Tuesday, July 04, 2006

شحنة تفريغ واعادة شحن

ماما قرأت اللي كاتباه وقالتلي ايه يا نوران لغتك بايظةعلشان الكلام بالعامية زيادة عن اللزوم وبالذات كلمة "اقعت" وكلمة"خت" مع اني شايفاهم عادي- شكلهم كده مش عادي-و
المهم انا قولت اكتب باللغة العربية يعني قولت هاجرب وارجو ان العواقب منكنش وخيمة:)
الكلام ده كده كتبته الساعة سته الصبح من باب التفريغ واعادة الشحن علشان دماغي تشتغل كويس


جلست في شرفة غرفتي اتطلع للسماء لعلها تأتيني بفكرة من تأملي لها .......شكوت لها حالي فقد جف نهر ابداعي وتصحرت جنات افكاري لم اعد استطيع الاستمرار في حياتي بدون ابداع وبدون افكار........شكوت لها همي وسكت وظللت اتأمل حتى لمعت نجمة في السماء ومع لمعان نجمة السماء لمعت فكرة في عقلي ثم نظرت للسماء وشكرتها لانها
اعادت مجرى المياه لنهر ابداعي فروت جنات افكاري شكرا ايتها السماء
ايه رايكم في اسلوبي

25 comments:

إ بـ ر ا هـ يـ م said...

و الله انا عن نفسي باجي عشان اشوف البنوته اللي اسمها نوران اللي في ثانوي ( سابقا ) كاتبه ايه مش عايز شمعه الفيلسوفه و لا شمعه الشاعره و لا الكاتبهعايزك شمعه مش لمبه نيون بس طبعا تقدري تكتبي اللي تحبيه في اي وقت
لا اسلوبك مش ردئ ابدا بالمنسبه السؤال الاخير ده ممكن ياثر علي راي الناس بالسلب

ادم المصري said...

عن نفسي اسلوبك عاجبني جدا وان كنت افضل العامية المطعمة ببعض الفاظ الفصحي ويا سلام بقي لو كانت عامية خام بدون اي اضافات

وعايزك كمان تقولي لماما اني الفصحي دي لغه جميله لكن العامية لغه احلي لانها لغتنا

كتير من الناس فاكرين ان احنا بنتكلم عربي وده مش صح احنا بتكلم لغه جديده اخترعها المصريين لنفسهم

العامية المصرية

علشان كده لازم نحبها ونتمسك بيها لانها لغه جميله وتستحق حبنا لها

اما اسلوبك في الفصيح فهو برده جميل وسلس .. واحب اقولك انك فنانه موهوبه
يمكن انا ما قريت لكيش كتير لكن انت عندك حس فكاهي لذيك في الكلام

وده معناه اني واحد بتحب الضحك .. واكيد كل الكلام اللي هتكتبيه بعد كده وقبل كده الله اعلم اكيد هيكون سخرية من اي موضوع

اللي احب اقوله وانتي لسه في بداياتك انك لازم يكون عندك اسلوبك الخاص علشان تكون متميزة

حطي في دماغك دايما انك بتنافسي بين سبعين مليون مصري

لو قلنا اللي بيكتبوا منهم حوالي تلاتين مليون

يبقي اللي بيقروا منهم حوالي عشرة مليون

ازاي انتي البنت الصغيرة اللي في ثانوي سابقا علي راي ابراهيم هتشد انتباه العشرة مليون

حطي في دماغك النقطة دي وربنا هيوفقك انشاء الله

تحياتي

ادم المصري said...

بصرحة انا ما بحبش اعيد الكلام مرتين لكن امري لله

انا لسه كاتبك دلوقتي عريضة كلام لكن النت الله يلعنه فصل وانا بابعته

نعيد من تاني
كنت بقولك يا ستي ان كتاباتك جميله جدا جدا جدا

والعامية بتاعتك جميله والفصحي برده وان كنت انا بفضل العاميه المطعمة بكام كلمة فصحي لزوم الزواق بس

وياسلام بقي لو كانت عاميه خام بدون اي اضافات تبقي مُكن

انا كمان عايزك تقولي لماما ان فيه ناس عاجبهم كلامي كده وكده حلو .. وزي ما المثل بيقول

لو لا اختلاف الازواق لبارت السلع

وانا بحب العاميه لانها لغتنا .. ناس كتير فاكرين ان احنا بنتكلم عربي وده طبعا غلط

احنا بنتكلم عاميه مصرية
الفصيح دي لغة ماتت من حوالي الف سنه

مستخدمة بس في الدواوين والكتب لزوم الزواق ... حتي لغة الكتب اليومين دول مش العربي الفصيح .. دي عاميه متزنة

ياعني لغة كده مشتقه من العامية بتاعتنا عشان الحمير تفهم

عايز اقولك كمان انك موهوبه جدا .. كتباتك تحمل اسلوب فكاهي مرح بين السطور

وده معناه انك انسانه بتحب الضحك .. يا عني اي موضوع هتكبيه هيكون فية سخرية

لكن الله احب اقولهولك .. انك لازم يكون ليكي اسلوبك الخاص .. لازم تحطي في دماغك انك بتنافسي بين سبعين مليون مصري .. ده غير العرب اللي معاهم فلوس تساعدهم ع الانتشار

لو قلنا م السبعين مليون دول فيهم اربعين بيعرفوا يقروا ويكتبوا

يبقي فيهم حوالي خمستاشر بيقروا ومهتمين بالقرايه

لازم تحطي في دماغك اني تغلي البنوته الصغير اللي في ثانوي سابقا علي راي ابراهيم .. تقدر تشد انتباه خمستاشر مليون قارئ

المهمة صعبة ... ولكن بالارادة ما فيش مستحيل

radwa osama said...

نور الجميلة ..برافو

Nouran said...

ابراهيم:
شكرا يا دكتور بس احب اقولك انها مش فلسفة دي فزلكة حرام عليك انا لمبة نيون اينعم المستر كان بيقولي اخرك عود كبريت لما يضايق مني بس انا اتنين نور مش لمبة وممكن ابقى شمعة
شفت غيرت السؤال اللي تحت علشان ميأثرش بالسلب ع الناس شكرا ع النصيحة :)

ادم المصري:
شكرا والله رفعت روحي المعنوية ولما بكتب بالعامية مش هتلاقي ولا كلمة فصحى الا اذا مكنتش عارفة اكتبها يعني غصب عني والمصريين اهل الاختراعات كفاية الكلام اللي بنتكلمه
كنت قولتلي موضوع التنافس ده ع الامتحانات علشان يحفزني يلا اللي حصل:)
عارفة موضوع النت يقطع وانت بتكتب ده موضوع رخم بس التعليقين اتنشروا والتعليق التاني حلو زي الاولاني بس شارحه معرفش هوا كده وخلاص :)

رضوى:
شكرا جزيلا

سومة said...

نوران

اسفة اذا كنت حعلق فى مدونتك على موضوع بعيد عن اللى انت كتباه وكمان يمكن لا يخصك بس السبب انى طلب منى عدم التعليق عند صاحب المدونة ابراهيم وانا ححترم هذا

علقتى هناك قولتى
انا كنت متابعة حواراتك انتن وسومة من البوست اللي فات
وامبارح كتبت تعليق كبييييييييير جدا وجت انشره عملت ستوب والكلام كله اتمسح قولت اكيد من عند ربنا حيث من تدخل فيما لا يعنيه لقي ما لا يرضيه
ومفيش مانع انك تعمل مع نفسة قعده صفا علشان شكلك مكتئب فعلا يعني لو خت نصيحة من حد ومعجبتكش بس لقيت فيها حاجة ممكن تنفعك مفيش مشكل
بصراحة مش ده كل اللي عايزة اقوله بس زي ما قولتلك من تدخل فيما....
الى اخر المثل او المقولة مش عارفة
بس فرفش يا دكتور احنا في اجازة :)

انتهى تعليقك
كان نفسى اقرأ تعليقك مش علشان ارد علية او انى غاوية مشاكل لكن تعليقك كان حيفدنى شخصيا فى معرفة اذا كان اسلوب الصدمة فى ابداء النصيحة مفيد او لا ـ لان كان هدفى الاساسى اعطاء نصيحة مخلصة لشاب ذو مستقبل ـ لكن اخذتة العزة بلاثم وبدل ما يسمع اتنطط

نوران
انا متخصصة تخصص عالى فى علم النفس وخبرة سنوات طويلة وياريت تكتبى التعليق اللى كنت ناوية تنشريه بس اتمسح منك مرة تانية وبعد كدة ابقى امسحية لو عاوزة يمكن تتحقق الفايدة

بالمناسبة انا متوقعة لك نجاح باهر فى حياتك العملية وحتوصلى لكل اللى عاوزاة لانك عندك الامكانيات الكامنة وصدقينى ـ مش بقلك خبرة طويلة
لكى كل الحب ومنتظرة تعليقك عندك هنا او عند ابراهيم ومش حعلق علية وهذا وعد ـ المخلصة سومة

إ بـ ر ا هـ يـ م said...

يا بنتي ما اقصدش انك بتتفلسفي .. اقصد بس بحب كلامك البسيط العامي البايظ علي راي الماما بتاعتك و ده اللي بيشدني لمدونتك و بيخليني ضيف مستديم عندك
تقدري تحققي طلب سومه لاني كمان عايز اعرف كتبتي ايه

Nouran said...

سومة:
زي ما قلت لابراهيم مش بحب اتدخل فيحاجة تخصني بس حضرتك اللي طلبتي مني
التعليق كان كالاتي:
اولا : انت يا ابراهيم فكرتني بنفسي لما ابقى مضايقة بتفنن في الرد ع اللي ضايقني
ثانيا: انا معاك ان مينفعش حد ينصحني نصيحة وهو ميعرفش عني حاجة لازم الللي ينصحني يكون انسان قريب مني يعني مينفعش اشوف واحد عامل حاجة في الشارع اروح انصحه ممكن تكون مش من طبعة وحصلت فلته
ثالثا: انا لو حد نصحني ورديت عليه بس لقيت حاجة ممكن تفيدني هعمل بيها
رابعا: يا سومة طريقة النصيحة مش كويسة يعني لو كنت قولتيها بطريقة احسن من كده كان ممكن يكون الرد احسن من كده يعني المفروض كنت تختاري طريقة احسن من كده لو عايزة تنصحي حد متعرفيش ردة فعله ازاي فلو كنت عاملتيها بهدوء اي حد كان هيتقبلها حتى لو مضايق بس انت دخلتي في الدكتور شمال يعني هوا لي حق
خامسا: فرفش يا دكتور احنا في اجازة

هو ده نص التعليق ان مكنش وقع مني حاجة وكنت مكلماكي بصيغة المذكر بس صلحتها
ومظنش ان اسلوب الصدمة هينفع زي ما كنت كاتبة قبل ما حتى حضرتك تقوليلي

وشكرا ع توقعك ليا بالنجاح وانا مستنية النتيجة ادعيلي
ويا ريت تردي عليا علشان اعرف رايك بخصوص الكلام اللي قولتهولك وبعد كده هرمي التلات تعليقات علشان ملهمش علاقة بالموضوع زي ما انت قلتي في الاول واي خدمة بس حاولت اجمع افكاري علشان افتكر التعليق :)

Ahmad El-Saeed said...

حلوة يا نوران .... بس حاولى تهتمى بالقواعد الإملائية شوية .. عشان فيه جمل , لو الواحد قراها على نفس واحد , ممكن نفسه يتقطع

غير كده , جو البوست حلو قوى

تسلم إيديكى و إبقى طمنينا لما النتيجة تطلع

سومة said...

شكرا جزيلا يانوران على الرد
وانا لماقلت ان انا متوقعة لك نجاح باهر فى حياتك العملية وحتوصلى لكل اللى عاوزاة لانك عندك الامكانيات الكامنة ده ملوش علاقة بمجموع الثانوية العامة انت فى اى مجال حتنجحى اى كلية حتكون بالنسبة لك الشهادة اللى عوزها المجتمع النجاح فى الحياة العملية هو اللى بعد مرحلة التلمذة ـ ارجو ان تحققى كل طموحاتك مع ثقتى فى ذلك
ختاما انا لااعرف ابراهيم وهو لايعرفنى علشان كنت اجملة وانا بقول له النصيحة حسيت ان دة الاسلوب المناسب والمباشر بالنسبة لحالته ـ الان تقدرى تمسحى اللى انت عاوزة لكن ياريت تعطى فرصة لابراهيم يقرأ هذا الكلام ـ لك كل الحب ياصغيرتى ودعوات حارة بالمجموع الكبير ـ تنت سومة

Nouran said...

احمد:
شكرا بس حكاية القواعد دي صعبة جدا عليا انا فاشلة في العربي وان شاء الله ساعة النتيجة هعمل اللي ميتعملش بس يا رب انور السنة دب

طنط سومة:
انا مش همسح حاجة اصل اللي بيرجع في كلامه بيبقى عيل وانا بصراحة عيلة شور عيلة"هبقى احكي ع الموضوع ده بعدين"
بس مجموع الثانوية العامة خطوة في طريق الالف ميل يبقى فاضل999ميل ربنا يقدرني واخلصهم حاجة اخيرة بعد اذن حضرتك طنط بتكتب بال"ط" مش بال "ت"
انا اسفة بس اظن كده ومعرفش ليه حضرتك حطيتي لابراهيم النصيحة كده علطول بس انا راي الهدوء احسن في النصايح بالذات بغض النظر عن الشخصية
اللي بديها النصيحة بس زي ما حضرتك قولتي ده تخصصك وفي الحالة دي من قال لا اعلم فقد افتى :)

pharoinlove said...

اسلوبك حلو وجميل بس وانا اشجعك تكتبى بيها علطول.ااعامية كمان ليها ميز انها بتنقل الاحساس زى ما انزل

ام المريله الكحلى said...

انا قريت البلوج كلها
عسوله يا نوران
صدقنى العاميه لغه جميله وكفايه عليكى ان الكل فاهمها ولا ايه

فيولينا said...

حلوة يا نوران
بس مكنش ليه لازمه السؤال اللي ف الآخر

هوميروس said...

لا لايمكن ان نترصد للإبداع ببندقية القلم فما الابداع الا ومضات في سماء مظلمة تظهر في اوقاتها الخاصة التي لا نعرفها ثم تزول لتاتي اخري اما ما يمكن ان يدوم هو كيفية صنع بوتقة جميلة للابداع وهي الخبرة التي نكتسبها بالتمرس

أجدع واحد في الشارع said...

اكتبى كمان وكمان
بجد البوست جميل جدا
انا اول مرة اجى هنا بس باين عليا هكون مدمن لمدونه دى
عشان باين عليها
هى حلتى بظبط
وبأذن الله هتكون من الاوئل

Nouran said...

pharoinlove:
شكرا والله معنوياتي بتترفع جدا لما حد يقولي كده والعاميه بصراحة بتنقل

ام المريلة الكحلي:
كفاية ان الكل فاهمها ع رايك :)

فيولينا:
امال لو شفتي السؤال اللي قبلي كنت قلتي ايه
انا حاطاه علشان اعرف رائيكم ولو مكنش عجبكم الاسلوب اكون عارفة قدراتي ايه واحاول اني اغير من اسلوبي
هوميروس:
عندك حق واالله الابداع ده بيجي كده لوحده ويهرب لوحده برضه بس حلوة بندقيه القلم دي :)

ابن الشارع:
يا رب متكنش اخر مرة
انا هكتب بس انتوا يا ريت متزهقوش مني وياااااااا رب اكون من الاوائل :)

مهندس مصري said...

المهم الفكرة اللي جاتلك كانت كويسة ولا ايه
تاني حاجة ياريت لما تروحي هندسة القاهرة ابقي سلمي لي غلي كل الدكاترة اصل دول حبيبي قوييييييييييييييييييي

Nouran said...

الفكرة اللي جاتلي كانت بتاعة البوست علشان مكنتش لقيا حاجة اكتبها فانت اللي تحكم عليها كويسة ولا لا

اكيد تبعك وحبايبك لحسن لو مطلعش بجد وقولتلهم هيتوصوا بيا جامد :)

محمود عزت said...

يانوران , خليكي بالعامية , ألذ و أخف
و إكتبي زي ما إنت عايزة!
هي الناس حتقولنا نكتب إزاي بره البلوج و جواه!!!

مـحـمـد مـفـيـد said...

السلام عليكم
والله انا شايف ان كلام جميل جدا ومعبر ومش لازم يكون بالفصحي علشان يكون حلو المهم التعبيرعن اللي انتي حساه باي اسلوب احييكي جدا

Nouran said...

محمود عزت:
والله انا عن نفسي بفضل العامية بس حبيت اجرب لو كتبت بالعربي هبقى عاملة ازاي :)

محمد مفيد:
وانا كمان معاك اعبر عن اللي عايزاه باسلوبي بغض النظر عن الطريقة :)

film69 said...

نوران
اعملي اللي يريحك ، بس بلاش موضوع الفصحى ده لحد الصيف ما يعدي

Nouran said...

film69:
بس اشمعنى مكتبش بالفصحى في الصيف ليه علاقة بالحر في الصيف ؟
:)

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول