Saturday, July 01, 2006

تعالي العبي يا نورانا

من اسبوعين كده لما كنت معكوكة في الامتحانات كان يوم الخميس اللي قبل امتحان الفيزيا كنت عند جدتي هنام عندهم علشان كان درس الفيزيا بتاع المراجعة جنب بيت جدتي المهم كنت قاعدة اذاكر في بيتنا بعد كده رحتلهم ع الساعة 10
وشوية كده

جه ابن خالي "يحيى" المشهور ب"بوبا" -شددوا البيه التانية وضموا الاولانية- يعني عنده اربع سنين الا شوية ايام يقولي:
تعالي العبي معايا يا نوران كنت قاعده احل مسائل مكلكعة
انا:لا يا بوبا اناعندي مذاكرة وامتحانات لما اخد الاجازة هاجي العب معا
هو: انا هعلمك تلعبي ازاي لعبة بينك بانتر
انا: ايه دي يا بوبا
هو: لما تخلصي مذاكرة
انا: طيب -وبقول في نفسي مبقاش الا يحيى يعلمني العب لعبة معرفش ايه-يا سلام

الحمد لله خت الاجازة واول يوم خميس في الاجازة اقعدة فري ومفرفشة بالرغم من عك الميكانيكا يالله بلاش السيرة دي
يجي ويقولي

ختي الاجازة يا نوران
انا: ايوة يا بوبا
هو: طب تعالي العبي
انا: طيب انا جاية
المهم راح ع الكمبيوتر قولت اكيد لعبة جيمز ع الكمبيوتر قولت اكيد هيخليني افتحه او ينادي حد في البيت يفتحهولوا ويجيب اللعبة
ايه يا بوبا هتبوظة
هو: استني يا نورانا- لازم نورانا دي معرفش ليه بس ارحم من بت اللي كان بيقولهالي وهو صغير-شفتوا
فتح الكمبيوتر واختار اليوسر بتاعه واستنى شوية لحد ما الجهاز فتح قولت في نفسي اكيد داس ع الزرار كدة زي ما كلنا بنعمل شوية ولقيته فتح my computer وبعد كده اختار درايف معين بعد كده فتح فولدر وجواه فتح فولدر
لحد ما قالي: خلاص انا لقيت اللعب اه بينك بانتر
ايه اللعبة دي يا بوبا
هو: انا هعلمهالك
فتحها واختار لود جيم ومخترش نيو جيم
انا :لا يا بوبا اختار اللي فوقيها
هو: لا دي علشان تيجي مرحلة السفينة علطول
انا: طيب
المهم راح واختار المرحلة اللي عايزها وبدأ يشرحلي اللعبة
هو: بصي يا نورانا احنا لازم ناخد الموزللقرد علشان يخلينا نعدي
انا: طيب يا بوبا وبعدين
هو: لازم ناخددهب كتير والقلب علشان يعيش
انا: بس في نفسي وربنا ولا فاهمة حاجة
هو- وكانة حس-: انا هوريكي
المهم جت اللعبة اكتشفت انه النمر الوردي pink panther
وهو قعد يوريني ده بينط وده بيضرب وده بيطير وده بياخد الموزة
-انا طيب يا بوبا هات انا العب -اه ما انا عيله لازم العب
-المهم اقعت العب وفي حتة مش عارفة اعديها- يا دي الكسوف شكلي وحش اوي
هو : هاتي يا نورانا اه اه جاتلي فكرة
ياخد الكي بورد بدالي ويعمل حجات غريبة ويعديها
انا :برافو يا بوبا
هو :هاتي العب شوية
انا -اتكسفت منه وخلاص-: خليته يلعب وخلاص ماشية
هو: نورانا تعالي اتفرجي عليا وانا بلعب اقعدي جمبي مش جنبي في لعب تانيه
انا -وكاني مستنياها-: طيب عندك لعبة الفراخ
هو: لا كانت عندي ومسحتها علشان مش بحبها
انا: نعم مسحتها
رحت مشيت ووانسحبت من وراه وبقول في نفسي راحت عليكي يا نورانا مفيش غير البوبا يعلمك
صحيح اصغر منك بيوم يعرف عنك ب100سنة وهو اصغر مني ب13 سنة يا ده يعرف عني بكتيييير اوي

سوري ان البوست طويل بس حبيت اوريكي جيل اليومين دول مع العلم انه حتى مدخلش حضانة ولا مدارس لسه

9 comments:

فيها حاجة حلوة said...

يارب مصر كلها تبقي زي بوبا

هوميروس said...

اذيك يانوران انتي عاملة ايه والله وحشتيني كنت بدور علي اللينك بتاعك اصل كنت مرة دخلت عندك بأمارة لما قلتلك اذا كنتي انتي شمعة فانا عندي شمعتين
مبروك الافراج من الامتحانات يعني
علي فكرة رولا مصطفي خرسا قالت اسمك في برنامج في العمق وقالت عنك ان انتي اصغر مدونة
انا هعملك لينك عندي

Dr. Zeus said...

هاها
ربنا يكرمهم يا رب

m_elsewedy said...

نوران
توقعى اى حاجة من اطفال اليومين دول ممكن يودوكى البحر ويرجعوكى عطشانة
:D
على فكرة انا عندى نسختين من بوبا
معاذ ومؤمن ولاد اختى
معاذ
5
سنين
ومؤمن سنتين ونص بس عفاررريت كمبيوتر حتى مؤمن الزئرد ده بيعرف يدخل ويفتح اى لعبة
بس كويس على فكرة لان فى ناس كبار مش بيعرفوا يستخدموا الكمبيوتر ما بالك بقى عيال فى السن ده بيعرفوا يستخدموه متهيالى ده هاينمى مستوى ذكاؤهم اكتر وهايبقوا ناجحين فى حياتهم اكتر بس طبعا مع المتابعة الجيدة من الاب والام

وربنا يخليلك بوبا ويخليكى ليه
:))

غادة الكاميليا said...

فكرتيني بأحمد أخويه الصغير بس هو أكبر من بوبا بسنه هو كمان بيحسسني إني معرفش حاجه خالص
يلا هناخد زمنا وزمن غيرنا

Nouran said...

المهندس المصري:
يا رب بس لو بقت زيه في كل حاجة المصريين كلهم هيبقوا بلطجية لحسن لما يقلب بينسى نورانا ويقولي ملكيش دعوة بيا يا بت طمعرفش ليه بت دي"

ابراهيم:
والله كنت قاعدة اقولهم وماله الاتاري ونفسي العب بي بلا بلاي ستيشن بلا كمبيوتر بس ع فكرة انا بعلم بوبا البلاي ستيشن برضه علشان ارد كرامتي:)

هوميروس:
شكرا ع اللينك يا باشا وانا الحمد لله احسن بعد االامتحانات

pharoinlove:
ع رايك يا خوفي لما يخش المدرسة يجي يقولي اعمللي بلوج:)

dr zeus:
ربنا يكرمنا كلنا

forsha:
ياااااااارب

سويدي:
اظن ان معظم اطفال مصر زي بوبا او بوبا اللي زيهم
بس مستوى ذكائهم خايفة ليقل بعد ما يخش المدرسة انت عارف التعليم المصري سواء لغات ولا خاصة ولا حكومة ربنا يكون في عون بوبا

غادة الكميليا:
ع رايك هناخد زمنا وزمن غيرنا بس احنا مش كبار اوي لسة يعني نلعب برضه

Haitham said...

ياه يانورانا أنا نفسي ألعب .. بقالي كتير جدا ناسي اللعب

حدوته مصرية said...

مع انى استغربت اوى لما لاقيتك لسه ثانوية عامة وازاى وانتى فيها عاملة بلوج و مع انك برضه صغيرة بس دى حاجة كويسة برضه ان فى حد هربان من الثانوية ولو حتى فى بلوج

بالنسبة لبوبا يا رب كل جيله يطلعوا ناصحين كده فى كل حاجة

Nouran said...

طاغور:
لا ولو شوفت الثنائي بتاعي انا وبسملة اخت بوبا الصغيرة مش هتصدق نفسك

هيثم:
والله وانا نفسي مابطلش لعب بعد الامتحانات وده اللي بيحصل علطول قدام الكمبيوتر والبلاي ستيشن تقدر تقول عقدة مدارس

حدوتة مصرية:
الحمدلله اخر سنة في الثانوية و كمان انا لازم اروش نفسي انا مروشاها من اول السنة محدش واخد منها حاجة
ويا رب بوبا يفضل كده بعد المدارس النتائج هتظهر بعد سنة بعدkg.1