انا اكيد مجنونة

احب اعرفكوابنفسي اسمي نوران اشرف عندي 16 سنة في ثالثة ثانوي علم رياضة جبت السنة اللي فاتت 98.5% وماما وبابا كانو عايزين يدخلوني علم علوم بس انا مرضتش علشان انا نفسي اخش هندسة اصل وانا صغيرة نفسي اطلع مهندسة ديكور وبما اني فاشلة في الرسم وهسقط في امتحانات القدرات اصل انا في الاعدادية نقصت 7 درجات في الرسم وكل الناس كانوا متوقعين ان اجيب مجموع كبير بس الرسم ع العموم الحمد لله انا متكلمتش ع العنوان بتاع الكتابة ده انا اكيد مجنونة ليه انا بحس من جوايا اني مش متظبطة دماغي طقا طبعا الاخطاء اللغوية عندي بالهبل بس سيبك من الموضوه ده خلينا في الجنون اللي عندي انا بس اللي شايفة كده اما اصحابي مش شايفين كده كانو مسميني في ابتدائي نوران عبقرينو وفي اعدادي فيلسوفة عصرها اما في ثانوي بقيت شمعة شمعة تحترق من اجل الاخرين على راي مستر الكيميا بتاعي .

السنة الجديدة جت ومعاها بدات البلوج اصل انا بحب الكتابة اوي وبدل ما اكتب في الاجندة ومحدش يشوف اكتب ع النت والكل يشوف مش هخسر حاجة ع فكرة انا عرفت الموضوع ده(البلوج) من بنت عمي هيا عاملة واحد اسمه وهكذا انا (رضوى اسامة)خطيبة عمروعزت اصل احنا كلنا طاقين بس الطققان بتاعي مش بيظهر غيربيني وبين نفسي وانا قررت اظهلاه علني بس رضوى طبعا انتو عارفينها مش محتاجة تعريف.

انا نفسي احقق حجات كتيرة السنة دي بس خليها في سري دلوقتي المهم انتوا ادعولي علشان اطلع من ال300 الاوائل ع الجمهورية علشان ده بقيت حلمي انا معلقاه قدامي ع المكتب.

طلب اخير لو سمحتوا تدعوا لجدتي ماما ممتي ربنا يشفيها ويطول في عمرها.

نوران الشهيرة بشمعة