Tuesday, January 01, 2008

كل سنة واحنا طيبين

سنة عدت وكتبت كل حاجة حسيت بيها ف بلوجي الحبيب وده يستدعي ذكر ان شمعه اتمت عامها الثاني بحمد الله
حيث ولدت شموعة ف 1-1-2006
واتمت عامها الاول ف 1-1-2007
وها هي تتم عامها التاني بسرعة الصاروخ
:)
شمعة مش بتبقى منورة غير بيكم بتنور بيكم وعلشانكم وكدا يعني كل سنة وانت طيبة يا شموعة

مرت سنه بحلوة و مرها بضحكاتها ودموعها بايامها ولياليها
مرت سنة ضحكت فيها كتير وعيطت فيها كتير
سقطت فيها ورجعت نجحت فيها
ناس اتجوزت وناس اتوفت
ناس فرحت وناس حزنت
الاهلي كسب الصفاقسي ع ارضه –تونس يعني- والنجم كسب الاهلي ع ارضه –مصر يعني- ف نفس السنة
ابو تريكة فرحنا فيها ف الدقيقة حاجة وتسعين وخلانا نعيط مش علشان خسرنا علشان هو بكى علشان ضياع البطولة
سنه هيست فيها كتير اوووووي اكتر سنة هيست فيها بجد
سنة اتصحبت فيها ع اجمل شلة بالرغم من انها رخمة ونكدية بس بجد بحبهم اوي العيال ديه بجد فعلا اجمل شلة ف حياتي
سنة تميت فيها 18 سنة وطلعت الرخصة انا محكتش ع الرخصة معرفش ليه- بس هيه هيه هيه هيه عملت الرخصة– وسنة تم فيها الاهلي 100 سنة
سنة وصل فيها معدل التفاؤل بتاعي فيها ل100% ووصل فيها الاحباط ل100% برضه ومازال الصراع مستمر
سنة ضاع فيها حلم كنت بحاول اقنع نفسي فيه –اني اخش اتصالات – ووقفت ف نفس الوقت ع اول خطوات حلم قديم من كي جي وان –اطلع مهندسة ببني عمارات –
سنة كتبت فيها هنا حجات غريبة جدا مكنتش اتصور اني اعرف اكتبها
سنة غيرت فيها اللوك بتاع البلوج اللي كنت حاسه انه هيفضل لونه فوشيا ساده طول العمر
سنة معملتش فيها غير 4 تاجات بس وفيه تاج متأجل
سنة عملت فيها نيو لوك للنشرة ومكتبتش غير 4 نشرات ف 12 شهر بس –بالمناسبة فيه نشرة بعد الامتحانات هتاخد كل المناسبات من اول شهر سبتمبر لحد شهر يناير نشرة اكس لارج يعني :)
سنة مرحتش فيها السينما غير مرتين بس مش عارفا ليه كدا ؟؟
سنة بوبا وسوكا فيهم بقوا صحابي اكتر واكتر ودخلوا الاتنين المدرسة ومتعذبين
سنة ظهرت فيها ليلى تاني وشاركت فيها تاني
سنة اتعلمت فيها حجات كتير طلعتلي افكار جديدة احلام جديدة شخابيط جديدة
سنة اتغيرت فيها اوي
سنة حاولت اني ابقى فيها كويسة ومعرفش قدرت اكون كويسة ولا لأ
سنة خلصت وسنة خلاص استقبلتها بابتسامة بالرغم من كونها ابتسامة باهته ووراها تعب و ارهاق واحباط بس فيه شمعه امل بدأت تنور
يا رب تبقى سنه 2008 خير علينا كلنا :)

10 comments:

WhItE HeArT said...

كل سنة وانتي طيبة

بلوجتك رائعه فعلا وفيها مواضيع حلوه مش غريب على واحده مهندسة يعني

عموما كل سنه والمهندسين كلهم كويسين اللي اتخرجوا واللي لسه الكلية مبهدلاهم

ربنا يوفق الجميع

تحياتي

مداح القمر said...

كل سنه وانتى طيبه وكل سنه وتدوينة شمعه طيبه
وعايزين مواضيع اكتر من اى سنه ان شاء الله

Coca said...

كل سنه وانتي طيبه وعام جميل ان شاء الله

بوست لذيذ لبدايه سنه جديده

تحياتي

مـحـمـد مـفـيـد said...

كل عام وانتي بخير وشمعه اشعاع لعالم التدوين يا نوران

zordeak said...

كل سنة وانتى طيبة

ياااااااه كل ده حصل

السنة دى كانت مليانة فعلا

كل سنة وبلوجك بخير

وانتى وشلة الانس بالف خييير

:)

Anonymous said...

نياهاهاهاهاها

مش عارف لية بحس بالشماتة لما أسمع إن عيال صغيرة هيدخلوا المدرسة؟

أتعتقدين أنها عقدة المدرسة اللي ما صدقت خلصت منها؟

اللي فعلاً يفطس من الضحك إن النهاردة إخواتي عندهم مدرسة لأن الترم التاني بدأ ، تخيلي إني صحيت من الساعة خمسة و صليت الفجر عشان بس أطلع مع بابا و هوا بيوصلهم الصبح و أقعد أضحك عليهم عشان أنا عندي أجازة لغاية شهر اتنين بعدين أبدأ سنة تانية، لأ مش عايز أفكر في كدة دلوقتي، كفاية كدة

سلام

أه، كل سنة و انتي طيبة

hummar said...

هاي شله هاي اصحابي طبعا الشمعه وصلت عمرها وبقت ك جي 2 عقبال ماتتخرج من الابتدائيه اعتقد دلوقتي وقت الاستذكارعلشان امتحان الترم لانه طبعا لو ماذاكرناش مش هايبقى فيه بلوج خالص

صاحب البوابــة said...

تحددالافتتاح لدار الكتب الخاصه بي يوم الخميس القادم - 10 يناير - الساعة 6 مساءا في مكتبه البلد , ندعو الجميع لكي نقص سوياً شريط افتتاح الموقع ونطلق شراره انطلاقه نحو خدمه كل المثقفين والمهتمين بالقراءة

العنوان / مكتبه البلد - ميدان التحرير بوسط البلد - 31 ش محمد محمود أمام الجامعة الأمريكيه

تليفون مكتبه البلد / 27922768

نتمني منكم أن تشاركونا هذه اللحظات والتي لن تنجح إلا بوجودكم

DoOoOoOdY said...

كل سنه وانتى طيبه يا شموعتى
وكل سنه واحنا اصحاب ومع بعض
وياااااااااااارب تحققى كل اللى نفسك فيه فى السنه الجديده

Nouran said...

white heart:
وانت طيب
شكرا يا باشا
ايوه كلنا مبهدلين ف الكلية ربنا معاانا كلنا يا رب

الدكتور احمد باشا:
وانت طيب يا دكتور وان شاء الله نعمل مواضيع كتيبر وكويسة :)

coca:
وانت طيبة ويا رب اجعله عام سعيد علينا كلنا يا رب

محمد مفيد:
شكرا يا باشا وكل سنة وانت طيب

احمد باشا زورديك:

وانت طيب يا باشا فعلا سنة مليانه فعلا الحمدلله ويا رب نكون كلنا بخير

محمد فوزي:
ليه الشماته ديه يا ابني وكمان اجازة من دلوقتي لشهر اتنين وتبدأ سنة تانية ايه الكروتة دية ؟؟
كل سنة وانت طيب

الشاكوش:
الحمدلله طبعا طبعا مش هيبقى فيه بلوج ساعتها :) بس خلاص قربت اخلص الامتحانات


صاحب البوابة:
يا رب يكون الافتتاح كان كويس

دودي:
وانت طيبة ويا رب نكون صحاب علطول
ونحقق اللي بنتمناه يا رب