
وانت طيب يا رايق احنا خلاص هنشيل الزينة بعد العيد

شريف غريب:
ايوه انا مليش ف السحور ده يا عم انا بتسحر زبادي كفاية اوي كده
كل سنة وانت طيب يا باشا

سوووويدي:
وانت طيب يا باااااشاااااا ورمضان كريم وعيد سعيد هههههه

مسلمة:
وانت طيبة والامة الاسلامية كلها بخير


طنطاوي:
ليه يا عم بتفرق بين طلبة الكليات المختلفة يعني انت شغال امتحانات اكيد هيختلف ولا بلوجك بقى غريب ف رمضان مفهمتش حاجة منه خااالص
ربنا يتقبل مننا هخليها بمب العيد علشان مجبتش السنة دي ف رمضان ماشي
كل سنة وانت طيب يا دكتور :)

عمو احمد شقير:
كل سنة وحضرتك طيب
فعلا مصر بتنفرد بيها اوي
مين المعلم رشدان ده
انا شفت فوازير نيلي وشريهان بس مين بابا عبده ده انا اعرف عمو فؤاد بس
امبارح محوصولش حاجة خااالص هههههه
رمضان كريم وعيدسعيد:)

اوسه هانم:
وانت طيبة يا جميل انا باكل كويس بس رمضان ده بشرب كويس معرفش بخلص الماية والعصير حاجة غريبة
يا ده انت متعدده المهن شكل رمضان اثر عليكي ان شاء الله ترجعي لطبيعتك
بس انا بحسبك ف السن وبتتكلمي ايطالي كمان ؟؟

جدو العزيز:
ابيتاف اللي طلعت عليا الاشاعة دي انا موصلنيش اي حاجة انا قاعدة ف بيتنا مختش حاجة خاالص
احنا هنزل قانون العيد كحكة بسكر ولا جنية جديد اختار يا جد
وحضرتك طيب ورمضان كريم وعيد سعيد

lamia mahmoud:
وانت طيبة

حائر في دنيا الله:
حلوة اوي الدعوة الاخيرة دي ربنا يرزقنا كلنا راحة البال وكل سنة وانت طيب

ماما مكسوفة :
كل سنة وحضرتك طيبة

ادم باشا المصري:
كل سنة وانت طيب

هيرو باشا:
وانت طيب وكلامك مظبوط

باتريسيا:
بصي انا كتبت الاسم بالعربي علشان كسلت اقلب انجليزي سمحيني ممكن:
وانت طيبة وعيد سعيد

لص:
اهلا بيك ف العالم الجميل ده بتاع التدوين بجد احرجتني بذوقك وقدام انت لسه جديد اكيد متعرفش اني باخد قلم ف نفسي اوي يعني كده محدش هيقدر يكلمني هه:)
كل سنة وانت طيب يا باشا

الساحر:
اكيد بقت قصيدة قديمة جدا اعذرني يا دكتور كنت مختفية

عشقك ندى:
وانت طيب وعيد سعيد

دودي:
وانت طيبة وخلاص المسامح كريم وبلاش تسيح ع البلوجر يا بنتي

مي:
وانت طيبة والله يبارك فيك تعرفي حسيت كلامك ده ساعة المدرسة وحستيه برضه لما شفت بكالريوس ميكانيكا ف فطار جماعي والحجات اللي عملوها ع قد تعبهم فرحانين

رشا:
اي خدمة يا هندزة احنا ف الخدمة

محمد المصري:
وانت طيب وانا الحمدلله ماشيه ف الكلية باستثناءاني مش بذاكر

جبلاوي:
وانت طيب يا باشا
ده ايه الكروته الشديدة دي؟
صح تصدق خت بالي بس لقيتك رديت فاكتفيت صح يا اوسه اسمها لا حول ولا قوة الا بالله مش ناقصين ذنوب ف كلام بنغلط فيه واحنا مش حاسين

اكتب بالرصاص:
انا خلصت رمضان وهو فعلا خلص طبعا اي حاجة ف مصر ليها طعم تاني

هوميروس باشا:
وانت طيب وخلاص العيد جه عيد سعيد

عمر:
اكل عيش بقى صحيح مسيرك تقضي رمضان مرة عندنا وتشوف الحكاوي دي وتحسها بنفسك :)

داليا هانم:
شفتي بقيت رغاية اوي وانت طيبة والله محدش عبرني بفانوس حتى دودي خدت الفانوس وكنسلت فانوسي هطالبها بيه امتى بقى ورمضان خلص خلاص حاجة غريبة

حلم:
شرفتيني ونورتيني وحضرتك طيبة
وكل سنة وحضرتك كيبة بمناسبة العيد

darweshe:
وانت طيب

روميل:
وانت طيب

الشاكوش بيه ميت فل عليه :)
معرفش والله طالعة رغاية لمين
الله يبارك فيك ومل سنة وحضرتك طيب
هندسة للجدعان دي بتفكرني بالسجن للجدعان فيها شبه صح؟؟

الفرعون الحر"دي الترجمة صح العربي اسهل اعذروني نايمة جدااا"
ربنا يخليك روعة مرة واحدة ويا ريت متكنش اخر مرة بجد ده اللي بحس فيه ف الشهر ده واكيد ناس كتير بتحس نفس الاحساس ده وكل سنة وانت طيب:)

ليتيلمو:مش لايقة بالعربي سوري كسل بقى:)

ماشي يا باشا كل سنة وانت طيب

حلم:
انا جيت اهوه :) شكرا ع السؤال

د.اشرف حمدي:
كل سنة وحضرتك طيب ورمضان كريم وعيد سعيد علينا كلنا :)

عازفة الكمان said...

فعلا انا ورضوي كنا بنتخانق انا عايزه سلاحف النينجا وهي عايزه بوجي وطمطم بجد كانت ايام حلوه قوي بس بكار حلو بردك هو رخم من ساعه مني ابو النصر ما توفت وابنها ورثه اه ما الشخصيات الكرتون بتتورث ما علينا كل سنه وانت طيبه يا نوووووور