هندسة القاهرة

كدة بقيت رسمي ف الكلية مبروك يا نوران :) انا عرفت من التليفون ف رقم بنتصل بيه ونقول رقم الجلوس تتطلع الكلية اللي جتله بابا اتصل الصبح وقالي مبروك يا نوران جتلك هندسة القاهرة

كان نفسي يجي الجواب علشان اتفرج عليه واقولكوا شكله ايه اكيد شوفتوه بس ا نا لسة محصليش لشرف وشوفته

.

يوم التنسيق رحت سحبت الورق الساعة 10 كان فاضي نوعا ما بس اللي لفت نظري ان كل البنات والاولاد هناك شكلهم دكاترة معرفش اشمعني يمكن علشان اي حد شاطر بيبقى عايز يخش طب ادبي علمي كلهم دكاترة حاجة غريبة يعني

.

جبت الورق والمفروض اني شريحة اولى اقدمه يوم الجمعة مش فاكرة كام سبعة المهم مكتبتش الرغبات غير بعد الفجر لا واحسن حاجة اني لزقت ال48 طابع لوحدي بس كانوا استيكر اكتشفت انهم استيكر من زمان يعني مش من ايامي بس يا سلام فضلنا للساعة ستة ونص قاعدين بابا دخل نام ساعتين وانا كملت لحد الساعة تسعة وبعدين رحنا مكتب التنسيق المعظم ونظرا لانني شريحة اولى وعلمي بخلصت بسرعة ورجعت البيت طبعا مش هقلكوا عملت ايه ولا حاجة طبعا فطرت بعد كده ع السرير مباشرة والحمد لله ع قد كده :)

.

والناجح يرفع ايده هيه

هيه هيه هيه هيه هيه هيه هيه هيه هيه هيه هيه هيه هيه هيه من هنا للصبح

اليوم المتفق عليه

كلنا مع لبنان وفلسطين ضد اسرائيل والمحتلين

.........................
بالعربي بالانجليزي المهم نسمع صوتنا للعالم
وان لم نستطيع حمل السلاح فالنحمل الكلمه
وبأي لغة نستطيع نشرها

بالإنجليزية

We are with Lebanon and Palestine against Israel and occupiers

والفرنسية

Nous sommes avec tous le Liban et la Palestine contre l’Israel et les occupants

والألمانية

Wir sind zusammen mit dem Libanon und Palästina gegen Israel und Besatzer

والإسبانية

Somos todos con Líbano y Palestina contra Israel e inquilinos

والصينية

我们都是同黎巴嫩和巴勒斯坦对以色列占领者

واليابانية

私達はイスラエル共和国および占有者に対してレバノンおよびパレスチナとのすべてである

اولا........ وثانيا ........وثالثا

اولا اعتذار ارجو ان تقبلوه

بناء ع طلب سيادة الوالد " بابايا الحبيب" انشر اعتذاري عن الاخطاء الغير مقصودة ف البوست اللي فات اكلمة الثورة الثورة الثورة الواو قبل الراء نأسف اصلي كنت بفكر هعمل ايه بالثروة اللي معايا ما انا ناجحة بقى :)

وعن كلمة غايبين والمفروض جايبين بالجيم مش الغين

وما خفي كان اعظم انا حاسة ان محدش خد باله اصلا :)

ثانيا: رسالة الى عمي الحبيب "عمو احمد حبيبي" وصديق طفولتي-ع فكرة عمو كبير يعني مش تقارب سن -اوك

يا رب تقوملنا بالسلامة يا رب بعد اجراء لجراحة بسيطة معرفش ايه نوعها بس الحمد لله خلصت ع خير

عمي يبقى اخو بابايا وابن جدي ده طبيعي اما صديق طفولتي فعلشان هو الوحيد اللي كنت بكلمه ف العيله اصل انا كنت ف السعودية مع بابا وماما زمان وهو كمان كان هناك فان الوحيد اللي انا مستعرفة عليه وكان بيلعب معايا كوتشينة وكنت بكسبه متقولوليش ازاي طريقة النصب السرية بتناعتي وانا عندي اربع سنين طبعا كنت بلعب اصعب لعبة فيكي يا مصر كنت بلعب الكومي واخد كل الاولاد لنفسي والسبعة الحمرا السنبوكسة وبكده كنت بكسب من الدرجة الاولى طبعا :)

وكان بياخدني معاه الشغل يوم الخميس علشان نص يوم واي حد يساله مين ديه يقولوه دي سكرتيرتي الجديدة وطبعا كمية الحجات الحلوة اللي كنت باخدها كنت متروقة فعلا وكمان عملي اسمي ف ورقة كبيرة بالبالونات وفي كل بلونة فيها حرف ع الكمبيوتر عندي لحد دلوقتي

يا سلام وكان برضه بيلعب معايا اتاري ايام ما كان الاتاري هو الكل ف الكل وعايزة اقوله علشان هو هيخش عندي ويشوف انا كتبت ايه انا والله العظيم بحبك اوي يا عمو ويا رب تكون دي اخر العمليات :)

ثالثا:موعدنا يوم الخميس 27 لنشر الكلمات اللي فكرت بيها ليالي فكرة كويسة نعمل حاجة احسن من مفيش

كلنا مع لبنان وفلسطين ضد اسرائيل والمحتلين بالعربي بالانجليزي المهم نسمع صوتنا للعالم وان لم نستطيع "حمل السلاح فالنحمل الكلمه وبأي لغة نستطيع نشرها

بالإنجليزيةWe are with Lebanon and Palestine against Israel and occupiersوالفرنسيةNous sommes avec tous le Liban et la Palestine contre l’Israel et les occupantsو

الألمانيةWir sind zusammen mit dem Libanon und Palästina gegen Israel und Besatzer

والإسبانيةSomos todos con Líbano y Palestina contra Israel e inquilinosوالصينية我们都是同黎巴嫩和巴勒斯坦对以色列占领者

واليابانية私達はイスラエル共和国および占有者に対してレバノンおよびパレスチナとのすべてである

مع اني مش فاهمة اي حاجة من المربعات دي بس الترجمة بتاعتها بالعربي فوق

مش هكتب عنوان

طبعا مش بحب اكتب ف السياسة كتير علشان وجع الدماغ وارتفاع ضغط الدم واحمرار العينين وكل الاعراض اللي بتجيلي لما بسمع النشرة او بقرا الجرنان-انا عادة مش بقراه بس بشوف الصفحة الاولى وصفحة الرياضة وصفحة الحوادث والتحقيقات واخبار محلية علشان درجات الحرارة اصلا احنا مش بنجيب جرايد علشان مفيش حد بيقراها بس لما بابا يجي ممكن نجيبله الجرنان-شفتوا
المهم الكلام اللي هكتبه مظنش انه ليه علاقة بالسياسة بس فيه اسرائيل وممكن يكون ليه علاقة بالسياسة مش مشكلتنا
المهم النهاردة لا امبارح يوم الاحد يعني 23يوليو التاريخ ملوش علاقة باللي هقولوه الرغم انه يوم ثروة 23 يوليو بتاعة عبد الناصر اللي النهاردة روان بتسال ماما هما غايبين اغاني وطنية ليه ع كل القنوات قالتلها ده النهاردة الذكرى معرفش كام لثورة هيا كانت 52 ولا 56لا كانت 52 صح احتفلوا بالاغاني ما شاء الله :(

فضلت نايمه لحد الساعة سته بس صحيت صليت الظهر الساعة 3 ونمت تاني برضه مش مشكلتنا طبعا حلمت مليون حلم زي كل يوم بس حلم واحد علق ف دماغي كان معلق اول ما صحيت وبعدين علق دلوقتي خلاني ااجل كل اللي هكتبه
المهم حلمت ان رضوى ورشا معلش والله ده كان ف الحلم معرفش اشمعنى انتوا وكان عمو اسامة موجود برضوا ف اسرائيل معرفش ليه بعد كده كنت عايزه اكلم رشا بس خفت اكلمها قلت بعت مسج بعد كده سبحان الله بقيت هناك فين احنا فين احنا ف اسرائيل مع اننا كنا ف الحلم بس كنت خايفة اوي اوي اوي بمجرد سماع كلمة اسرائيل دي بصيت من بعيد لقيت زحمة كتير اتضح ان كل دول مصريين بس الغريب ان كل ده كان ف لصحرا ع الحدود-هوا احنا عندنا حدود مع اسائيل؟- بعد كده خير الله اجعله خير ان الاسرائليين ورانا واحنا مشيين مشيين بسرعة بنجري لحد ما وصلنا لمصريين اللي كانوا هناك واقفين ع الحدود معرفش اتخيلت ف الحلم طبعا ان الحدود دي عبارة عن بوابة مقولة والجنود قربوا قربوا اهم جايين علينا البوابة اتفتحت دخلنا احنا ف مصر يا حسيت برااحة غريبة حسيت بالامان يا ايه ده الواحد ميعرفش قيمة بلده غير لما يرح اسرائيل ويرجع لبلده ف الحلم

حسيت لما صحت اني فرحانة جدا ان حسني مرداش يحارب او يدخل ف الحرب وبقيت نفسي اشكره زي ما جدو عمل ف تدوينة بعد ما كنت هكتب بوست ع الريس بقول فيها انه صعبان عليا من اللي بيعمله بس برضه الواحد مينفعش يقول انه كويس علشان وفرنا الامن والاكل لا

بس حسيت بالانانية اني فرحانة ان معندناش حرب وغيري من العرب مفيش بيت يناموا فيه علشان الصواريخ الي دمرت بيتهم معرفش دي انانية ولا ايه بس الحمد لله ع نعمة االامن اللي احنا عايشين فيه لما نضرب من ولاد البلد احسن من لما نضرب من ولاد بلد غيربلدنا

يا ريت محدش يعلقلي ويقولي كنت متغطية كويس لان ده اليوم الوحيد اللي صحيت لقيت نفسب متغطيه ماشي

حجات بتسعدني

يا سلام استعت نشاطي بالرغم من البرد اللي عندي-حد بيجيله برد في الصيف حاجة صعبة- رحت النهاردة لا امبارح- علشان احنا دلوقتي الفجر- الصبح بدري الساعة 10 علشان اجيب الملف جبته وطلعت الطوابع استيكر و48 رغبة لسه مكتبتش حاجة بفكر ف ترتيب الرغبات اللي بعد لااولانية بس برضة بيلعبوا ف دماغي يقولولي خشي حاسبات قلت اعمل استخارة واللي في الخير يقدمه ربنا بس انا عايزة هندسة من زمان يلا مش مشكلتنا دلوقتي المهم نخش ف الموضوع جدو طلب مننا كل واحد يكتب عن الحاجة اللي بتسعده فانا بعد النتيجة يعني دلوقتي هكتب الحجات اللي بتسعدني ممكن تكون حجات بسيطة وهكتب حجات كتيرة ماشي بس الحجات مش بالترتيب

.

1-لما اكون بحل مسائل مكلكعة رياضة وفيزياء

.

2-لما بابا يكون معانا ونخرج معاه

.

3-لما بلعب بلاي ستيشن بس اكسب

.

4-لما اشوف حد بحبه صدفة او اشوف حد بقالي كتير ماشفتهوش

.

5-لما حد بيعبرني بمسج يا قمة السعادة

:)

6-لما يبقى في ماتش جامد والفرقة اللي بشجعها تكسب

.

7-لما نكون عاملين محشي

.

8-لما اروح فيلم مش فاشل

.

9-لما حد يشكر فيا من غير مااعرفه كويس

.

10-لما كنت بجيب الدرجة النهائية في اي امتحان

.

11-لما بنبقى في العيد الكبير واقطع معاهم اللحمة

.

12-يا سلام لو اتنين سندوتش فول من ع عربية معينة مش محل لازم العريبية دي دماغ

بقى برستيجي مايسمحش غير من ع العربية دي ويكون الساعة سته الصبح قبل ما نام بيكون طعمة فراخ مشوية محدش يتريق حقيقة والله

.

13-يا سلام لو الواحد يختم المصحف بجد بفرح جدا بالموضوع ده و حاجة تانية بتبقى جميلة التراويح في رمضان وبالذات لما رجلي توجعني من الوقفة بستمتع جدا بالموضوع ده

.

14- لما نروح عمرة اول وهلة لما تشوف الحرم تحفة تحس انك طاير فوق زي الحمام

حولين الكعبة الكلام ده سواء في مكة او المدينة

.

15-لما اكتب قصة من القصص الفاشلة اللي بكتبها ووريها لاخواتي ويعجبوا بيها لازم

طبعا ما انا اختهم الكبيرة

.

16-لما بلعب مع سوكا اقصد بسملة اخت بوبا الصغيرة وبرضه لما بلعب مع بوبا بس

سوكا اكتر

.

17-لما افهم حد حاجة مش فاهمها

.

18-لما حد يبعتني اعمل حاجة واعملها كويس

.

19-لما ماما او بابا بيدعولي

.

20-لما اكون منهمكة في المذاكرة وبنجز اللي ورايا واللي قدامي :)

.

21- لما اجيب كوتشي عجبني ويا ريت يبقى مريح

.

22-لما اروح دريم بارك مع صحابي زي السنة دي

.

23-في الشتا والجو ساقعة اوي اوي واشرب مج كبييير كاكاو دافي لا سخن وجميل والواحد يدفى يا سلام وبرضه في الشتا في يوم ساقعة اوي واناام بدري تحت البطنية اللحاف بس شرط اكون مخلصة كل المذاكرة اللي عليا علشان استمتع ومفكرش في المذاكرة :)

.

كفاية كده لحسن هنجت وشكل الحرارة طلعت تاني اروح اشوفها سلام

اه انا حطه نقط علشان السطور تتعدل مش بتطلع زي ماانا عايزاها

:(

تساؤلات

تساؤلات نطت في دماغي لما شفت امبارح قناة الجزيرة ومكتوب في الشريط اليوم السابع للقذف ع لبنان- طبعا انا مليش ف اي حاجة من دي- بس الكبار كانوا بيتفرجوا واقعدت اتفرج معاهم ونطت ف دماغي حجات كتيرة اوي

العرب عاملين

بمبدأ من خاف سلم

.ولا بمبدأ رحم الله امرء عرف قدر نفسه

ولا بمبدأ عيش ندل تموت مستور

ولا بمبدا الجبن سيد الاخلاق .

ولا بمبدأ انا واخويا ع ابن عمي وانا وابن عمي ع الغريب

.

ربطت المقولات دي بالوضع الراهن في لبنان ولقيت ان العرب بيعملو بالمبدأ الاول والتالت والرابع طبعا

من خاف سلم والجبن سيد الاخلاق من المبادئ اللي الحكام العرب بيحبوا جدا لانها بتخلصهم من المشاكل سواء ف فلسطين او ف لبنان حاليا

اما عيش ندل تموت مستور ده اهم واحد علشامن لو قرروا يحاربوا مظنش ان في جيش فهيتفضحوا ف هيندلوا مع لبنان ونيتهم صافية انهم بيعملوا الصح

اما المبدا التاني: "رحم الله امرء عرف قدر نفسه" فده ممكن يكون استبن عندهم ع اساس ان امريكا بتساعد اسرائيل

ام اخر مبدأ وهو انا واخويا ع ابن عمي وان وابن عمي ع الغريب مظنش انهم يعرفوا او عارفينه ومطنشين او ممكن بيحسبوا اسرائيل هي اللي بنت عمهم ولبنان الغريب :)

تساؤل اخير : هو في في الدول العربية جيش " انا عارفة ان كان في زمان عندنا جيش هو لسة موجود" حد يجاوبني لو سمحتوا

الحمد لله

من الثانوية للكلية والمجموع قرب ع الماية-مقربش اوي يعني - و

الناجح يرفع ايده ويقول ويقول دايما ناجحين ع طول دايما ونجاحنا يطول دايما دايما ع

طول دايما دايما علطوووووووووووووووووووووووول دايما دايما دايما دايما دايما دايما

مع اني يعني قليت السنة دي كتير بس حاسة وكان حمل انزاح من ع قلبي والحمد لله المستوى الرفيع هو اللي خلى المجموع شكله حلو من غيره كنت اتشحورت طبعا نقصت ف كل مادة 2 درجة ما عادا الاقتصاد والاحصا قفلتها والعربي نقصت 2ونص

طبعا مظلومة ف الانجليزي لاني حلاه كله صح بالترجمة وفي الفيزيا برضه بس الرياضة كويس كده بالنسبة للامتحانات اللي كانت جاية والحمد لله ع قد كده

بس الملحوظ ان المجاميع كلها قلت للعلمي بس واالادبي في ارتفاع ملحوظ والتقارير اللي

اعددتها انا ورضوى تشير الى ذلك

النت كان يحرق الدم ويفور الاعصاب والنتيجة جاتلي من السعودية بابا اتصل وجبهالي فضلت اعيييييييييييييييييييييييييييييييط لحد ما عرفت الدرجات

ابن خالتي جابهالي من سايبر حتينا واقعد يحكيلي ع اللي حصل في السايبر

محمود:

يا بنتي مشفتيش اول ما جت عملوا ايه

انا: عملوا ايه يعني

محمود:طبعا كلهم تماتنمينات وسبعينات وحاجة صعبة اول ما اسمك ظهر ع الشاشة الراجل مسك الكمبيوتر وقال نوران اشرف طب قلتيله طب ايه انت مش شايفها رياضة واقعدوا يقولوا ايه البت الدحيحة دي

انا : كدة ودحيحة يا ربي الحمد لله

بعد كده النت اتكرم عليا وظهرلي النتيجة بعد ما عرفتها من مصادر متعددة

والحاجات اللي لفتت انتباهي ان في واحد قربنا قدي طول عمرنا انا اجيب اعلى منه الترم الاول وهو يكتسحني الترم التاني وحصل بجدارة كان جايب النص الاول 98 والتاني جاب 100 والله فرحتلوه اوي علشان عايز يخش طب وهو كمان ما شاء الله شاطر اوي وطيب وبيعذبني دايما مش مشكلة

مبرررررررررررررررررررررررررررررررررررررررررررررررروك

عليا و ع كل صحباتي

وانا فرحانة وقلبي سعيد ماما جابتلي نونو جديد-ملهاش علاقة بالنجاح بس قولت اكتبها

علشان انا فرحانة" منعا للفهم الخاطئ الاغنية دي كده بمناسبة النجاح "

اوك- :)

انا نجحت

جبت 98.4 بالمستوى رفيع هقولكوا بالتفصيل بكرة

فاضل اقل من 24 ساعة

حقيقة مش خيال نوررررررررران فوقي النتيجة بكرة

يا سلام ما انا عارفة

انتي خايفة

انت بتسألي ده سؤال انتي متعرفيش الامتحانات كانت عاملة ازاي

ما انت حليتي خلاص وخلصت واللي حصل حصل

هو ايه اللي حصل حصل

خلاص النتيجة مكتوبة ومفيش حاجة هتغير اللي مكتوب

شكرا جدا

حاولي تهيئي نفسك انك هتنقصي

انقص ده انا يجيلي ترالالي

مش انت بتقولي الامتحان كان صعب ما انت كنت معايا

انا عارفة انه صعب بس انت حليتي كويس

مين قالك ده تفاؤل انا محلتش حلو وهنقص في الميكانيكا والاقتصاد و الفيزيا والعربي حتى المستوى رفيع كان صعب جدااا

مش صعب قولي رخم والميكانيكا كلها من الكتاب

الاستاتيكا اه لكن الديناميكا لا

بصي لن يصيبنا الا ما كتبه الله لنا

ع رايك امري لله اروح استنى الوزير يكلمني بكره الساعة 11

انت هبلة يا بنتي

اسكتي انت انا عارفة انا بقول ايه

من الاخر ده حوار كل يوم في دماغي اكلم وارد ع نفسي في نفس الوقت وفي الاخر اتريق ع نفسي واقول اروح استنى الوزير من غلبي

انا خااااااااااااااااااايفة جداااااااااااااااااااا وبحاول اهيئ نفسي للصدمة وطبعا بابا واماما يقولولي انت عملتي اللي عليك وربنا هيجزيك ع قد عملك-طبعا انا بسمع دي ودماغي بتضرب-وبعدين يقولولي مش هنزعل اي حاجة تجيبيها هتبقى كويسة- انا عارفة انهم بيقولولي كده بس بس هما هيزعلوا من جوه-بس انا حاسة اني عملت اللي عليا بس الامتحانات صعبة يا ماما ومليش مزاج اعيط علشان بصدع من العياط فده حل مش كويس وكمان السنة اللي فاتت محدش متوقع المجموع واتفاجئوا فالسنة دي كلهم مستنين المجموع القنبلة اللي هتفرقع فيا انا كفاية كدة

نسيت اقول حاجة كنت مع رشا النهاردة كنت مبتئسة برضه وبقولها: بصي لو جبت مجموع معجبنيشهتوقف عن التدوين وممكن ارمي البلوج

هي : وايه العلاقة بين النتيجة والبلوج انت هبلة

انا: لا علشان اعاقب نفسي احرمها من حاجة بحبها

طبعا رشا مقتنعتش بالكلام ده بس والله الموضوع ده بيدور في راسي بس مظنش اعمل كده ممكن اخد اجازة تصالح مع نفس الكلام ده لو لقدر الله جبت مجموع وحش انا خايفة جداااااااااااااااااااااااااااااااااااااا

ع فكرة انا ممكن مخشش علطول بعد النتيجة علشان مش هبقى في البيت بس هتعرفوها ان شاء الله كويسة او مش سواء مني او من رضوى او من رشا او من رضوى عندكم مصادر متعددة :)

صحبتي الانتيخ

انا قلتلكلوا مش هكتب غير ساعة النتيجة بس انا بغزالة بصراحة ده مش موضوعنا المهم صحبتي الانتيخ "رضوى " عملت بلوج بعد عذاب دام كتير :)
اناوهي صحاب من اولى ابتدائي اينعم العلاقة لم توثق غير في ثانوي بس برضه كان يتقال علينا مقربين في ابتدائي واعدادي
انا وهي مش زي بعض في حاجة ممكن نكون بنكمل بعض بس مختلفين كتير بالرغم من اختلافنا بس احنا متفقين دايما والحمد لله وبكده مكنش انا اصغر مدونة لانها اصغر مني بشهر و 10 ايام شوفتوا بقى خلاص راحت عليا و

الحماسة واخداها وكتبت مواضيع حلوة يالا شجعوا الجيل الجديد من المدونين انا ان شاء الله خلي بقية صحباتي يعملوا مدونات برضه عيال عندها افكار حلوة كتير
ع فكرة رضوى كاتبة عليا موضوع جامد عن حبي الشديد للقطط -طبعا بتريق- انا بخاف منهم جدا بس والله القطة اللي حكت عليها دي كانت من غير عنين ولا ديل
وبتنونو من غير صوت ناقصة الحجات دي علشان اخاف انا اصلا بخاف خلقة ربنا كده

ايه السبب اللي ممكن ميخلنيش اكتب

كتبت يجي 6 بوستات وكان مصيرهم الموت مش الموت اوي تقدر تقول التاجيل شكلي

لما اتريقت ع موضوع الصفر بتاع ابراهيم يظهر عفاريت البوست زعلت وحطتني في

دماغها وخلتني معرفش اكتب حاجة

ابراهيم والنبي خليهم يبعدوا عني خلاص والله حرمت

مقدرش افضل كل ده مش بكتب كفاية ايام المدرسة بس ممكن ميكونش سبب العفاريت

ممكن يكون سبب داخلي حالة خوف داخلي مش ظاهر برة خالص علشان اللي يشوفني مش

هيقول واحدة مستنية نتيجتها بصراحة بحب ابان باردة ومش هممني بس

من جوة ببقى خايفة جدا جدا او ممكن ميكنش السبب ده برضه اكيد بسبب تشويش

لذهن اللي بعاني منه من غير معرف سببه متسالونيش ازاي بس هو كده وخلاص

اوممكن يكون بسبب كتر الافكار بس كتر الافكار نابع من تشويش الذهن و ممكن يكون

بسبب انه مفيش رغبة بالكتابة بس ازاي مظنش برضه يكون هو السبب اني مش عارفة

اكتب الموضوع بالصورة المرضية بالنسبة ليا او ممكن يكون ان الورقة والقلم وحشوني

وعايزة اكتب بيهم مش على الكمبيوتر بس برضوا مظنش انه سبب كفاية مش

عارفةاممكن لو بعدت شوية اكتب حلو لا مش فكرة كويسة هي اكيد حالة وهتعدي

يلا محدش واخد منها حاجة افرفش علشان احنا في اجازة ومفيش مشكلة لو خرجت مع

صحابي كل الخروجات بتتفركش هنحاول نبني خروجة كويسة يالا نأسف للازعاج وللدوشة :)

تلات حاجات عايزة اقولها

اول حاجة : مبروووووووووووك يا دكتور ابراهيم ع النجاح والله انا فرحتلك يا دكتور

كاني انا اللي نجحت

تاني حاجة: مبرووووووووووووك لالمانيا عالمركز التالت اينعم مشفتش الماتش علشان كنت بره بس اكيد

كان لو وكويس ان المانيا نالت من الحب جانب

تالت حاجة:محدش عنده واسطه يجيبلي النتيجة علشان اتخنقت "انا بهزر"

بيقولوا النتيجة هتطلع يوم السبت في المدرسة والجمعة بليل ع النت :)

تحديث:

ايطاليا خدت كاس العالم الماتش كان جامد خصوصا الشوط التاني بس الفرنسيين صعبوا عليا والله كانوا بيلعبوا حلو بس زيدان اتطرد ممكن يكون ده سبب تضيع ضربة جزاء لا لا ملوش علاقة بالموضوع :)

النتيجة معرفش هتطلع امتى بالظبط اظن ان الاشاعات انها هتطلع السبت بس الاكيد انها هتطلع الاسبوع الجاي ان شاء الله

شحنة تفريغ واعادة شحن

ماما قرأت اللي كاتباه وقالتلي ايه يا نوران لغتك بايظةعلشان الكلام بالعامية زيادة عن اللزوم وبالذات كلمة "اقعت" وكلمة"خت" مع اني شايفاهم عادي- شكلهم كده مش عادي-و
المهم انا قولت اكتب باللغة العربية يعني قولت هاجرب وارجو ان العواقب منكنش وخيمة:)
الكلام ده كده كتبته الساعة سته الصبح من باب التفريغ واعادة الشحن علشان دماغي تشتغل كويس

جلست في شرفة غرفتي اتطلع للسماء لعلها تأتيني بفكرة من تأملي لها .......شكوت لها حالي فقد جف نهر ابداعي وتصحرت جنات افكاري لم اعد استطيع الاستمرار في حياتي بدون ابداع وبدون افكار........شكوت لها همي وسكت وظللت اتأمل حتى لمعت نجمة في السماء ومع لمعان نجمة السماء لمعت فكرة في عقلي ثم نظرت للسماء وشكرتها لانها

اعادت مجرى المياه لنهر ابداعي فروت جنات افكاري شكرا ايتها السماء

ايه رايكم في اسلوبي

تعالي العبي يا نورانا

من اسبوعين كده لما كنت معكوكة في الامتحانات كان يوم الخميس اللي قبل امتحان الفيزيا كنت عند جدتي هنام عندهم علشان كان درس الفيزيا بتاع المراجعة جنب بيت جدتي المهم كنت قاعدة اذاكر في بيتنا بعد كده رحتلهم ع الساعة 10

وشوية كده

جه ابن خالي "يحيى" المشهور ب"بوبا" -شددوا البيه التانية وضموا الاولانية- يعني عنده اربع سنين الا شوية ايام يقولي:
تعالي العبي معايا يا نوران كنت قاعده احل مسائل مكلكعة
انا:لا يا بوبا اناعندي مذاكرة وامتحانات لما اخد الاجازة هاجي العب معا
هو: انا هعلمك تلعبي ازاي لعبة بينك بانتر
انا: ايه دي يا بوبا
هو: لما تخلصي مذاكرة
انا: طيب -وبقول في نفسي مبقاش الا يحيى يعلمني العب لعبة معرفش ايه-يا سلام

الحمد لله خت الاجازة واول يوم خميس في الاجازة اقعدة فري ومفرفشة بالرغم من عك الميكانيكا يالله بلاش السيرة دي

يجي ويقولي

ختي الاجازة يا نوران
انا: ايوة يا بوبا
هو: طب تعالي العبي
انا: طيب انا جاية
المهم راح ع الكمبيوتر قولت اكيد لعبة جيمز ع الكمبيوتر قولت اكيد هيخليني افتحه او ينادي حد في البيت يفتحهولوا ويجيب اللعبة
ايه يا بوبا هتبوظة
هو: استني يا نورانا- لازم نورانا دي معرفش ليه بس ارحم من بت اللي كان بيقولهالي وهو صغير-شفتوا
فتح الكمبيوتر واختار اليوسر بتاعه واستنى شوية لحد ما الجهاز فتح قولت في نفسي اكيد داس ع الزرار كدة زي ما كلنا بنعمل شوية ولقيته فتح my computer وبعد كده اختار درايف معين بعد كده فتح فولدر وجواه فتح فولدر

لحد ما قالي: خلاص انا لقيت اللعب اه بينك بانتر

ايه اللعبة دي يا بوبا
هو: انا هعلمهالك
فتحها واختار لود جيم ومخترش نيو جيم
انا :لا يا بوبا اختار اللي فوقيها
هو: لا دي علشان تيجي مرحلة السفينة علطول
انا: طيب
المهم راح واختار المرحلة اللي عايزها وبدأ يشرحلي اللعبة
هو: بصي يا نورانا احنا لازم ناخد الموزللقرد علشان يخلينا نعدي
انا: طيب يا بوبا وبعدين
هو: لازم ناخددهب كتير والقلب علشان يعيش
انا: بس في نفسي وربنا ولا فاهمة حاجة
هو- وكانة حس-: انا هوريكي
المهم جت اللعبة اكتشفت انه النمر الوردي pink panther
وهو قعد يوريني ده بينط وده بيضرب وده بيطير وده بياخد الموزة
-انا طيب يا بوبا هات انا العب -اه ما انا عيله لازم العب
-المهم اقعت العب وفي حتة مش عارفة اعديها- يا دي الكسوف شكلي وحش اوي
هو : هاتي يا نورانا اه اه جاتلي فكرة
ياخد الكي بورد بدالي ويعمل حجات غريبة ويعديها
انا :برافو يا بوبا
هو :هاتي العب شوية
انا -اتكسفت منه وخلاص-: خليته يلعب وخلاص ماشية
هو: نورانا تعالي اتفرجي عليا وانا بلعب اقعدي جمبي مش جنبي في لعب تانيه
انا -وكاني مستنياها-: طيب عندك لعبة الفراخ
هو: لا كانت عندي ومسحتها علشان مش بحبها
انا: نعم مسحتها
رحت مشيت ووانسحبت من وراه وبقول في نفسي راحت عليكي يا نورانا مفيش غير البوبا يعلمك
صحيح اصغر منك بيوم يعرف عنك ب100سنة وهو اصغر مني ب13 سنة يا ده يعرف عني بكتيييير اوي

سوري ان البوست طويل بس حبيت اوريكي جيل اليومين دول مع العلم انه حتى مدخلش حضانة ولا مدارس لسه