فرح رضوى وعمرو

رضوى والكوافير

رضوى خرجت من الكوافير

رضوى وعمرو ف العربية رايحين القاعة

رضوى وصلت القاعة وبتدور ع عمرو

رضوى بتكلم بابايا فالتليفون يعني عمها

بابايا خد عمرو يكلمه يعني عم العروسة

رضوي ع المنصه و متفائله

وصلوا الجونينة يعني الحديكة الازهر باارك بقي

عمركوا شفتوا عروسة قاعدة ع النجيلة !؟

شفتوا الجنتلة علشان سقعانة

وخلاص اتجوز و ا
بوست مشترك

انا: فرح ولا ف الاحلام ولا ف اليقظة كمان

رشا: ده لو تواضعنا وسميناه فرح كمان

انا: يالالله كله لله ونمشية فرح بس قال فرح قال

رشا:بس برضه احسن كتير من اي فرح تاني كان ممكن يعملوه

انا:ايوه كده حسنتي كلامك كنت لسه هخش فيكي شمال بس كانت فكرة جديدة ويا ريت متتكررش

رشا:متتكررش ايه يا بنتي-ديه جملة اعتراضية استفهامية-ده كل الناس بعد كده هتعمل فراحها ف الازهر بارك بعد ما مصر قعدت تتفرج عليهم

انا:ورضوى تقولي تجربة جربوا واحكموا انا ايه اللي خلاني اسمع كلامهما بس بصراحة يعني تجربة ظريفة بس مش اوي لحسن الناس كلها تعمل زيها

رشا:بس المهم ان احنا نشكر الناس اللي قاموا بالواجب وحيوا الفرح من مدونين ومواطنين واطفال الشوارع المشرديين بس الاغريبة ان المواطنين كانوا بيسالوا "يا عيني ايه اللي خلاهم يعملوا"؟

انا:هو العريس بيشتغل ايه ههههههههه-مع الاعتذار لعمرو-

رشا:بس مقدرش انكر احساسي بالفرحة رغم كل اللي عملوه بس فرح اختي اعمل ايه بقى

انا: لا انكري والنبي

رشا:رغم اني مكنتش حافظة الاغاني بتاعتهم لكن كنت بحاول احفظ اي حاجة واغني معاهم ولما الغبط افضل اصقف مهو فرح اختي

انا: مهو فرح بنت عمي ولا انا اسال عمرو ايه الاغاني ديه يقولي ديه مشهورة قال مشهورة قااااااال واااء واااء دول غنوا اغاني غنوا حاحا مين حاحا ده وغنوا يالالالي وسهر الليالي والبحر بيضحك ليه

رشا:ومتنسيش يا نوران اغنية الغلبانين ديه اللي معهمش فلوس ولا مليم بتاعغة الحلوة قامت تعجن ف المغربية لا ف الازهر باارك
انا: ولا حركة 37فبراير والنشيد القومي بتاعها
ع فكرة نوران نايمة عندي -انا بايته عندها وانا اللي بكتب - ويا ريت متزلنيش لاني خلصت اكلها ورشا بتقول اني اكلت 6 سندويتشات معرفش ايه الفضايح ديه :)
ع فكرو كمان كمبيوترهم عذبني وكمان كنت هعمل سليد ومعملش فحطيت الصور كده

رشا: علي فكره كده عيب قوي والكمبيوتر جاله اكتئاب منك

انا: هو احنا هنئلبها شات هنا ولا ايه؟؟

النشرة اوعى تقفل الصفحة واقراها كلها

النشرة احجز مقعدك الان

اهلا بكم ف مدونتنا جنية ونص للتهنئة وكلها مجانا –متسالونيش ازاي هو كده- وحصريا ع شمعة 100.9
هذا العدد من نشرتنا الاخبارية عدد خاص جداا ويضم مناسبات عديدة وايضا سيحدث تجديد للنشرة –اللي بقت مملة وقلت لازم اجددها علشان الناس متمشيش وتحول ع اف ام اللي اكيد اكتر ملل من النشرة هههه-
وايضا ف هذا العدد- هحرمكوا من النكت السخيفة بتاعتي وهحط مكانها النكت بتاعتكوا يعني اي حد كتب نكتة ف كومينت هنزلها- وبعد طول انتظار –مني يعني علشان الامتحانات بلاش العكننة دلوقتي هبقى احكيلكوا ع امتحان الفيزيا لاحقا – نشرة شمعة ف ثوبها الجديد –جبتلها يونيفورم جديد-

اولا التهاني :

كل سنة والمسلمين بخير وعام هجري جديد يا ريت يبقى عام سعيد او سيد او حسن بس بلاش يبقى عام مبارك –دعوة واحد مصري-
ع فكرة كنت هحط اغنية ايظن علشان كلبوزة تفرح كده وتزأطط لكن لقيت انه مينفعش اهنئ الامة الاسلامية بعام هجري واحتفل باغنية ايظن نوع من التاقض شوية صح ؟؟


::::::ابيتاف :::::::
كل سنة وانت طيبة يا ابي يا حميلة وعقبال 120 سنة هخلي الورثة يكتبوهالك

كلمة مني ليكي يا ابي:
عارفة لما دودي كانت هتخش السن فرحت قعدت اقول ف نفسي يااه ده ممكن تتعرف ع جوجي ونعرفها شخصيا بجد بتمنى اعرفك شخصيا حاسة وده اكيد انك انسانة جميلة اوي
تعرفي اول مرة احس اني لما اشوف اللون الاسود برتاح وببقى سعيدة جدا لما بخش ع مدونتك
بلوجك بلونه الاسود وموسيقى عمر خيرت اللي غالبا بسمع اول حته علشان بقفل الصوت علشان ماما بتكون بتكلم بابا وانا جيت قطعت الاندماج بتصفحي ع النت –معرفش ايه لزمة القصة دي- بجد ببقى مبسوطة جدا وانا عندك ولما اخش ع سلامترو كافية عندك والحلبسة اللي معرفش ايه هيا بس حد قالي انها حمص الشام ؟؟
وكلام نواعم اللي عندك والمحشي ورق عنب الافتراضي اللي بتعزمينا بيه ده حاجة اخر ابه عظمة ع عظمة يا جوجي باشا
وف الاخر كل سنة وانت طيبة يا جميلة


:::::::::ادم باشا المصري::::::::
كل سنة وانت طيب وعقبال ما تكمل ال204 سنة يا رب والاجيال برضه تعملك تهنئة

كلمة مني ليك:
لما دخلت عندك اول مرة وانت حاطط صورة جدو وتيتة دول قلت يااه ده عجوز اوي وحاطت كمان صورة شريكة حياته ايه الحب ده –ايه رايك ف الغباء ده كنت ف ثانوية عامة س الغباوة ازدادت يا ادم يا اخويا لازم نحطلها حد- عرفت ان افكارك المطرقعة وجرئ ف طرح المواضيع ورسالة الدكتوراه الطقه اللي انت عملتها دي وطبعا كونك هتبقى مهندس مستقبلي يعني زميل ف الكفاح اللي انا لسه ف اول درجاته بحس انك تعبر عن شباب مصر القرفانين اللي بيفهموا بجد وبيحسوا بجد و جواهم حجات كتير عايزين يطلعوها ومعندهمش مكان –يعملوا بلوج ويطلعوا اللي عايزنه اهوه وسيلة برضه- بجد ربنا يوفقك وتبقى حاجة كبيرة كده وتشتري محل عصير ها محل عصير وتدي العمال فيه 100 جنيه مش 10 متقوليش هنبقى ف عصر ايه اكيد عصر الانفتاح الاقتصادي


::::::::البشمهندس عمو احمد شقير باشا:::::::::
كل سنة وحضرتك طيب انا عرفت من عند ابيتاف ان عيد ميلادك ف شهر يناير برضك ولقيت كده السن اتغير ف البروفيل بقى 22 سنة كده يا دوبك اكبر من ابيتاف بسنتين بس كب سنة وحضرتك طيب وعقبال 142 سنة كده لما اكتبلك تهنئة يا رب

كلمة مني لحضرتك:
ع فكرة اتعملتك تهنئتين ف النشرة شوفت يا باشا

انا بليل بحب البس نظارة شمس واقرا ققص صغيرو وبالمرة اتفرج ع صور طريفة كل ده وانا بسمع حكاوي اخر الليل طبعا ع الاذاعة بتاعة شقير باشا –بس يا ريت متنافس اذاعة شمعة يعني خدلك محطة فضايئة يا عم وولا تزعل-
كل ما اخش عند حضرتك بفتكر بابا يمكن علشان مسافرين زي بعض وبتاكلوا اكل غريب هندي وصيني وكده يعني وكمان اسلوب حضرتك جميل جدا وكنت بالنسبة للمدونين قائد ف موضوع باهر السليمي وصور احمد اللي نشروها من غير ما ينسبوها ليه

:::::::سيادة وزيرة الاعلام سوسة المفروسة هانم::::::::::
كل سنة وانت طيبة يا جميلة يا وزيرة

كلمة كده ع الماشي:
ماشاء الله ليك قدرة غريبة ع جذب انتباهي- واكيد انتباه كتير غيري – اني افضل متابعة اللي انت كاتباه كلامك شيق جدا جدا وبالذات الفيلم اللي كنت عاملاه وكل مواضيعك وتايدك لشعبولا لما اتكلم والعرب واقفين بيتفرجوا
ربنا يكرمك ف حياتك ويرزقك باللي تتمنيه يا رب

حلوة اوي كل سنة وانتوا طيبين من غير هدايا بصوا ابيتاف قالت انها عايزة نكته وانا هكتبهالها تحت شوفوا انتوا عايزين ايه

كده ع ما اظن مفيش تهاني تانية للمدونين
اه فرح رضوى وعمرو يوم الاحد ربنا يوفقهم واكيد هكتب حجات بعد الفرح

نيجي لتهنئة اسبيشيل لانسانة عزيزة عليا جدا ميمو او مستكة الاسم اللي تحبه
كل سنة وانت طيبة يا باشمهندسة ماشاء الله عليها كبيرة جدا تمت 17 سنة –معرفش مهندسين اخر زمن-
بعد رضوى اكيد معرفتش اتاقلم مع اي حد تاني وانا من النوع اللي مش بتاقلم مع حد بسرعة من الاخر رخمة وسخيفة ده انا مش هيا لحسن تفهموا غلط
ميميو كانت معانا ف المدرسة واحنا ف اعدادي بس كانت معرفة سطحية موصلتش حتى الزمالة حتى نقلب الصفحة دي لحسن مش كويسة المهم لقيتها معايا ف الكلية وكذا حد معرفة برضه بس هي وتويتي صحبتنا التالتة اللي اتاقلمنا مع بعض
بحس انها بتفهمني وبينا حجات زي بعض مشتركة وكفاية اني انسجمت معاها قبل مع التيرم يخلص ده انجاز يعني بجد بعتز بصداقتها جداجدا ويا رب نفضل مع بعض وننجح ف امتحان الفيزيا والمواد كلها ويا ريت تشيل الفكرة الرائعة اللي مسيطرة عليه بعد الامتحان اكيد انت عارفة ايه هي واستهدي بالله ماشي

تحدددددددددددددددددددددددددددددددددددددددددددددددددددددديث

عيدميلادغادة الكاميليا 27يناير

كل سنة وانت طيبة يا جميلة وعقبال مليوووووووووووون سنة وانت بصحة وسلامة ويخليكي لينا انت وبلوجك الجميل يا جميلة

بصوا بقى التهاني كتير ده لسه فاضل سبعميت عيد ميلاد
اتنين لزمايلنا وواحد اختي وبنت خالتي وخالي وبنت خالي -مصروفي ادمر من الهدايا حاجة صعبة ده زل ولا ايه هههههههههه-


ثانيا القصة الرائعة :

نظرت طويلا من نافذتها تتامل الاطفال يمرحون ويلعبون يركلون الكرة يركضون وراء بعضهم البعض تذكرت ايام طفولتها لقد كانت طفلة رائعة الجمال وبرغم من ملامحها الجميلة الهادئة التي تخضع كل من يراها ويظن انها اهدى طفلة ع وجه الارض يكتشف بعض ذلك انها كتله طاقة متحركة وكما يقولوا الطاقة لا تفنى ولا تستحدث من عدم كانت هي خير مثال لذلك لا تهدا ابدا تذكرت اليوم العالمي لاطفال الشارع والذي يقوموا فيه بسباق كبير للدراجات وكانت هي الطفلة الوحيدة ف هذا السباق لم تجرؤا بنت من قبلها او بعدها ان تدخل هذا السباق المميت ولكن بالرغم من كل ذلك كانت تشعر بسعادة غامرة لاحساسها بانها مختلفة عن الجميع وبالفعل كانت مختلفة عن الجميع...
تنبهت الي لصوت القادم من خلفها يناديها
ساذهب فاليوم هو
نعم السباق العالمي
اندهش الصبي لمعرفة اخته بهذا اليوم فهو اول مره يشارك فيه ولا يظن ان احد من الكبار يعبا بهذا اليوم ولكنه وجد العكس واندهش اكثر عندما راى اخته تستعد للنزول معه الي الشارع
نزل هو وهي الى الشارع وبدأ السباق ومع بدا السباق غمرت سعادة هائلة للاخت
سمعت صوتا يهمس من خلفها احست بان هذا الصوت مالوف لها استدارت لتراه وجد ته كما هو باستثناء الطول الفرق بين شاب وطفل طبعا -نفس الملامح نفس الوسامة نفس نظرة الاصرار التي تلاحظها ف عينه دوما
سمعته يقول لها لم تتغيري اتتمنين ان تشاركي ف السباق مرة اخرى ابتسمت قائلة وافوز عليك ف كل مرة
ابتسم لها قائلا اتعلمين اخي يشارك في هذا السباق قالت واخي ايضا يالها من صدفة
قال لها ترى من سيفوز
لم ينتظرا طويلا لمعرفة الفائز فقد كان السباق يوشك ع الانتهاء بل انتهى بالفعل ولكن حد ث شيئا لم يتوقع
الصغيران لم يظهر الاثنان لم يعودوا مضت دقائق قليلة مرت ع الاثنان كسنين كثر ساد الصمت ولكن .....

ثالثا فقرة :
انا والنجوم من مصر مش من هناك فقرة من مصر والى مصر ونورت مصر يكتبها اليكم –حاجة بديهية-انا طبعا:

ومعانا المطرب الجليل عبده اش اش
عبده ايه رايك ف الاوضاع اليومين دول كان فيه لبش كتير الايام اللي فاتت
عبده: لبش لبش ايه كفالله الشر
انا:عبده انت متعرفش كان فيه مشاكل كتير عندنا التوربيني واكياس الدم وحجات كتير
عبده:اه عرفت ان سعد سبقني وعمل اغنية علشان اطفال الشوارع واكياس الدم
انا باستغراب: ايه ده امتى ؟؟
عبده: انت معرفتيش مش جاب بنت من اطفال الشوارع بتغني علشان يؤكد حقهم ف الحياه
انا بهبل: ايه
عبده: ايوه حمره يا اوطه حمرة يا اوطه
انا : يا سلام هي البنت اللي بتغني دي من اطفال الشوارع
عبده: انت مش شايفة صوتها ولا صورتها
انا في سري –ولا شت حاجة بس فعلا صوتها نشاز امال عبده ده صوته ايه-: ها يا استاذ عبده والاكياس الملوثة
عبده :برضه نوه عنها ف نفس الاغنية حمره يا اوطه والدم لونه احمر شئ بديهي انهم ممكن يبدلوا الدم بعصير الطماطم شفتي ازاي سعد ناصح
انا : طبعا طبعا هو: طبعا يعني فكرك انصح مني طب ان هكسر البلوج ع البلوجر كله
انا: هدي نفسك يا عبده بيه خلاص هعمل معاك كونتراست هو : هتعملي ايه
انا : عقد بس لازم اوسا توافق هو : مين يا شمعة
انا : خلاص بس انت بتعرف تقي شعر هو : اه طبعا طبعا
انا : طب دي اوسا عاملة شعر عن اطفال الشوارع يجنن اسمه كان نفسي ابقى مدون لو وافقت ع بركة الله
طب معلش يا عبده بيه الوقت خلص وفيه فقرات تانية كتير احنا اسفين لازم نخلص
كان معاكم شمعة من فقرة جديدة ف النشرة الفنية بتاعتها والى لقاء قادم ان شاء الله

الجزء الرابع : اغنية وموقف
مش كنت تتكلم –هو انت شايفني اخرس- شايفني بسيب ايديك وبضيع –لا مش شايفك مش لابس النظارة وكمان هتضيع تروح فين انت مش عارف طريق بيتكوا- ناديني وقولي ليه بتبيع –ابيع ايه هو انت بضاعة –لو غلطة هتعلم –شايفني مدرس وانت تلميذ-

كفاية كده لحسن بوظت الاغنية ههههه


خامساالنكت الرائعة هههههههه –هدية ابيتاف:

نكت مزمز:
مرة واحد دخل فكهاني بقى فكهيثم
مرة واحد دخل محل فكهاني خرج من المحل فكهيثم

واحد حب طحنوه

صعيدي خرج يتمشى جابوه من ع الحدود

مرة خروف صيفي بشنب قابل خروف صيفي من غير شنب قالوا تجي نلعب استغماية قاللو ليه إنت شايفني شماعة جاب عصير قصب والعمارة وقعت خد الموتوسيكل وجري أمه ضربت نفسها بالشاكوش فالصعيدي جاب لب وقشر برتقان قام المدرس ضرب الواد اللي مجاوبش مسألة الحساب أم كرنبة في أولها ومحشي بتنجان

مرة واحد عصبي جدا جدا جدا اتجوز واحدة عصبية جدا جدا جدا خلفوا عيل الدكتور جه ينزله منبطن أمه قاللو حاسب كده أنا هنزل أنا

ولو كلهم قدام تبقى غتاتة نيجيرية بحتة
ع فكرة انا حسيت ان مزمز زعل مني علشان قلتله ع نكته قديمة حاطلي كل دول

نكته احمد القصاص:
دكتور عظام كل ما يمشي ف الشارع الكلاب تجري وراه

ابيتاف مكتبتلكيش نكتة عربي كفاية عليكي تقريها مرة واحدة بس صح ههههههه

كلااام ف الكوباية

يا احلى اسم ف الوجود يا مصر يا اسم مخلوق للخلود يا مصر نعيش لمصر ونموت لمصر مصر ومصر وتحيا مصر تيرالا تيرالا طاطا بكلمات الاغنية كنت بتمتم يوم الاتنين بليل افتكرت الطابور وموسيقى الاغنية اللي كنا بنطلع بيها الفصول ممكن تكون محاولة للهروب من الواقع الاليم كنت اليوم ده مبتئسة ومهيسة تصوروا كنت بغسل المواعين واعمل عصير كل ده انا اللي كنت بعمله من غير ما ماما تقولي شفتوا الياس هههههها رجعت من الامتحان كان صدمة بالنسبة لي بعد ما ذكرت معرفتش احل مش مشكلتنا رضه بس كنت مهلوسة جداااااااااا للركب يعني فقاعدة اعمل عصير موز -اتفضلوا معانا-واغني الاغنية وابص للكوباية واقول اه ابص للنحية الفاضية منها ذاكرت ومعرفتش احل كويس ابص تاني للناحية المليانة حليت احسن من الميت تيرم ارجع للناحية الفاضية تاني اما دي مذاكراها امال هعمل ايه ف الفيزيكس نرجع للناحية المليانة خلصت امتحان ولسه عايشة ههههه ولسه هرجع للنص الفاضي الخلاط كان هيعيط وبيقولي كفاية بقى وقفيني تعبت صعب عليا ووقفته طلع العصير عايز موز رحت جبت موز تاني وحطيته وابص للكوباية والحوار يشتغل تاني برضه بس المرة دي الخلاط معيطش انا اللي كنت هعيط المهم حطيت العصير ف الكوبايات وكلها بقت مليااانة شفتوا الامل وبعد ما شريبت العصير والله كان حلو اوي اانا خسارة ف التعليم اساسا ههههه
وبعديها بشويةاه اه يا ماما عندي حساسية يا دي النيلة ف الفترة دي كل ما اكل موز وشيكولاتة ماشاء الله الحساسية تشتغل مورهاش غيري المهم نرجع للكوباية اخر حاجة مش مشكلة المهم امتحان النهاردة ولله الحمد جه كويس يعني مش قوي بس ارحم من الجبر والتفاضل بصوا بقى انا عندي امتحان الاتنين كويس والخميس فيزيكس ادعولي بجد اذاكرها واخش اعرف احل ماشي

انتظروا نشرة قوية جدا البوست اللي جااي

وعدت سنة

سنة عدت بالحلو والوحش سنة خسرت فيها ناس وكسبت ناس تانيين فرحت واكيد زعلت سنة من عمري مرت قدام عيوني وف بداية السنة اللي فاتت 2006بدات البلوج نطت ف دماغي الفكرة ونزلت اول بوست كتبته كان ليلة راس السنة او بمعنى اصح اول تلات بوستات ليا بصوا انا هعمل اقتران-حلوة اقتران دي-هعمل اقتران بين البلوج السنة اللي فاتت وانا ومصر السنة اللي فاتت برضه
اكتر شهر كتبت فيه شهرسبعة
اكتر تعليقات جاتلي اكيد عن مناسبة كنا ف رمضان 46 تعليق
مكتبتش غير حوالي 3مرات باللغة العربية الفصحى
ممسحتش غير بوستين بس واحد علشان كان موضوع يخص واحدة صحبتي ومسحته علطول والتاني علشان كان نكدي -بخصوص الامتحانات -وقلت لما اتحسن همسحه
ممسحتش ولا تعليق خاااالص
بجد بجد كل بوست كتباه بعتز بيه جداا وبيبقى بموقف معايا وكل تعليق متعلقلي معتزة بيه جدا برضه
نبدا التفصيل الممل :))
. اكيد فيه احداث هتهمل زي القطارات والحجات الطبيعية دي

.
نرجع سوا كده ليناير 2006 وتحديدا الساعة 12 ليلة راس السنة قررت اعمل بلوج وكنت مسمياه -انا اكيد مجنونة-بس غيرته وخليته شمعة الفكرة جاتلي من رضوى لقيتها فرصة اعبر عن افكاري واحتك بالعالم الخارجي الافتراضي وطبعا كان اسلوبي ف الاول رائع جداا هههههه وكنت افضل افكر اكتب ايه وازاي وحجات كده اول ما نزلت

Nightlegenالتدوينة الاولى بعديها بخمس ايام دخلت لقيت اول كومينت ف حياتي من ومظنش انه علقلي تاني بس فرحت اوي اني وانا لسه مدخلتش لحد لقيت حد عبرني بعد كده رضوى عملتلي بوست عندها وابتدى يدخل ناس عندي
شهر واحد ع المستوى الشخصي محصلش فيه حاجة اما ع المستوى الدولي والمحلي محصلش حاجة برضه

.
شهر فبراير ده كان شهر افراح واحزان سويا الافراح كانت علشان المنتخب وانه ربنا نفخ ف صورته وكسب بالبطولة
اما الاحزان فوفاة جدي الله يرحمه بعد العيد الكبير ب10ايام كده ولحد بعديها بشهور ببقى ناسية ولما اروح عندهم كنت بغلط بلساني واسال عليه بس اداري ع الموقف علطول وكمان كان فيه انفلونزا الطيور وبطلنا ناكل لحمة ااقصد فراخ
وف شهر فبراير غبت شوية عن البلوج بس لما رجعت مكنش فيه غير ابراهيم ربنا يمسيه بالخير اللي كان بيخش عليا وكانت الحالة المزاجية سيئة ومكدرة بسبب الثانوية العامة ونص البوستات تهييس اه طبعا ف شهر اتنين كان الفلانتين وده ملناش دعوة بيه

.
شهر تلاتة عيد االام ايه فيه حاجة حصلت فيه طبعا بدات الكتابة تقل بس كان ف موضوع بحبه اوي وووصل فيه عدد التعليقات لاكتر من 15 تعليق شفته الهنا بس كانت خلاص الامتحانات قربت وكده يعني باين كده كان فيه العبارة غرقت ولا كان ف شهر اتنين المهم اكيد حصل مصيبة ف شهر تلاتة والا منكنش عايشين ف مصر طبيعي يعني

.

شهر ابريل حصلت مصيبة بتاعة دهب صح برضه ولا بيتهيالي لا صح ودخلت خصيصا-حلوة خصيصا دي-علشان اكتب وجهة نظري ومكتبتش غير اتنين بوست اه وفيه عيد ميلاد الريس حد يقدر ينسى المناسبة دي

الكتابة كانت قليلة لاني لازم استكن واقعد اذاكر علشان احافظ ع المجموع واخش الكلية اللي انا عايزاها

شهر خمسة مظنش فيه حاجة حصلت حتى لو فيه مكنتش هاخد بالي علشان كنت معكوكة ف الفيزيا اللي مكنتش بذاكرها طول السنة وكنت بلم نفسي ف المواد المتبعترة وهو الشهر لوحيد اللي مكتبتش فيه ولا بوست ممحي من الارشيف:)

.
شهر ستة اه فيه عيد ميلادي ف عز معمعة المذاكرة وكان نفسي اكتب بوست بس رشا حبيبتي كتبتلي بوست

و كتبت تدوينة مهيسة جدا عن الامتحانات و بدات الاحتكاك المباشر مع البلوجات اخش من بلوج اطلع ع بلوج لحد ما كنت هتهبل.

.
شهر سبعة ماشاء الله فيه النتيجة والتنسيق والماتش النهائي بتاع كاس العالم واللي انا متبعتش الماتشات ت علشان الامتحانات بس شفت الماتشات الاخيرة وكان نفسي المانيا تكسب بس ايطاليا هي اللي خدتها مش مشكلة المرة الجاية يمكن الاهلي يخدها هههههههههه
المهم ف شهر سبعة التهيس اشتغل والحالة المزرية اشتغلت والخوف وكل حاجة مع اني كنت عارفة هحجيب كام وعارفة اني هنقص بس برضه والنتيجة ظهرت يوم الاحد16يوليو وليلتها ع النت وكان معذبني وظهرت نتيجة التنسيق يوم 29يوليو يوم الاحد برضه وبرضه ف شهر 7 رضوى صحبتي الانتيج عملت البلوج بتاعها.

.
شهر 8 كان فيه عندنا فرحين وكان فيه فرح ف شهر سبعة برضه بس انا نطيته وف شهر 8 نزلت اول نشرةوتاني نشرةع يمينكوا برضه ونزلت بوست وزارة الدفاع كان بوست جامد -والوزراة دي ف حركة كلابيز من اجل التغيير اللي بتقوم بيها الزعيمة كلبوزة والاعضاء رئيس الوزرا زنجولا نزلهم ف بيان رسمي ااقصد بوست عنده ف المدونة
.

شهر 9 دخلنا المدرسة والكلية وكده يعني وجه رمضان وكده يعني فيه حاجة حصلت تاني ؟؟
شهر 10 العيد الصغير والحمد لله مفيش مصايب حصلت
شهر 11 اول امتحان ميد تيرم امتحنه وكان مسخرة
شهر 12 العيد الكبير ف اليوم اللي قبل الاخير ف السنة
3
2
1
هابي نيو ير ههههههه كل سنة وانتوا طيبين وطولت عليكوا بس هو كل يوم الواحد هيتم سنة ااقصد بلوجه يعني كل سنة وشمعة طيبة

ملحوظة صغيورة:

الامتحانات خلاص بتدق الابواب فطبعا لازم اتهد واقعد اذاكر وااوفر كل دقيقة للمذاكرة علشان انجح فهنتغيب لمدة لن تزيد عن 25 يوم علشان هخلص الامتحانات يوم 25 يناير بس ممكن اخش اختلس النظر لو ذاكرت كويس هههههههه