تاج

تحديث

يا سلام اتبعتلي تاج من اربع اشخاص اعزاء عليا من جدو العزيز وسويدي باشا وام

المريلة الكحلي الجميلة ودودي صحبتي الانتيخ يا سلام

المهم نأسف للتاخير كان عندنا فرح هحكيلكوا عليه بعدين ولازم انزل تهنئة انتوا عارفين ف النشرة اه وبمناسبة التهنئة عندي تهنئة جاااااااااااااااااااااااااااااااااااااااااااااااامدة جدااااااااااااااااااااااااااااااااااااااااا لروشا الحمد لله اخيرا نتيجتها ظهرت جابتلنا ترالالي عقبال ما جت هعملها تهنئة ف النشرة مع الفرح بس بعد البوست بتاع وزيرة الدفاع اللي انا هعمله ماشي المهم رشا جابت جيد جداااا والحمد لله ومبرووووووووووووك ياستي اي خدمة وهنزلهالك ف النشـــرة

نيجي للتاج

هل انت راض عن مدونتك شكلا وموضوعا:

اولا شكلا بقيت راضية عنها بعد ما حطيت فيها صورة بووووووه يا سلام عجباني الصورة اوي

اما موضوعا فأنا بكتب اللي جوايا وافكاري والحمد لله محصليش مرة اني كتبت حاجة مش راضية عنها ولو حصل مش مشكلة اهي مرة وكمان انا بفضفض كتير واوقات بتبقى فضفضة بهبل عادي يعني

.

هل تعلم اسرتك الصغيرة بأمر مدونتك؟

طبعا عارفين وبخليهم يقروا اللي كاتباه بس مش قدامي لما ابقى مش موجودة ويقروه هو كده النظام حتى

عارفين الباسورد بس مش عارفين اليوسر نيم ههههههه وبابا عامل بروفيل بيعلقلي مش بيبقى معايا ف راي مش مشكلة اختلاف الرأي لا يفسد للود قضية بس اوقات بحس اني غلط اني قلتلهم علشان ببقى عايزة اكتب حاجة براحتي من غير وجود حد يقولي متكتبيش كده تاني - يا رب ما يقروش البوست ده- هههههههه صحيت الصبح لقيت بابا بيقرا البوست روحت خارجة من الاوضة بس غريبة معلقش ومقليش حاجة شكله نط السطور هو الموضوع وراثة ولا ايه :)

.

هل تجد حرجا ف ان تخبر صديقا عن مدونتك ؟

لا طبعا كل الناس عارفة وبالذات لما اتكتب ف جريدة الشرق الاوسط اني اصغر واحدة -سابقا لان ف دلوقتي اصغر مني هيرو 16 سنة ع ما اعتقد- يا سلام عملت فرح وقلت للناس كلها عيلة بقى :)

.

هل تعتبرها امرا خاص؟

يعني ايه بصراحة مش فاهمة مغزى السؤال - شكله تبع السؤال اللي فوق-لو تبعه يبقى لأ مش امر خاص عادي يعني

.

هل تسبب المدونات بتغير ايجابي لافكارك؟اعطني مثال ف حالة نعم.؟

طبعا ف تغير كبير بقيت اعرف اراء اكتر ووجهات نظر وطرق تانية ف التفكير وكنت بحسب ان معظم شبابنا ف الضياااع بس لقيت تقريبا كل المدونات اللي دخلتها مش ف الضياع مع ان ممكن يكون حد عامل مدونه شخص شفته ف الشارع وقلت عليه ضايع بالضاد مش الصاد

.

هل تكتفي بفتح صفحات من يعقبوك بردود ف مدونتك ام تسع لاكتشاف المزيد؟

طبعا مش بكتفي بخش عند ناس من عند ناس تانين عارف بحس ان عالم المدونات ده كبيير ومهما حاولت ابحث هلاقي المزيد واللي ممكن ميرويش فضولي لمعرفة العالم ده

.

ماذا يعني الك عدد الزوار ...هل تهتم بوضعه؟

طبعا احب ان يكون العدد كبيييييير بفرح اوي بحس ان حد بيقرا كلامي وبعرف ده من خلال التعليقات يا سلام بفرح جدا وطبعا كنت عايزة احطه من الاول بس مش عارفة كل ما جرب حاجة تبوظ بس اكتشفت انه بيقع ف خطر الازدواج المحاسبي انه ممكن يعدني من ضمن الزوار لو دخلت اكتر من مرة يبقى ايه فايدته بس اعتقد انه ف البروفيل ف حاجة شبه العداد بتعد اللي شافوه البروفيل

.

هل حاولت تخيل شكل اصدقائك المدونين؟

اقولكوا حاجة ومتتريقوش عليا انا بتخيل ان كل واحد هو مدونته يعني مثلا عندكوا حد انا عارفة شكله مثلا رضوى افضل متخيلها هكذا هي الحياة ولو حطه صورة هتفضل هيا الصورة لحد ما شوفها تاني ورشا متخيلاها نيمو وهي بتكتب ده اصلي بحس ان اللي بيحط صورة بتبقى الاقرب الي قلبه بس مش ف كل الحالات بس برضه مش عارفة اتخيل الواحد ازاي هو ممكن حد يعرف شكل حد من كلامه

.

هل ترى فائدة حقيقية للتدوين:

لو مكنتش الاقيله فايدة كنت معملتش مدونة اصلا ع فكرة التدوين ده ممكن يكون ان مبقاش ليه ضغط هيب ع الحكومة بس تبقى مشكلة لو خدونا ف الرجلين هههههههه ساعتها هروح اقعد مع بابايا ف السعودية ولا اعرفكوا :)

.

هل تشعر ان مجتمع المدونين منفصل مجتمع منفصل عن العالم المحيط بك ام متفاعل مع احداثه؟

هو طبعا مش منفصل باحداثة لاني بعرف الاخبار من المدونات مش من الجرايد والتلفزيون وكمان بيبقوا اسرع ف نشر الخبر وكمان تحليله ان امكن مع اعطاء وجهه نظرهم التي من الممكن ان لم تكن صحيحة ف اغلب الاحيان - هو انا قلبت لغة عربية كده ليه -ن

بس اوقات بحس ان الدونين دول مش ف مجتمعنا معرفش بحس ف مدونين مش قليلين ومقدرش اقول كتير ان عندهم فلته او حاجة غلط ممكن من كتر السكوت بيطلعوا ف بلوجاتهم ممكن

.

هل يزعجك وجود نقد ف مدونتك ام تعتبره ظاهرة صحية؟

انا بطبعتي بضايق لما حد ينقدني مش هقول هتقبل بصدر رحب والكلام ده وانا بعتبر النصيحة غير النقد - ده توضيح لحسن حد يحسبني مش بتقبل النصيحو وغرور وكده يعني- بس لو كان نقد متخذ شكل النصيحة فهتقبلها بصدر رحب ونفس شهية كاني هاكل محشي بالظبط ورق العنب بتاع ابيتاف - مع اني مش بحبه- ما علينا

.

هل تخاف من بعض المدونات السياسية وتتحاشها؟ هل صدمك اعتقال بعض المدونين؟

مش هقول بخاف وبتحاشى هقول مش بخشها اصلا انا بصراحة مش بحب السياسة خااالص وبحس ان معظم المدونات السياسية هما اللي عندهم فلته

اما اعتقال بعض المدونين يعيني بجد حاجة صعبة مع ان ممكن اللي يكون حصلهم بالذات الشرقاوي حصل لكتير غيرهم واوحش من كده بس دول علشان احنا عرفنا عنهم وحصلت ضجه ف البلوجات علشان كده عرفت واتصدمت وفعلا حسبي الله ونعم الوكيل ف اللي عمل كده فيهم

.

هل فكرت بمصير مدونتك حال وفاتك؟

بصراحة مفكرتش بس اكيد هتعرفوا من اي حد من الاقارب الاعذاء او الاصدقاء المقربون بس والنبي لما تيجوا عندي بعديه اقروا الفاتحة ع روحي ويا ريت حد يعمل النشرة ع بلوجي بس يكتب فيها تعاذينا الحارة والغوا فقرة التهنئة وهسيبلكوا قصة وكام نكته بس مش سخيفة علشان تفتكروني بحاجة حلوة :) هبقى اقول لدودي اليوسر نيم والباسورد

.

آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟
اولا مين امال فهمي دي انا معرفهاش مذيعة ع القناه التالته ؟؟

الاغنية اللي احب اسمعها بتاعه عمرو دياب انا مهما كبرت صغير بس انا مش بحب احط لينك لاغنية هتجبلي وش ف دماغي وانا اصلا مش حطه السماعات شايلاها علشان الوش برضه

.

اكتب اسماء خمسة تمرر ليهم الدور

لازم خمسة اناهعملهم عشرة زي جدو

يا سلام المهم اللي بعتولي التاج كان نفسي ابعتهلهم لما يتبعتلي وكمان بعتوه لناس انا كان نفسي ابعتهلهم ايه اللخبطه دي المهم

روشا

ابراهيم

هوميروس انا معرفش راح فين راح ومرجعش

عمو احمد شقير -لازم عمو دي ناسف ده ادب-

الاستاذ ادم المصري

زنجولا باشا

البشمهندس المصري

رضوى هكذا انا

محمد مفيد

wa3ed el 3yoon

.

انا تعبت مش قادرة احط لنكات ع اللي مبعتلوهم انا هروح اقولهم بنفسي ماشي :)

طفلة صغيرة

ليت الزمان يعود للوراء ثانية لأكون فيه ليس سوى طفلة صغيرة امرح مثلما اشاء ووقت ما اشاء لا احزن ابدا اضحك دائما وفي نفس الوقت ابكي لاتفه الاسباب اركض سريعة ف اي اتجاه و في اي مكان اريد

امسك ورقتي و قلمي لارسم شيئا يدور بداخلي وابدا بالرسم ايا كانت رسمتي سأريها لامي لتقبلني قائلة:" رسمة حلوة يا نور اهتمي بموهبتك ف الرسم" ثم

ابدا بتلوين ورقتي بالالوان التي اريد بلا قيود ابدأ باللون الازرق والاخضر والاصفر فقط تلك الالوان لا يهم شكل ورقتي ف النهاية المهم ان اكون سعيده بها أريد ان اكون طفلة لأسامح من يخطئ في حقي بدون اي حقد او كراهية

اريد ان اكون طفلة لكي لا اعرف معني الكراهيه و الحقد ولا اشعر باحساسهما لا مجال عندي للغيرة

فقط ان يكون عالمي مملوء بالحب والمودة اريد ان اضحك ضحكة صافيه تملأ قلبي سعادة وتملأ الكون حولي بهجة

والاهم ان استيقظ سعيدة واخلد لفراشي سعيدة غير مهتمة بما يحدث حولي من شئ من حروب وغيرها لا اعبء بهما ولن يلومنني احدا لاني ليس سوى طفلة .. طفلة صغيرة

تحديث لثالث مرة" الاذاعة من عند شمعة

من مكاني هنا ابثها لكم -ايه التخاريف دي- من مكاني هنا قررت -خلصينا خنقتينا- قررت اني اعمل اذاعة -بس المشكلة يا فالحة ان الاذاعة بتتسمع مش بتتقري- خلاص هسميها نشرة مش مشكلة ولا يهزك-ايه احنا ف فرح هنا عيب- خلاص ولا يهمك بلاش يهزك دي المهم انا فكرت اعمل بلوج ليها لوحديها بس قلت اجرب هنا لو حلوة اعملها لوحدها لو وحشها هعملها هنا بلوجي وانا حرة في :)

المهم النشرة من عند شمعة او الاذاعة من عند شمعة - المهم الموضوع فيه شمعة وخلاص- دي بتتكون من كذا حاجة

1- تهنئة لاي مناسبة او اكثر من تهنئة

2-قصة فاشلة من بتوعي اللي مش بيكملوا -بالمناسبة كنت عاملة بلوج اسمه قصة لم تكتمل بعد ومسحته ومعرفش مين حتى دخل عليه قلت اكتب هنا -

3-نكته سخيفة -لازم تبقى سخيفة هو ده النظام-

4-معرفش بقى لحد كده وفكرت لو ممكن حد يقولي ازود عليها او اخليها كده اوك

1.....2....3...

بسم الله الرحمن الرحيم-انتي داخلة ع الميكروفون خشي ف الموضوع- ماشي

التهنئة:

كل سنة وانتوا طيبين وعقبال 100 سنة كمان مع بعضيكوا وتكونوا كده بقالكوا 118 سنة سوا وانا يبقى عندي 117 سنة يا كده كبيرة اوي مش مشكلة

النهاردة 3\8 عيد جواز بابايا و ماماتي ال18 كل سنة وهما طيبين وعقبال البكاري - انا موجودة مش انا برضه ابقى البكاري علشان انا الكبيرة-

التهنئة التانية : للعروسة والعريس بتوع امبارح 2\8هما مش هيقروا الكلام ده بس مبروك ليهم ويا رب يبقوا فرحانين علطول يا رب علشان هما ناس كويسة

التهنئة التالته:لكل صحابي اللي دخلوا الكليات اللي عايزنها واسبيشل لدودي مبرووك يا بنتي بقينا من طلاب الجامعات المصرية الخطيرة :)

تهنئة الرابعة: للدكتور ابراهيم مبروك يا مان ع الشغل وعقبال لما تفتح عيادة- هو الشغل بيتعمله تهنئة-اه بيتعمله ف النشرة بتاعة شمعة

تحديث مطلعش شغل طلع تدريب ناسف للغلطة يا دكتور

تهنئة خامسة : ليا ياسلام وصل عدد التعليقات ف البوست اللي فات ل31 انا معلقة 3 تعليقات بس مش مشكلة انجاز ياسلام- رشا قالتلي ده علشان الثانوية العامة والتنسيق-

مش مشكلة انجاز برضه

تحديث : تهنئة سادسة ليا برضوا

هاهاهاهاها قال بيقولوا اني اعلى نمرة رياضة ف المدرسة 48 من 50 شكل المدرسة اتقلبت من مدرسة المتفوقين لمدرسة الفاشلين قال انا اعلى درجة قال ههههههههههه

تحديث 2 : التهنئة السابعة :

كل سنة ودولي طيبة وعقبال 126 سنة ماشي يا جميل :)

تحديث 3:التهنئة الثامنة

مبرووووووووووك يا بشمهندس نور ع نجاحك

انا محبتش اعمل نشرة جديدة علشان متبقاش نشرتين ورا بعض والنكت السخيفة هتكتر هيا والقصص

فعملت تحديثات علشان اديكوا هدنة ومتزهقوش شفتوا انا طيبة ازاي

كل دي تهاني يا رب كتر الافراح يا رب حاجة صعب علشان الحرب اللي مش راضية

تخلص دي ملناش دعوة دلوقتي بيها خلينا ف اللي احنا فيه

.

ننتقل للجزء التاني

القصة الفاشلة : استحملوا وامركم لله ممكن تعدوها مش هزغل بس قولولي انكوا نطوها

استيقظت سعيدة ع غير العادة تسترجع ذكريات يومها الماضي واخذت تتحدث مع نفسها : قالها لي اخيرا قالها وهو ينظر في عيني ويمسك يدي لقد قالها لي امام العالم كله قالها بقوة وحنان ودفء قال : بحبك بحبك هل تقبلينني ...وضعت يدي ع فمه لماذا لا اعلم هل لاني اخاف من المستقبل انا دائما هكذا اضع اسوا شئ امامي ولكنه قال لي اعرف ما يدور بداخلك لكن هل تقبلينني زوجا لكي اشتدت خوفي ثانية فانا لم اعتد ع الدنيا سوى ان تاتيني بكل ما هوسئ تعطيني اسوا ما لديها

ولكنه قبل يدي وقالها ثانية لم اتردد لحظة ثانية وقلت له نعم ارضى بذلك

يرن الهاتف ليقطع احلامها وافكارها تنظر اليه وتجيب

الو الو ماذا حدث وكيف ....... انقطع الخط

بصراحة القصة دي اكيد من نسيج كتر الافلام العربية والهندي اللي كنت بتفرج عليها سا عة الامتحانات معرفش هندي

.

ننتقل للجزء التالت

النكتة السخيفة :

مرة سمكة غبية غرقت

مرة واحد رخم قابل واحد رخم قاله منيجي نرخم ع حد قاله لا قاله ليه قاله رخامة

بصراحة انا بحب النكتة الرخمة اللي فوق واللي تحت بتغظني

ايه البوست ده من تاثير الفرح بتاع النهاردة - اكيد مش بتاع بابا وماما-

اللي معجبتوش القصة يقولي انه نطها ماشي - يا عيني انا اتهبلت اوي - ربنا يحميني لشبابي يا رب

البوست طويل اوي مش مشكلة يا جماعة هيا نشرة كل 3 اربع اسابيع يعني لما يبقى في مناسبة خلاص بقى

ع فكرة انا فايقة اوي معرفش ليه

ملحوظة:

كتير قالولي ارتب افكاري بس انا مش عارفة ع ايه

اذا كانت حاجة ملخبطة فده علشان كنت بشرح الموضوع بس مش اكتر بس برضه قولولي ملخبطة في ايه يمكن مكنش فهمت كويس بعض التعليقات ماشي الكلام :)

سلام

هندسة القاهرة

كدة بقيت رسمي ف الكلية مبروك يا نوران :) انا عرفت من التليفون ف رقم بنتصل بيه ونقول رقم الجلوس تتطلع الكلية اللي جتله بابا اتصل الصبح وقالي مبروك يا نوران جتلك هندسة القاهرة

كان نفسي يجي الجواب علشان اتفرج عليه واقولكوا شكله ايه اكيد شوفتوه بس ا نا لسة محصليش لشرف وشوفته

.

يوم التنسيق رحت سحبت الورق الساعة 10 كان فاضي نوعا ما بس اللي لفت نظري ان كل البنات والاولاد هناك شكلهم دكاترة معرفش اشمعني يمكن علشان اي حد شاطر بيبقى عايز يخش طب ادبي علمي كلهم دكاترة حاجة غريبة يعني

.

جبت الورق والمفروض اني شريحة اولى اقدمه يوم الجمعة مش فاكرة كام سبعة المهم مكتبتش الرغبات غير بعد الفجر لا واحسن حاجة اني لزقت ال48 طابع لوحدي بس كانوا استيكر اكتشفت انهم استيكر من زمان يعني مش من ايامي بس يا سلام فضلنا للساعة ستة ونص قاعدين بابا دخل نام ساعتين وانا كملت لحد الساعة تسعة وبعدين رحنا مكتب التنسيق المعظم ونظرا لانني شريحة اولى وعلمي بخلصت بسرعة ورجعت البيت طبعا مش هقلكوا عملت ايه ولا حاجة طبعا فطرت بعد كده ع السرير مباشرة والحمد لله ع قد كده :)

.

والناجح يرفع ايده هيه

هيه هيه هيه هيه هيه هيه هيه هيه هيه هيه هيه هيه هيه هيه من هنا للصبح

اليوم المتفق عليه

كلنا مع لبنان وفلسطين ضد اسرائيل والمحتلين

.........................
بالعربي بالانجليزي المهم نسمع صوتنا للعالم
وان لم نستطيع حمل السلاح فالنحمل الكلمه
وبأي لغة نستطيع نشرها

بالإنجليزية

We are with Lebanon and Palestine against Israel and occupiers

والفرنسية

Nous sommes avec tous le Liban et la Palestine contre l’Israel et les occupants

والألمانية

Wir sind zusammen mit dem Libanon und Palästina gegen Israel und Besatzer

والإسبانية

Somos todos con Líbano y Palestina contra Israel e inquilinos

والصينية

我们都是同黎巴嫩和巴勒斯坦对以色列占领者

واليابانية

私達はイスラエル共和国および占有者に対してレバノンおよびパレスチナとのすべてである

اولا........ وثانيا ........وثالثا

اولا اعتذار ارجو ان تقبلوه

بناء ع طلب سيادة الوالد " بابايا الحبيب" انشر اعتذاري عن الاخطاء الغير مقصودة ف البوست اللي فات اكلمة الثورة الثورة الثورة الواو قبل الراء نأسف اصلي كنت بفكر هعمل ايه بالثروة اللي معايا ما انا ناجحة بقى :)

وعن كلمة غايبين والمفروض جايبين بالجيم مش الغين

وما خفي كان اعظم انا حاسة ان محدش خد باله اصلا :)

ثانيا: رسالة الى عمي الحبيب "عمو احمد حبيبي" وصديق طفولتي-ع فكرة عمو كبير يعني مش تقارب سن -اوك

يا رب تقوملنا بالسلامة يا رب بعد اجراء لجراحة بسيطة معرفش ايه نوعها بس الحمد لله خلصت ع خير

عمي يبقى اخو بابايا وابن جدي ده طبيعي اما صديق طفولتي فعلشان هو الوحيد اللي كنت بكلمه ف العيله اصل انا كنت ف السعودية مع بابا وماما زمان وهو كمان كان هناك فان الوحيد اللي انا مستعرفة عليه وكان بيلعب معايا كوتشينة وكنت بكسبه متقولوليش ازاي طريقة النصب السرية بتناعتي وانا عندي اربع سنين طبعا كنت بلعب اصعب لعبة فيكي يا مصر كنت بلعب الكومي واخد كل الاولاد لنفسي والسبعة الحمرا السنبوكسة وبكده كنت بكسب من الدرجة الاولى طبعا :)

وكان بياخدني معاه الشغل يوم الخميس علشان نص يوم واي حد يساله مين ديه يقولوه دي سكرتيرتي الجديدة وطبعا كمية الحجات الحلوة اللي كنت باخدها كنت متروقة فعلا وكمان عملي اسمي ف ورقة كبيرة بالبالونات وفي كل بلونة فيها حرف ع الكمبيوتر عندي لحد دلوقتي

يا سلام وكان برضه بيلعب معايا اتاري ايام ما كان الاتاري هو الكل ف الكل وعايزة اقوله علشان هو هيخش عندي ويشوف انا كتبت ايه انا والله العظيم بحبك اوي يا عمو ويا رب تكون دي اخر العمليات :)

ثالثا:موعدنا يوم الخميس 27 لنشر الكلمات اللي فكرت بيها ليالي فكرة كويسة نعمل حاجة احسن من مفيش

كلنا مع لبنان وفلسطين ضد اسرائيل والمحتلين بالعربي بالانجليزي المهم نسمع صوتنا للعالم وان لم نستطيع "حمل السلاح فالنحمل الكلمه وبأي لغة نستطيع نشرها

بالإنجليزيةWe are with Lebanon and Palestine against Israel and occupiersوالفرنسيةNous sommes avec tous le Liban et la Palestine contre l’Israel et les occupantsو

الألمانيةWir sind zusammen mit dem Libanon und Palästina gegen Israel und Besatzer

والإسبانيةSomos todos con Líbano y Palestina contra Israel e inquilinosوالصينية我们都是同黎巴嫩和巴勒斯坦对以色列占领者

واليابانية私達はイスラエル共和国および占有者に対してレバノンおよびパレスチナとのすべてである

مع اني مش فاهمة اي حاجة من المربعات دي بس الترجمة بتاعتها بالعربي فوق

مش هكتب عنوان

طبعا مش بحب اكتب ف السياسة كتير علشان وجع الدماغ وارتفاع ضغط الدم واحمرار العينين وكل الاعراض اللي بتجيلي لما بسمع النشرة او بقرا الجرنان-انا عادة مش بقراه بس بشوف الصفحة الاولى وصفحة الرياضة وصفحة الحوادث والتحقيقات واخبار محلية علشان درجات الحرارة اصلا احنا مش بنجيب جرايد علشان مفيش حد بيقراها بس لما بابا يجي ممكن نجيبله الجرنان-شفتوا
المهم الكلام اللي هكتبه مظنش انه ليه علاقة بالسياسة بس فيه اسرائيل وممكن يكون ليه علاقة بالسياسة مش مشكلتنا
المهم النهاردة لا امبارح يوم الاحد يعني 23يوليو التاريخ ملوش علاقة باللي هقولوه الرغم انه يوم ثروة 23 يوليو بتاعة عبد الناصر اللي النهاردة روان بتسال ماما هما غايبين اغاني وطنية ليه ع كل القنوات قالتلها ده النهاردة الذكرى معرفش كام لثورة هيا كانت 52 ولا 56لا كانت 52 صح احتفلوا بالاغاني ما شاء الله :(

فضلت نايمه لحد الساعة سته بس صحيت صليت الظهر الساعة 3 ونمت تاني برضه مش مشكلتنا طبعا حلمت مليون حلم زي كل يوم بس حلم واحد علق ف دماغي كان معلق اول ما صحيت وبعدين علق دلوقتي خلاني ااجل كل اللي هكتبه
المهم حلمت ان رضوى ورشا معلش والله ده كان ف الحلم معرفش اشمعنى انتوا وكان عمو اسامة موجود برضوا ف اسرائيل معرفش ليه بعد كده كنت عايزه اكلم رشا بس خفت اكلمها قلت بعت مسج بعد كده سبحان الله بقيت هناك فين احنا فين احنا ف اسرائيل مع اننا كنا ف الحلم بس كنت خايفة اوي اوي اوي بمجرد سماع كلمة اسرائيل دي بصيت من بعيد لقيت زحمة كتير اتضح ان كل دول مصريين بس الغريب ان كل ده كان ف لصحرا ع الحدود-هوا احنا عندنا حدود مع اسائيل؟- بعد كده خير الله اجعله خير ان الاسرائليين ورانا واحنا مشيين مشيين بسرعة بنجري لحد ما وصلنا لمصريين اللي كانوا هناك واقفين ع الحدود معرفش اتخيلت ف الحلم طبعا ان الحدود دي عبارة عن بوابة مقولة والجنود قربوا قربوا اهم جايين علينا البوابة اتفتحت دخلنا احنا ف مصر يا حسيت برااحة غريبة حسيت بالامان يا ايه ده الواحد ميعرفش قيمة بلده غير لما يرح اسرائيل ويرجع لبلده ف الحلم

حسيت لما صحت اني فرحانة جدا ان حسني مرداش يحارب او يدخل ف الحرب وبقيت نفسي اشكره زي ما جدو عمل ف تدوينة بعد ما كنت هكتب بوست ع الريس بقول فيها انه صعبان عليا من اللي بيعمله بس برضه الواحد مينفعش يقول انه كويس علشان وفرنا الامن والاكل لا

بس حسيت بالانانية اني فرحانة ان معندناش حرب وغيري من العرب مفيش بيت يناموا فيه علشان الصواريخ الي دمرت بيتهم معرفش دي انانية ولا ايه بس الحمد لله ع نعمة االامن اللي احنا عايشين فيه لما نضرب من ولاد البلد احسن من لما نضرب من ولاد بلد غيربلدنا

يا ريت محدش يعلقلي ويقولي كنت متغطية كويس لان ده اليوم الوحيد اللي صحيت لقيت نفسب متغطيه ماشي

حجات بتسعدني

يا سلام استعت نشاطي بالرغم من البرد اللي عندي-حد بيجيله برد في الصيف حاجة صعبة- رحت النهاردة لا امبارح- علشان احنا دلوقتي الفجر- الصبح بدري الساعة 10 علشان اجيب الملف جبته وطلعت الطوابع استيكر و48 رغبة لسه مكتبتش حاجة بفكر ف ترتيب الرغبات اللي بعد لااولانية بس برضة بيلعبوا ف دماغي يقولولي خشي حاسبات قلت اعمل استخارة واللي في الخير يقدمه ربنا بس انا عايزة هندسة من زمان يلا مش مشكلتنا دلوقتي المهم نخش ف الموضوع جدو طلب مننا كل واحد يكتب عن الحاجة اللي بتسعده فانا بعد النتيجة يعني دلوقتي هكتب الحجات اللي بتسعدني ممكن تكون حجات بسيطة وهكتب حجات كتيرة ماشي بس الحجات مش بالترتيب

.

1-لما اكون بحل مسائل مكلكعة رياضة وفيزياء

.

2-لما بابا يكون معانا ونخرج معاه

.

3-لما بلعب بلاي ستيشن بس اكسب

.

4-لما اشوف حد بحبه صدفة او اشوف حد بقالي كتير ماشفتهوش

.

5-لما حد بيعبرني بمسج يا قمة السعادة

:)

6-لما يبقى في ماتش جامد والفرقة اللي بشجعها تكسب

.

7-لما نكون عاملين محشي

.

8-لما اروح فيلم مش فاشل

.

9-لما حد يشكر فيا من غير مااعرفه كويس

.

10-لما كنت بجيب الدرجة النهائية في اي امتحان

.

11-لما بنبقى في العيد الكبير واقطع معاهم اللحمة

.

12-يا سلام لو اتنين سندوتش فول من ع عربية معينة مش محل لازم العريبية دي دماغ

بقى برستيجي مايسمحش غير من ع العربية دي ويكون الساعة سته الصبح قبل ما نام بيكون طعمة فراخ مشوية محدش يتريق حقيقة والله

.

13-يا سلام لو الواحد يختم المصحف بجد بفرح جدا بالموضوع ده و حاجة تانية بتبقى جميلة التراويح في رمضان وبالذات لما رجلي توجعني من الوقفة بستمتع جدا بالموضوع ده

.

14- لما نروح عمرة اول وهلة لما تشوف الحرم تحفة تحس انك طاير فوق زي الحمام

حولين الكعبة الكلام ده سواء في مكة او المدينة

.

15-لما اكتب قصة من القصص الفاشلة اللي بكتبها ووريها لاخواتي ويعجبوا بيها لازم

طبعا ما انا اختهم الكبيرة

.

16-لما بلعب مع سوكا اقصد بسملة اخت بوبا الصغيرة وبرضه لما بلعب مع بوبا بس

سوكا اكتر

.

17-لما افهم حد حاجة مش فاهمها

.

18-لما حد يبعتني اعمل حاجة واعملها كويس

.

19-لما ماما او بابا بيدعولي

.

20-لما اكون منهمكة في المذاكرة وبنجز اللي ورايا واللي قدامي :)

.

21- لما اجيب كوتشي عجبني ويا ريت يبقى مريح

.

22-لما اروح دريم بارك مع صحابي زي السنة دي

.

23-في الشتا والجو ساقعة اوي اوي واشرب مج كبييير كاكاو دافي لا سخن وجميل والواحد يدفى يا سلام وبرضه في الشتا في يوم ساقعة اوي واناام بدري تحت البطنية اللحاف بس شرط اكون مخلصة كل المذاكرة اللي عليا علشان استمتع ومفكرش في المذاكرة :)

.

كفاية كده لحسن هنجت وشكل الحرارة طلعت تاني اروح اشوفها سلام

اه انا حطه نقط علشان السطور تتعدل مش بتطلع زي ماانا عايزاها

:(

تساؤلات

تساؤلات نطت في دماغي لما شفت امبارح قناة الجزيرة ومكتوب في الشريط اليوم السابع للقذف ع لبنان- طبعا انا مليش ف اي حاجة من دي- بس الكبار كانوا بيتفرجوا واقعدت اتفرج معاهم ونطت ف دماغي حجات كتيرة اوي

العرب عاملين

بمبدأ من خاف سلم

.ولا بمبدأ رحم الله امرء عرف قدر نفسه

ولا بمبدأ عيش ندل تموت مستور

ولا بمبدا الجبن سيد الاخلاق .

ولا بمبدأ انا واخويا ع ابن عمي وانا وابن عمي ع الغريب

.

ربطت المقولات دي بالوضع الراهن في لبنان ولقيت ان العرب بيعملو بالمبدأ الاول والتالت والرابع طبعا

من خاف سلم والجبن سيد الاخلاق من المبادئ اللي الحكام العرب بيحبوا جدا لانها بتخلصهم من المشاكل سواء ف فلسطين او ف لبنان حاليا

اما عيش ندل تموت مستور ده اهم واحد علشامن لو قرروا يحاربوا مظنش ان في جيش فهيتفضحوا ف هيندلوا مع لبنان ونيتهم صافية انهم بيعملوا الصح

اما المبدا التاني: "رحم الله امرء عرف قدر نفسه" فده ممكن يكون استبن عندهم ع اساس ان امريكا بتساعد اسرائيل

ام اخر مبدأ وهو انا واخويا ع ابن عمي وان وابن عمي ع الغريب مظنش انهم يعرفوا او عارفينه ومطنشين او ممكن بيحسبوا اسرائيل هي اللي بنت عمهم ولبنان الغريب :)

تساؤل اخير : هو في في الدول العربية جيش " انا عارفة ان كان في زمان عندنا جيش هو لسة موجود" حد يجاوبني لو سمحتوا

الحمد لله

من الثانوية للكلية والمجموع قرب ع الماية-مقربش اوي يعني - و

الناجح يرفع ايده ويقول ويقول دايما ناجحين ع طول دايما ونجاحنا يطول دايما دايما ع

طول دايما دايما علطوووووووووووووووووووووووول دايما دايما دايما دايما دايما دايما

مع اني يعني قليت السنة دي كتير بس حاسة وكان حمل انزاح من ع قلبي والحمد لله المستوى الرفيع هو اللي خلى المجموع شكله حلو من غيره كنت اتشحورت طبعا نقصت ف كل مادة 2 درجة ما عادا الاقتصاد والاحصا قفلتها والعربي نقصت 2ونص

طبعا مظلومة ف الانجليزي لاني حلاه كله صح بالترجمة وفي الفيزيا برضه بس الرياضة كويس كده بالنسبة للامتحانات اللي كانت جاية والحمد لله ع قد كده

بس الملحوظ ان المجاميع كلها قلت للعلمي بس واالادبي في ارتفاع ملحوظ والتقارير اللي

اعددتها انا ورضوى تشير الى ذلك

النت كان يحرق الدم ويفور الاعصاب والنتيجة جاتلي من السعودية بابا اتصل وجبهالي فضلت اعيييييييييييييييييييييييييييييييط لحد ما عرفت الدرجات

ابن خالتي جابهالي من سايبر حتينا واقعد يحكيلي ع اللي حصل في السايبر

محمود:

يا بنتي مشفتيش اول ما جت عملوا ايه

انا: عملوا ايه يعني

محمود:طبعا كلهم تماتنمينات وسبعينات وحاجة صعبة اول ما اسمك ظهر ع الشاشة الراجل مسك الكمبيوتر وقال نوران اشرف طب قلتيله طب ايه انت مش شايفها رياضة واقعدوا يقولوا ايه البت الدحيحة دي

انا : كدة ودحيحة يا ربي الحمد لله

بعد كده النت اتكرم عليا وظهرلي النتيجة بعد ما عرفتها من مصادر متعددة

والحاجات اللي لفتت انتباهي ان في واحد قربنا قدي طول عمرنا انا اجيب اعلى منه الترم الاول وهو يكتسحني الترم التاني وحصل بجدارة كان جايب النص الاول 98 والتاني جاب 100 والله فرحتلوه اوي علشان عايز يخش طب وهو كمان ما شاء الله شاطر اوي وطيب وبيعذبني دايما مش مشكلة

مبرررررررررررررررررررررررررررررررررررررررررررررررروك

عليا و ع كل صحباتي

وانا فرحانة وقلبي سعيد ماما جابتلي نونو جديد-ملهاش علاقة بالنجاح بس قولت اكتبها

علشان انا فرحانة" منعا للفهم الخاطئ الاغنية دي كده بمناسبة النجاح "

اوك- :)

انا نجحت

جبت 98.4 بالمستوى رفيع هقولكوا بالتفصيل بكرة

فاضل اقل من 24 ساعة

حقيقة مش خيال نوررررررررران فوقي النتيجة بكرة

يا سلام ما انا عارفة

انتي خايفة

انت بتسألي ده سؤال انتي متعرفيش الامتحانات كانت عاملة ازاي

ما انت حليتي خلاص وخلصت واللي حصل حصل

هو ايه اللي حصل حصل

خلاص النتيجة مكتوبة ومفيش حاجة هتغير اللي مكتوب

شكرا جدا

حاولي تهيئي نفسك انك هتنقصي

انقص ده انا يجيلي ترالالي

مش انت بتقولي الامتحان كان صعب ما انت كنت معايا

انا عارفة انه صعب بس انت حليتي كويس

مين قالك ده تفاؤل انا محلتش حلو وهنقص في الميكانيكا والاقتصاد و الفيزيا والعربي حتى المستوى رفيع كان صعب جدااا

مش صعب قولي رخم والميكانيكا كلها من الكتاب

الاستاتيكا اه لكن الديناميكا لا

بصي لن يصيبنا الا ما كتبه الله لنا

ع رايك امري لله اروح استنى الوزير يكلمني بكره الساعة 11

انت هبلة يا بنتي

اسكتي انت انا عارفة انا بقول ايه

من الاخر ده حوار كل يوم في دماغي اكلم وارد ع نفسي في نفس الوقت وفي الاخر اتريق ع نفسي واقول اروح استنى الوزير من غلبي

انا خااااااااااااااااااايفة جداااااااااااااااااااا وبحاول اهيئ نفسي للصدمة وطبعا بابا واماما يقولولي انت عملتي اللي عليك وربنا هيجزيك ع قد عملك-طبعا انا بسمع دي ودماغي بتضرب-وبعدين يقولولي مش هنزعل اي حاجة تجيبيها هتبقى كويسة- انا عارفة انهم بيقولولي كده بس بس هما هيزعلوا من جوه-بس انا حاسة اني عملت اللي عليا بس الامتحانات صعبة يا ماما ومليش مزاج اعيط علشان بصدع من العياط فده حل مش كويس وكمان السنة اللي فاتت محدش متوقع المجموع واتفاجئوا فالسنة دي كلهم مستنين المجموع القنبلة اللي هتفرقع فيا انا كفاية كدة

نسيت اقول حاجة كنت مع رشا النهاردة كنت مبتئسة برضه وبقولها: بصي لو جبت مجموع معجبنيشهتوقف عن التدوين وممكن ارمي البلوج

هي : وايه العلاقة بين النتيجة والبلوج انت هبلة

انا: لا علشان اعاقب نفسي احرمها من حاجة بحبها

طبعا رشا مقتنعتش بالكلام ده بس والله الموضوع ده بيدور في راسي بس مظنش اعمل كده ممكن اخد اجازة تصالح مع نفس الكلام ده لو لقدر الله جبت مجموع وحش انا خايفة جداااااااااااااااااااااااااااااااااااااا

ع فكرة انا ممكن مخشش علطول بعد النتيجة علشان مش هبقى في البيت بس هتعرفوها ان شاء الله كويسة او مش سواء مني او من رضوى او من رشا او من رضوى عندكم مصادر متعددة :)

صحبتي الانتيخ

انا قلتلكلوا مش هكتب غير ساعة النتيجة بس انا بغزالة بصراحة ده مش موضوعنا المهم صحبتي الانتيخ "رضوى " عملت بلوج بعد عذاب دام كتير :)
اناوهي صحاب من اولى ابتدائي اينعم العلاقة لم توثق غير في ثانوي بس برضه كان يتقال علينا مقربين في ابتدائي واعدادي
انا وهي مش زي بعض في حاجة ممكن نكون بنكمل بعض بس مختلفين كتير بالرغم من اختلافنا بس احنا متفقين دايما والحمد لله وبكده مكنش انا اصغر مدونة لانها اصغر مني بشهر و 10 ايام شوفتوا بقى خلاص راحت عليا و

الحماسة واخداها وكتبت مواضيع حلوة يالا شجعوا الجيل الجديد من المدونين انا ان شاء الله خلي بقية صحباتي يعملوا مدونات برضه عيال عندها افكار حلوة كتير
ع فكرة رضوى كاتبة عليا موضوع جامد عن حبي الشديد للقطط -طبعا بتريق- انا بخاف منهم جدا بس والله القطة اللي حكت عليها دي كانت من غير عنين ولا ديل
وبتنونو من غير صوت ناقصة الحجات دي علشان اخاف انا اصلا بخاف خلقة ربنا كده

ايه السبب اللي ممكن ميخلنيش اكتب

كتبت يجي 6 بوستات وكان مصيرهم الموت مش الموت اوي تقدر تقول التاجيل شكلي

لما اتريقت ع موضوع الصفر بتاع ابراهيم يظهر عفاريت البوست زعلت وحطتني في

دماغها وخلتني معرفش اكتب حاجة

ابراهيم والنبي خليهم يبعدوا عني خلاص والله حرمت

مقدرش افضل كل ده مش بكتب كفاية ايام المدرسة بس ممكن ميكونش سبب العفاريت

ممكن يكون سبب داخلي حالة خوف داخلي مش ظاهر برة خالص علشان اللي يشوفني مش

هيقول واحدة مستنية نتيجتها بصراحة بحب ابان باردة ومش هممني بس

من جوة ببقى خايفة جدا جدا او ممكن ميكنش السبب ده برضه اكيد بسبب تشويش

لذهن اللي بعاني منه من غير معرف سببه متسالونيش ازاي بس هو كده وخلاص

اوممكن يكون بسبب كتر الافكار بس كتر الافكار نابع من تشويش الذهن و ممكن يكون

بسبب انه مفيش رغبة بالكتابة بس ازاي مظنش برضه يكون هو السبب اني مش عارفة

اكتب الموضوع بالصورة المرضية بالنسبة ليا او ممكن يكون ان الورقة والقلم وحشوني

وعايزة اكتب بيهم مش على الكمبيوتر بس برضوا مظنش انه سبب كفاية مش

عارفةاممكن لو بعدت شوية اكتب حلو لا مش فكرة كويسة هي اكيد حالة وهتعدي

يلا محدش واخد منها حاجة افرفش علشان احنا في اجازة ومفيش مشكلة لو خرجت مع

صحابي كل الخروجات بتتفركش هنحاول نبني خروجة كويسة يالا نأسف للازعاج وللدوشة :)

تلات حاجات عايزة اقولها

اول حاجة : مبروووووووووووك يا دكتور ابراهيم ع النجاح والله انا فرحتلك يا دكتور

كاني انا اللي نجحت

تاني حاجة: مبرووووووووووووك لالمانيا عالمركز التالت اينعم مشفتش الماتش علشان كنت بره بس اكيد

كان لو وكويس ان المانيا نالت من الحب جانب

تالت حاجة:محدش عنده واسطه يجيبلي النتيجة علشان اتخنقت "انا بهزر"

بيقولوا النتيجة هتطلع يوم السبت في المدرسة والجمعة بليل ع النت :)

تحديث:

ايطاليا خدت كاس العالم الماتش كان جامد خصوصا الشوط التاني بس الفرنسيين صعبوا عليا والله كانوا بيلعبوا حلو بس زيدان اتطرد ممكن يكون ده سبب تضيع ضربة جزاء لا لا ملوش علاقة بالموضوع :)

النتيجة معرفش هتطلع امتى بالظبط اظن ان الاشاعات انها هتطلع السبت بس الاكيد انها هتطلع الاسبوع الجاي ان شاء الله

شحنة تفريغ واعادة شحن

ماما قرأت اللي كاتباه وقالتلي ايه يا نوران لغتك بايظةعلشان الكلام بالعامية زيادة عن اللزوم وبالذات كلمة "اقعت" وكلمة"خت" مع اني شايفاهم عادي- شكلهم كده مش عادي-و
المهم انا قولت اكتب باللغة العربية يعني قولت هاجرب وارجو ان العواقب منكنش وخيمة:)
الكلام ده كده كتبته الساعة سته الصبح من باب التفريغ واعادة الشحن علشان دماغي تشتغل كويس

جلست في شرفة غرفتي اتطلع للسماء لعلها تأتيني بفكرة من تأملي لها .......شكوت لها حالي فقد جف نهر ابداعي وتصحرت جنات افكاري لم اعد استطيع الاستمرار في حياتي بدون ابداع وبدون افكار........شكوت لها همي وسكت وظللت اتأمل حتى لمعت نجمة في السماء ومع لمعان نجمة السماء لمعت فكرة في عقلي ثم نظرت للسماء وشكرتها لانها

اعادت مجرى المياه لنهر ابداعي فروت جنات افكاري شكرا ايتها السماء

ايه رايكم في اسلوبي

تعالي العبي يا نورانا

من اسبوعين كده لما كنت معكوكة في الامتحانات كان يوم الخميس اللي قبل امتحان الفيزيا كنت عند جدتي هنام عندهم علشان كان درس الفيزيا بتاع المراجعة جنب بيت جدتي المهم كنت قاعدة اذاكر في بيتنا بعد كده رحتلهم ع الساعة 10

وشوية كده

جه ابن خالي "يحيى" المشهور ب"بوبا" -شددوا البيه التانية وضموا الاولانية- يعني عنده اربع سنين الا شوية ايام يقولي:
تعالي العبي معايا يا نوران كنت قاعده احل مسائل مكلكعة
انا:لا يا بوبا اناعندي مذاكرة وامتحانات لما اخد الاجازة هاجي العب معا
هو: انا هعلمك تلعبي ازاي لعبة بينك بانتر
انا: ايه دي يا بوبا
هو: لما تخلصي مذاكرة
انا: طيب -وبقول في نفسي مبقاش الا يحيى يعلمني العب لعبة معرفش ايه-يا سلام

الحمد لله خت الاجازة واول يوم خميس في الاجازة اقعدة فري ومفرفشة بالرغم من عك الميكانيكا يالله بلاش السيرة دي

يجي ويقولي

ختي الاجازة يا نوران
انا: ايوة يا بوبا
هو: طب تعالي العبي
انا: طيب انا جاية
المهم راح ع الكمبيوتر قولت اكيد لعبة جيمز ع الكمبيوتر قولت اكيد هيخليني افتحه او ينادي حد في البيت يفتحهولوا ويجيب اللعبة
ايه يا بوبا هتبوظة
هو: استني يا نورانا- لازم نورانا دي معرفش ليه بس ارحم من بت اللي كان بيقولهالي وهو صغير-شفتوا
فتح الكمبيوتر واختار اليوسر بتاعه واستنى شوية لحد ما الجهاز فتح قولت في نفسي اكيد داس ع الزرار كدة زي ما كلنا بنعمل شوية ولقيته فتح my computer وبعد كده اختار درايف معين بعد كده فتح فولدر وجواه فتح فولدر

لحد ما قالي: خلاص انا لقيت اللعب اه بينك بانتر

ايه اللعبة دي يا بوبا
هو: انا هعلمهالك
فتحها واختار لود جيم ومخترش نيو جيم
انا :لا يا بوبا اختار اللي فوقيها
هو: لا دي علشان تيجي مرحلة السفينة علطول
انا: طيب
المهم راح واختار المرحلة اللي عايزها وبدأ يشرحلي اللعبة
هو: بصي يا نورانا احنا لازم ناخد الموزللقرد علشان يخلينا نعدي
انا: طيب يا بوبا وبعدين
هو: لازم ناخددهب كتير والقلب علشان يعيش
انا: بس في نفسي وربنا ولا فاهمة حاجة
هو- وكانة حس-: انا هوريكي
المهم جت اللعبة اكتشفت انه النمر الوردي pink panther
وهو قعد يوريني ده بينط وده بيضرب وده بيطير وده بياخد الموزة
-انا طيب يا بوبا هات انا العب -اه ما انا عيله لازم العب
-المهم اقعت العب وفي حتة مش عارفة اعديها- يا دي الكسوف شكلي وحش اوي
هو : هاتي يا نورانا اه اه جاتلي فكرة
ياخد الكي بورد بدالي ويعمل حجات غريبة ويعديها
انا :برافو يا بوبا
هو :هاتي العب شوية
انا -اتكسفت منه وخلاص-: خليته يلعب وخلاص ماشية
هو: نورانا تعالي اتفرجي عليا وانا بلعب اقعدي جمبي مش جنبي في لعب تانيه
انا -وكاني مستنياها-: طيب عندك لعبة الفراخ
هو: لا كانت عندي ومسحتها علشان مش بحبها
انا: نعم مسحتها
رحت مشيت ووانسحبت من وراه وبقول في نفسي راحت عليكي يا نورانا مفيش غير البوبا يعلمك
صحيح اصغر منك بيوم يعرف عنك ب100سنة وهو اصغر مني ب13 سنة يا ده يعرف عني بكتيييير اوي

سوري ان البوست طويل بس حبيت اوريكي جيل اليومين دول مع العلم انه حتى مدخلش حضانة ولا مدارس لسه

نفسي اعمل التاج ده

من زمان رضوى بعتتهولي وكان نفسي اعمله بس مكنش في وقت ولقيت ابراهيم بيقول اول اربعة يعلقوا رحت قلت اهو تغير يمكن افك شويا

افتح أقرب كتاب إليك، على الصّفحة 18، السّطر4

تحليل القوة اي مركبتين"كتاب الميكانيكا حسبي الله ونعم الوكيل"

مط ذراعيك قدر ما تستطيع

مقدرش لحسن هنام

ما اخر ما شاهدته ع التلفزيون؟

مسلسل مدبلج ع mbc

بدون ان تسترق النظر كم الساعة؟

اتنين ونص

وكم الساعة فعلا؟

تلاتة الا ربع

باستثناء صوت الكومبيوتر ماذا تسمع الان؟

الكمبيوتر ملوش صوت والصوت التاني بتاع التلفزيون اللي ماما بتتفرج عليه

م

تى خرجت من المنزل اخر مرة؟ماذا كنت تفعل؟

الصبح رحت الامتحان

قبل مباشرتك لهذه الاسئلةاي موقع تتصفح؟

عندما تحدث ابراهيم

ماذا ترتدي؟

بنطلون جينز وبلوزة

هل حلمت امس؟

حلمت ان الامتحان فاتني بمعنى اصح كوبست

متى اخر مرة ضحكت؟

الصبح قبل الامتحان مكنت مهلوسة ومهبلة وبعد الامتحان اتصدمت

ماذا فوق الجدران؟

الساعة

هل لاحظت شيئا مؤخرا؟

ان الوقت بيجري بسرعة وانا في الامتحان

م

ما رايك في هذا الاختبار؟

اسهل من امتحانات الثانوية بتاعة السنة دي

ما اخر فيلم شاهدته؟

فيلم كامل: ظرف طارق في العيد

حتة من فيلم: امبارح فيلم السلم والتعبان

اذا اصبحت فاحش الشراء ماذا تشتري؟

الحمد لله مش محتاجة حاجة وفي حاجات مينفعش تشتريها بالفلوس

اخبرني شيئا اجهله عنك؟

اوقات ببقى رغاية واوقات ببقى فيلم صامت

ان كان بامكانك تغير شيئا واحد في العالم بغض النظر عن السياسة؟

هرمي كل قنوات الفيديو كليب لا هلغيها من الكون

جورج بوش؟

رئيس امريكا

لو كان وليدك الاول فتاة ماذا تسميها؟

رقية

ولو كان صبيا؟

عمر

قد تفكر يوما في العيش في الخارج؟

ممكن

ماذا تتصور ان يقول الله عندما تقفي بين يد الله؟

يا رب يقولي"اذهبي فادخلي جنتي"1

اربعة اشخاص تمرر لهم الدور؟

اي حد لسة معملوش

هو انا مين

هو انا مين ؟؟
اسمي ايه؟؟
في سنة كام؟؟
عندي كام سنة؟؟
انا مش فاكرة حاجة خاااااااااااااااالص انا فقدت الذاكرة:(

رحت عند الدكتور سألني الاسئلة اللي فاتت دي معرفتش اجاوب حاجة خالص:(
نزلت لقيت واحدة مستنياني بسألها انت مين؟؟ قالتلي انا ماما
ماما ماما مين يا ماما الحقيني انا مين
هدتني وشربتني ماية وديتني بيتنا -انا معرفوش- بعدين شفت اخواتي

هو انا عندي اخوات؟؟
معرفش دخلت مكان المفترض انه غرفتي

اه افتكرت انا شفت المنظر ده قبل كده منظر الكتب والمكتب

بس لسة معرفش انا مين وهما مين بس عرفت اني في ثانوية عامة الحمد لله عرفت حاجة عن نفسي انا في ثانوية عامة

ثواني ايه هيا الثانوية العامة؟؟
اه افتكرت دي حاجة غريبة الحمد لله انا فاكرة المنهج بس هروح اكتب ايه في الورقة اكتب اسم مين

قعدت افكر كتير بعدين دخلت نمت قلت ممكن افتكر حاجة............. بس

صحيت من النوم الحمد لله افتكرت اني امتحنت حجات كتيرة انا امتحنت الفيزيا اه يا سلام هم وانزاح الحمد لله بدأت افتكر اه بفتكر الحمد لله


الدليل اني افتكرت اني دخلت ع البلوج وكتبت الباسورد واليوسر نيم الحمد لله :)

شوفتوا انا اتهبلت:)

ادعولي

بكرة امتحاني يا مامي انا خايفة ادعولي الساعة 9 بالظبط عندي امتحان عربي ودين انا كان نفسي اخش اكتب بوست يوم عيد ميلادي بس مقدرتش والحمد لله رشا قامت بالواجب شكرا يا روشا ع البوست الحلو اللي انت كاتباه في حقي ده والصورة الشياكة اللي انت حاطها واحنا في العربية دي المهم ادعولي يا رب الامتحانات تيجي سهلة يا رب ماشي وان شاء الله كلها 18 يوم واخلص وومتنسوش يوم 17 و 18 ستة تكثفوا الدعوات علشان عندي فيزياء:( يالا ربنا معايا اقوم علشان اروح انام ولما اخد الاجازة هكتبلكوا عن الهلاوس اللي بعاني منها اليومين دول

ربنا يستر

انا معرفتش موضوع دهب ده الا بالصدفة بابا كلمني يوم الاتنين وقالي

بابا: شفت الانفجارات اللي حصلت في دهب

انا: لأ ده فين عندكوا في الرياض ولا ايه

بابا: لا يا بنتي ده عندكوا انتوا

انا: في جزيرة الدهب؟؟؟

بابا: لا مش في جزيرة الدهب في دهب جنب شرم الشيخ

انا: ياااا ولا كنت اعرف ربنا يستر والانفجارات متجلناش الهرم وتفجره

بابا: بلاش هزار

انا: طيب وحضرتك عامل ايه

الى بقية المكالمة............. بأختصار معرفتش الموضوع الا بالصدفة زي الموضوع اللي قبله بتاع الكنائس وزي موضوع العبارة وزي موضوع بني مزار وما خفي كان اعظم

ومعرفش نسبوا الموضوع لمختلين عقليا زي اللي قابليهم ولا لجماعة ارهابية متطرفة ولا لابن لادن ولا لأنبوبة بوتجاز فرقعت وعملت اللي عملتوا طبعا كلها حجج واعذار اتعودنا عليها عند صدور اي مصيبة يا عيني وكل حاجة بيحطوها ع شماعة مختل عقليا طب بدل ما تسرحوهم في الشوارع لموهم وحطوهم في مستشفى ولو مفيش اماكن في العباسية ابنوا مستشفيات جديدة على الاقل هتشغلوا دكاترة ومهندسين وعمال ومحاسبين ومليون حد علشان المختلين كتروا في البلد دي ولا ايه رأيكم؟؟

ولما تشغلوا الناس دي البطالة هتقل وممكن يكون البطالة هو السبب في موضوع دهب ده هتقولوا ازاي؟؟ هقول ان ممكن شباب فاضيين خلصوا كليات ومش لاقين شغل اشتركوا في منظمة ارهابية وقالوا هيوروا الحكومة اللي مش موفرةالهم شغل -انا بتريق ان مكنش بجد- الله اعلم الحقيقة فين.

يعني في مليون مصيبة في البلد وهما مش بيجيبوا غير الانفجارات والمدابح بتاعة الارهابيين والمختلين عقليا وامش هنجيب الغلط ع مصر ولا ع الدولة اصل الدولة -زي ما خت في الاقتصاد- ما هي الا مجموعة افراد انتخبوا من قبل الشعب ليديرهم طبعا وده مش حقيقي ده مجموعة من العصابات اللي الشعب ميقدرش يفتح بقه ويكلمهم

والحاجة المؤكدة ان الواحد مش بيحس بالنعمة الي في ايده غير لما تضيع منه زي الصحة والحواس الخمسة يعني لو مصر ضاعت او جت امريكا وخدتها كلنا هنقف ضدها لكن طول ما العصابة مسكاها مش هنعمل حاجة وهنتفرج ده طبيعي جدا ع البشريين ولا انا غلطانة يعني تسمعوا في فلسطين او العراق عن مذبحة بشرية او عن عبارة غرقت او عن حاجة ذي ديه بأختصار هما مش فاضيين علشان وراهم حاجة كبيرة اسمها انهم عايزين يحرروا وطنهم لكن احنا وطنا متحرر بس متخلف ومورناش حاجة نعملها زي ان احنا نعمل ع تقدمه لكن ورانا ان احنا نخربه اكتر

ودي وجهة نظري المتشائمة جدااااااااااااااا

مش مكفيهم الثانوية العامة علينا جايبين انفجارات كمان

وربنا يستر ع البلد دي

درس خصوصي

اانا بكتب البوست ده علشان بيقولوا البوست رحته طلعت اصلا ملوش ريحة بس مش مشكلة معرفش وكمان بييقولوا الcall tone

قدمت رحت حطيت خالد عجاج ع قد حالي احسن يستهلوا يسمعوها

اما بخصوص درس خصوصي فهو مش درس الفيزيا ولا العربي ولا الرياضة ولا الانجليزي ولا الاحصاء ولا الاقتصاد ايه ده كل دي دروس يا ده انا ليه الجنة لا ده درس يعيني محسوب ع اللي بيدهولي مين يا ترى المدرس ده؟؟؟؟

رشاااااااااااااااا شوفتوا اشتغلت قبل ما تتخرج بتديلي عمارة قدرات قالولي خدي علشان اسوا الظروف متخشيش تجارة افكار بقة المهم رشا مدرسة كويسة يا عيني بتعذبني لا اقصد انا بعذبها مش بعمل اللي بتقول عليه بتقولي بص يا نوران فيه تلات خطوط خط افقي ورأسي وخط لنقطة الهروب ماشي الكلام اجي ارسم حاجة معملهاش سمك تقولي ايه ده ورقة مش بعرف اعمل سمك خالص انا هطلع فاشلة ولا ايه يا رب مخشش ولا عمارة ولا مدني الحاجات هتقع المهم الحمد لله الدرس الاول عدى وخت واجب طلع غلط الدرس التاني عدى وخت واجب الحمد لله عملتوا صح بس الكوبري اللي عملتوا هيقع علشان سمكه صغير لو اتبنى وموقعش هاسمي كوبري 6 يونيو لو وقع الله يرحم الناس اللي كانوا عليه وعملت حمام سباحة رائع وغرفة نوم رهيبة عينك ما تشوف الا النور جينا الدرس التالت يوم الجمعة اللي فاتت اول امبارح بنينا مستشفى رشا سمتها مستشفى الشفا وانا هعمل واحدة اسميها مستشفى نوران وعملنا حمام سباحة بمدرجات هسميه نادي نوران برضه مفيش مشكلة يا رب اجيب لائق في الامتحان الغريب ده

المهم انا هخلص بقى علشان ورايا نص مصرع كليوباترا بتاع احمد شوقي يا عيني عليا

جدول الامتحانات نزل وحش اوي هأبدأ 10\6 وهخلص28\6 وكله ورا بعضوا يا الله هانت شهر 4 خلص خلاص عقبال شهر 5 و 6 و7 علشان التنسيق يجي والزق طوابع من وانا صغيرة نفسي الزقها ياللا ربنا معايا

تخييل

تخييل بعد عشر سنين يعني في 2016 تفتح البلوج وتشوف الارشيف وتشوف اول حاجة كتبتها اظن اني هستمتع اوي بس يا ترى هعمل بلوجات تانية واتخلى عن شمعة ولا اصلا هرمي شمعة بس انا اامل اني اخلية وان محدش يرمي بلوجه ولا يتخلى عنه يممكن يزودهم بس يبقى ع القديم ويسيبه حتى لو مجرد ذكرى

وهقولكم انا متخيلة الموضوع ازاي يعني مثلا

رضوى بنت عمي هتعمل بلوج جديد هتسميه ام العيال واول حاجة هتحطها صور السبوع و هتحكلنا عن مغامرتها مع

اولادها وانا اقصد مغامرات بمعنى الكلمة وهيبقة هكذا انا للماضي لا هتكتب في قليل او هتسيبوا ذكرى علشان ام العيال هيبقى ليه مواضيع اكتر او ممكن تعمل لكل واحد من ولادها بلوج باسمه من اول يوم وهتكتب فيه عنهم لحد ماتسلمه ليه لما يبقى عنده 6 سنين اشمعنى هو ده اللي جه ع بالي اما

عمرو ممكن ما يكتبش عن كل مظاهرات واعتصامات هيكتب عن تجربته كأب عليه مليون حاجة منها انه يجيب الولاد

د من المدرسة وممكن يتعارض وقت ندوة او مظاهرة مع وقت خروج الاولاد معرفش هل ممكن يسيب اولاده في الشارع ويروح المظاهرة ولا يخلي رضوى تجيبهم مع العلم انها كانت جابتهم امبارح يعني مش دورها اسيبه يرد هو عليا والايام هتورينا

اما رشا هتخلص وتبقى خالي شغل او ممكن حد يشغلها لا هتقعد في البيت مورهاش حاجة علشان مفيش شغل خالي او

ممكن تعمل مشروع هيا وزمايلها ممكن تتخطب وتحط صورالخطوبة ع البلوج او ممكن متتخطبش نظرا لعدم وجود عرسان هده مش لانها وحشة ده علشان الايام هتبقى صعبة ومحدش هيتجوز ولا يشتغل ممكن نطبق ساعتها فكرة اليوجينيا هيا هترد عليا برضة والايام هتورينا هيبقى عندها 29 سنة ولسه ولا اشتغلت ولا اتجوزت اقصدي ولا اتخطبت

وعمو اسامة هيبقى جد وهيكتب في بلوجه شعر ع تجربة الجد وهيكتب قصايد ع احفاده ولاد رضوى

اما انا فممكن اخلص مظنش ان شمعة تفضل منورة كل ده لا ممكن انا طويلة فيا رب ماخلص وان شاء الله اكون خلصت والكليه اكيد ع 26 سنة اكون خلصت هشتغل بواسطة مع العلم اني هخلص بعد رشا بس انا هشتغل وهيا لا هو كده بقى وهتخطب وهيا لا برضة لاني هاعمل اعلان يوجد عروسة لو متختبطش لحد سن 22 سنة شوفتوا الندالة بتاعتي هاسيب بنت عمي مش بتشتغل و متتخطبش ولا تتجوز

والله انا كتبت عن عيلتي ولو في وقت كنت هخش ع كل البلوجات وقاريته من اول واعرف كل واحد واكتب عنه بس انا ورايا حجات كتير

الكلام اللي كتبه هزارمتزعليش يا رشا يا رضوى قولي لعمرويخش ويقولي هيعمل ايه ماشي وان شاء الله الحاجة بعد 10 سنين تتحسن بس برضه كان في كلام حقيقي منه

وكل واحد يا ريت يكتبلي يتصور نفسة مع البلوجات عامل ازاي وفي حياته وياااااااااااااااااااااا رب يحقق كل اللي يتمناه وانا هخش اخد بصه ع التعليقات واخرج من غير ما اكتب حاجة

اسيبكوا ومتنسونيش وادعولي ربنا

شمعة

تفااااااريح

انا دخلت تفرايح سبحان الله الدي اس ال الجديد بدل القديم دخل النهاردة وقلت اجرب وخت الاذن من بابا ع النت والحمد لله

لولولولولوللولوللولوللولولولي اخيرا دخلت ع البلوج بعد 25 يوم شوفتوا انا اتهبلت خلاص يا رب متكنوش نستوني وتكونوا بتدعولي علشان انا خلاص دماغي ضربت وشعري شاط انا في حالة مذرية ربنا معايا ومع الجميع يلا الايام دي متتعوضش ابدا والاكل والشرب والنوم طول ماانا قاعدة انام واكل واشرب سبحان الله يا رب انجح السنة دي يا نهاري انا مكنتش اعرف اني اتهبلت اوي كده ان شاء الله هنجح هاكتب بوست عدل بعد ده بس هنشرده برده

شمعة

مبحبش كدة

مبحبش حد يفهمني غلط والمشكلة ان كل الناس بتفهمي غلط يبقى اكيد العيب من عندي انا اللي مش بعرف اوصل المعلومة كويس ولا ايه لما اقول حاجة بتتاخد ع محمل سيئ وانا مش قصدي كدة يعني في البوست اللي فات اظن ان كل اللي قراه فهمني غلط او مكملوش للاخر والله العظيم انااااااا بحب مصر . مصر هي امي زي النشيد انا كنت بقول رغم كل اللي فيها فهي بلد الخير وحبها فطرة وانتوا فهمتوا اني مش بحبها الكلام ده وانا طفلة عبيطة بحب المكان اللي بابا بيبقى فيه ولحد دلوقتي برضة بحب السعودية بس مصر بلدي وانا مش بكسف اني مصرية ده ليا الشرف وبحب اغنية نانسي عجرم بتاعة لو سألتك انت مصري وبالذات ساعة الامم الافريقية بس انا مضايقة من الي بيحصل فيها والمصريين اجدع نااااس ع مر العصور والنبي (عليه الصلاة والسلام) قال ان المصريين خير اجناد الارض وانا بقول تاني المصريين اجدع ناس كفاية انك تبقى حاسس بالالفة بينهم شعب جدع يعني في الافراح يسدوا وفي الخناقات يفضوا وفي المحن يأذروا كدة يعني ولو حصل موقف بايخ هتلاقي ناس كويسين برضة البلد لسه بخير وانا اسفة لو كان كلامي مش مفهوم

حاجة اخيرة هتتحرموا من نوري الشهور اللي جاية علشان احنا في شهر 3 والامتحانات قربت وكل ما بتقرب بطني بتوجعني علشان مش مذاكرة كويس فلازم الم المواد وانتوا ادرى بالموضوع ده قبلي و ادعولي ربنا يرزقني الفهم واحقق هدفي ماشي الكلام

إلا اني ممكن اكافء نفسي لو ذاكرت كويس واخش كل 3 اسابيع مرة يالله ربنا معايا ومع الجميع

سلااااااااام

شمعة

معرفش

معرفش بحبها ولا لأ طبعا هتقولوا ايه هيا هقولكوا مصر انا زمان كنت بقول انا اصلا مش مصرية اصل مفيش حاجة ادتهالنا علشان ابقى مصرية مش هقول كلام الانشا شربت من نيلها وقلت اغنيلها زي نانسي عجرم

مهم لوثوا النيل سواء بالاشاعات بتاعة انفلونزا الطيور اللي طلعت او بورد النيل مش اسمه كده برضة انا وانا صغيرة في السعودية كان في ماتش بين مصر والسعودية وبما ان روح الانتماء عندنا مش بتظهر غير في المتشات الا اني كنت بشجع السعودية وبابا وعمي كان هاين عليهم يضربوني اينعم مكنتش لسه عديت 5 سنين بس برضة وقعدت اعيط علشان مصر كسبت ولسه فاكرة الموضوع ده لحد دلوقتي طبعا هاقول كنت صغيرةبس الحمد لله بقيت اشجع مصر

لكن لحد ما كان عندي 12 سنة وانا مش بحب مصر يمكن علشان مكانش ليا صحاب واصحابي هناك اسئلوا رشا ورضوى كنت بعمل ايهكنت طفلة عدوانية جدااااا بس اخر مرة سافرنا فيها كنت عايزة ارجع مصر بس مش عشان بلدي علشان اهلي واقعد اقول لبابا احنا نجبهم هنا ومنروحش مصر تاني بس كانت وحشاني بس اول ما خرجنا من بابا المطار اعوذ بالله قولت يا ريتني ماجيت

بس بصراحة بلد الخير يعني بلد غيرها لو فضلت تتسرق طول عمرها كده الا فترات قليله كانت اتمسحت من ع الخريطة لكن مصر جنة الله في الارض ع راي نص كان عندنا السنة اللي فاتت مش فاكرة اسمه

ومش عارفة محدش عنده انتماء ليهده حتى تحيه العلم مش بنحييه اصلا اخر مرة حييت العلم كنت في رابعة ابتدائي دلوقتي ساعة تحية العلم بنكون بناكل بنرغي عادي خالص

الحكومة اللي مخلتناش نفرح حتى بالمنتخب ونكدت علينا بوضوع الفراخ اللي هو اصلا متألف بابا كان لسه قاعد يقولي قبل ما يسافر انت مسمعتيش عن حاجة بتتقال ده الفراخ جالها فرة قالي هيا دي انفلونزا الطيور هما عملين عليه هوليله كبيرة زي جنون البقر والبطيخ المسمم وبعد كده هيقولولنا السمك احول

او ممكن علشان الحكومة مبتعملش اي حاجة غير السرقة لما بذاكر اقتصاد بقول دي الدولة حلوة اوي لكن لما اخلص بشوف الحقيقة المرة لا ولا حكومتنا المصون معملتش اي حاجة في موضوع الدنمارك ده ماشاء الله كتر من التنفيض لازم نكبر علشان نعيش-قولوا الله اكبر-

بس اعمل ايه بلدي حبها فطرة زي حب الام

ارحمني يا ربي نكدددددددددددددددددد حاجة صعبه

شكلي هتمسك امن دوله يالا مرة من نفسي افضفض

كده

بعيد عنكوا الكمبيوتر بااظ وستبط الويندوز تاني علشان بابا وماما بيتكلموا ع النت فاضطريت اعمله المهم انا دلوقتي بستب الماسينجير وعندي مذاااكرة كتير المفروض اذاكر ادب وفيزيا ورياضة قلت اخش ع البلوج اشوفه وما شاء الله الواحد عايز يكتب ع حاجات كتيرة بس بابا قالي ذاكري قلت احترم نفسي واذاكر عايزة اكتب ع انفلونزا الطيور ما شاء الله لا والحاجة اللي غايظاني فعلا موضوع الدنمارك انا عارفه بقالي كتير عارفه ومعملتش حاجة ده حتى شعبان عبد الرحيم عمل اغنية لسه شايفاها يوم الخميس بليل ع مزيكا زوووم ياادي الاحراج الواحد ميعملش حاجة للرسول ولله بس احنا مقطعين يعني عملنا حاجة

دخلت ع رشا بنت عمي اخت رضوى وعلقتلها تلات تعليقات ورا بعض علشان الكلام كان بيقع مني علشان متزعلش وقلت اكتب بسرعة واسيب الماسنجير يتستب واخش اذاكر يلا سلاااااااااااااااااااااااام

لا اقولكوا حاجة اقعدت انشر البوست ومكانش راضي قولت يا دي النحس اتاري النت قطع شفتوا التوهان

ادعولي بقى

هابي فالانتينو

امبارح كان يوم الحب او الفالانتين داي وتشاء الظروف بان تكون الاحوال الجوية في غاية الروعة هطول امطار تغير لون الجو واخيرا البرد الشديد سبحان الله اظن ان محدش خد هدايا امبارح واحنا جايين من المدرسة النهاردة شفنا ولد بيدي بنت هديتها كل واحد ماشي بهديا وانا واصحابي نتفرج ونضحك لا ونتخيل واحدة لسه خارجة من الكوافير والمطرة نطرت او نازلة من العربية وديل الفستان ينزل في المايه او تيجي عربية تطرطش علية لو كان قصير ممكن تقوله ده حقد بشري بس كنا فرحانين فيهم جدا وقعدنا نقول لبعضينا هابي فالنتين ونسال بعض اجيبلك ايه هديه بس ياريت تكون رمزية علشان مفلسه انا كل سنه بجيب لرضوى ميدالية مرة ع شكل شوزة ومرة ع شكل شبشب بس السنة دي عايزاني احولها رصيد شفتوا وربنا ناس فاضية ولا كأننا ثانوية عامة وفي الاخر هابي فالنتين تو جميع الناس

ملحوظة مش بعرف اكتب انجلش بسرعة علشان كده كتبه للعربي علشان اختصر الوقتا

مأساة طالب

مأساة من اول الصحيان بدري مش قادرة اقوم من النوم بس اعصر ع نفسي جردل لمون واصحى علشاان ايام الغياب المهم البس وانا نايمة وانام شوية وانا بصلي المهم انزل اقابل رضوي -صديقة الطفولة- ونروح سوا المدرسة نقف نرغي في الطابور ونطلع كل واحد يروح ع فصله ونفضل في الفصل نرغي وننام ونفهم بس في حصة الرياضة والعربي ونادرا في الفيزياء المهم ننزل الفسحة نشرب بيبسي ونفضل جنب الجرس لحد مايضرب نطلع وبعد كدة ننزل تاني علشان نروح وهنا الماساة الحقيقية قدام مسرح البالون نستنى لحد مايجي الفرج ويجي ميكروباص جيزة بعد كده في ميدان الجيزة اسئل الميكوباص فيصل يقولي لأ اقول هرم يقول لا اقوله مساكن يقول لا اسئلة رايح فين المريييييييييييييخ ولا في داااااهية يمش ويسبني وطبعا ليلة بيضة لو الظابط واقف يبقى مش هنروح في يومنا ده المهم يكون ميكروباص يعطف علينا ويركبنا بس بعد عناااء لا ولما نركب تيجي ماساة تانية لو حد اقعد ع حجرك مهما كان حجمك اوحجمه كل يوم بتفعساو لو اعدت جنب الباب طول الطريق ادعي اني مقعش

ده يوم من ايام طلبة مدرسة الاورمان اللي في العجوزة شفتوا ماساااة طالب

امتى ربنا يتوب علينا

سحابة سودا

السحابة دي مش بتاعة القش اللي بيتحرق دي سحابة دماغي اللي بتيجي كل شوية ممكن تقول نوع من الهسهس بلاش تخاريف كل مرة اكون محضرة هكتب ايه يعني اكون كاتبة في الاجندة المره دي بكتب من دماغي يعني التخاريف هتبقى للركب

انا السنه دي مش في حالتي الطبيعية انا اتجننت ولا ايه اتغيرت كتييييييييييييير بس اظن للاسوا انا عارفة ان الاعتراف بالحق فضيلة لكن لما اعترف بعيوبي حاجة كويسة بس المشكلة الكبيرة اغيرها ازاي

كل يوم من التخاريف دي في دماغي تحس انها نظرة تشاؤم اينعم ان التشاؤم حرام لكن مش بايدي لا والظاهرة الكبر اني مبقتش اطيق المذاكرة ولا المدرسة وعندي احباطااااااااااااااااات كتير بابا بيقولي ياريت تفضلي شمعة منورة وبلاش تطفي يا نوررررر

تقلباااات مزاجية كتيرة ابقى فرحانة سعات وابقى كئيبة سعات لا والموضوع ده يفرق بثانية تخيلوا المأساة اللي انا عايشاها

انا مش عارفة ايه اللي حصلي انا اتجننت ولا ايه كفاية علشان لو زودت هعك انا عارفة ان الكلام مش متناسق بس اعذروني

الحمد لله
من بداية البطولة وانا كنت هكتب ربنا يسترمن الفضيحة بس حصلت ظروف منعتني اولها التليفون باظ ولما اتصلح الadsl باظ وراح التليفون باظ تاني وبعد كدة زي ما انتوا عارفين جدي توفى المهم في الاخر مكتبتش حاجة
المهم امبارح قعدت اذاكر فيزياء قبل الماتش عشان اتفرج عيه كله المهم طول120 دقيقة تظن مصر كلها كانت هيجليه سكتة قلبية وحاطط ايده ع قلبه بس بصراحة المنتخب عمل اللي عليه وعصام الحضري امبارح كان نجم المباراة وسد اتنين ضربة جزاء المهم بعد الماتش كنا هنموت من الفرحة والشوارع كانت هاااااايصة والبنات عملوا عمايل والنهاردة في المدرسة كانوا جايبين اعلام وقعدوايغنوا ويهيصوا بصراحة الشعب عايز يفرح باي حاجة المدرسة كان الحديث الاول ليها الماتش لا وطبعا يدخلوا كلام البنات في النص زي شفتي عصام الحضري كان زي العسل لا ولا صحبتي رضوى تقولي عماد متعب زي القمر وهو حالق دقنه لأ دول واخدين بالهم حتى من الدقن والسوالف شفتوا دقة الملاحظة
بس الحمدلله ربنا ستر ومتفضحناش اصل 70مليون واحد كان بيدعلهم اكيد دعوة رشقت وربنا استجاب يا رب دمها نعمة والحمدلله